Lukasi 9

Jesusi ghana kutuma hashadikumi nohawadi

(Mat 10:5–15; Mark 6:7–13)

1Jesusi gha kongwedhire hashadikumi nohawadi pofotji no gha wa pire ngcamu dhokutjidha hashatani no kwirukitha yikorwa keho. 2Ko kuwatuma kwendi ha yuvithe ghufumu waNyambi no kwirukitha yikorwa. 3Ho gha wa tongwerire eshi:

“Mbadi mwa kona kushimba thinu mundhira, nomburo temba ngambi thikutu ngambi ghuroto ngambi kakomani nomahembe mawadi temba. 4Ngeshi ha mwingena mundhugho dhimweya, mu kare momo, kate ru funguruke ruyendo rwenu. 5Ngeshi pa di hanu wa hana kudhira kumutambura, mu shwaghe mudyango dyokemo, no mu kukumune rukungu kumapadhi ghenu yi kare manongweneno ghokukwawo.”

6Ko kufunguruka kwawo dighumbo tunda dighumbo, kukuyuvitha mbudhi dhodhiwa no kwirukitha hakakukorwa.

Matamangerero ghaHerodesi

(Mat 14:1–12; Mark 6:14–29)

7Herodesi ghomupanguri, gha yuvire yinu yoyiheya yi ya hokokire no gha karire mudidhongera, yoyishi hamweya ha tongorire eshi: “Johannesi ne ghana vumbuke mwawafu.” 8Hamweya eshi: “Eliya ne ghana hokoka.” No hamweya eshi: “Yofotji ghopawaporofeta hokare‐kare yo ghana vumbuka.”

9Herodesi gha huthire eshi: “Johannesi ne yame na mu tumenine eshi ha mu tete mutwi. Ene murume munye yu na kuyuvanga yinu yoyayonayo kukwendi?” Ho gha yerekire eshi gha mu mone.

Mavurithero ghomaghuroto

(Mat 14:13–21; Mark 6:30–44; Joh 6:1–14)

10Apa ha ka hukire hapostoli, ha ka mu tongwerire Jesusi yoyiheya yi ha tendire. Munyima ko kuwashimba kwendi ha tambe kudighumbo dyaBetsayida, ha ka kare pithawo mudingoshi. 11Ene hanu ha yi dimukire no ha mu kutha‐kuthire. Naye gha wa tawedhire no gha ghambaghurire nawo yokughufumu waNyambi. Nawa ha hakire eshi gha werukithe ha pwire kwirukitha.

12Pakutokera diyuwa ko kwiya hashadikumi nohawadi kukwendi no ha ningire eshi: “Tume hanu ha huke ha ka shane mumaghumbo nomumaparaghumbo mararo no ha kone kuwana yidya, yoyishi twe ne kudyango dyodingoshi tu di.”

13“Mu wa pe ne thinu thodudya,” dyo gha ningire kukwawo. Awo ha huthire eshi: “Mbadiko thi tu di natho shimengwa maghuroto kwoko notuthi tuwadi keho. Endi tu yende tu ka ghurere dhino mbunga dhawanu yidya?” 14Harume pithawo ha karire ngwa mayovi kwoko.

Munyima Jesusi gha tonwerire hakathisongero wendi eshi: “Mu ninge hanu ha hungumane mumafwa kehe wa makumi kwoko ha dye.”

15Nawo dya tendire kemo no ha hungumekire waheya thiwana. 16Ndani gha tumburire maghuroto kwoko nothi dhiwadi, ho gha dighamenine kudiwiru no gha yi kandadhekire. Ko kughuyondaghura no gha ghu tapire kwawakathishongero wendi ha ghu tapere hanu. 17Waheya ha dire no ha rikayine. Eyi ya thigharire ko, ha yi kongwedhire no ya yarire yikote dikumi noyiwadi.

Manongweneno ghaPetrusi. Mayuvithero ghokutanga ghomanyandero

(Mat 16:13–23; Mark 8:27–33)

18Parumweya gha karire Jesusi pithendi mukurapera, nawakathishongero wendi ha karire pofotji nendi. Ko kuwepura kwendi eshi: “Ngepi di hana kuninga hanu, eshi Yame dye?”

19Awo ha mu huthire eshi: “Johannesi ghoMukadiyoghero, hamweya karo eshi: Eliya, hamweya eshi: Muporofeta ghopakarekare yo ghana vumbuka.”

20“Amwe ne,” dyo ghepurire, “ngepi di muna kuninga, eshi Yame dye?”

Ko kuthutha Petrusi eshi: “Yowe mukakupwa kuwetha waNyambi.”

21Munyima ha wa kon̂omeka Jesusi gha wa shinge eshi, mbadi ha kona kuyitongora kwawanu. 22Yoyi gha ningire eshi: “Mwanamunu ghana kunyanda thikuma, kwawamayami no kwawapristeri hohakuru no kwawakamarukwaro pakumuyandja. Mbana mu pagha no midiyuwa dyoghuhatu mbo ghana vumbuka karo.”

Mukukutha Jesusi

(Mat 16:24–28; Mark 8:34—9:1)

23Ho gha ningire kwawahe eshi: “Ngeshi ghumweya ghana haka kunikutha, gha kufupipithe thinda no gha shimbe thikurushe thendi kehe diyuwa no gha ni kuthe. 24Yoyishi yomuhe oyu ghana kushana kukunga moyo wendi, mbo ghuna yongara, noyu ghana kuyongaritha moyo wendi kumahimeno ghange mbo ghana ghu kungu. 25Nye keho mbo yi ghamwena munu, ngambi ha witha kaye kokahe ene aye thinda ne kunakukumwagha ngambi ghana thimbama? 26Yoyishi yomuhe oyu ghana kufa honyi mumwange nomuman̂ando ghange, naye mbo ghana mufu honyi Mwanamunu apa mbo gha kuma mughufumu wendi, nomughufumu waWihe nowawaengeli hokupongoka. 27Ghushemwa na kumutongwera: Padi hamweya awa ha nemana pano awa mbadhira kufa, oku shime mbadi hana mono ghufumu waNyambi.”

Mathitunukero ghopadirundu

(Mat 17:1–8; Mark 9:2–8)

28Munyima dhomayuwa kwoko nomahatu apa gha manine kughamba Jesusi man̂ando gha, ko kushimba kwendi Petrusi naJohannesi naJakobusi kudirundu kukurapera. 29Oku shime gha karera mukurapera, ko kuthitunuka rupara rwendi no yivata yendi ya twedhimine. 30Kapupi popo ko kukara po harume hawadi awa ha ghambaghurire nendi. Awa ne ha Mosesi naEliya. 31Ha mu hokokerire mughurwedhima no ha ghambaghurire nendi, yomatambo ghendi agha mbo gha ka rikanyitha muJerusalema. 32Petrusi nawamweya, ha pothomokerire muturo. Apa ha pindukire ha monine ghurwedhima wendi nawanu hawadi awa hemanine kukwendi. 33Pakumunyangutuka harume wa ha mu tunde, ha ningi Petrusi kwaJesusi eshi: “Muruti, yiwa thikuma yi tu di kuno. Ninge tu tende yishashara yihatu, thofotji thoye, thofotjie thaMosesi nothofotji thaEliya.” Aye Petrusi mbadi gha kudimukire eshi nye ghana kughamba.

34Oku shime ha ghamba, ko kwiya divuyi di wa fike. Apa dya wa ngambwerire diviyu, ko kuyapa hakathishongero. 35Ko kushwagha diywi mudivuyi edi dya ningire eshi: “Oyu ne yoMwanange oyu na torora. Mu tegherere kukwendi!”

36Apa dya shwaghire diywi, ha dimuka kwawo eshi Jesusi ne pithendi gha di ko. Nawo ko kuporera kwawo, no mbadi ha tongorire kwaghumweya thothihe thi ha monine.

Jesusi ghana kwirukitha murumyana

(Mat 17:14–18; Mark 9:14–27)

37Mudiyuwa dyokuranda ko apa ha shurukire kudirundu, ko kumuhangana Jesusi hanu hohengi. 38Kapupi ko kwitha murume ghumweya mukatji kombunga eshi: “Muruti, kenge kamanana kwamwanange. Aye ne yomwanange ghoyofotji. 39Mupepo ghoghumango ghuna kumughombekedha ghu mu toghe. Munyima dhokenge yo ghana kukugherera no ghana kuyaghera no karo difudhi mukanwa kendi. Mupepo ghuna kumupetha no mbadi ghuna kumuthigha wangu. 40Netha hakathishongero woye eshi ha ghu shwaghithe mupepo, ene mbadi hana yi kono.”

41Jesusi gha huthire eshi: “Mwakakupira matawero mwe nomwadiko dyokwora. Rure munye sho ni kare nenu no kumutjimapa? Ka rete mwanoye kuno.”

42Pakwiya mwanuke, ko kumuwithera mupepo pamuve no kumuyagheritha thikuma. Ene Jesusi gha ghu fudhire mupepo ghoghumango, gherukithire mwanuke no gha mu tapire kwawihe. 43Waheya ha tutukwire thikuma yoghufumu waNyambi.

Jesusi ghana kuyuvitha paruvadi yokufa kwendi no yomuvumbukero

(Mat 17:22–23; Mark 9:30–32)

44Oku shime ha yapera waheya koyi gha tendire Jesusi, ho gha ningire kwawakathishongero wendi eshi: “Amwe ne mu kwate n̂ando dhi mumitjima dhenu. Mwanamunu ghana kupwa kuyandja mumoko ghawanu.” 45Awo ne mbadi ha tjwathanine yighamba yi. Yininga yoman̂ando gha, ya wa fikire mukudhira kughatjwathana. Ene ha yapire thikuma kuyimwipura karo Jesusi.

Yidye mukakupiterera

(Mat 18:1–5; Mark 9:33–37)

46Pa karire man̂anani mukatji kawo eshi yidye sho gha kare mukuru mumwawo. 47Jesusi ne gha dimukire eshi yinye hana kundhundha, no gha kokerire mwanuke pepi nendi. 48Munyima gha wa tongwerire eshi: “Kehe yu ghokutambura mwanuke yu muDina dyange, Yame ghana tambura, noyomuhe ghokutambura Me, ghana tambura Yu gha ni tumine Me. Yoyishi, oyu gha kara mumbiru mukatji kenu, yomukuru.”

Oyu gha dhira kumudhimba ne wenu

(Mat 12:30; Mark 9:38–40; Luk 11:23)

49Johannesi gha ningire eshi: “Muruti, tuna mono ghumweya oyu ghana kushwaghitha hashatani muDina dyoye. Ho tuna yereka kumushinga, yoyishi mbadi tuna kukukutha pofotji nendi.”

50Ene Jesusi gha mu huthire eshi: “Mwa shinga, yoyishi oyu gha dhira kumudhimba ne, wenu.”

HakaSamaritane ha shwenine kumutambura Jesusi

51Apa gha henyine mayuwa ghokumudhineka Jesusi kudiwiru, gha himine ruyendo rokuJerusalema, 52no gha tumine hakamushongwe kughutho. Nawo ha fungurukire no ha yendire kudighumbo dyawakaSamaritane, ha ka mu tendere mwara. 53Ene wa ha tungire mo mbadi ha himine kumutambura, yoyishi gha karire muruyendo rokuJerusalema. 54Pakuyimona hakathishongero wendi haJakobusi naJohannesi, ha ningire eshi: “Ghuna haka eshi tu kumbere mudiro mudiwiru na ghu wa hanyaghure po ndi?”

55Ene Jesusi gha pirukire no gha wa tughumukerire. 56Popo ko kushimburura ruyendo rwawo ha yende kumaghumbo ghamweya.

Ngepi di ghokukutha Jesusi

(Mat 8:19–22)

57Shime ha karera mundhira, ko kuninga ghumweya kukwendi eshi: “Ame ne na kukukutha kokuheya ku sho yende.”

58Ha mu hutha Jesusi eshi: “Hambwawa ha kara nomakwina ghawo, noyinyunyi noyitunguru yayo. Ene Mwanamunu mbadi gha kara nomathateko ghomutwi wendi.”

59Kwaghumweya gha ningire eshi: “Ni kuthe.” Aye gha huthire eshi: “Fumu, ni thighe tango ni huke ni ka vumbeke tate.”

60Jesusi gha mu huthire eshi: “Thighe hafu ha vumbeke hafu wawo, owe ne yende ghu ka yuvithe ghufumu waNyambi.”

61Ghumweya karo naye eshi: “N̂anyi ni kukuthe Fumu, ene ni thighe tango, ni ka rumerithe hapange kudighumbo.”

62Ko kuninga Jesusi eshi: “Oyu ghokupumura dyoko dyendi kuthikere no kuthetadhoka munyima eshi yinye yi di mo, mbadi gha fumana mughufumu waNyambi.”

Actualmente seleccionado:

Lukasi 9: MHW1986

Destacar

Copiar

¿Quieres tener guardados todos tus destacados en todos tus dispositivos? Regístrate o inicia sesión

Mbunga dhoBayibili dhaNamibia (Bible Society of Namibia) 1986

Aprende más sobre Testamende Ghomupya Nopisalemi 1986