Lucas 24
24
Ca e' mami' ca Jeju
Mateus 28.1-10; Marcos 16.1-8; João 20.1-9
1Domingo pin iri na ne, pain iri' xo' xec ma', maji pain manain pacun ca an corom pe xine curucun Jeju pane ac cacama na oro narima'. Cut mama' ac cacamain na oro waraqui pana ca hu xain tamana ca wara ara xo' cacama ma'. 2Hwet iri nanain ne, querec ac cacamain na ca wara joc panajao' pin xine pacun ca tao' pa' nain ma'. 3Corom mama' ac cacama na. Wara om pin na curucun Taramaxicon nexi' Jeju. 4Cain' cain' xira ne ac xequequem na. I'ina na ximicacam. Ane ane coco' to ho' ac cacam na wari' ma'. Ma' 2 nana. Toc meremem tamana na womicocon, ac ca joc xec mip ca xina na cocon. 5Jin' tamana ac cacama na. Pe torotop to nana, noro quiji' mama' nanain macan' ma' quem. Tomi' ac cacam na wari' ma': Para pirao' pe hun pain manain pacun co e' mami' quem? Xi pe xica' pe ara cain i ca' wari' co mi' pin ta. Om ca pe cain i ca' wari' co e'. 6Om pin nain i ca'! E' mami' na ta! Mam' pe wet jein ca tomi' cuhu' pane, pain ca pe ho' pe ho' wet cuhu' pain Galileia pane. 7Tomi' ca' nuhu' pane: Iri' Wari' paxi' ina, ane ma' caca wari' co noc nanapa' ne. Na e' na pain ca an mi' cacapa' cocon oro caracat. Na e' na pain ca tatatain mi' cacapa' pain pana quem. Ma' 3 pin iri tara xec nein ca mi' pin ne ne, na ac ne tara pain ca e' mami' ta' quem. Ac i ma' na ca tomi' cuhu' pane na ca tomi' cacam ma'. 8Mam' pe wet ac cacamain na ca tomi' nucun Jeju pane.
9In ca' iri nanain manain pacun ne, in hwet ac cocon na co taxipa' ca Jeju ma', co ma' 11 nana ma', tomi' hwet tomi' hwet pi' pin ac cocon na pain oro ca querec cacama pain oro ca taraju cacama ma' quem. Tomi' hwet tomi' hwet pi' pin nonon pain oro xucucun wari' co howa nonon Jeju ma' quem. 10Mo nana oro narima' co tomi' hwet nonon pain oro apóstolo ma': Ma' na Maria Madalena. Ma' na Joana. Ma' na Maria jicon Tiago. Ma' nana oro xequequem co ja' ja' nanam ma' quem. 11Ane om howa tacacama ne. Ac ca tamanain cacama na ta nana pain ca taraju cacain ca tomi' nequequem. 12Pedro ma' iri na ne, tequi' pe ac ca na, mo hwet ac cain na manain pacun. Xujuxuc pe iri na ne, querec e' non wom co mam' wiric pa' tocwa ma'. In mao ac ca na, cain' cain' xira ne ac ca na pain carawa ca ara non Jeju.
Ca hwet pa' tococwa co taxipa' ca co xuruxut mama' nanain wanaji Emaús
Marcos 16.12-13
13E' mami' iri na Jeju ne, pain iri' xec nein ma', paca' ac cacain na Jerusalém win ma' caca co taxipa' ca Jeju ma', co howa nonon ma'. Ma' 2 nana. Xuruxut mama' nanain wanaji ca paric to ne xirim ma', Emaús ma'. Om ca pira ca' nein Jerusalém Emaús. Ma' 11 e' na quilômetro nein pain ca pira ca' nein ma'. 14Pain ca xuruxut mama' caca ma', tomi' tomi' ac xucucun na pain oro carawa ca ara ne con Jeju. 15Pain ca tomi' tomi' wet xucucun ma', maqui' ac cain waracocon na Jeju. Wirico Jeju co wixicam nonon ma'. Xuruxut wi ac xucucun na. 16Wirico paxi' na, ane om querec pin' cocon ne. Ac ca narain ho' pan tococwa na pain ca querec pin' cocon ma'.
17Tomi' querec ac tococwa na: Ma' carawa ca tomi' xujuhu' pain ca xuruxut hwe ca' quem tata.
Coco' ac caca na. Naro na tococon. Querec pin' tata pain ca tomi' xaxa' tamana nucucun. 18Tomi' ac ca na xucun ma'. Cleopas na wixicon. Tomi' querec non Jeju: Mija nana oro xucucun wari' co maqui' nanain Jerusalém pain oro xijein xec ca' ne. Xica' pe ma pain ca om taxi' main carawa ca ara ne ra na ca tomi' querec con ma'.
19Ma' carawa ca ara ne quem ac con na.
Om na, tomi' xujuxut pain carawa ca ara non Jeju co maqui' nain Nazaré pane ac caca na. Profeta na Jeju pane, pijim' hwara' opa na pane. Ara nain carawa ca om ara taxi' ne ca wari' wa quem. Hohot non Iri' Jam, in ac in ac pi' pin nonon oro wari' quem. 20Ane noc cocon oro taramaxicon nucucun oro sacerdote cocon oro xucucun oro taramaxicon nexi' ne. An mi' nonon con taramaxicon nucucun oro romano. Ma' ta to' pa' ma' totoron ne nonon. To' pa' pin nonon quem, tatatain mi' nonon pain pana. 21Coromicat ca' paxi' urut con pane: Wirico tara co to' witan ca' toton napari' cocon oro co noc nanapari' pain ca wari' nein Israel iri' ca', ac je paxi' na ca coromicat nuxut con pane. Ane ma' 3 pin ne xec pain ca to' pa' pin cocon ne. 22Pain xec cara ne, jaxicao' pin ac cacaparut na oro narima' co win ma' urut quem. Iri' xo' xec pin iri na ne, mama' nanain manain pacun ca an corom pe xine curucun Jeju. 23Hwet iri nanain ne, wara om pin na curucun. In hwet ac cacaparut na, tomi' hwet ac cacaparut na pain ca querec cocon oro jam co taramaja mi' nonon Iri' Jam. Ac ca tohwein' cacama na, ane om pi'am cacama ne. Querec nana. Tomi' ac cacam na, e' mami' na ta ac cacam na. 24Mo querec xi' e' ac caca na oro win ma' nuxut quem, paric nana co mama' nanain manain pacun. Iri'o' na xin ca tomi' cacama ne nana. Hwet iri nanain ne, wara joc hwet pin na pacun ca tao' pa' nain, wara om pin na curucun quem. Noro xin paxi' nanain, ane om querec cacain ne na ca tomi' hwet cocon Jeju ma'.
25Wa inuhu' me pan ac cocon na Jeju. I'ina a xihwe pain ca taraju pa' wa ta. Je xi howa hap hwein oro ca tomi' caca oro profeta cara pane? 26Xi na e' ara ne pain ca jain jain ca Cristo pain ca mi' pin nucun ta. Aram aram mi' pan ac con tara pain ca momon taramaxicon cara wa Iri' Jam ta na ca tomi' tococwa ma'. 27Tomi' xo' ac tococwa na pain capijacon Iri' Jam ca tomi' mi' pan non ma', je pain ca xirao' pe nucun Moisés, je pain oro ca xirao' to nucucun oro profeta cara pane, tomi' xo' tomi' xo' pi' pin ac tococwa na pain oro ca xirao' pe xine capijacon Iri' Jam ca tomi' mi' non quem.
28Hwet pin iri nanain ca paric to ne xirim ca xuruxut xumu caca ma', pain Emaús ma', ac ca tiquin' mao ta' ca na Jeju ma'.
29Om na, ta tiquin' mao ma me. Pe ho' xut, xi irawin pa' pin xim ara capari' ta. Xim pin ta' na ta nonon. Tomi' tamana nonon, tomi' mip nonon. Ma ac tococwa na, corom hwet ac tococwa na pain xiricocon.
30Xao to ho' iri xucucun pain pana ca mam' cao' to wa ne, an ac cain na capam' Jeju, tomi' ac con na Cote ca: Tomi' querec te urut pum pain ca mi' maparut pain capam' ca' Te ac ca na, jicat ac cain na, mi' ac tococwa pain na quem. 31Ane ane ma' pin ac ne na ximicocon. Querec pin' nonon Jeju. Ane om pin hap pan ca ne. Querec querec om pin nonon. 32Wirico ma' ira ac xucucun na. Om ca meo toto ne ximixi' pain ca tomi' tomi' capari' pain wana ra? Meo toto napari' ca' ira! Tomi' querec te tamana iri' pain iri' ximixi' pain ca tomi' xo' capari' pain ca xirao' pe xine capijacon Iri' Jam ne xucucun.
33Maji ta ac xucucun na, in mama' hap ac cacain na Jerusalém. Hwet ac tococwa na co taxipa' ca Jeju ma', co ma' 11 nana ma'. Hwet tata pain ca cut in xucucun cocon oro xucucun co howa nonon Jeju ma' quem. 34Tomi' pan ac caca na: Iri'o' na ca e' mami' ca Taramaxicon nexi' ta. Hwet pa' non Simão cwa' quem nana. 35Caram ma' co xo' maqui' nanain Emaús ma' iri nana ne, tomi' hwet ac cocon na pain oro ca ara nonon pain ca xuruxut cacain wana ne, je pain ca querec pin' cocon Jeju pain ca jicat pan cain capam' pain ca cao' nucucun quem.
Ca hwet pa' cocon co taxipa' ca Jeju
Mateus 28.16-20; Marcos 16.14-18; João 20.19-23; Atos 1.6-8
36Pain ca tomi' tomi' wet xucucun ma', hwet qui' ac ca na Jeju. Xat pe nain ximijacocon. Ta toron ne xumuhu' me ta ac tococwa na.
37Xat ac ne na ximicocon. Jin' nana quem. Jima tara ma' nonon. 38Tomi' ac tococwa na: Para toron ne xumuhu' ma'? Para tara con ta'a mahu' pain ca e' mami' ta' ca' quem tata. 39Noro jein jami manain prego pain mu je pain caxima ca' quem. Wata' cwa' ira. Quep xine, querec pin' xine. Xi ma' ne cwerein tamataracon wari' ta. Om nain arain quem. Ane ma' capa' ara je cwere ne na ca tomi' tococwa ma'.
40Tomi' iri nain i ma' ne, mam' pe mi' ac tococwa na pain jami manain prego pain micon pain caximacon. 41Tomi' querec te tamana ac caca na. Wa wa paxi' nana, ane tara con ta'a tara con ta'a wet cocon ne.
Ma' nuhu' carawa ca cao' wa quem ac tococwa na. 42Mi' ac cocon na con hwam co wara xain caca ma' 43Cao' ac con na. Querec nonon pain ca cao' con quem#24.43 Pain ca cao' con hwam Jeju ma', je ca to' querec pin' tococwa co taxipa' ca pain ca e' iri'o' ca ma'. Xi cao' taxi' ca jima ta. .
44Je ca tomi' xuhu' pain ca pe ho' pe ho' wet xuhu' pane ac tococwa na. Na e' na pain ca hwet pin ne oro capijacon Iri' Jam pata'. Oro ca xirao' nucun Moisés cocon oro profeta, je pain Oro Tamara' quem, na e' na pain ca hwet hwet pi' pin ne pata' ac tococwa na.
45Mi' ac tococwa na pain ca taraju pa' wa. Ma' ta taraju pa' hwein capijacon Iri' Jam ca xirao' pe xine pane tata. 46Tomi' ac tococwa na: Je i ca' ca xirao' to caca pata' pane: Cristo ma', na e' na pain ca jain jain ca pain ca to' pa' pin tocwa ta. 3 pin iri tara xec pain ca mi' pin nucun ne, e' mami' ac ca tara ta na ca xirao' to caca pata' pane. 47Xirao' to ca' nana pane quem: Oro wari' co howa nonon ma', na e' na pain ca pijim' hwet cocon oro wari' con Cristo ta nana pata'. Pijim' pijim' pi' pin totoron oro wari' pain oro xijein macan'. Pijim' ca' totoron: Cwirin' pin jein ca caracat nuhu', ma' ta xic am pin cain Iri' Jam ta totoron. Pijim' cain' to tatarain Jerusalém, mao ac ne ma' tara cocon, pijim' mama' ac cacain tara oro xijein macan' ta na ca xirao' to caca pane. 48Je ca tomi' xuhu' ca' ac tococwa na. Pijim' jujun oro wari'. Tomi' hwet jujun pain oro ca taraju nuhu' je pain oro ca querec nuhu' ca' quem. 49Taraju wet xine e': Main mam' xuhu' pain Tamataracon Te ca wara tomi' pe mi' cuhu' pane. Ane na e' ne pain ca winim' cain' hwein ne. Winim' to cain' jein Jerusalém ca', aram aram hwet pa' ac cuhu' tara ca hwara' opa nucun Te co pe pawin cwain na ca tomi' tococwa ma'.
Ca in mao cain pawin Jeju
Marcos 16.19-20; Atos 1.9-11
50Maji ta ac ca na Jeju, o mama' ac tococwa na co howa nonon ma'. Wixicam pin iri nanain ca paric to ne xirim pain Betânia ne, cut piri' ac cain na micon, tomi' ac tococwa na: Param mi' inuhu' pain ca ara mi' cuhu' pain oro ca awi wa Te Iri' Jam ta tata. 51Pain ca tomi' tomi' wet tococwa ma', piri' ca' ac tococwa na, an piri' mao ac tocwa na pain pawin. 52Pe torotop mi' querec te ac cocon na, in mama' ac cacain na Jerusalém. Tomi' querec te tamana nana. 53Mama' ho' mama' ho' ac cacain na ca tao' caho' nein cote ne xiricon Iri' Jam ma'. Awi na Iri' Jam awi na Iri' Jam ta nana quem.
Je i ma'.
Actualmente seleccionado:
Lucas 24: TBPN
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Copyright 2023 Missão Novos Tribos do Brasil