Luqaasi 22
22
Sullaata Yesuusi qara sulamte
Maati 26:1-5; Maari 14:1-2; Yoha 11:45-53
1Sitiiyyi xayso nessuma a laaqqota, isasene a qaran tarpeeta kidamma kela foolsatte 2Saarra qeesewwa isho kollissampaya a seera, qoota samayta fuuren malla, saanta ishin Yesuusi qapan ka ishshane dekaan dekatti faddanni.
3Sitiiyyi seetana ka Yihuta Asqorottittase erkamampaya a Yesuusi kudanka lakki oppaayye takka kodde karopa kale. 4Semmalla Yihuta ka saarra qeesewwa isho ajajampaya a tooytampaya a tika qulqulloota kapopa aane ka atta akkima Yesuusi qapsiiso, ishootta olli oorsade. 5Ishootta ka seppa xasooden ka akka kaaja kuli ishi daashane olli kalen. 6Isha ka oppa owsade ka a orra in upnin mali akka Yesuusi qapsiiso aroota ettanto faddanni.
Yesuusi akka eetota a qaran tarrpeeta erkamampayaadi olli dame
Maati 26:17-25; Maari 14:12-21; Yoha 13:21-30
7Sekkammaayye xayso nessumasene a laaqqota a oppaayye laahase a qaran tarpeeta qallaane kayte. 8Yesuusi ka Peetiroosi isho Yohaannisi erke ka ishootta kide, “Akkan eetotose a qaran tarpeeta dammo'e aana ka ino' harmisha.”
9Ishootta ka isha kaassaden ka kidene, “Eetotose a qaran tarpeeta akkan aysha ke harminno heenta?”
10Yesuusi ka ishootta kide, “Oto katamaappopa kullinittaneeyye, tin nama okkotan pisha haano akkitaneey, isha kamma' aana ka tika a namoose karopa kullo karopa kamma kulla. 11Ka aappa tikoosetiti kida, ‘Kollissampaytinno ike kiini, tika xaykitta an kela tamaarewwaayyo ollin eetota a qaran tarpeeta dammo a xaame?’ 12Isha nefo tika kuttayteeta a pafta qara kitto ka fayya harmisamte ishina akkishaay, eyye ino harmisha.”
13Tamaarewwasene lakki ka aanen ka akka Yesuusi ishootta kide mina we piisa ka kodden, ikka akken; ka eetotase a qaran tarpeeta eyye' harmishen.
Taanteta a qulqulloota qurpaana
Maati 26:26-30; Maari 14:22-26; Qoro 1ta 11:23-25
14Ete saatetase kayteeyye Yesuusi, erkamampayasene xaadi olliiyyi damta kuti'e. 15Ka ishootta kide, “A rakkoota ana qara in kaynin turanne, akkan ishin olli eetotose a qaran tarpeeta damo'e a kuttatin xajeelli. 16In ishina kiini, haka mankisteeta Waaqatiiyyi, dukaata wosseneti a juutamte immakootan laka sooknitto kara'e arepa desa eetotose a qaran tarpeeta an damo.”
17Se kammaayye Yesuusi tiwwa qeede ka qara Waaqa kalataysade ka kide, “Hinda ka ollin kaya.” 18Dukaatan ishina kiini, “Ammaayye paayyatte haka mankisteese Waaqa deenitto kara'e ikkaytoose a dalta a wayneeta oppa an ikko.”
19Kammadesa Yesuusi laaqqoota qeedeew ka qara Waaqa kalataysade ka oppa moosse ka ishootta kide, “Hinda, sede dakintase xayyo ishin malla daasammittooy, sede matte anan oorsatta koda.” 20Ka eetota kammaayye tiwwa qeedeew ka ishootta daashe ka kide, “Tiwwoose kodeetase haaraya a diikase xayyo ishin malla tuqamon, kodammitto.
21“Ma xoori harka a nama ana qapsiisooti, tin are tomoppa ana olli dammi. 22Inna a nama, akka turan qootaadi desa muramte mina'e, ito'a. Ma xoori, nama inna a nama toota qapsiiso, oo isha kido!” 23Ishootta ka, oli kakaassaden ka kidene, “ino oppaayye ayno asse koda?”
Ayno piisa qara jaalli
24Se kammaayye ishootta ka oli shiishsha paayyen ka kidene “Ayno ino piisa qara jaalli?” #Maati 18:1; Maari 9:34; Luqa 9:46 25Yesuusi xoori i'ishootta kide, “Nuqussa piisseti, samayta qaraayye hupna ukkumeeta'e qapan; mukissampaya ka, a samayta pa'aarumta koona kidammi. #Maati 25:27; Maari 10:42-44 26Ishina xoori a xaaysho mina koddeeta ishin faani in kitto; sekapaayye a ishin oppa nama kutta kodde, a nama shakka mina' koddo; a saara koddeew a orxayta mina koddo. #Maati 23:11; Maari 9:35 27Adamta kute'e ka dammo isho a qa'ade ka ishi paata deddehanno oppaayye, a xaame kutti? Akutta kidammo sede damta kute'enne? Anti xoori ishina oppaayye an orxayta mina. #Yoha 13:12-15 28Ishina kiseetiyyo a rakkoota pisa oppaayye ana olli japaatten. 29Semmalla akka Aappinno mankisteetaadi qara ana shuume, mina'e, anti mankisteetiyyo qara'en ishin shuuma. 30Semmalla mankisteetiyyo oppaayye damta kutiitan ka damtan ka ikkitan; ka sufaana qara kutiitan ka kaffasene a Isira'eeli kudanka lakki qara' farattan.” #Maati 19:28
Yesuusi akkima Peetiroosi isha marmado turanneew haasawade
Maati 26:31-35; Maari 14:27-31; Yoha 13:35-38
31Kamma desa Yesuusi ikide, “Simooni Simooni, tin, akkima qotampayta miillatoppaayye ukkashsha xayyinno mina'e, seetana ishin xayyissa fade. 32Anti xoori akka amanteetaayti in pannini'in Waaqopa ke' qinsada. Atti oto tiittaawtooyye, hellaassin kokkonnayshe.”
33Peetiroosi ka kide, “Poqallaay, kadi punu hida ka toota kodditeeyye, anti ke olli anta in harmisade.”
34Yesuusi xoori i'ishi kide, “Peetiroosi! in ke kiini awwe a lukkalitta in iyyinin turanne, ‘An isha an upo’ kiita ka sessaan ana marmatta.” 35Ka sekkammaayye tamaarewwaadi kide, “Hela awtan porsa ka qarateeta isho xopadda maliiyyi, ishin erkeeyye, wa ishina qaje icaane?” Ishootta ka ishi oorshen ka kidene, “we takkan nefo ino in qajine.” #Maati 10:9-10; Maari 6:8-9; Luqa 9:3; 10:4
36Yesuusi ka ishootta kide, “Amma oori nama porsa taaki qarateeta qapo a isquda teyyado. Nama koraateta in qapnin nefo, a mehaddaadi a kalsanna kato ka koraateeta piddado. 37In ishina kiini, wa turan qootiyyo desa taafame piisa qoota dikkatta ishootta faanitto malla, qaalese a mataafa qulqulloota kiinitto ‘Tiyyoolayaappa'e dikame, ana qara dikkatta isheeta faani. #Issa 53:12
38Tamaarewwaadi ka ishi kidene, “Poqallaay, tin koraateta lakki areeyye ca.” Isha ka ishootta kide, “ikoddite.”
Yesuusi akkima Taprasaytiiyyi qinsade
Maati 26:36-46; Maari 14:32-42
39Yesuusi katamaappa sooke ka akka kollimaadi mina'e, Taprasaytipa aane. Tamaarewwaadi ka isha olli aanen. 40Ete eeyye kayeneeyye, Yesuusi ka ishootta kide, “Akka ekkaysumaappa a piinini'i, Waaqopa qinsada.”
41Ka sekkamma a xaptitta daka mina kitto ishootta kapa desa sekaade ka kilpiippade ka qinsade ka kide, 42“Aappo, oton iheentaayye, tiwwoosene a rakkoota alle ana qara sekayshe. Ma xoori a heennaati qara koddito diisheey, xayyo qara in koddinin.” 43Sitiiyyi erkampattoota a moonte deete ka isha tura akkaatte ka isha kokkonnasse. 44Ikka karan xata dikke qaapni ka a kuttati qinsanni, ditiita ka a diika mina isha qara piitopa tajtajni.
45Ka qinseetase qara xa'e ka tamaarewwaadi kapopa aane ka nyarrahata qara koopte qaran xaate'e, ishootta muke akke. 46Ka ishootta kide, “Maana'e muknittan? Sekkapaayye akka ekkaysuma oppa a piinini'i, xa'a ka Waaqa qinsada.”
Yesuusi akkima qapame
Maati 26:47-56; Maari 14:43-50; Yoha 18:3-11
47Yesuusi ete sede haasawattaappa cooyye, orra lekayta ka eennow de'e. A ishoottan de'e nefo, Yihutase kudanka lakkasene oppa takka kodde. Ka Yesuusi dinkeeta isha kapopa dehaade. 48Yesuusi xoori i'ishi kide, “Yihuta! hela dinkittanne inna a nama qapsiisni?”
49Tamaarewwasene Yesuusi kapa ca, ete wa koddina akkeneeyye, i Yesuusi kidene, “Poqallaay! in koraatetan ishootta qiina?” 50Ishootta oppa nama takka ka orxayta a saara qeesewwa koraatetan dayshe ka qudaayye napahata a akkitta mure.
51Yesuusi xoori ikide, “Diishe, ka lammatta asse in kodan.” Ka napahatase a namaseti quda qappade ka dinshe.
52Se kammaayye Yesuusi, saarrasene a qeesewwa ka ajajampaya a tooytampaya a tika qulqulloota isho qimootase a piita isha qapa deete'e kide, “Sede a koraatewwa isho kumaya qapatten ka ana qapa deetene, hela an kera? 53An awwta piisa tika qulqulloota kelaayye, ishin olliiyyi cooyye, ana a' qapne. ammaa xoori ini etaassin ka eta hupna tukkanta.” #Luqa 19:47; 21:37
Peetiroosi akka Yesuusi marmade
Maati 26:57-58, 69-75; Maari 14:53-54, 66-72; Yoha 18:12-18, 25-27
54Sekkammaayye orrase, Yesuusi qeede ka, tika saara qeesewwa opa ishin aane. Peetiroosi ka lakeedesa isha kamma desa anni. 55Orrase ka tikase kara apitta katade ka kapa ollin qaa'e. Peetiroosi ka de'e ka ishootta oppa kuti'e. 56Ete Peetiroosi apittase kapa kuti'eyye, orxayteeta takka ka la'aytase a apitta karadesa isha akkite ka isha quda ilda koote, ka kiite “Tin namoose turan Yesuusi olli ca.” 57Peetiroosi xoori imarmade ka kide, “Iskatteetayti, anti isha an upo.” 58Eta shakkaya kammaayye, nama pila ka Petiroosi akkeew ka ishi kide, “Atti ishootta oppa a takka.”
Peetiroosi ka kideewwe, “Namo! anti ishoottoppa an qapo.”
59Ete saateta takka mina kitto jare kammaayyeew, nama takka a pilaa ka Peetiroosi qara nessa kokkonnayshe ka kideewwe, “namoose qoota Kelelitta kodde malla, dukaatanne Yesuusi olli ca.”
60Peetiroosi xoori ikide, “Namo! wa kiinitta anti an upo.” Ete sede haasawattaappa cooyye, lukkalitta ka eennow iyye. 61Sitiiyyi Poqalla Yesuusi ka desa tiitawe ka Peetiroosipa desa tooyyade. Peetiroosi ka qaalese a Poqalla Yesuusi haasawade ka kide, “Awwe a lukkalitta in iyyinin turanne sessan ana marmatta” Matte oorsade. 62Ka lakopa sooke ka a kuttati pooye.
63Sitiiyyi orrase Yesuusi qape ka isha qara seesni ka ishoppa qiini. 64Ka ilda qara ishi hideew ka ishi kiini, “Ayno ke dayshe? Oton a xuumampaytaayye intoonno upadooy.” 65Ka we lekaya isha qara' haasawanni ka ishoppa onni.
Yesuusi akka firti shoonkota turopa qeedame
Maati 26:59-66; Maari 14:55-64; Yoha 18:19-24
66Ete pariteeyye, qimoota piita ka saarra qeesewwa isho kollissampaya a seera ollopa aanen. Ka Yesuusi isi turopa dehayshen. 67Ka ishi kidene, “Oton a Kiristoosiiyyi intoonno ino' leleey?”
Isha xoori i'ishootta kide, “Katin ishina lela nefooyye, a ana amantan; 68Umma katin ishin kaassada nefo, a ana'e a oorissan. 69Ma xoori ammaayye paayyatte inna a nama, harka a hupnampaytase a Waaqati'i akkitta kuti'an.”
70Ikka piisani isha kaassaden ka kidene, “Hela kuli atti a inna a Waaqa'e?”
Isha ka ishootta kide, “Aa akka ishina kiiten qara.”
71Ishootta ka kidene, “Qaaleta afaadippa sookte ino mattinno'e in dakayneey arepa desa maakkitta maana'e ino parpaaccisniiw?”
Actualmente seleccionado:
Luqaasi 22: MaQu
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión