Muuduko 14
14
A'mwo aguto kig tooravuro molo bwotonyo sunopo tovinokwono
1-9To'no'gwowi a'mwo aguto kig atobuul pworo kuujo tool sulopiyamoka tomguda'ai a'mwo aguto kig aral aral gabovo pworai dolago tomuu amwallajuporogano. A'mwo aguto kig atobuul su tooraino yovo tov pwol wagwolago Soodoomda'ai a'mwo aguto kig Beralekono. Pwol wagwolago Goomoorada'ai a'mwo aguto kig Birisalekono. Pwol wagwolago Atimada'ai a'mwo aguto kig Sinapolekono. Pwol wagwolago Sebooyimda'ai a'mwo aguto kig Semeperolekono. Pwol wagwolago Belada'ai a'mwo aguto kig tookono. Wagwolago su toru'no yovo puruv Soowarorukono. A'mwo aguto kig atobuul su tooro kuujo tool sulopiyamoka tomguda'ai a'mwo aguto kig aral aral gabovo toorai kisuvolo wiyo'mno molo'mo soporogano. A'mwo aguto kig aral aral su tooraino yovo tov pwol Elamda'ai a'mwo aguto kig Kedoolaiyoomolekono. Pwol Bebelooniyada'ai a'mwo aguto kig Amrafolekono. Pwol Elesada'ai a'mwo aguto kig Ariyookolekono. Pwol Gooyimda'ai a'mwo aguto kig Tidalekono. A'mwo aguto kig su tooro molo yo'mo toga kevnokwe tooro molluulnodupu kwiyo'mwoju'nyajuporogano. Aki toro tooravuro a'mwo aguto kig Kedoolaiyoomol mollubworomokavlapto sajukekono. Toro te Kedoolaiyoomol a'mwo aguto kig atobuul toorai mido mollomwallo yoduke tov kworomo 12-pela tobuul kuuwolo'nokaikono. Toro uuwolo'nyuno sumaiyokwe kworomo 13 tollugwo kuuwolo'noka toga a'mwo aguto kig atobuul tooro Kedoolaiyoomollu kisuvolo kwiyoporogano. Toro kisuvolo kwiyopo tovino tov kworomo 14 toga Kedoolaiyoomol molo wiyo'moneyokwe gami amolluullajupo toorai doma'no sumaiyokwe amoju'bworomarokarogano. Aral aral su tooro kemi a'mwo molo mollo'mo toorai mollu'bwo'no sumaveyokwe a'mwo aguto atobuul kisuvolo kwiyajupo toorai molo wiyo'mo avlavoporogano. Toro tooro plaino sumaveyokwe muudu'nodo toga wagwolago Asateroot Kanim tomuuno plaino sumaveyokwe a'mwo Refaiyimda'ai toorai molo wiyo'mno kuuwolovoporogano. Aki wagwolago Ham tomuuno plaino sumaveyokwe a'mwo Suusimda'ai toorai molo wiyo'mno kuuwolovoporogano. Aki kwako worato Kiriyataiyim'no plaino sumaveyokwe a'mwo Emimda'ai toorai molo wiyo'mno kuuwolovoporogano. Aki muumuudo Sir tomuu ilno sumaveyokwe a'mwo Hooroda'ai toorai povomjapiyo'mno kwako Eliparan'no kwole'movaporogano. Kwako su toru a'mwomaiyo kuu'maiyo tovuro yiulopiyabiyo tomuu wo'dowodorukono. Toro towai kwole'movaporogano. Toro tooro aikomgu bino sumaveyokwe Kades towai bo'mno Amalekda'ai tooravuro yiuwi'nokai kwako tomuu molo bwiyo'mno kuuwolovoporogano. Aki wagwolago Hasasoon Tamaro'no plavo'mno Amooroda'ai toorai molo wiyo'mno kuuwolovoporogano. Toro te Kedoolaiyoomol a'mwo aguto pworapwol su toorogai molo toro momjumovla'mdowo kuuwoleyajuporogano.
To'no'gwowi a'mwo aguto Soodoomda'ai tooke'aro Goomoorada'ai tooke'aro Atimada'ai tooke'aro Sebooyimda'ai tooke'aro Belada'ai tooke'aro tooro Kedoolaiyoomollu kisuvolo sopo tovino tov Kedoolaiyoomeke'aro tooro kuudo wuuteyo'mo aboporogano. Toro bodopure toga a'mwo aguto atobuul kisuvolo sopo su tooro kwako worato Sidim'no wolno sumaveyokwe mesogwollo ainyajuporogano. Toro kinodopure toga Kedoolaiyoomeke'aro tooro buuru'maro'mno molo sunoporogano. Kwako worato su tovino yovo puruv Wonyo Buugo Bolnodo toolluro kwako woratokwono.
10Toro sunopo kuvi kuruv wagwolago Soodoomke Goomoorake tovalluda'ai a'mwo aguto kig tooral luko ino sumaleyokwe kemi molo mollo'mo a'mwo toorogai lukado avlavoporogano. Kwako worato Sidim su toru ilooloo'buugo pworo kurukweyorukono. Ilooloo'buugo su toorai gwomalo to'busuko wel pun kuulovomwona'dupudogano. Toro te pworo buuso su tonyu su'noporogano. Pworo muumuudo tooraiyomno lukado sulaporogano. 11Toruda'ai a'mwo aguto kig aral aral tooro wagwolago Soodoomke Goomoorake tovalluda'ai toorai molo ino'mno kuuwolovoporogano. Toro uuwolo'mno sumaveyokwe wagwolago su tovalluda'ai yiuwi'nokai kuto ivito tonyu ipoloma'no sumaveyokwe kemi ago tomuuno amovipolomokavlavoporogano. Aki wosamujuko sovi'mwojosajupo togai'aro tonyu amovipolomokavlavoporogano. 12Aki Lootol wagwolago Soodoom tovi amwallajuko kwolluda'ai meromworaro'mno gamoro kuto ivito kugai'aro amovipolomokavlavoporogano. Lootol Eburamolluro gagwai'yago toolluro kwolaiyekono.
13Toro meromokavla'mdopure tekwojaida'ai a'mwo pwol abirolo'nugolokwokaikono. Toro birolo'nugolokwino sumaiyokwe Hibruu iko tovasuda'ai a'mwo Eburamollu wuujo'moneyokwe bo'no Lootollu kwimo'noka tovino Eburamollu abuudokaikono. Toro toga Eburamol Mamureyolluro iko aburaudoka towai amwallajukekono. Mamureyol a'mwo Amooroda'aiyekono. Toro te Mamureke'aro gami gagwai'yago Eskooleke'aro Anereke'aro todoroto ikomago toorai molo wiyo'mo toga Eburamollu amolluullajuporogano. 14Toro te Eburamol gavuge avalo Lootollu meromokavla'mdopure tovi wuu'no'no gamoro ago towaida'ai molo yo'moneyokwe me'no amollovrowosajuko toorai adomarokaikono. Toro doma'no sumaiyokwe 318-pela a'mwo molo yo'moneyokwe amollovrowosajuko su toorai mollu'bworomwora'no sumaiyokwe Eburamol sumdomgu amollubworomokwanokarogano. Toro tooro plaino sumaveyokwe wagwolago Dan toru ai'movoporogano. 15Toro ki'mo'mno sumaveyokwe surakuuto toga Eburamol gamoro a'mwo molo'mo toorai gowasuno gowasuno moomuudeyomwalluno sumaiyokwe molo kwiyoporogano. Molo tov wino sumaveyokwe kemi ikomago toorai amovomjapiyoporogano. Toro tooro movomjai'nyuno sumaveyokwe wagwolago Damaskos tovi wonyo sumdo kwolamoka tomgu uuwolovo'mno wagwolago Hooba toru ai'movoporogano. 16Toro ki'mo'mno sumaveyokwe Eburamol yiuwi'nokai kuto ivito sumdomguda'ai amovipolomokavlavopo tonyu aikomgu supolomarokaikono. Aki Looteke'aro gamoro kuto ivito togai'aro a'mwo tooravuro abolo togai'aro yiuwi'nokai ameromokavlavopo togai'aro su tonyu aikomgu supolomarokaikono.
Melkisodekol Eburamollu sugudo tov adubweyoka tovinokwono
17Toro te Eburamol Kedoolaiyoomoleke'aro a'mwo aguto kig pworapwol toorogai'aro toorai molo tov me'no uuwoleno sumaiyokwe aikomgu abokaikono. Toro tool puuto tomuu kwako worato puwai kuuno boduke toga Soodoomda'ai a'mwo aguto kig tool Eburamollu abuuru'marokaikono. Toro abuuru'maroka toru'no yovo tov Saveyorukono. Aki su toru'no yovo puruv, A'mwo Aguto Kig Tooravuro Woratorukono, dodupudorukono. 18#Hib. 7:1-10Toro buuru'ma'duke toga wagwolago Salemda'ai a'mwo aguto kig Melkisodekol kwol kuruv Eburamollu abuuru'marokaikono. Toro tool bret togai'aro wain wonyo togai'aro tonyu momwora'no sumaiyokwe kuumokabokaikono. A'mwo aguto kig su tool Gooti Yiuwi'nokai Tonyu Uuwolo'mdowodo toolluro pris womdo yokwekono. 19Toro tool Eburamollu sugudo tov aro adubweyokaikono. “Gooti Yiuwi'nokai Tonyu Uuwolo'mdowodo tool sulugumdo tokwe'aro kwako tokwe'aro tovallu sokwollosokaikono. Gooti su tool Eburamollu sugudo pun nokwo uubweyogawono. 20Aki Gooti Yiuwi'nokai Tonyu Uuwolo'mdowodo toolluno neya ilomoropiyowano. Gooti su tool gujo'mwojo'moneyokwe gumi ikomago toorai molo wiyo'no me'no kuuwolovokaikono. Toro toolluno yovo tov ilomoropiyowano.” Kuudokaikono. Toro wuujuno sumaiyokwe toga Eburamol yiuwi'nokai kuto ivito aikomgu avipolomokabopo tonyu mollu'bworosuno sumaiyokwe atousal sumo'nopogano. Toro te Eburamol atousal amollu'bworosoka tonyuda'ai puruv Melkisodekollu kwiyokaikono.
21Toro wino sumaiyokwe Soodoomda'ai a'mwo aguto kig tool Eburamollu aro kuudokaikono. “Yiuwi'nokai kuto ivito ton gumiyo'mo nokwo maro'bi kuvi kuruv moro a'mwo abolo aikomgu supolomokabodo tono'gwowi neya donyabono.” Kuudokaikono. 22-23Soodoomda'ai a'mwo aguto kig tool toro kuudoka kuvi kuruv Eburamol aro kuudokaikono. “Gooti Yawel kwako tokwe'aro sulugumdo tokwe'aro tovallu sokwollosokaikono. Gooti Yiuwi'nokai Tonyu Uuwolo'mdowodo su toollu subuu'yamju aro me'no kwiyonyugono. Nuu gumoro buro'nyo buro'nyo kuto ivitodeyo ton puru'monodo kuruv mama'monyugono. Noonyumwonyu sullekwojudeyo oo suulpweyo'mdeyo puru'monodo kuruv mama'monyugono. Gumoro kuto ivito ama'mi tov guu lukomgu ilomoropunyu kuudo yauro'bi aro nonyudubiyo. “Oo moro kwiyo tovida'ai Eburamol kuto ivito bwotonyagokwe jumo'nadopiyo.” Toro nonyudubiyokweyo'mo tov 24nuu puru'monodo kuruv mama'monyugono. Toro kuvi kuruv moro a'mwo mollurogudo toorono'gwowi puuto tomuu wosamujuko pun me'no amonugoboporogano. Toro te nuu kuto ivito pugai'aro mama'monyugono.” Eburamol toro wuujuno sumaiyokwe aki aro kuudokaikono. “A'mwo mi amanyuulopo Anereke Eskooleke Mamureke tooro kemiyo'mo kuto ivito pwekwono pwekwono nomapinorogano. Toro ma'dopure toga guu wonyapino neya ibinekugono.” Eburamol Soodoomda'ai a'mwo aguto kig toollu toro kuudokaikono.
Actualmente seleccionado:
Muuduko 14: SMB
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2022: Ethnos360 Sanford, Florida