SAN MATEO 6
6
Allita ruhuanamanta
1Ama gentecunapac ñaupapi paicuna ricuchun nishpalla, allita ruhuaichicchu. Chashna ruhuacpica, jahua pachapi tiyac cancunapac Taita Diosca, ima allita mana cungachu. 2Chaimanta can huacchacunaman imata cushpaca, ama gentecuna alli nichunlla pimanpish parlashpa puringuichu. Chashnaca mishqui shimi, jayac shungucunallami tandanacuna huasicunapipish, mai ñancunapipish gentecuna alli nichun nishpa, parlashpa purincuna. Chashna ruhuashpaca, cai pachapacllami alli nishca cancuna. Chaica chashnatacmi can. 3Can huacchacunaman imata cushpaca, cambac alli ricsishcacunallamanpish ama parlaichu. 4Chashna huacchacunaman imatapish pacalla cucpica, ima pacalla ruhuashcata ricuc Taita Diosca, can japina cashcataca cungami.
Taita Diosman mañanata yachachishcamanta
(Lc 11.2-4)
5Cancuna Taita Diosman mañashpaca, ama chai mishqui shimi jayac shungucuna shina mañaichicchu. Paicunaca gentecuna ricuchun nishpallami, plaza esquinacunapi, tandanacuna huasicunapi shayarishpa mañanata munancuna. Chashna ruhuashpaca, cai pachapacllami alli nishca cancuna. Chaica chashnatacmi can. 6Chaimanta can Taita Diosman mañashpaca, ucuman yaicui, punguta huichcai, cambac Taita Diosman pacalla mañai. Can pacallapi mañacushcatapish ricuc Taita Diosca, can japina cashcataca cungami.
7Shinallatac Taita Diosman mañashpaca, ama chai Diosta mana ricsiccuna shina imatapish cutin cutin chaillatatac nishpa mañaichicchu. Paicuna ashtahuan rimarishpa mañacpica, Taita Diosca ashtahuanmi uyanga yuyashpami, chashnaca mañancuna. 8Cancunaca ama paicuna shina mañaichicchu. Cancunapac Taita Diosca imalla illashcataca cancuna manarac mañacpimi, ña yachan. 9Cancuna Taita Diosman mañashpaca, cashna ninguichic:
‘Jahua pachapi cac
ñucanchic Taitalla,
cambac sumaimana shutita,
tucuilla alli nishca cachun.
10Can mandana punzha shamuchun.
Ima shinami jahua pachapi
can munashca ruhuaricun,
shinallatac cai pachapipish
can munashca ruhuarichun.
11Ñucanchic punzhanta micuna tandata,
cunan punzhapish carai.
12Ima shinami ñucanchic
mana allita ruhuaccunata perdonanchic,
shinallatac ñucanchic
juchacunatapish perdonai.
13Ama ima millaipi
urmachun saquinguichu,
ashtahuanpish tucui
mana allimanta huacaichingui.
[Canmi huiñai huiñaita
tucuita mandacpish,
tucuita ruhuacpish,
sumaimana cushicuipish cangui.
Chashna cachun]’ nishpa mañanguichic.
14Cancunata ima mana allita ruhuaccunata cancuna perdonacpica, jahua pachapi tiyac cancunapac Taita Diosca cancunatapish perdonangami. 15Ashtahuanpish cancunata ima mana allita ruhuaccunata mana perdonacpica, Taita Diosca cancunapac juchacunataca mana perdonangachu.
Ayunanamanta
16Cancuna ayunashpaca, ama chai mishqui shimi, jayac shungucuna shina, llaquilla ñahui tucushpa ayunaichicchu. Paicuna chashna ruhuashpaca, cai pachapacllami alli nishca cancuna. Chaica chashnatacmi can. 17Ashtahuanpish cancuna ayunashpaca, ñahuita jahuarichic, umatapish llambucllata ñaccharichic. 18Cancuna chashna ayunacpica, gentecunaca mana yachangachu, ashtahuanpish ima pacallatapish ricuc Taita Diosmi, cancuna japina cashcataca cunga.
Jahua pachapi chayuc canamanta
19Cai pachallapi chayuc canataca, ama munaichicchu. Chai charishcacunataca polillapish micunllami, shuhuacunapish huasita jutcushpa shuhuanllami. Mana cashpaca chaicunaca ismushpa tucurinllami. 20Ashtahuanpish jahua pachapi chayuc canata munaichic. Chaipica polillapish mana micunchu, imapish mana chingarinchu, shinallatac shuhuacunapish mana shuhuanchu. 21Maipi ima huacaichishca tiyacucpica, chaillatatacmi cancunapac shunguca yuyacun.
Ñahuicunaca cuerpopacca luz shina cashcamanta
22Ñahuicunami cuerpopac luz shinaca. Chashna cashcamanta cambac ñahui alli cacpica, tucui cuerpomi achicpi canga. 23Ashtahuanpish cambac ñahui mana alli cacpica, tucui cambac cuerpomi amsapi canga. Chashna cashcamanta cambac cuerpopi achicyachic luz amsayacpicarin, ¡amsaca ima mundo amsachari canga!
“Chayucyana yuyailla cashpaca, Taita Diosta mana servi
pudinchu” nishcamanta
(Lc 16.13)
24Maijanpish ishcai amotaca mana servi pudinchu. Chashna servicushpaca, shuc amotaca p'iñangami, caishuc amotaca c'uyangami. Shuc amo mandashcataca cazunga, caishuc amo mandashcataca mana cazungachu. Chashnami maijanpish charicyana yuyailla cashpaca, Taita Diostaca mana servi pudinga.
Taita Diosca paipac huahuacunamanca,
ima illashcatapish cuc cashcamanta
25Chaimantami ñucaca cancunamanca cashna nini: ‘¿Imatatac micushun, imatatac ubiashun, imatatac churarishun?’ nishpaca, ama chai yuyailla canguichicchu. Causaimari micunamantapish ashtahuan yalli valin. Shinallatac cuerpomari, churanamanta ashtahuan yalli valin. 26Zhutacunata ricushpallapish yuyarichic. Paicunaca mana tarpunchu, mana tandanchu, chashnallatac grano huacaichinatapish mana huacaichincunachu. Chashna cacpipish jahua pachapi tiyac cancunapac Taita Diosca, paicunamanca caranllami. Cancunacarin, ¡zhutacunatapish yallimari valinguichic! 27Chashna cashcamanta maijanpish unaita causasha nishpa chai yuyailla cashpapish, shuc horallatapish yallihuanca mana causai pudinchu.
28¿Ima nishpatac cancunaca ‘churana illan’ nishpa, chai yuyailla canguichic? Chagrapi tiyac sisacuna sumacta sisacucta ricushpallapish yuyarichic. Paicunaca mana puchcanchu, imatapish mana ruhuanchu. 29Ashtahuanpish caita yuyarichic: Jatun mandac Salomón paipac tucui charishcacunahuanpish, chai sisacuna shina sumactaca mana churarircachu. 30¡Mana tucui shunguhuan cric gentecunalla! Cunanca sumacta sisacuc, cayaca ninapi shitanalla q'uihuacunatapish huiñachic Taita Diosca, ¿manachu cancunamancarin ashtahuan yallita churachinga? 31Shinashpaca: ‘¿Imatatac micushun, imatatac ubiashun, imatatac churarishun?’ nishpaca, ama chai yuyailla caichicchu. 32Chai shinaca, Diosta mana ricsiccunami chai yuyailla causancuna. Jahua pachapi tiyac cancunapac Taita Diosca, cancunapac ima illashcataca ña yachanmi. 33Cancunaca tucuimanta yallica, Taita Dios munashcata ruhuashpa, pai mandacucpi causanata yuyaichic. Shinashpaca, cancunapac ima illashcatapish chasquinguichicllami. 34Shina cacpica: ‘Cayaca, ¿imashi tucushun?’ nishpaca, ama chai yuyailla caichicchu. Ima llaquicunaca punzhantami tiyan. Chaimanta cayapac ima tucuna cashcataca, cayallatacmi yuyarina canguichic.
Actualmente seleccionado:
SAN MATEO 6: QXR96
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Quichua Cañar Nuevo Testamento © United Bible Societies in Ecuador, 1996.