Рут 2
2
Рут БогӀазил хурий хӀалтӀи
1НогӀомил вукӀана росасул рахъалъан гӀагарав, гӀезегӀан къадру-къимат бугев, Эли-Маликилгун цо къавмалъул чи. Гьесда цӀар букӀана БогӀаз.
2 # 2:2 Мусал къануналда рекъон, жугьутӀаз хур-ах тӀубан рагӀа-ракьанде щун бакӀаризе бегьулароан. КъватӀиса рачӀаразул, къороллъуда хутӀаразул, бестӀалазул ва мискинзабазул ихтияр букӀана гъутбузда хутӀараб пихъ ва хурзабахъ лъилъарухъабазухъа гъоркьа хутӀараб бугӀа-ролъ жидеего бакӀаризе. МогӀавияй Рутица абуна НогӀомида: «Бегьилищ дун хурзабахъе ине, дида гурхӀаразул хурзабахъа тӀор бищизе?» «А, дир яс», – илан абуна НогӀомица. 3Рут ана, ва лъилъарухъабазда хаду-хадуй йилълъун, гьезухъа гъоркьа хутӀараб тӀор бищизе жуяна. Гьеб хуралъул бетӀергьан ватана БогӀаз, Эли-Маликил агьлуялъул чи. 4Гьелде тӀадеги, гьеб къоялъ живго БогӀазги вачӀана гьениве Бетлегьемалдасан.
«БетӀергьанас кумек гьабеги!» – ян кӀалъана гьев лъилъарухъабазда.
«БетӀергьанасул баркат дудеги рещтӀаги!» – ян жаваб кьуна гьез гьесие.
5Жиндирго лъилъарухъабазе бетӀерлъи гьабизе тарав цо цеветеласда БогӀазица цӀехана: «Дой гӀолохъанай яс лъил кколей?» – ян. 6НогӀомида цадахъ МогӀавиязул ракьалдасан ячӀарай МогӀавияй йигин абун жаваб кьуна цеветелас. 7«Долъ дида цӀехана: „Бегьилищ дица лъилъарухъабазда хаду-хадуй йилълъун, гьезухъа гъоркь хутӀараб тӀор бищун, гьелъул диего гулал къазе?“ – ян. Радалго ячӀана дой, ва гьанжелъизегӀан, цодагьабго мехалъ гурони лъалхъичӀого, хӀалтӀулей йиго».
8Гьебмехалда БогӀаз кӀалъана Рутида: «Дир яс, гӀенекке дихъ. Мун тӀокӀай цогидал хурзабахъе унге тӀор бищизе, гьаниса киего унге мун, дир гьанир хӀалтӀулел ругел руччабазда цадахъ йикӀа. 9Лъилъарухъаби хӀалтӀулеб бакӀ бихьун, гьезда хадуй хьваде. Дица дир киналго хӀалтӀухъабазда лъазабун буго мун къварид гьаюгеян. Къечон, лъим гьекъезе бокьани, дир церетелаз цӀун лъун ругел гӀертӀазухъа гьекъе», – ян.
10ГӀодор накабиги чӀван къулана гьей гьесие ва абуна: «Щай дуца гьедигӀан дида цӀоб лъун дир тӀалаб-агъаз гьабулеб, дун къватӀисейлъидал?» 11БогӀазица жаваб гьабун абуна: «Дида рагӀана дур рос хун хадуб дуца дурго якьадалъе гьабурабщинаб лъикӀлъиялъул хӀакъалъулъ, эбел-эменги, дурго ватӀанги рехун тун, мун чияр ракьалде гочарайлъи. 12Рази гьаеги мун БетӀергьанас, ГӀизраилил Аллагьас, дуца гьабураб лъикӀабщиналъухъ, дуца Гьесул цӀобалда мугъчӀван бугелъул». 13Гьелъ абуна: «БетӀерчӀахъад, хаду-хадубги дур гурхӀел-рахӀмуялде хьул буго дир. Дуца дун разилъизаюна, рекӀее хӀалхьи гьабуна, дур лагъцин дун гуреб мехалъ».
14Къаде квание заман щварабго БогӀазица абуна Рутида: «Гьание ячӀа, кӀалдиб жо лъе, гьаниб къанцӀадулъги ччун кванай дурго чадил мочӀу». Рут ячӀун лъилъарухъабазда аскӀой гӀодой чӀедал, гьес гьелъие бассараб ролъул чӀер кьуна. Гьелъ гӀорцӀизегӀан квана, жеги нахъеги хутӀана.
15Хадуй тӀадеги яхъун, жеги тӀор бакӀаризе лъугьана. БогӀазица жиндирго хӀалтӀухъабазда лъазабуна: «Биччанте долъ гулазда гьоркьосаги тӀор бищизе, вореги нужеца долъул ракӀ бакъвазабуге; 16гулал къалелъул, нужецагоги цо-цо квацӀи гъоркь те долъие, ва щибго гӀайибги чӀваге долда».
17Гьединаб хӀалалда маркӀачӀумех щвезегӀан бакӀарана Рутица пурчӀина. Лал тӀамун хадуб гьелъул бахъана гӀага-шагарго цо къали цӀураб жо#2:17 АнцӀила анлъго килогӀанасеб жо.. 18Гьебги босун шагьаралде щвана ва гьалъул якьадалда бихьана гьалъ гӀезегӀан жо бакӀарун бугеблъи. Гьелда тӀадеги Рутица къватӀибе бахъун бачӀана ва якьадалъе кьуна къаде кванил тӀоклъун хутӀараб бутӀа.
19Якьадалъ гьалда цӀехана: «Киса жакъа дуца тӀор бакӀарараб? Мун кий йикӀарай хӀалтӀулей? Баркат лъеги жакъа гьадин дур тӀалаб гьабурав чиясда!»
Рутица жиндирго якьадалда бицана лъил бакӀалда йикӀараяли. Жий хӀалтӀулей йикӀараб хурул бетӀергьанасда цӀар БогӀаз бугилан бицана Рутица. 20«БетӀергьанас баркат лъегийин досда, чӀагоязеги хваразеги ритӀухъав вугелъул!» – ин абуна НогӀомица нусалда. НогӀомица тӀадеги жубана: «Дов чи нилъер гӀагарав чи ккола. Досда кӀола нилъее кумек гьабизе»#2:20 ЖугьутӀазул динияб гӀадаталда рекъон, «гӀагарав чи» абулеб рагӀул цоги хасаб магӀна букӀана. Росги хун, лъимерги нахъе течӀого васги хун, жийгоги херлъун цо пуланай гӀадан хутӀани, гьезул гӀагарлъиялъул бищун цевесев чиясда тӀадаб букӀана гьелъул тӀалаб-агъаз гьабизе. Гьединго гьес бецӀун босизе кколаан гьезул хутӀараб балъ ва гьелдаго цадахъ къороллъуда хутӀарай нусги ячине кколаан лъадилъун. Гьесда тӀадаб букӀана хварасул цӀар тӀагӀине биччачӀого, гьей гӀадамалъ гьавурав вас хварасул васлъун рикӀкӀун хьихьизе, ва тӀаде жиндирго рахъалдасаги жубан, доб тӀолабго бецӀун босараб балъ гьесие ирсалъе кьезе..
21МогӀавияй Рутица абуна: «Жиндир хурзал ракӀарун лъугӀизегӀан жиндир хурзабахъ ва жиндир хӀалтӀухъабазда аскӀой йикӀайиланцин абуна дос дида». 22НогӀомица абуна жиндирго нус Рутида: «Досда цере хӀалтӀулел руччабазда цадахъ мун йикӀине йигеблъи лъикӀ буго, дир яс, ва гьедин бугони, лъицаго мун инжит-хӀакъир гьайизеги гьечӀо».
23Хурзабазухъа пурчӀина ва ролъ бакӀарун лъугӀизегӀан#2:23 ПурчӀина ва ролъ хурзабахъа бакӀарулаан апрель моцӀрол ахиралдаса байбихьун, июнь моцӀрол авалалде щвезегӀан., БогӀазида цере хӀалтӀулел руччабазда аскӀой чӀун хӀалтӀана Рут, гьелъул чӀейги жиндирго якьадалъул бакӀалда букӀана.
Actualmente seleccionado:
Рут 2: АварАК
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© Институт перевода Библии, 2005-2023