Luqaasi 21
21
Daassatase a hiyyetteeta
Maari 12:41-44
1Yesuusi ete ela kide ka tooynooyye, a teyantoolaya saatineetase karopa hiyyeessa kaaja pohonaan, karopa kaajaasso dakkina'e akke. 2Ka akkamoose mina'ew hiyyeetteta takka a saatineetase karopa santima lakki kannitto akkeew 3ka kide, “Dukaatannen ishina kiini, hiyyeettese, piisa qaropa qapnasse ka daasse. 4Ishootta a teyaantaysho kela haste daashen; isheetta xoori, teekolayteeta ma, wa a qapta piisa daasse.”
Yesuusi akka tika qulqulloota qitqitto xuuma haasawade
Maati 24:1-2; Maari 13:1-2
5Orra demo, itorrinni ka kiini “Tikoose a qulqulloota, oo atta paxaari! Ha dakadda a heraan kokokkoka isho daassawwa a Waaqa daasametinne siramte;” 6Yesuusi xoori i'ishootta kide, “Dakadoosen a' tooynittane piisa kuyyaata a oppaayye akka dawamenen oli qara in caannini de'a. Dakadoosen piisa kuyyaata takka iqitqitan.”
7Ishootta ka isha kaassaden ka kidene, “Kollissampayto, sede aytami asse koddita? Eta oppa sede koddita dehaattaaysho milikkita an ishin upnaanno maana.”
8Yesuusi ka ishootta oorshe ka kide, “Akka akkamma a dapnini'i, tooytaada. Lekaya maxxiyyon dea ka kida, ‘Anti an Kiristoosi ka kidaawwe tin eta idehaadeneey.’ Ishootta kamma in aanan. 9Oto qoota oranna ka qoota horaytati desa dakaytaneeyye, in tammaqan. Paayyota qara sene koddeeta ishootta parpaaccisniiy, a koddito ma piraampira in dehan.”
10Kamma desa Yesuusi ikideewwe, “Samayta samayta qara'e xa'a, mankisteeta ka mankisteeta qara' xaata. 11Pora poroppa'e, piita a kuttaati lellehta, do'a isho paaqa orra pirro ka de'a. Wa orra fufuurinna isho milikkitadda a orra qawwanna ka moonta quda akkadan. 12Ma xoori a sede piisa in koddinin turanne, orra ishina qaqqapa ka ishin kamma daana ka tikkasene a qinseeta a orra Yihuta isho tika hida opa ishin tarpisha ka qoota maxxiyyo malla saarra piita isho nuqussa turopa ishin qeeda. #21:12 orra yihuta tikase xaaysho a qinseeta kela'e deexa ka ishshaarritta kutiini. 13Sede ka akka qoota maxxiyyoti desa maakkumtane'e, aroota fayya ishina koddita. 14Semmalla kisseeta ishin qara dehaannito mina'e, wa' oorsattaneeti desa oppa rakkatta akkima ishin parpaaccisni in kinnin turanneew upnaada. #Luqa 12:11-12 15Anti afa isho ookuma paarakaaladdaassin oppaayye a nama takka nefo puteeta ka shiisheeta in ettaninnini'in ishina daasha. 16Toolla a ishin xaaye ka hellaassin isho daltayaddaassin ka moottadaassin kuli ishin qapsiisa ishin oppaayye orra demo ka leysama. 17Maxxiyyo malla akka orra piisa kapa a needdatame kodditan. 18Ma xoori nyirfa a mattaayshina oppaayye takkan nefo in patan. 19Akka duupattaayshinan issin pahatan.”
Yesuusi qoota pateetta Yursaalamiti desa akka turanneew lele
Maati 24:15-21; Maari 13:14-19
20Kamma desa Yesuusi ikide “Oto Yursaalami xela orannaatin kapa muramto, akka akkitaneeyye, pateettaadi akka desa kayte upnaada. 21Awsetiiyyi, a piita Yihuta kara ca, a irroowwa qaropa qahen; a katama kara ca a alle kara sooken; a kantada kara ca, katama karopa in kullinin. 22Xuumase qoota pateettati desa taafame akka dikkado'e, ini eta haalota pooyya ka a qitaateta'ey. #Hoose 9:7 23Awsitiiyyi iskatta a karittoppa inna qapo isho a luukinno, oo ishootta kido! Rakkoota a neeqa'e piita qara de'a, miira Waaqa ka samayse qara de'ay. 24Ishootta oppaayye orra lekayta koraatetan leysama, a demo ka poojama ka piitaddappopa qeedama. Haka xelta a orra a Yihutaata in koddinini dikkannitto kara'e, Yursaalami orra a Yihutaata in koddininitinni diitamta.”
Inna nama akkima lammatta ooran
Maati 24:29-31; Maari 13:24-27
25Kamma desa Yesuusi ikide, “Milikkitadda orra qawwanna'e piirtota ka leya isho hikka qara akkaada. Piita qara samayta piisa ka, nessase pakateeta isho puppeeta kara xaano ka orra tammaqinno qaran xaate'e fuura ka qaapa. #Issa 13:10; His 32:7; Iyyu 2:31; kele 6:12-13 26Samayta ka wa piita qara kaya asatta minan fuura an ririkkaawa. Awsiti hupnaada moonta iyaaqyaaqan 27Sitiiyyi orra ka inna a nama a oraarappa hupna ka ulfeena kuttan deeno akka. #Taani 7:13; kele 1:7 28Oto sede piisa kodda paayyinittooyye, dinayshin idehaadeey, ela kida ka opeela tooyyada.”
Pahanasene a hilteeta a deena poqalla akkinna
Maati 24:32-35; Maari 13:28-31
29Kamma desaaw Yesuusi pahanoosene ishootta' lele ka kide, “Qoyra hilteeta isho qora pila qanqannissa tooyya. 30Oto haashshaasso japarraaneeyye akka akkitaneeyye, akkima katana dehaade i'uptan. 31Akkamose mina'ew, oto sede piisa kodda paayinitto akka akkitaneeyye, akka deena mankisteeta Waaqa dehaaden upnaada.
32“Dukaatannen ishina kiini, haka sede piisa koddinitto kara'e, xeltose in tarpito. 33Piita isho moonta itarpan ma, qaaletiyyo in tarrpito.”
Japaattan asatta
34Kamma desa Yesuusi ikide, “Duttana a tura xeela in qapnin ka maashshootta isho kallaata piita qaapeeta minan, karittaayshin akka in kafannini'i, tooytaada; a taakati a isi qara a upnin mali kuyyaatose a turuura minae ishin qaptaay. 35Kuyyaatose, a isi qara in upnin mali orra a piita qara co piisa qara kayta. 36Semmalla akka wossen deena piisa kela pahatan ka fuula inna a nama tura qa'atta ettanissane'e, qinsada ka awta piisa japaada.”
37Yesuusi kuyyaata piisa tika qulqulloota kelaayye orra kollinni ka, oto halkeettaawtooyy, irroota Taprasayti kidammitto qaropa fayyanni ka eeyye mukni. 38Orra piisa ka Yesuusi dakkaysatta'e paraappan xaani ka tika a qulqulloota kelopa isha kapopa keeni.
Actualmente seleccionado:
Luqaasi 21: MaQu
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión