Yohaannisi 12
12
Iskatteetase Yesuusi shittootan daatite
Maati 26:6-13; Maari 14:3-9
1A xayso nessuma qaran tarpeeta a orra Yihuta kayto'e, A kuyyaata lehi hasteeyye, Yesuusi Pittaaniyaapa aane. Pittaaniya paleetase a Alaasaarise a Yesuusi tootoppa xaashe kara kalo. 2Ikka eeyye eetota ishi koden. Maarta nefo ishootta'e paata deddehanni. Alaasaari nefo orra Yesuusi olliiyyi damta kuti'e oppaayye takka. 3Sitiiyyi Maariyaami ka shittoota takka qoyra naartoosi patta oppaayye kodamte heraan akata kokkoka, a paka nitiroota mina kitto shuubbaan qeette ka loqqa Yesuusin daatite, ka nyirfaadi a mattatin quda haaqte, aluma ashittootasitika tikase piisa kela qiten. #Luqa 7:37-38
4Tamaarewwa Yesuusi oppaayye takka, Asqorottittase Yihuta isase kuli Yesuusi qapsiiso ka kide, 5“Shittootose maana'e opani dinaara#12:5 dinaara takka: xaayya anama a koda kuyyata takkati. dippa sessa in kannin ka kaajaadi teekolaya'en qoonnin?” 6Isha wa malla asse haasawade, qoota teekolaya suraysade mallan ma qoota kera kodde malla. Qoota qarateeta kaaja' xaayno ka kaaja a qarateese kara' xaayna quda hatanta kollade malla.
7Yesuusi ka kide, “Kuyyaata an oppa hawlamo tura'e asse harmisatteey, isheetta diisha. 8Teekolaya awta piisa ishin kapa caan, anti xoori awta piisa ishin kapa an caado.” #ooreta 15:11
9Sitiiyyi Yihutaatoppaayye orra lekayta ka akkima Yesuusi Pittaaniyaayye co upnaade ka eyyepa de'e, wa malla de'ene nefo, qoota Yesuusi patta mallan ma, Alaasaarise a Yesuusi tootoppa xaashe kuli akkeeta malla de'en. 10Saarrasene a qeesewwa' xoori Alaasaari kuli ikassa'e oorsaden. 11Sede nefo qoota Alaasaari minan Yihutaatoppa lekya amanteetaaysho alle' diinnaan ka Yesuusi amannaan malla.
Yesuusi akkima ulfeenanne Yursaalamipa kale
Maati 21:1-11; Maari 11:1-11; Luqa 19:28-40
12Parraytaadiiyyi, orra lekayta a xaysonessuma qaran tarpeetati de'e, akkima Yesuusi Yursaalamipa de'o dakaye. 13Ka taamma Sampaapa qapade ka isha teyyatta' sooke ka nessa kuttishe ka kide, “Hosa'inna, nuqusa Isira'eeli a maxxa Poqallaatin deeno a eeppisamo!” #mas 118:25-26
14Yesuusi ka innayya harreeta akkade ka qara' kute'e. Sede nefo wa malla asse koddite, 15xuumase taafame ka kiino,
“Atti Yurusaalami katama Siyyooniti, in fuuran;
tin nuqusaayti innayya harreeta' qare kute'e ka deeni”
akka dikkado malla. #Sakka 9:9
16Tamaarewwa Yesuusi paayyota qaraayye sede ishootta in kalle ma ete Yesuusi ulfeenan moontopa fayyadeeyye, sede akka qootaadi desa taafamte ka ishi' koddite matte oorsaden.
17A Yesuusi Alaasaari hawloppa hale ka tootoppa xaasheeyye, orra isha kapa co piisa qootaadi desa maakkummi. 18Wa malla orra lekayta Yesuusi turopa ollopa sooke' nefo, qoota kodoose orra qawwanno a kode dakaye malla. 19Sitiiyyi Feresaata ka olli' kiite, “Tin orra piita' piisa isha kamma anniiy. akkiman ino we takkan' nefo koda an ettaninnin i'akkinittane?”
20Etasene a xayso nessumaati, orra Yursaalamipa sakatatta aane oppaayye, orra Kirikki takka takka ca. 21Ishootta ka Kelilaayye nama takka a katama Peete Sayda' kodde Filippoosi kapopa aanen ka ishi' kidene, “Poqallaay, Yesuusi akkeetan faaninna.” 22Filippoosi ka aane ka turaayye Intiriyaasi' lele. Intiriyaasi isho Filippoosi ka ollin aanen ka Yesuusi' lelen. 23Yesuusi ka oorshe ka ishootta' kide, “Tin saateta a oppaayye inna a nama ulfeessaman ikayte. 24Anti dukaatannen ishina' kiini, uqqinteeta a kappa oton piitoppa'e in piinin ka in tooniniiyyi, xawwaati hasni. Oton itoota xoori lekaya dalli. 25Nama isi jaalanno isi patinni; nama piisse' qara isi needdino xoori caatta paraparati'i isi tooytini. #Maati 10:39; 16:25; Maari 8:35; Luqa 9:24; 17:33 26Nama orxaytiyyo kodda heeno, a ana kamma de'o; pora an anti oppaayye co, orxaytiyyo eeyyew caada; nama orxaytiyyo kodde Aappa i'isha ulfeessa.”
Yesuusi akkima qoota rakkoota isho toota a isha qara' kayto desa haasawade
27Kamma' desa Yesuusi ikide, “Tin anti qaapannen kupade ka kuli maanan kida, hela in kida ‘Aappo, saatese kela anan pahe?’ Ma xoori akkan asse an kiinini'i, saatese a rakkoota mallan de'e; 28Aappo, maxxaayti ulfeesse!”
Se kammaayye nessa a kiino, “Maxxiyyo in ulfeesse ka oppa' ooraaw ka ulfeessaaw” ka moonte xata dakaade.
29Orra eeppaayye qaqqa'anno ete nessoose dakayeeyye ikide, “Ha qaqawwa!” Ademo ka kidene, “Ha erkampattoota ishi' haasawade.”
30Yesuusi ka oorshe ka kide, “Ha nessoose ishin malla de'e diisheey, ana malla in deene. 31Eta a oppaayye piisse' qara faratamta amma. Eta a oppaayye poqallasene a piissiti, seetana lakopa katamo nefo, ammaaw. 32Anti oton piita qareela opeela qeedamooyye, orra piisan issipa tita.” 33Yesuusi wa malla asse haasawade, toota atta pahato akkima to'o akkissa malla.
34Orrase ka ishi' kide, “Wa seeroppa' taafame, anka akkininna, ikiini, ‘Kiristoosi haka paraparati kallaadaay,’ atti atta' kiini ‘Inna a nama fannisama ishootta faani?’ Innoosene a nama kan ayno?” #mas 110:4; Issa 9:7; His 37:25; Taani 7:14
35Yesuusi ka ishootta' kide, “Amma eta shakkaya kara'e la'ayta ishin kapa caay, akka tukkanta ishin qare in qinnin turan, a la'ayta ishin kapa cooyye pora aana. Nama tukkantoppa pora anno, pora a opa anno in upooy. 36Akka hellaa la'ayta' kodditane'e, a la'ayta ishin kapa co oppanneew la'aytoseti amana.” Yesuusi ete sede haasawade kammaayye, i'aane ka ishootta tura dekade.
Yihutaata akkima in amannin
37Yesuusi kadi punu kodaddaasene orra qawwanna lekaya fuulaaysho' tura' kode nefooyye, Yihutaata isha in amanne. 38Sede nefo wa malla asse koddite, qaaletase a xuumampaytase Issayyaasi haasawade ka kide,
“Poqallaay, ayno maakkuminno amane?
hupna Poqalla ka ayno' akkaade?”
akka dikkatto malla. #Issa 53:1 39Issayyaasi ka oppa' ooreew ka akkima in amannin upnayshe ka kide,
40“Akka ildaassotinni in akkinini'i,
ka karittaaysho' kara matte in qapnaannini'i,
ka desa in oorrin ikka ishootta in dininnini'i,
Waaqa ildaasso' lulshe
ka karittaaysho daka' kode.” #Issa 6:10
41Issayyaasi wa malla asse kide, qoota ulfeena Kiristoosi akke malla qoota Yesuusi desa sede haasawade. 42A koddito ma, saarra a Yihutaata kuli oppaayye lekaya Yesuusi amane ma, xoori akka Feresaata tikase a qinseeta a orra Yihuta kelaayye alle ishootta in daannini fuuren ka ildaappa desa ishi maakkuma diishen. 43Wa malla asse kodene nefo, qoota ulfeena a Waaqa kapa teyanno kapa a nama kapa teyanno jaaladen malla.
44Yesuusi ka nessaadi kuttishe ka kide, “Nama ana amanno, ana patta amanni in co ma, isase ana erke kuli amanni. 45Nama ana akkino, isase ana erke akkini. 46Nama ana amanno piisa akka tukkantoppa in kallaannini'i, anti la'aytan kodde ka piita qaropa de'e. 47Nama qaaletiyyo dakayo ka ishin kallaanni in kinnin a isha qara' farato anan. Anti piita dinissa'en de'e diisheey, piita qara' farata an deene. 48Nama ana tiinno ka qaaletiyyo teyyanni in kinnin qara'e a farato ca. Qaalese an anti haasawade isheetta kuyyaata piraampiratiiyyi isha qara' farata. 49Anti hupniyyo a ukkumeetatin an haasawanne; ma ajajose an anti lello ka haasawanno a ana' daashe, Waaqa Aappa isase ana erke. 50Ajajaadi nefo akka caatta parapara' kodde in upa. Semalla anti wa Waaqa Aappa ana' lele'en haasawanni.”
Actualmente seleccionado:
Yohaannisi 12: MaQu
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión