Rukaxi 24
24
Kemɨranutanierixɨ 'umierieka
(Ruk 24:1-10 – Mat 28:1-8, Mar 16:1-8, Wa 20:1-8)
1Tsemana mexɨakame tukaritsie ximeri kwitɨwa, teukiyapa mekanekɨne 'ukarawetsixi witsimu'ɨa me'ahapatɨ memikuha'aritakai. 2Hikɨ teté mekaniutaxeiya heuhɨiyakame kitenie meukatei. 3Meheutahaxɨaka teukiyapa, mepɨka'itaxei Ti'aitame Ketsutsi kaxarieya. 4'Atsimepɨkatemaikai kememɨteyurienikekai mɨpaɨ mɨtiuyɨkɨ, hikɨ 'ukitsi yuhutatɨ wa'aurie mekaniti'uni merɨkawime me'anakatɨtɨ. 5Memamatɨ kwiepa mekaniukahɨxima'uni, peru mɨkɨ mɨpaɨ mekateniwarutahɨawe:
—¿Titayari mɨkite watsata xete'iwautɨwe mɨkɨ mayeniere? 6'Uwa pɨkayeka, kananukuketɨarieni. Xekena'eriwani kemɨtixe'utahɨawixɨ Karereyatsie 'uyeikatɨ 'akuxi, 7kexemɨte'utahɨawarie: “Yuri Tewi hepaɨtsita, kemɨreuyewekai mɨyetuiyanikɨ 'axateyuruwamete memiwiyakɨ, kuruxitsie mɨmierienikɨ, hairieka tukaritsie manukukenikɨ kemɨreuyewekai”.
8Hikɨ 'ana Ketsutsi niukieya menaye'erieni. 9Hikɨ teukiyapa mewayekɨneka mekanekɨne, 'ikɨ naime mekateniwarutaxatɨani tamamata heimana xeime, meta hipame yunaime. 10'Ukari Mariya Mararatanaka, Wana, Mariya Kakuwu mɨwarutsieyatɨkai metenitetewakaitɨni meta hipatɨta wahamatɨa memu'uwakai 'ukari yunaitɨ yamekateniwarutaxatɨani nɨ'ariekate. 11Peru mɨkɨ yakɨ me'utiyuaneme mekani'eriekaitɨni metekuxatakaku, yuri mepɨkatewaruta'eriri. 12Perutsɨ Pekuru kaneyani teukiyapa 'unautsarɨmetɨ. 'Anahuka nixeiya 'ixuriki mana 'akateme 'uyemaweme. Yukie kaneyani waɨka 'iyarixietɨ kemɨtiunierixɨ hepaɨtsita.
Kememɨte'ixei 'Emahu huyeyari 'utɨa me'uhutɨ
13Merikɨtsɨ mɨkɨ tukaritsie yuhutatɨ mɨkɨ huyeta menekɨne, kiekaritsie meneta'axɨanikekaitɨni 'Emahu mɨrakutewatsie, Kerutsareme nehurakaitɨni, yanetewakaitɨni tamamata heimana huta kirumetɨruyari xeikɨa. 14Metenikuxatakaitɨni naitɨ kemɨtiuyɨ hepaɨtsita. 15Merikɨtsɨ metekuxatakaku niuki mexɨatɨakaku Ketsutsitɨtɨ niwaranuku'axe me'uhukaku, wahamatɨa niumiekaitɨni, 16peru mepɨkapitɨariekai memeitimanikɨ. 17Mɨpaɨ katiniwarutahɨawe:
—¿Ketitita 'ikɨ niuki xemɨxɨatɨa xe'uhutɨ, titayari xeteyuhiwerie?
Mɨkɨ mana meniti'uni me'ayexɨxɨnitɨ yɨhɨxie, 18xewitɨ mɨkɨ Kɨreupaxi mɨtitewakai mɨpaɨ katinitahɨawe:
—¿Kari 'ekɨ 'atsipepɨkatimate Kerutsareme kemɨreyɨ takai 'atu, 'atsita kɨkamete mɨpaɨ mepɨtemate?
19'Iya mɨpaɨ katiniwarutahɨawe:
—¿Kereyɨkuta?
Mɨkɨ mɨpaɨ mekatenitahɨawe:
—Ketsutsi Natsaretitanaka, kemɨranayetɨa pekatimate. Mɨkɨ tewi Kakaɨyari hetsiemieme katinixaxatametɨkaitɨni, kemɨtiyurienekai kemɨtikuxatakai, kanitɨrɨkaɨyekaitɨni Kakaɨyari hɨxie yunaime teɨteri wahɨxie. 20Mawari wewiwamete tewa'aitɨwamete ta'itsɨkate meta mekaniyetuani hetsiena mɨrahɨiyanikɨ mɨmierienikɨ, 'arike kuruxitsie mepeimi. 21Tametsietɨ tekanita'ikwewakaitɨni yuri tete'erietɨ 'iya mɨhɨkɨtɨkaikɨ kemɨ'ane mɨtatsitixɨnakekai 'ixaheritsixi teɨteriyari. Mɨkɨ meta, haika tukari kaniyuriekari hikɨ, mɨya reyɨku. 22Matsi meta 'ukari tatsata miemete mepɨtatsi'ɨhɨxiyatsitɨa hikɨ, ximeri waniu menekukɨnixɨani teukiyapa, 23peru kaxarieya mepɨkahexei. Mekaniu'axɨani mɨpaɨ me'utiyuatɨ kename niuki tuayamete mewarexei meteheinɨme meyu'erietɨ, mɨkɨ waniu kename Ketsutsi 'ayeniere mekateniwaretahɨawe. 24'Ana hipatɨta tahamatɨa memu'uwa teukiyapa mekanekɨne, 'ukari kememaitɨkatei, mɨpaɨ 'aneme mepetaxei, peru Ketsutsi mepɨkahexei.
25Hikɨ Ketsutsi mɨpaɨ katiniwarutahɨawe:
—Kari 'atsixepɨkatemate, yu'iyaritsie xepu'itutupe, 'akuxi yuri xepɨkateta'eriwawe texaxatamete kememɨtekuxatakaitsie naime. 26¿Kareuyewekai Kɨritsitu mɨpaɨ mɨtikwinekɨ, 'arike mɨkake witsi'anetɨ karayanikekai?
27'Ana Muitsexi xapaya xatatɨ meri yunaime texaxatamete waxapa xatatɨ, kanitsutɨani tiwahekɨatsitɨiyatɨ kemɨre'ukai hepaɨtsitana naime 'utɨarikatsie.
28Merikɨtsɨ kiekaritsie hakewa memeta'axɨanikekai mekaneta'axɨani, 'iya matsi 'ateewa kaniumiekaitɨni. 29Mɨkɨ kwinimieme mekani'iniekaitɨni mɨpaɨ me'utiyuatɨ:
—Tahamatɨa kene'ahayewa, 'etsiwatɨkaku putaikai pakayunirɨme.
Hikɨ muwa kaneutahani wahamatɨa mɨyuhayewakɨ. 30Hikɨ wahamatɨa 'ayerɨka mexa 'aurie, 'enu'ɨka paa, 'aixɨa kaniutayɨni Kakaɨyari hepaɨtsita paa hepaɨtsita, 'ititaraka kaniwarumini. 31'Ana wahɨxie katineukuyepiere hikɨ mekaneitimani, peru mɨkɨ kamatsiɨkɨtɨ kanayuyeitɨani tawari mepɨka'ixei. 32Hikɨ mɨpaɨ mekateniyɨkɨhɨawekaitɨni:
—'E'e, 'ayumieme ta'iyaritsie kwini mieme tepɨtayetuakai mexi tatikuxaxatɨwakai huyeta te'uhukaku, mexi tatsihekɨatsitɨiyakai 'utɨarika kemaine.
33Hikɨ me'anuku'uka kwitɨ, Kerutsareme mekanekɨne yu'utɨma. Tamamata heimana xeime hipameta mekaniwaretaxeiya meyuxeɨriekame. 34Mɨkɨ mɨpaɨ mekaniutiyuanekaitɨni: «Kaniyuritɨni, Ti'aitame panukuke. Matsiɨkɨtɨ kanayuyeitɨani Tsimuni 'ixeiyakaku».
35Mɨkɨ meta mekateniwarutaxatɨani huyeta kemɨreyɨ, kememɨteheitima paa 'utitaraku.
Ketsutsi matsiɨkɨtɨ kemɨrayuyeitɨa teyɨ'ɨkitɨwamete wahɨxie
36Merikɨtsɨ metekuxatakaku 'akuxi, 'iya wahixɨata kaniutakeni, mɨpaɨ kaniutayɨni:
—'Aixɨa 'aku.
37Mɨkɨ mekaniutimamani, mɨki mexeiyame meyu'erietɨ.
38Mɨkɨtsɨ mɨpaɨ katiniwarutahɨawe:
—¿Titayari xeteyuxamurie? ¿Titayari xete'itsutɨa niuki xexɨatɨatɨ yu'iyaritsie? 39Xekeneu'ixɨari nemamate ne'ɨkate, ne nekanihɨkɨtɨni, xekeneneumayɨa xekeneneuxeiya, 'iyari 'ume pɨkahexeiya wai pɨkahexeiya nehapaɨ.
40Mɨpaɨ 'utayɨka yumamate yɨ'ɨkate kaniwaruxeitsitɨani. 41Meyutemamawietɨ mehɨxiyatɨ, kayuritɨme mepɨ'eriekai 'akuxi, hikɨ mɨpaɨ katiniwarutahɨawe:
—¿Tixaɨ xekatehexeiya 'ena tikwaiwame?
42Tsaapa waiyari yayeukame mekanimini warikime. 43'Enu'ɨka kanitakwani wahɨxie. 44Merikɨtsɨ mɨpaɨ katiniwarutahɨawe:
—'Ikɨ niuki nekanixekuxaxatɨwakaitɨni xehamatɨa ne'uyeikatɨ 'akuxi, mɨpaɨ ne'utaitɨ kename heuyewekai maye'atɨarienikɨ naitɨ nehepaɨtsita kemɨre'uxa Muitsexi 'inɨarieya niukiyaritsie, texaxatamete waxapatsie meta kwikari xapayaritsie ne'utaitɨ.
45'Ana wa'iyari kaniwatiyepieni memeitimanikɨ tita 'utɨarika xapayari mɨtixatakai.
46Mɨpaɨta katiniwarutahɨawe:
—Mɨpaɨ pɨre'uxa, kemɨreuyewekai Kɨritsitu nehɨkɨtɨtɨ mɨya nekatinikwinekekaitɨni, hairieka tukaritsie nekananukukenikekaitɨni mɨkite watsata. 47Mɨkɨ meta, yunaitɨ nuiwarite mɨpaɨ mekatenitahɨawariekuni, xɨka xete'uhayewa kexemɨteyuriekai, xɨka pɨta xenetsihahɨaweni kemɨ'ane nemɨhɨkɨ, xepɨteheuyehɨwiyarieni 'axaxemɨte'uyurikɨ, Kerutsareme meri, 'ariketa xaɨtsie yakatinikuxaxatsiwamɨkɨ. 48Xeme xekanihɨkɨtɨni xemunenierixɨ xemihekɨata 'ikɨ kemɨtiuyɨ hepaɨtsita. 49Ne meta nepɨtixehanɨ'airieni tita ne'ukiyari mɨrainekai mɨtixeminikekaikɨ, xeme kiekaritsie xekeneyuhayewani tukari 'aye'ayuke kepauka tɨrɨkariya xemɨpitɨarieni taheima mieme, 'anake xepayekɨne.
Kemɨranutitɨa
50Hikɨ kaniwarayewitɨni Wetaniya 'aurie, yumamá teikɨ hetseratɨ kaniutaniuni 'aixɨa memɨ'itɨarienikɨ. 51Mexi 'utaniukakai wahetsɨa kanayeyani, muyuawitsie kananutiwitɨkieni. 52Mɨkɨ nenewieri me'ipitɨaka Kerutsareme mekanekɨne kwini mieme meyutemamawietɨ. 53Tukarikɨ tuki kuraruyarita mekaniu'uwakaitɨni 'aixɨa me'utiyuatɨ Kakaɨyari hepaɨtsita. Mɨpaɨ xeikɨa kani'aneni.
Actualmente seleccionado:
Rukaxi 24: hch
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2020, Wycliffe Bible Translators, Inc.