Luqaasi 15
15
Pahana a laahase pate ka kuli teyadeeti
Maati 18:12-14
1Orra qarata qaratno isho juppoolaya piisa ka kollissa Yesuusi dakkaysatta, isha kapopa ollopa de'en. #Luqa 5:29-30 2Feresaata isho kollissampaya a seera ka sede akken ka qoota Yesuusi desa qoojqoojin ka kiini, “Isha juppoolaya teyyanni ka ishootta olliiyyi damta dammi” 3Yesuusi ka pahanoosen ishootta haasawade ka kide,
4“Ishin oppaayye nama kaharra dippa qapo, kaharroseni oppa takka ka pattooyye, a kaharrasene ata hase kunda sakali sakal kappina oppa in diinnin ka haka takkase pate akkino kara'en in faanini ayno? 5oto akkooyye i'asooda ka xashshittan haada, ka ishin kala. 6ka oto tika kayooyye, moottadaadi isho kantiyyaadi ollopa halaa ka ishootta kida, ‘laahase xayyo pate in akke ka xasoodeey ishina kuli xasooda’ 7Semmalla in ishina' kiini, hanqeellaya kunda sakali' sakal a juppootoppa tiitawa ishootta parpaaccisni in kinnini kapaayye, juppolayta takka a juppootaadi oppa tiitaawno minanne moonteeyye asseew xasa koddini.”
Dakarase a pirreeta pate ka kuli teyade
8Kammadesaaw Yesuusi ikide “Iskatteeta a dakara pirreeta kudan qapto, kati oppaayye takka pattaayye, ipsa opaysanni in kitto ka tikaadi kela sahannin kitto ka haka dakaroose a pirreeta teynitto kara'e qanqannissa faani in kitto? 9Oto teytooyye moottadaadi isho kanttiyyaadi ollopa haleeta ka ishootta kiita, ‘Dakarase xayyo a pirreeta pate in teye ka xasoodeey ana olliiyyi xasooda!’ 10In ishina kiini, juppoolayta takka a juppootaadi oppa tiitaawno minanne moonte erkampattowwa a Waaqa asseew xasoonni.”
Innasene pate ka kuli teyade
11Kamma desaaw Yesuusi ikide, “Aappa takka hellaa lakki qapa. 12Kussitta ka aappaayshoti kide, ‘Aappo, teyantaayti quda ana qootte ka qeraytiyyo ana daashe’ Aappaase xaaysho ka teyantase xaadi hellaadi lakki oppa qoote. 13Kuyyawwa lamaya kammaayye, kussittase ka kaajaadi piisa ollopa oorsade ka piita seka opa aane ka piisseti'i, kaajasene xaadin kahade ka piisa pire.
14“Ete kaajasene xaadi piisa pire kammaayye, piisse oppa loota kokkoka ka deete. Ikka rakkoota qara pi'e. 15Ka semmalla orra piitoseti oppa takka kelopa oore. Ikka sikmayta tuuyyowwaati isha kode. 16Isha ka ukkashshase a tuuyyowwasene dammaane mattaadi dameeta xajeelli; umma nama sede nefo ishi daasho in co. 17Sitiiyyi oori innasene ishin dapayytaade upnaade ka issi kide, ‘Orxaya aappinno kela kira koona a damta duttanna ikka ishootta kela hasnitta meeqa! Anti ka are do'an tooni. 18In xa ka aappinno kapopa aana ka aappinno kida: aappo fuula Waaqa ka fuulaayti ture'en ishin dape. 19Umma arepa desa innaatti kidama ana parpaaccisni in kittooy; orrose ke kela kira koono oppaayye a nama takka kapa ana dike’ 20Ka semmalla xa'e ka aappaaysho kapopa aane. Aappaaysho ka laka desa isha akke ka isha suraysade ka turopa keere ka isiqudopa qapade ka isha dinke. 21Innasene ka aappaayshoti kidene, ‘aappo, fuula Waaqa isho fuulaayti tura'en ishin dape, umma arepa desa innaatti kidama ana parpaaccisni in kitto’ 22Aappaaysho xoori orxayaadi hale ka ishootta kide, ‘Jarjara ka mehadda akata paxaara qeeda ka isha quda kalsha ka qupittaadi quda jifeeta ka loqqa kela xopa kuli ishi kalsha. 23Ka meerta qeeda ka qalla ka damma ka xasoonna. 24innoosen xayyo paayyota ito'en ka amma caadeneey; ipaten ka amma akkaadeneey’ Ka oori xasootta paayyen.
25“Sitiiyyi qaarta dulopa sookade ka ete kallooyye ka tika kapa foolsadeeyye, nessa Kehayta a dawammo ka a kirpa dakaye.
26“Ka orxayaappaayye takka hale ka kaassade ka kide, ‘Ata wossen maana?’ 27Orxaytase ka ishi kide, ‘Qoota innassin kalen; aappaayshin ka nakaytan isha akke malla meerta ishi qale.’
28“Qaartase xaaysho ka harmo miirode ka kide, ‘Tika karopa an kullo’ Aappase xaaysho ka xarroppopa sooke ka akka kullo isha naappade. 29Innasene xoori i'appaayshoti kide, ‘Tin parroosen piisan ke kela yaale, umma apariiyyi ajajaayti antiinne. Ma xoori akkan moottadaayyo olli ishin xasoodo'e nyalqitta qolpayta nefo ana'e a daanne. 30Innasene xaayti xoori, ete almaleeta iskatta kela teyantaayti pire, ka kaleeyye, meerta ishi qalte’ 31Aappaaysho ka ishi kide, ‘Innaayyo, atti awta piisa ana olli kitta; wa an qapa piisa kan xaaytiiw. 32Innoosen xaayshin xoori, ito'en ka amma caaden; ka paten ka amma teyadeneey, xasootta ino faani.’”
Actualmente seleccionado:
Luqaasi 15: MaQu
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión