Mataafa Uumata 1
1
Paayyatta uumatadda
1Waaqa paayyota'e, piita ka moonta uume. 2Piita sitiiyyi pissa in qapto, umma we takkan nefo qaraayye in caan. Tukkanta ka piita piisa qara pirte. Hapura Waaqa ka pisha qara xoopilaawni.
3Sekkammaayye, Waaqa ka kide, “La'ayta a koddo!” La'aytase ka kodde. #Qoro 2ta 4:6 4Waaqa ka la'aytase tooye ka akka paxaari akke ka oori halkeetta ka kuyyaata oli kela reexe. 5Waaqa ka la'ayta'e, “Kuyyaata” kide ka tukkanta'e, “Halkeetta” kide. Letta ka dumte ka parite. Sede nefo kuyyaata a paayyota.
6Waaqa ka kide, “Arta pisha' kara'e, letta a koddito ka pisha isho pisha olkela reexto.” #Peti 2ta 3:5 7Waaqa ka letta kode ka pisha letta qaropeela ca ka a kelopa xata ca reexe; ikka kodden. 8Waaqa ka letta' kide, “Moonta” Letta ka dumte ka pariteew. Sede nefo kuyyaata a lammatta.
9Sede kammaayye, Waaqa ka kide, “Pisha a moonta kelopa xata ca a porra porraapa ooren, pora koke ka kara sooko.” Ikka akka Waaqa kide mina' koddite. 10Waaqa ka porose koke'e, “Piita” kide ka pishasene ollopa ooreeti, “Pakateeta” kide. Waaqa ka sede tooye ka akka paxaari akke. 11Waaqa ka kide, “Piita a aykitta ka miissa ika ikanne ka qora luukkata a kara dalta qapto dalla isho unta ika ikan dehisso.” Ikka akka Waaqa kide mina' koddite. 12Piita ka aykitta ka miissa ika ikan ka qora luukkata a kara dalta qapto dalla isho unta ika ikan dehisse. Waaqa ka sede tooye ka akka paxaari akke. 13Letta ka dumte ka pariteew. Sede nefo kuyyaata a sessatta.
14Waaqa ka halkeetta ka kuyyaata oli kela reexa'e kide, “La'aytadda a moonta quda' kodden. Ishootta' nefo, a kuyyawwa ka leyadda ka parra oli kela reexa'e milikkitadda kodden. 15Ka akka piita qara la'ayshane'e la'aytadda a moonta quda' kodden.” Ikka akka Waaqa kide mina' kodden. 16Waaqa ka akka piita qara' la'ayshane'e, la'aytadda kukutta lakki kode. La'ayta kutta akka kuyyaate la'ayo'e, la'ayta shakkaaw, akka halkeette la'ayo'e kode ka hikka kuli quda' padaawe. 17Akka piita qara' la'ayane'e, Waaqa moonta quda'e ishootta kode. 18Ikka kuyyaateeyye isho halkeetteeyye la'ayni ka la'ayta ka tukkanta olkela reexni. Waaqa ka sede tooye ka akka paxaari akke. 19Letta ka dumte ka pariteew, sede nefo kuyyaata a afratta.
20Sekkammaayye oori Waaqa ka kide, “Wa nessa qapa ka lellehna a pisha karaayye sooken, xampira a moonteeyye arepa xata ka piiteeyye opeela, a arta karandesa xaxxa'aden.” 21Waaqa ka pinaana kukutta ka pisha kara kala ka xampira moonta piisa uume. Waaqa ka sede tooye ka akka paxaari akke. 22Waaqa ka asse kide ka ishootta' sake, “Hora ka lekaada ka pisha pakateeta kara immaka. Xampira ka piita qara' koopen.” 23Letta ka dumte ka pariteew, sede nefo kuyyaata a kenatta.
24Se kammaayyeew Waaqa ka kide, “Piita karaayye uumatadda nessa qapa ka horeeta ka pinaana ika ikanne, a teyaden.” Ikka akka Waaqa kide mina' koddite. 25Waaqa ka pinaana kappina ika ikan ka horeeta ika ikan isho uumta a piitan desa titmanno ika ikan kode. Waaqa ka sede tooye ka akka paxaari akke.
26Se kammaayye Waaqa ka kide, “Akka pahanaanno ka a pissaayno mina nama uumma. Ikka murkuja pisha kara ka xampira moonta ka horeeta isho uumata a piitan desa titmanno piisa qara hupna ukkumeeta' qapnaado.” #Qoro 1ta 11:7
27Semmalla Waaqa ka pahanaadinni nama uume ka pahana Waaqatin uume. Ka diirta ka iskatteeta' kode ka uume. #Maati 19:4; Maari 10:6 28Waaqa ka asse kide ka ishootta' sake, “Tumma dala ka lekaada ka piita qara immaka ka muksha ka murkuja pisha kara ka xampira moonta ka uumata a caatta qapo a piita qarandesa lellehno piisa ukkuma.” #uuma 5:1-2 29Waaqa ka kide, “Dishima a piita qara co a dalta dallo piisa ka qora a luukkataaysho kara dalta kitto piisa akka damtane'en ishina' daashe. 30Pinaana piita ka xampira moonta isho uumata caatta qapo a piita qarandesa lellehno piisa akka miissa ilaawa piisa damane'en ishootta' daashe.” Ikka akka Waaqa kide mina' koddite. 31Waaqa ka wa kode piisa tooye ka akka harmo' paxaari akke. Letta ka dumte ka pariteew, sede nefo kuyyaata a lehatta.
Actualmente seleccionado:
Mataafa Uumata 1: MaQu
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión