Lucas 6
6
Ca tomi' em' tococwa co taxipa' ca Jeju pain ca om xao to wa cacain ximicocon pain sábado
Mateus 12.1-8; Marcos 2.23-28
1Maqui' iri na sábado ne, xut mao ac cain na totain trigo Jeju. Wirico, wiricoco co taxipa' ca quem, xuruxut mama' ac cacain na totain trigo. Xuruxut xuruxut, caracat ac cacain na xirinain trigo co taxipa' ca ma', joc niri ac cacain na pain micocon. Cao' ac cacain na tocwi. 2Ma' nana oro fariseu co tomi' ca' nonon: Para taramaja hwe pain sábado ca', pain ca caracat hwein xirinain trigo ma'? Tomi' caho' ara xi' napari' ca xirao' nucun Moisés pain ca taramaja wa pain sábado ta na ca tomi' querec cocon ma'.
3Om na ta ac cocon na Jeju. Om ca noro hwein capijacon Iri' Jam ra pain ca pijim' xine carawa ca ara ca taramaxicon Davi cara pane, pain ca pe' qui' ca Davi cocon oro win ma' ca pane? 4Corom mao nain xiricon Iri' Jam pane, cut ac cain na capam' ca an toco' mi' tocwa Iri' Jam. Cao' ac cain na quem. Cao' xica' to xirarain oro sacerdote. Tomi' caho' paxi' tata pain ca cao' wa oro xucucun wari', ane cao' pan cain Davi ne. Cao' jein quem ac tococwa na oro win ma' ca quem. 5Je ca tomi' xuhu' ca' ac tococwa na. Taramaxicon ina. Wata' pain ca Iri' Wari' ta' ca', Taramaxicon pan ina. Wata' co tomi' xo' nuhu' pain carawa ca ara xi' hwe pain xec nein ca xao to wa ne ca xumu wa quem na ca tomi' tococwa ma'.
Ca quep xio pin tocwa wari' co xirac micon
Mateus 12.9-14; Marcos 3.1-6
6Om ca pain homa ne, pain xijein sábado ma', corom mao ac cain na xirim ca cut in to xucucun oro judeu Jeju. Pijim' ta' ta ac ca na, ca' na ac tococwa na pain capijacon Iri' Jam. Pe nain i ma' wari' co xirac micon ma'. Iri' curucun na ca xirac ma'. 7Oro fariseu cocon oro co ca' na taxipa' nanain ca xirao' nucun Moisés ma', tocojin' nonon Jeju quem. Ma' ta ha' capari' pain ca tomi' em' xun ta nana. Je ca ja' noro cocon ma'. Quep xio ton tara pain xec nein ca xao to wa ne ca xumu wa pain sábado ca' ra, ac i ma' paxi' na ca coromicat nucucun. 8Ane taxi' cocon Jeju ne, taxi' nonon pain ca coromicat ac i ma' nucucun. Tomi' ac con na co xirac micon ma': Tequi' pe ra e'. Hap ra, xat pe rain ximijaxut ca' non. Tequi' pe ac ca na, hwet ac con na pain ximijacocon.
9Tomi' ac tococwa na co tocojin' nonon ma': Tomi' querec xim inuhu'. Cain' cain' xixi' pain xec nein ca xao to wa ne ca xumu wa ca' quem? Ma' ca ara je capari' Iri' Jam quem? Om ca hohot ne pain ca quep xiho' xun wari' ra? Hohot na pain ca quep em' xun ra? Om ca hohot ne pain ca to' witan xun ra? Hohot na pain ca to' pa' pin xun ra na ca tomi' querec tococwa ma'.
10Noro noro xam' ac tococwa na pain ca to to mam' cocon ma'. Tomi' ac con na co xirac micon ma': Coc matam rain mum ma' ta non. Coc matam ac cain na, awi pin ac ne na con.
11Mana' tamana ac caca na caram ma' co tocojin' nonon ma'. Cain' cain' xuxun quem ac xucucun na.
Ca tora' cocon oro apóstolo Jeju
Mateus 10.1-4; Marcos 3.13-19
12Om ca pain homa ne, mo tomi' ton Te ta ac ca na Jeju, mao ac cain na pacun. Tomi' ac con na, tomi' tomi' xec pa' ac con na quem. 13Xec pin iri na ne, harahap je ta ac tococwa na caram ma' co taxipa' nonon ma'. Tora' 12 ac tococwa na. Apóstolo je pain ca tomi' hwet huhun pain capija oro wari' ta ac tococwa na. 14Mo nana co tora' ca ma': Simão ma', co wara o' ma' ni ca pane, pain ca Pedro pin ra ta con pane#6.14 O' ma' ni iri non Simão Jeju ne, pain ca Pedro pin ra ta con pane, ca' na ca coromicat nucun: Hwara' opa pan ra cocon oro win apóstolo ma ma'. Ac ca taramaxicon pe ho' momon tara, ac i ma' na ca coromicat nucun Jeju pane. Ma' nana wari' co Simão Simão wet nonon, ma' ac caca na co Simão Pedro nonon, ma' ac caca na co Pedro e' nonon quem. . Ma' ac ca na coxa' ca ma' quem, André ma'. Ma' ac ca na Tiago con João con Filipe con Bartolomeu ma'. 15Ma' ac ca na Mateus con Tomé ma'. Ma' ac ca na Tiago panxica Alfeu ma'. Ma' ac ca na Simão co jain jain tamana nonon oro win ma' ca pain ca witan ca' xun cocon oro romano ma'. 16Ma' ac ca na Judas panxica Tiago ma'. Ma' ac ca na Judas Iscariotes ma' quem. Wirico Judas Iscariotes co aram aram quep xiho' ton nonon co noc nonon Jeju ma', pain ca quep xun cocon ma', ame hwe e'. Ac i ma' nana co apóstolo je ca Jeju pane.
Ca ca' na tococwa pain capijacon Iri' Jam, je pain ca quep xio pin tococwa quem
Mateus 4.23-25
17Quiji' wi ac cocon na pain pacun ma', wirico Jeju, wiricoco co taxipa' ca ma' quem. Coco' to ac cacain na ca om tamaja nein ma' quem. Mija nana wari' co to nanain i ma'. Mija nana co wara taxipa' nonon, mija nana wari' co maqui' nanain oro xijein cidade pain Judeia, maqui' nanain Jerusalém, maqui' nanain cacarain iri' cote ne com pain Tiro je Sidom ma' quem. Om ca paric camain' caca. 18Taraju xun nonon, quep xio tarapari' pain ca caxi nexi' quem nonon. Oro wari' co corom to ho' nonon caxicon jam ma', tomi' jein pin ac tococwa na oro caxicon jam nucucun quem. 19Quep xuxun na nonon, jain jain jain jain pi' pin nonon. Xi pe ho' ara con ca hwara' opa wa ta. Je ca mam' quep xio quep xio pi' pin cocon quem.
Oro wari' co param mi' wawa pain ca awi wa, cocon oro co ximin xi' nana quem
Mateus 5.1-12
20Noro ac tococwa na co taxipa' ca ma'. Tomi' ac tococwa na:
Wahu' pain ca ximin hwe ma'#6.20 Tomi' mi' tata wari' co ximin nana pain ca om cocon oro carawa ma', tomi' mi' tata wari' co querec pin' xucucun pain ca om hohot cocon Iri' Jam quem. Tomi' mi' tata co coromicat ca' xucucun: Mo ta om xiram pa' capa' Iri' Jam, om ta hwet ac ton pain ca taramaxicon pe nucun ta, wiricoco nana co tomi' mi' wawa ma'. , param mi' nuhu' pain ca awi wa Iri' Jam. Xi wari' ne ara cuhu' pain ca taramaxicon pe ho' xim cuhu' ta.
21Wahu' pain ca pe' hwe pain xocori ca', param mi' nuhu' pain ca awi wa Iri' Jam. Xi maqui' ta' ara ne xec nein ca ma'am xi' hwe ta#6.21 Pain ca tomi' mi' tococwa wari' co cao' xi' nana pain ca pe' nucucun ma', ca' paxi' na ira: Oro wari' co jain jain nanain oro caramaxicon Iri' Jam ma', co ac ca pe' caca na pain ca param tamana cacain capijacon, je pain ca win xumu cacain oro ca param pan nucun quem, wiricoco tatara co mi' mi' pi' pin wawa pain oro caramaxicon ta na ca tomi' nucun. .
Wahu' pain ca awaran hwe pain xocori ca', param mi' nuhu' pain ca awi wa Iri' Jam. Xi maqui' ta' ara ne xec nein ca tomi' querec te xi' hwe ta#6.21 Mija na oro ca to' i'ina wa ca to' awaran napari' pain xocori ca'. To' tomi' xaxa' napari' ca caxi nexi' pain oro ca jain jain nexi'. To' tomi' xaxa' napari' ca caracat nexi' quem, je ca to' tomi' xaxa' tamana pan capari'. Ane ja' tomi' querec te capari' Iri' Jam ne, xi om ne ca mi' pin caho' ara capari' Jeju ta. Xic am pin napari' pain ca caracat nexi'. .
22Wahu' pain ca noc cucuhu' oro wari' ma', pain ca howa mahu' pain ca Iri' Wari' ta' ca', wahu' pain ca xin hwerehwet cucuhu' pain ca cut in to xucucun ma', je pain ca tomi' xirac cucuhu' ma', je pain ca tomi' ximama' cucuhu' pain ca pan teretem hwe ta cucuhu' ma', ara ac i ma' iri nunuhu' pata' ne, param mi' nuhu' pain ca awi wa Iri' Jam ta. 23Maqui' iri tara xec nein ca to' i'ina ac i ma' cucuhu' ne, tomi' querec te ac hwe tara. Tomi' querec te tamana je. Xi om ne ca awi tamana ara ne oro ca mi' xim cuhu' Iri' Jam pain pawin cain ta. Ac i ma' ara xi' nana oro hwanana nucucun pain cara pane, pain ca quep em' qui' cocon oro profeta pane.
24Wahu' pain ca caramaju hwe pain xocori ca' iri na ne, main maqui' tara xec nein ca ximin tamana xi' hwe. Xi wara ma' ara cuhu' carawa ca ja' tomi' querec te nuhu' pain xocori ca' quem.
25Wahu' pain ca ma'am hwe pain xocori ca', main maqui' tara xec nein ca ximin tamana xi' hwe. Xi pe' tamana xi' ara hwe ta#6.25 Hohot paxi' na pain ca caramaju iri', hohot paxi' na pain ca ma'am iri' pain ca cao' wa quem. Ane om hohot ne pain ca param e' xin oro caramaji macan' pain ca om howa xun Jeju quem. Mo ta om howa xun Jeju ma', ximin pan iri'. Ximin tamana iri', xi ma' capari' iri' carawa ca to' hohot napari' ta. Om ca ma' capari' Jeju..
Wahu' pain ca tomi' querec te e' hwe pain xocori ca', main maqui' tara xec nein ca ximin tamana xi' hwe. Xi awaran tamana xi' ara hwe pain ca tomi' xaxa' nuhu' ta.
26Wahu' pain ca awi na awi na pi' pin cucuhu' oro wari' pain xocori ca', main maqui' tara xec nein ca ximin tamana xi' hwe. Xi tomi' ac i ma' ara caca hwanana nucucun pain cara pane, pain ca awi nana awi nana qui' cocon oro profeta co tomi' hwet mixein e' nanain capijacon Iri' Jam pane ta na ca tomi' tococwa ma'#6.26 Hohot paxi' na ca tomi' querec te iri'. Hohot paxi' na ca awi na awi na cacapari' oro wari' quem. Ane om hohot ne pain ca win xumu xin oro ca tomi' querec te nucucun oro wari' pain ca querec pin' xirarapari' pain ca awi nexi' na xuxun ta..
Ta noc huhun co noc nunuhu' ma' me ta tata
Mateus 5.38-48
27Wahu' pain ca taraju mahu' ma' iri na ne, tomi' ca' inuhu' ta ac tococwa na. Ta noc huhun co noc nunuhu' ma' me. Ara mi' jujun pain ca awi wa. 28Mo ta tomi' noro cucuhu' oro wari' co quep em' nunuhu' ma', tomi' mi' jujun con Iri' Jam. Xiram pa' roron, mi' roron pain ca awi wa ca' jun pain ca tomi' mi' huhun con. 29Tomi' inem pain ca mana' quem wari' ma' quem. Mo ta wap quem, pain xijein orocoxum ma', mo ta wap mami' xim quem quem, je i ma' ira, jami mi' ron pain xijein orocoxum, wap mami' ne pain me ac mon tara quem. Mo ta ma' ca wari' co an mao ton non to' om capin' nem ma', ta nain ho' mon con iri' curucun womum ma' quem me. 30Oro wari' co mi' xut nenem pain carawa ma', mi' mi' xam' roron pain carawa ca mi' xut caca ma'. Mo ta ma' ca wari' co an ca' nem pain caramajum ma', ta mi' in hwet ne pain mon me. 31Je ca tomi' xuhu' ca'. Oro ca ara mi' ma' tatarapari' ne huhun oro wari' ma', je i ma' tara ca ara mi' huhun quem.
32Je ca tomi' xuhu' ca': Mo ta om noc e' huhun oro wari' co om noc nunuhu' ma'. Cain' cain' xuruhu' Iri' Jam pain i ma' quem? Mi' turuhu' pain oro ca awi wa pain ca om noc e' huhun co om noc nunuhu' ma' ra? Om na. Ac i ma' ara xi' nana oro caracat ma'. Om ca noc cocon co om noc pan nonon. 33Mo ta xiram pa' e' huhun oro wari' co xiram pa' nunuhu' ma'. Cain' cain' xuruhu' Iri' Jam quem? Mi' turuhu' pain oro ca awi wa pain ca xiram pa' e' huhun co xiram pa' nunuhu' ra? Om na quem. Ac i ma' ara xi' nana oro caracat ma'. Xiram pa' nonon co xiram pa' pan nonon ma'. 34Mo ta wajim' cucuhu' pain oro carawa oro wari' ma', mo ta mi' e' huhun pain co main mi' in hwet xim tatarapa' pain hwe ma'. Cain' cain' xuruhu' Iri' Jam quem? Mi' turuhu' pain oro ca awi wa pain ca mi' e' huhun pain carawa ca wajim' caca co main in hwet mi' tatarapa' pain hwe ra? Om na quem. Ac i ma' ara xi' nana oro caracat ma'. Mo ta wajim' xucucun pain oro carawa ma', mo ta main mi' in hwet tatarapa' pain caca ma', mi' ac xucucun pain na. 35Je ca tomi' xuhu' ca': Ta noc huhun co noc nunuhu' ma' me. Xiram pa' jujun. Mo ta wajim' cucuhu' pain oro carawa ma', mi' ac huhun pain tara. Ta main mi' in hwet tatarapa' pain hwe me. Main mi' ac cuhu' tara pain oro ca awi tamana Iri' Jam. Querec pin' ac cucuhu' tara oro wari' pain ca an xiho' huhun Iri' Jam co Iri' Taramaxicon pan. Xi xiram pa' ara cocon oro caxicon wari' Iri' Jam ta. Oro wari' co om tomi' querec te taxi' nana pain ca cut caca carawa ca awi, je i ma' ira, xiram pa' pan nonon Iri' Jam ta. Oro wari' co pan teretem nana ma', je i ma' ira, xiram pa' pan ac cocon na quem. 36Xiram pa' taxipa' jujun oro wari' ta. Win ne ca xiram pa' taxipa' capari' Cotere' Iri' Jam quem na ca tomi' tococwa ma'.
Ca tomi' em' xijexi'
Mateus 7.1-6
37Ta tomi' em' xujuhu' pain ca pan teretem wa me ta ac tococwa na. Om ac ne tara ca tomi' em' cuhu' pain ca pan teretem wa Iri' Jam quem. Ta tomi' mi' xujuhu' pain ca wap wa pain ca pan teretem wa me. Om ac ne tara ca tomi' mi' cuhu' pain ca wap wa pain ca pan teretem wa Iri' Jam quem. Mana' mana' om xujuhu' pain ca ara cup xujuhu' ma', xic am pin ac cain tara ca caracat nuhu' Iri' Jam ta. 38Mi' querec te xujuhu' pain oro carawa, mi' pan ac cuhu' pain tara Iri' Jam quem. Mi' tamana turuhu' pain, win ca wari' co vender nain tocwi trigo ma'. Cut moin' nain, xin xam' nain, joc xoco' moin' ac cain na. An ho pa' mami' ac cain na, ma' ta moin' ne ca mam' cut nein pata' ta na. Ac i ma' turuhu' Iri' Jam quem, win hwe ma', pain ca mi' querec te caracan xujuhu' pain oro carawa ma', ac i ma' tara ca mi' xim cuhu' pain quem.
39Tomi' ac tococwa na: Noro jun wari' co om tocon ma'. Ma' na ca coc papan ac con win ma' ca co om tocon ma' quem? Om ta pan' horot mama' pi' pin cacain man ra? 40Noro jun wari' co ca' na wa pain oro ca taxi' wa ma' quem. Om ca taxi' tiquin' ca' con co ca' na pan non ma'. Mo ta taxi' taxi' pi' pin cain oro ca ca' na tocwa ma', an xiho' ac con tara co ca' na pan non ma', ac i ma' na ca pijim' tococwa ma'.
41Tomi' inem pain ca tomi' em' mon win ma' ma pain wijimain ca caracat nucun ma' ac tococwa na. Tomi' em' iri mon ne, an xiho' ac mon na wari' co noro e' nain wijimain tohoromi pana ca pe nain tocon win ma' ca ma'. Xi querec pin' pan cain cote ne pana ca pe nain tocon ta! 42Hot pin tain wijimain tohoromi pana ca pe nain tucum ma' xa' mon win ma' ma ra? Je i ma' ne ma ra? Cain' cain' xima quem? Ma' na ca tomi' ac i ma' ac ma ra? Xi ha' quem pain ca querec pin' main cote ne pana ca pe nain tucum ta. Ac ca iri'o' ta' ca' tara me ma ra? Hot pin cain' rain cote ne pana ca pe nain tucum ma'. Querec toha pin ac ma tara, ha' pin ac quem tara pain ca hot pin main wijimain tohoromi pana ca pe nain tocon win ma' ma ma' na ca tomi' tococwa ma'.
Ca an xiho' cacain panaji memem wari'
Mateus 7.15-20; Mateus 12.33-35
43Tomi' xin oro panaji memem ma' quem ac tococwa na. Panaji memem ca awi ma', om ca wina pan tem ne. Panaji memem ca pan tem ma' iri na ne, om ca wina awi ne quem. 44Mam' querec pin' irin oro panaji memem pain winain. Noro jein caji pi ma'. Wina awi na? Mi nain figo ra? Wina awi na caji nahwarac ca to' taratan wari' ma' quem? Mi nain uva ra? Om na. 45Ac i ma' nana oro wari' quem. Wari' co awi ca coromicat nucun ma', ac ca cut toco' xo' cain na ca awi ne capijacon pain ximicon, an hwet ac cain na pain ca tomi' nucun. Wari' co om awi ca coromicat nucun ma' iri na ne, ac ca cut toco' xo' cain na ca om awi ne capijacon pain ximicon, an hwet ac cain na pain ca tomi' nucun quem. Je ca tomi' xuhu' ca': Carawa ca coromicat taxipa' iri' pain iri' ximixi' ca', je ca tomi' hwet iri' pain ca tomi' nexi' ca' quem na ca tomi' tococwa ma'.
Wari' co quep pe na xirim pain pacun, xucun wari' co quep pe nain namaji quem
Mateus 7.24-27
46Para Taramaxicon ne Taramaxicon ne mahu' pain ca tomi' mahu' ma' quem? Xi tomi' ha' mahu' ta ac tococwa na. 47Taraju wet xine pain ca tomi' xuhu' ca'. Wari' co hwet napa' ma', co taraju nain ca tomi' ne ca', co tomi' ha' napa' ma' quem, pijim' joc mam' mi' xuhu' con wari' co an xiho' non. 48An xiho' non wari' co quep ta' na xirim. Xe' corom ac ca na pain iri' paxicom. Xe' corom xe' corom hwet iri nain pacun ne, cut in xo' ac cain na oro pacun nein caximain xiricon. Ma' ta teren ne nain. Je ca quep pe cain xiricon. Aram aram pan' ac ne na xowi'. Pan' tamana pan' tamana, we' pin iri na com ne, cote ne com pin ac ne na quem. Weweweo in paxi' nain xirim com ma', ane om meo camain' ne ne. Xi tara quep pe ara xine pain pacun ta. 49Wari' co taraju paxi' nain ca tomi' ne ma' iri na ne, taraju paxi' napa', ane om tomi' ha' capa' ne. An xiho' non wari' co quep pe e' nain xiricon pain macan'. Om ca cut in xo' cain oro pacun nein caximain xiricon pain pacun pain iri' paxicom. Quep pe e' nain xiricon pain macan'. Aram aram pan' ac ne na xowi'. Pan' tamana pan' tamana, we' pin iri na com ne, cote ne com pin ac ne na. Weweweo in iri nain xirim com ne, pa caracat mao ac ne na, pa horohot pi' pin ac ne na quem na ca tomi' tococwa ma'.
Actualmente seleccionado:
Lucas 6: TBPN
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Copyright 2023 Missão Novos Tribos do Brasil
Lucas 6
6
Ca tomi' em' tococwa co taxipa' ca Jeju pain ca om xao to wa cacain ximicocon pain sábado
Mateus 12.1-8; Marcos 2.23-28
1Maqui' iri na sábado ne, xut mao ac cain na totain trigo Jeju. Wirico, wiricoco co taxipa' ca quem, xuruxut mama' ac cacain na totain trigo. Xuruxut xuruxut, caracat ac cacain na xirinain trigo co taxipa' ca ma', joc niri ac cacain na pain micocon. Cao' ac cacain na tocwi. 2Ma' nana oro fariseu co tomi' ca' nonon: Para taramaja hwe pain sábado ca', pain ca caracat hwein xirinain trigo ma'? Tomi' caho' ara xi' napari' ca xirao' nucun Moisés pain ca taramaja wa pain sábado ta na ca tomi' querec cocon ma'.
3Om na ta ac cocon na Jeju. Om ca noro hwein capijacon Iri' Jam ra pain ca pijim' xine carawa ca ara ca taramaxicon Davi cara pane, pain ca pe' qui' ca Davi cocon oro win ma' ca pane? 4Corom mao nain xiricon Iri' Jam pane, cut ac cain na capam' ca an toco' mi' tocwa Iri' Jam. Cao' ac cain na quem. Cao' xica' to xirarain oro sacerdote. Tomi' caho' paxi' tata pain ca cao' wa oro xucucun wari', ane cao' pan cain Davi ne. Cao' jein quem ac tococwa na oro win ma' ca quem. 5Je ca tomi' xuhu' ca' ac tococwa na. Taramaxicon ina. Wata' pain ca Iri' Wari' ta' ca', Taramaxicon pan ina. Wata' co tomi' xo' nuhu' pain carawa ca ara xi' hwe pain xec nein ca xao to wa ne ca xumu wa quem na ca tomi' tococwa ma'.
Ca quep xio pin tocwa wari' co xirac micon
Mateus 12.9-14; Marcos 3.1-6
6Om ca pain homa ne, pain xijein sábado ma', corom mao ac cain na xirim ca cut in to xucucun oro judeu Jeju. Pijim' ta' ta ac ca na, ca' na ac tococwa na pain capijacon Iri' Jam. Pe nain i ma' wari' co xirac micon ma'. Iri' curucun na ca xirac ma'. 7Oro fariseu cocon oro co ca' na taxipa' nanain ca xirao' nucun Moisés ma', tocojin' nonon Jeju quem. Ma' ta ha' capari' pain ca tomi' em' xun ta nana. Je ca ja' noro cocon ma'. Quep xio ton tara pain xec nein ca xao to wa ne ca xumu wa pain sábado ca' ra, ac i ma' paxi' na ca coromicat nucucun. 8Ane taxi' cocon Jeju ne, taxi' nonon pain ca coromicat ac i ma' nucucun. Tomi' ac con na co xirac micon ma': Tequi' pe ra e'. Hap ra, xat pe rain ximijaxut ca' non. Tequi' pe ac ca na, hwet ac con na pain ximijacocon.
9Tomi' ac tococwa na co tocojin' nonon ma': Tomi' querec xim inuhu'. Cain' cain' xixi' pain xec nein ca xao to wa ne ca xumu wa ca' quem? Ma' ca ara je capari' Iri' Jam quem? Om ca hohot ne pain ca quep xiho' xun wari' ra? Hohot na pain ca quep em' xun ra? Om ca hohot ne pain ca to' witan xun ra? Hohot na pain ca to' pa' pin xun ra na ca tomi' querec tococwa ma'.
10Noro noro xam' ac tococwa na pain ca to to mam' cocon ma'. Tomi' ac con na co xirac micon ma': Coc matam rain mum ma' ta non. Coc matam ac cain na, awi pin ac ne na con.
11Mana' tamana ac caca na caram ma' co tocojin' nonon ma'. Cain' cain' xuxun quem ac xucucun na.
Ca tora' cocon oro apóstolo Jeju
Mateus 10.1-4; Marcos 3.13-19
12Om ca pain homa ne, mo tomi' ton Te ta ac ca na Jeju, mao ac cain na pacun. Tomi' ac con na, tomi' tomi' xec pa' ac con na quem. 13Xec pin iri na ne, harahap je ta ac tococwa na caram ma' co taxipa' nonon ma'. Tora' 12 ac tococwa na. Apóstolo je pain ca tomi' hwet huhun pain capija oro wari' ta ac tococwa na. 14Mo nana co tora' ca ma': Simão ma', co wara o' ma' ni ca pane, pain ca Pedro pin ra ta con pane#6.14 O' ma' ni iri non Simão Jeju ne, pain ca Pedro pin ra ta con pane, ca' na ca coromicat nucun: Hwara' opa pan ra cocon oro win apóstolo ma ma'. Ac ca taramaxicon pe ho' momon tara, ac i ma' na ca coromicat nucun Jeju pane. Ma' nana wari' co Simão Simão wet nonon, ma' ac caca na co Simão Pedro nonon, ma' ac caca na co Pedro e' nonon quem. . Ma' ac ca na coxa' ca ma' quem, André ma'. Ma' ac ca na Tiago con João con Filipe con Bartolomeu ma'. 15Ma' ac ca na Mateus con Tomé ma'. Ma' ac ca na Tiago panxica Alfeu ma'. Ma' ac ca na Simão co jain jain tamana nonon oro win ma' ca pain ca witan ca' xun cocon oro romano ma'. 16Ma' ac ca na Judas panxica Tiago ma'. Ma' ac ca na Judas Iscariotes ma' quem. Wirico Judas Iscariotes co aram aram quep xiho' ton nonon co noc nonon Jeju ma', pain ca quep xun cocon ma', ame hwe e'. Ac i ma' nana co apóstolo je ca Jeju pane.
Ca ca' na tococwa pain capijacon Iri' Jam, je pain ca quep xio pin tococwa quem
Mateus 4.23-25
17Quiji' wi ac cocon na pain pacun ma', wirico Jeju, wiricoco co taxipa' ca ma' quem. Coco' to ac cacain na ca om tamaja nein ma' quem. Mija nana wari' co to nanain i ma'. Mija nana co wara taxipa' nonon, mija nana wari' co maqui' nanain oro xijein cidade pain Judeia, maqui' nanain Jerusalém, maqui' nanain cacarain iri' cote ne com pain Tiro je Sidom ma' quem. Om ca paric camain' caca. 18Taraju xun nonon, quep xio tarapari' pain ca caxi nexi' quem nonon. Oro wari' co corom to ho' nonon caxicon jam ma', tomi' jein pin ac tococwa na oro caxicon jam nucucun quem. 19Quep xuxun na nonon, jain jain jain jain pi' pin nonon. Xi pe ho' ara con ca hwara' opa wa ta. Je ca mam' quep xio quep xio pi' pin cocon quem.
Oro wari' co param mi' wawa pain ca awi wa, cocon oro co ximin xi' nana quem
Mateus 5.1-12
20Noro ac tococwa na co taxipa' ca ma'. Tomi' ac tococwa na:
Wahu' pain ca ximin hwe ma'#6.20 Tomi' mi' tata wari' co ximin nana pain ca om cocon oro carawa ma', tomi' mi' tata wari' co querec pin' xucucun pain ca om hohot cocon Iri' Jam quem. Tomi' mi' tata co coromicat ca' xucucun: Mo ta om xiram pa' capa' Iri' Jam, om ta hwet ac ton pain ca taramaxicon pe nucun ta, wiricoco nana co tomi' mi' wawa ma'. , param mi' nuhu' pain ca awi wa Iri' Jam. Xi wari' ne ara cuhu' pain ca taramaxicon pe ho' xim cuhu' ta.
21Wahu' pain ca pe' hwe pain xocori ca', param mi' nuhu' pain ca awi wa Iri' Jam. Xi maqui' ta' ara ne xec nein ca ma'am xi' hwe ta#6.21 Pain ca tomi' mi' tococwa wari' co cao' xi' nana pain ca pe' nucucun ma', ca' paxi' na ira: Oro wari' co jain jain nanain oro caramaxicon Iri' Jam ma', co ac ca pe' caca na pain ca param tamana cacain capijacon, je pain ca win xumu cacain oro ca param pan nucun quem, wiricoco tatara co mi' mi' pi' pin wawa pain oro caramaxicon ta na ca tomi' nucun. .
Wahu' pain ca awaran hwe pain xocori ca', param mi' nuhu' pain ca awi wa Iri' Jam. Xi maqui' ta' ara ne xec nein ca tomi' querec te xi' hwe ta#6.21 Mija na oro ca to' i'ina wa ca to' awaran napari' pain xocori ca'. To' tomi' xaxa' napari' ca caxi nexi' pain oro ca jain jain nexi'. To' tomi' xaxa' napari' ca caracat nexi' quem, je ca to' tomi' xaxa' tamana pan capari'. Ane ja' tomi' querec te capari' Iri' Jam ne, xi om ne ca mi' pin caho' ara capari' Jeju ta. Xic am pin napari' pain ca caracat nexi'. .
22Wahu' pain ca noc cucuhu' oro wari' ma', pain ca howa mahu' pain ca Iri' Wari' ta' ca', wahu' pain ca xin hwerehwet cucuhu' pain ca cut in to xucucun ma', je pain ca tomi' xirac cucuhu' ma', je pain ca tomi' ximama' cucuhu' pain ca pan teretem hwe ta cucuhu' ma', ara ac i ma' iri nunuhu' pata' ne, param mi' nuhu' pain ca awi wa Iri' Jam ta. 23Maqui' iri tara xec nein ca to' i'ina ac i ma' cucuhu' ne, tomi' querec te ac hwe tara. Tomi' querec te tamana je. Xi om ne ca awi tamana ara ne oro ca mi' xim cuhu' Iri' Jam pain pawin cain ta. Ac i ma' ara xi' nana oro hwanana nucucun pain cara pane, pain ca quep em' qui' cocon oro profeta pane.
24Wahu' pain ca caramaju hwe pain xocori ca' iri na ne, main maqui' tara xec nein ca ximin tamana xi' hwe. Xi wara ma' ara cuhu' carawa ca ja' tomi' querec te nuhu' pain xocori ca' quem.
25Wahu' pain ca ma'am hwe pain xocori ca', main maqui' tara xec nein ca ximin tamana xi' hwe. Xi pe' tamana xi' ara hwe ta#6.25 Hohot paxi' na pain ca caramaju iri', hohot paxi' na pain ca ma'am iri' pain ca cao' wa quem. Ane om hohot ne pain ca param e' xin oro caramaji macan' pain ca om howa xun Jeju quem. Mo ta om howa xun Jeju ma', ximin pan iri'. Ximin tamana iri', xi ma' capari' iri' carawa ca to' hohot napari' ta. Om ca ma' capari' Jeju..
Wahu' pain ca tomi' querec te e' hwe pain xocori ca', main maqui' tara xec nein ca ximin tamana xi' hwe. Xi awaran tamana xi' ara hwe pain ca tomi' xaxa' nuhu' ta.
26Wahu' pain ca awi na awi na pi' pin cucuhu' oro wari' pain xocori ca', main maqui' tara xec nein ca ximin tamana xi' hwe. Xi tomi' ac i ma' ara caca hwanana nucucun pain cara pane, pain ca awi nana awi nana qui' cocon oro profeta co tomi' hwet mixein e' nanain capijacon Iri' Jam pane ta na ca tomi' tococwa ma'#6.26 Hohot paxi' na ca tomi' querec te iri'. Hohot paxi' na ca awi na awi na cacapari' oro wari' quem. Ane om hohot ne pain ca win xumu xin oro ca tomi' querec te nucucun oro wari' pain ca querec pin' xirarapari' pain ca awi nexi' na xuxun ta..
Ta noc huhun co noc nunuhu' ma' me ta tata
Mateus 5.38-48
27Wahu' pain ca taraju mahu' ma' iri na ne, tomi' ca' inuhu' ta ac tococwa na. Ta noc huhun co noc nunuhu' ma' me. Ara mi' jujun pain ca awi wa. 28Mo ta tomi' noro cucuhu' oro wari' co quep em' nunuhu' ma', tomi' mi' jujun con Iri' Jam. Xiram pa' roron, mi' roron pain ca awi wa ca' jun pain ca tomi' mi' huhun con. 29Tomi' inem pain ca mana' quem wari' ma' quem. Mo ta wap quem, pain xijein orocoxum ma', mo ta wap mami' xim quem quem, je i ma' ira, jami mi' ron pain xijein orocoxum, wap mami' ne pain me ac mon tara quem. Mo ta ma' ca wari' co an mao ton non to' om capin' nem ma', ta nain ho' mon con iri' curucun womum ma' quem me. 30Oro wari' co mi' xut nenem pain carawa ma', mi' mi' xam' roron pain carawa ca mi' xut caca ma'. Mo ta ma' ca wari' co an ca' nem pain caramajum ma', ta mi' in hwet ne pain mon me. 31Je ca tomi' xuhu' ca'. Oro ca ara mi' ma' tatarapari' ne huhun oro wari' ma', je i ma' tara ca ara mi' huhun quem.
32Je ca tomi' xuhu' ca': Mo ta om noc e' huhun oro wari' co om noc nunuhu' ma'. Cain' cain' xuruhu' Iri' Jam pain i ma' quem? Mi' turuhu' pain oro ca awi wa pain ca om noc e' huhun co om noc nunuhu' ma' ra? Om na. Ac i ma' ara xi' nana oro caracat ma'. Om ca noc cocon co om noc pan nonon. 33Mo ta xiram pa' e' huhun oro wari' co xiram pa' nunuhu' ma'. Cain' cain' xuruhu' Iri' Jam quem? Mi' turuhu' pain oro ca awi wa pain ca xiram pa' e' huhun co xiram pa' nunuhu' ra? Om na quem. Ac i ma' ara xi' nana oro caracat ma'. Xiram pa' nonon co xiram pa' pan nonon ma'. 34Mo ta wajim' cucuhu' pain oro carawa oro wari' ma', mo ta mi' e' huhun pain co main mi' in hwet xim tatarapa' pain hwe ma'. Cain' cain' xuruhu' Iri' Jam quem? Mi' turuhu' pain oro ca awi wa pain ca mi' e' huhun pain carawa ca wajim' caca co main in hwet mi' tatarapa' pain hwe ra? Om na quem. Ac i ma' ara xi' nana oro caracat ma'. Mo ta wajim' xucucun pain oro carawa ma', mo ta main mi' in hwet tatarapa' pain caca ma', mi' ac xucucun pain na. 35Je ca tomi' xuhu' ca': Ta noc huhun co noc nunuhu' ma' me. Xiram pa' jujun. Mo ta wajim' cucuhu' pain oro carawa ma', mi' ac huhun pain tara. Ta main mi' in hwet tatarapa' pain hwe me. Main mi' ac cuhu' tara pain oro ca awi tamana Iri' Jam. Querec pin' ac cucuhu' tara oro wari' pain ca an xiho' huhun Iri' Jam co Iri' Taramaxicon pan. Xi xiram pa' ara cocon oro caxicon wari' Iri' Jam ta. Oro wari' co om tomi' querec te taxi' nana pain ca cut caca carawa ca awi, je i ma' ira, xiram pa' pan nonon Iri' Jam ta. Oro wari' co pan teretem nana ma', je i ma' ira, xiram pa' pan ac cocon na quem. 36Xiram pa' taxipa' jujun oro wari' ta. Win ne ca xiram pa' taxipa' capari' Cotere' Iri' Jam quem na ca tomi' tococwa ma'.
Ca tomi' em' xijexi'
Mateus 7.1-6
37Ta tomi' em' xujuhu' pain ca pan teretem wa me ta ac tococwa na. Om ac ne tara ca tomi' em' cuhu' pain ca pan teretem wa Iri' Jam quem. Ta tomi' mi' xujuhu' pain ca wap wa pain ca pan teretem wa me. Om ac ne tara ca tomi' mi' cuhu' pain ca wap wa pain ca pan teretem wa Iri' Jam quem. Mana' mana' om xujuhu' pain ca ara cup xujuhu' ma', xic am pin ac cain tara ca caracat nuhu' Iri' Jam ta. 38Mi' querec te xujuhu' pain oro carawa, mi' pan ac cuhu' pain tara Iri' Jam quem. Mi' tamana turuhu' pain, win ca wari' co vender nain tocwi trigo ma'. Cut moin' nain, xin xam' nain, joc xoco' moin' ac cain na. An ho pa' mami' ac cain na, ma' ta moin' ne ca mam' cut nein pata' ta na. Ac i ma' turuhu' Iri' Jam quem, win hwe ma', pain ca mi' querec te caracan xujuhu' pain oro carawa ma', ac i ma' tara ca mi' xim cuhu' pain quem.
39Tomi' ac tococwa na: Noro jun wari' co om tocon ma'. Ma' na ca coc papan ac con win ma' ca co om tocon ma' quem? Om ta pan' horot mama' pi' pin cacain man ra? 40Noro jun wari' co ca' na wa pain oro ca taxi' wa ma' quem. Om ca taxi' tiquin' ca' con co ca' na pan non ma'. Mo ta taxi' taxi' pi' pin cain oro ca ca' na tocwa ma', an xiho' ac con tara co ca' na pan non ma', ac i ma' na ca pijim' tococwa ma'.
41Tomi' inem pain ca tomi' em' mon win ma' ma pain wijimain ca caracat nucun ma' ac tococwa na. Tomi' em' iri mon ne, an xiho' ac mon na wari' co noro e' nain wijimain tohoromi pana ca pe nain tocon win ma' ca ma'. Xi querec pin' pan cain cote ne pana ca pe nain tocon ta! 42Hot pin tain wijimain tohoromi pana ca pe nain tucum ma' xa' mon win ma' ma ra? Je i ma' ne ma ra? Cain' cain' xima quem? Ma' na ca tomi' ac i ma' ac ma ra? Xi ha' quem pain ca querec pin' main cote ne pana ca pe nain tucum ta. Ac ca iri'o' ta' ca' tara me ma ra? Hot pin cain' rain cote ne pana ca pe nain tucum ma'. Querec toha pin ac ma tara, ha' pin ac quem tara pain ca hot pin main wijimain tohoromi pana ca pe nain tocon win ma' ma ma' na ca tomi' tococwa ma'.
Ca an xiho' cacain panaji memem wari'
Mateus 7.15-20; Mateus 12.33-35
43Tomi' xin oro panaji memem ma' quem ac tococwa na. Panaji memem ca awi ma', om ca wina pan tem ne. Panaji memem ca pan tem ma' iri na ne, om ca wina awi ne quem. 44Mam' querec pin' irin oro panaji memem pain winain. Noro jein caji pi ma'. Wina awi na? Mi nain figo ra? Wina awi na caji nahwarac ca to' taratan wari' ma' quem? Mi nain uva ra? Om na. 45Ac i ma' nana oro wari' quem. Wari' co awi ca coromicat nucun ma', ac ca cut toco' xo' cain na ca awi ne capijacon pain ximicon, an hwet ac cain na pain ca tomi' nucun. Wari' co om awi ca coromicat nucun ma' iri na ne, ac ca cut toco' xo' cain na ca om awi ne capijacon pain ximicon, an hwet ac cain na pain ca tomi' nucun quem. Je ca tomi' xuhu' ca': Carawa ca coromicat taxipa' iri' pain iri' ximixi' ca', je ca tomi' hwet iri' pain ca tomi' nexi' ca' quem na ca tomi' tococwa ma'.
Wari' co quep pe na xirim pain pacun, xucun wari' co quep pe nain namaji quem
Mateus 7.24-27
46Para Taramaxicon ne Taramaxicon ne mahu' pain ca tomi' mahu' ma' quem? Xi tomi' ha' mahu' ta ac tococwa na. 47Taraju wet xine pain ca tomi' xuhu' ca'. Wari' co hwet napa' ma', co taraju nain ca tomi' ne ca', co tomi' ha' napa' ma' quem, pijim' joc mam' mi' xuhu' con wari' co an xiho' non. 48An xiho' non wari' co quep ta' na xirim. Xe' corom ac ca na pain iri' paxicom. Xe' corom xe' corom hwet iri nain pacun ne, cut in xo' ac cain na oro pacun nein caximain xiricon. Ma' ta teren ne nain. Je ca quep pe cain xiricon. Aram aram pan' ac ne na xowi'. Pan' tamana pan' tamana, we' pin iri na com ne, cote ne com pin ac ne na quem. Weweweo in paxi' nain xirim com ma', ane om meo camain' ne ne. Xi tara quep pe ara xine pain pacun ta. 49Wari' co taraju paxi' nain ca tomi' ne ma' iri na ne, taraju paxi' napa', ane om tomi' ha' capa' ne. An xiho' non wari' co quep pe e' nain xiricon pain macan'. Om ca cut in xo' cain oro pacun nein caximain xiricon pain pacun pain iri' paxicom. Quep pe e' nain xiricon pain macan'. Aram aram pan' ac ne na xowi'. Pan' tamana pan' tamana, we' pin iri na com ne, cote ne com pin ac ne na. Weweweo in iri nain xirim com ne, pa caracat mao ac ne na, pa horohot pi' pin ac ne na quem na ca tomi' tococwa ma'.
Actualmente seleccionado:
:
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Copyright 2023 Missão Novos Tribos do Brasil