Luqaasi 10
10
Akka otoose a fayya kollishane'e Yesuusi tamaarewwaadi kunda tappa lakki erke
1Se kammaayye Poqalla, orra pila nama kunda tappa lakki reexadeew#10:1kunnda tappa lakki: mataaffa a ollopa marramma takka takka “kunnda tappa” kiini. ka katamadda isho porra a oppopa isha anta dikade pisa opa akka isha turan desa aanane'e, nama lakki lakki ollin qape ka erke. 2Ka ishootta kide, “Fera ikutti, ferampaya xoori shakkayaawweey, semmalla aappa dula, akka ferooseneti ferampaya padaawo ka erko'e, isha qinsada. #Maati 9:37-38 3Oori aana, tin anti akkima kaharra mina'en yooytoppopa ishin erkini. #Maati 10:16 4Oto annittaneeyye, we takkan nefo an teyyadan; porsa kaaja koddite, qarateeta koddite, xoopa koddite in teyyadan. Umma poroppa qa'atta ka nakayta kaassattan eta an piran. #Maati 10:7-14; Maari 6:8-11; Luqa 9:3-5 5Tika a karopa kullitan piisa'e turan qattisha ka kida, ‘Toolaayti, nakayta a ishina koddo.’ 6Oton tikoose karaayye nama a nakayta jaalanno cayye, nakaytaayshin i'ishi kodda. Ataakkiti nakaytaayshin i'ishina oora. 7Kodampayta'e, mushaara iparpaaccisni; semalla tika a karopa kullitan karaayye, wa ishina dehaade dama ka ikka ka eyye' tawa diisheey, tika takka desa tika pila opa in tittiitaawan. #Qoro 1ta 9:14; Timo 1ta 5:18 8Oto katama takkan karopa kullinittaneeyye, orra ka ishin teyyadooyye, wa ishina dehaade dama, 9ka paaqolaya katamoosen kara ca dinsha ka samayta torra ka kida, ‘Mankisteeta Waaqa ishin kapopa idehaatte.’
10“Ma xoori, oto katama takkan karopa kullinittaneeyye, orra ka ishin teyyanni in kinniniiyyi, mooraasso oppopa sooka ka ishootta kida. #koda 13:51 11‘Tin kuyyaalayta katamaassina a loqqaanno quda co kulin ishina dawdawaninna. Ma xoori akka mankisteeta Waaqa ishin kapopa dehaatte upnaada.’ 12Anti in ishina kiini, kuyyaata firteetati katamoosen kapaayye, katama Sotoomiti'i qitaateta shakkatta.” #uuma 19:24-28; Maati 10:15; 11:24
Katamadda amanteeta tiiteeta minan qootisame
Maati 11:20-24
13Kamma'ew Yesuusi ikide, “Oo ke kido Korasini! Oo ke kido Peete sayda! Katin daxxowwosene ishin kara kodame'e, Tiroosi isho Sidoona kara kodame kiiteeyye, orra siti ishootta kara kalo, helani esse xattaaw ohawwa dapteeta uwwisanni heenen ka tarappa kutiini heenen, ka juppootaaysho oppa oorri heenen. #Issa 23:1-18; His 26:1—28:26; Iyyu 3:4-8; Amo 1:9-10; Sakka 9:2-4 14Semmalla kuyyaata firteetati, ishin kapaayye katama a Tiroosi isho a Sidoonaati'i qitaateta shakkatta. 15Atti Qifirnahoomi, hela moontandela kuttatta faate? Si'oli karopa lekkatta.” #Issa 14:13-15
16Yesuusi ka tamaarewwaadi kideewwe, “Nama ishina dakayno ana'e dakayni; nama ishin teyyanni in kinnin ana teyyanni in kinnin; nama ana teyyanni in kinniniiw, a ana erke teyyanni in kinnin.” #Maati 10:40; Maari 9:37; Luqa 9:48; Yoha 13:20
Tamaarewwasene kunda tappa lakki akka pora opa erkameneeye kalen
17Tamaarewwasene kunda tappa lakki, pora opa erkameneeyye xasan kalen ka Yesuusi kapopa dehaaden ka ishi kidene, “Poqallaay, maxxaaytin orriyya kuli ino ajajame.”
18Yesuusi ka ishootta kide, “Ha a seetana, a hankaada mina shuulame ka moonte pi'inon akke. 19Tin akka maaka isho kitatta qara diitan ka hupna paarakaala piisa puttane'e, hupna ukkumeeta in ishina daashe, umma wa ishin miidda takkan nefo in caan. #mas 91:13 20Ma xoori, qoota orriyya ishina ajajamen malla in xasoodan ma, qoota maxxaayshin maskapa moonta oppa taafame malla xasooda.”
Yesuusi akka xasoottaadi upnayshe
Maati 11:25-27; 13:16-17
21Sitiiyyi Yesuusi Hapura Qulqullootatinni xasoode ka kide, “Poqalla a piita isho a moonta Aappo xanno, qoota orra ookuma isho upna qapo tura sede juutte ka a sene in qapniniti upnasse malla, in ke kalataysanni. Aa, Aappo xanno, sede kodeeta heennaati a paxaara.”
22“We piisa Aappinno kapa ana daasame. Inna, ayno akkima kodde Waaqa Aappa maliiyyi nama upo takka nefo in co. Umma Waaqa Aappa ayno akkima kodde, inna maliiyyi, taaki nama a inna isha la'assa, heenan maliiyyi nama upo takka nefo in co.” #Yoha 3:35; 10:15
23Kamma desa Yesuusi tamaarewwaadipa desa tiitaawe ka ishootta patta kide, “Orra wa ishina akkitene akkino, eeppisame. 24Dukaatan xuumampaya isho nuqussa lekaya, wa ishina akkinittane akkeeta xajeele, umma in akkine; ka wa ishina dakaynittane dakaya xajeele, umma in dakayne.”
Suraysattampaytase a piita Samaariya
25Kuyyaata takkaayye kollissampayta takka a seera'e Yesuusi kapopa de'e ka isha ekkaysatta fade. Ka isha kaassade ka kide, “Kollissampayto, caatta parapara akkatta'e maana kodeeta ana faani?” #Maati 22:35-40; Maari 12:28-34 26Yesuusi ka ishi kide, “Seeroppa maana taafame? Oto nappapnittooyye, ikka atta ke kalli?”
27Namase ka ishi kide, “Seera ikiini, ‘Waaqa Poqallaatti, karittaayti piisan ka isi piisan ka hupnaayti piisan ka dikattaayti piisan, jaalado; ka akkima isi jaalannitto mina'e, kantittaayti jaalado.’”#Lewi 19:18; ooreta 6:5
28Yesuusi ka ishi kide, “Dukaata lelte, atti kuli asseew kode; caatta parapara'e akkattaay.” #Lewi 18:5
29Kollissampaytase a seera xoori hanqeellayta isi koda fade ka Yesuusi kaassade ka kide, “Hela amma kantittiyyo ayno?”
30Yesuusi ka ishi orshe ka kide, “Nama takka Yursaalami xata Iyyaarkopa lekkanni. Aporoppa cooyye, xolma tooma ka isha akken ka mehaddaadi a kalsade quda sookshen ka ete oppa qiden kammaayye, nessa patta oppa diishen ka kapa tawen. 31Qeesitta takka xaadi anno ka porose oppa xata anni; ka ete namase qidame ka eyye katame akkeyye, a we takkan nefo isha in koonin maliiyyi, qinda pilaatin maqe ka kapa tawe. 32Asseew Lewitta takka ka porose oppan anniw. Ka ete namoose akkeyye, a we takkan nefo ishi in koonin maliiyyi, qinda pilaatin maqe ka kapa taweew. 33Samaaritta takka 'xoori, ete eyyen tarpinooyye, namase kapopa de'e. Ka ete isha akkeyye isha suraysade. #otoo a 2ta 28:15 34Ka isha kapopa dehaade ka faykaadi qara'e sayteeta isho taadeta wayneeta ishi tuqe ka japaran qara ishi mare; ka harreetaadi qara isha kutiishe ka tika takka a xaykitta opa ishin aane; ka eyye qanqannissa isha ade. 35Ka parraytaadi tinaareta lakki qeede ka aappa tikase a xaykittati daashe ka kide, ‘Qanqannissa namoose ana ade; ka oton ikaaja a se qaropa ca'e kamma pirteyye, oton oorrooyyen ke oorshaay.’ #10:35 “tiinaara” piita ayihutatiiyyi, sitiiyyi tiinaara takka xaayya kuyyaata takka kapae nama xaffalammi.
36“Kuliyya namoose sessaappaayye, namoose a xolma tooma oppa qiden ikka eyye pi'e, ayno kantittaadi a paxaara kodde ke pahata?”
37Kollissampaytase a seera ka ishi oorshe ka kide, “namoose isha suraysade ka isha qaarqaare.”
Yesuusi ka kide, “Asseeyye atti kuli aane ka asseew kodeew.”
Yesuusi Maariyaami isho Maarta kapopa aane
38Yesuusi tamaarewwaadi olli anta kammaaw caade ka paleeta takka kaye. Eeyyeeyye iskatteeta takka Maarta kidammitto ka tikaadipa xaykuma isha teyyatte. #Yoha 11:1 39Enentaaysho nefo Maariyaami kidammi; Maariyaami loqqa Yesuusi kela'e kutiite ka kollissaadi dakkaysanni. 40Maarta xoori, damta harmissaanne a kuttati payyahani ka semmalla Yesuusi kapopa de'ete ka ishi kiite, “Poqallaay, sede a enentinno koda piisa ana qara diisse, anti ka xawwaati payyahano. i'akkiniiy atta jaw kiini? Akka ana qaarqaarto ishi lele”
41Poqalla Yesuusi ka ishi oorshe ka kide, “Maarta, maarta, atti we lekaya qaapni ka dikattan kupanni. 42Ma xoori wa fadamma takkaneew, Maariyaami wa fayya'e reexatte; umma nama takka nefo isheetta qara in qeedo.”
Actualmente seleccionado:
Luqaasi 10: MaQu
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión