KEJADIAN 7
7
Beag Entoi
1Telas ajeh Yahweh Kiurok nu Nuh, “Ku engkap sengoi ku jaman adeh, Eng Ngneng had hek taleh de benar ku mat Eng. Jadi, mujloh nu kateh bahtere besama ru dikdij peringak hek. 2-3Enloh tujoh pasag ibek ru ikenan ju jap-jap binatag halal, nupasag ibek ru ikenan ju jap-jap jenis binatag haram, ru tujoh pasag ibek ru ikenan ju jap-jap jenis cep. Behloh hal ajeh supaye jap-jap jenis binatag ru cep lekat mong lalu buleh naibiak nij ku bumi. 4Kerana tujoh arik nij, Eng doh Ngcerleh manik ku bumi selame 40 arik, yah ru kelem. Begei ajehloh Eng doh Ngpebinasa dikdij sinui de Ngcipte ju kemil bumi.” 5Lalu Nuh kibeh begei ma de bior ya Yahweh.
6Umur Nuh 600 tahut mase beag entoi belaku ku bumi. 7Nuh ru ikenah, besama ru ikekenon ru kekenah liknai, enai naimuj nu kateh bahtere naiha-peselamat diri liknai ju beag entoi. 8-9Binatag ibek ru ikenan ju jap-jap jenis binatag de halal hodpen de haram, ru jap-jap jenis cep, ru jap-jap jenis maklok de cekcip ku kemil tik, enai naimuj besama ru Nuh nu kateh bahtere kena begei ernor Jenang. 10Telas tujoh arik, beag entoi kihol nu bumi.
11Mase umur Nuh 600 tahut, ku arik ke-17, gecek kedue, dikdij kacoh teu ku kerop tik kibekah, ru pintu teu ku langit pen tebuka. 12Manik lebat kiceleh selame 40 arik, yah ru kelem. 13Ku arik ajehloh juga, Nuh ru ikenah baimuj nu kateh bahtere besama ru nik mom ikekenon Sem, Ham, ru Yafet, ru kekenah liknai. 14Besama ru enai ajeh dikdij jenis binatag ces, dikdij jenis binatag daknek, dikdij jenis maklok de cekcip ku kemil tik, dikdij jenis cep, ru dikdij maklok de bekengyeg juga. 15Jap-jap binatag ibek ru ikenan de sui ru belehem naimuj nu kateh bahtere besama ru Nuh, 16begei de bior ya Jenang. Telas dikdij ya naimuj, Yahweh Kitutop pintu bahtere ajeh.
17Beag entoi teros kihol nu bumi selame 40 arik, ru teu kihuj lei bahtere ajeh kiterapong. 18Teu ya guep lei bahtere ajeh kidediol ku kemil teu. 19Ipenyudah teu ajeh kitutop dikdij lod-lod de tinggi. 20Teu teros kiep lei tujoh meter lebeh tinggi daripade tumpog lod. 21Yahweh Kipebinasa dikdij sinui ku bumi - cep, binatag daknek, binatag ces, dikdij maklok de cekcip ku kemil bumi, ru dikdij manusia. 22Dikdij bende de benyawe ku kemil tik naidat. 23Jap-jap bende benyawe ku kemil bumi jadi binasa. Manusia, binatag, dikdij maklok de cekcip ku kemil bumi, ru cep bipebinasa ju bumi. Had Nuh ru dikdij ma de mong besama ru kek ku kateh bahtere taleh de pek binasa. 24Seluroh bumi tebeg ya teu selame 150 arik.
Actualmente seleccionado:
KEJADIAN 7: AEH
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2023, Wycliffe Bible Translators, Inc. All rights reserved.
© 2023, Bible Society of Malaysia. All rights reserved.