Tombonuo - WBT (NT+) Drama

Ido runat, minogdu'a si Yisus so ido tontong. Nopupus Iyo mogdu'a, mutongaro yo ido mompomaid Niyo ri nu, “Oo Tuhan, tuduki kai po mogdu'a, soko si Yuanis su minontuduk nu mompomaid niyo ri,” koo.
Sumombuto yo si Yisus nu, “Bang mogdu'a kou, soko itu yo tongaron muyu,
Oo Amo,
ido-ido Ko ya Kinoringan,
muda-mudaan ong
usaa'on om orumaton Ko.
Taaki kai yo nu okanon
nu runat tu muuma' so kai.
Ompuno yo kiawi' koraayan mai ri,
soko mongampun kai
nu lobuw kikoraayan so kai.
Kodi kai yo posimaidi
oliongan nu koimaidan
ong kinaman kai,
koo yo muyu ya,” koo si Yisus.
Mutongaro po Iyo so nosiro nu, “Bang ido koyuwan so kou mian nu tonga' nu awi so waloi nu una'-una' niyo om mutangar nu, ‘Oo lakitu, mokitaak aku po nu wogas tolu nopuut, su nokaambai una' ku nai so aku, om d'ado onu-onu ipookan ku so iyo,’ koo, sombutan ko sono nu oraai nu, ‘Ikod pongaagut so aku. Notutub-o pintu no om inonakan ku tu nga moturuw-o, dai su kotungag monaak so ikau nu pokitaakon mu no,’ koo. Mutangar Aku so kou, pudi pona una'-una' mu iyo, dai ya iyo moingin tumungag om monaak nu pokitaakon mu no. Nga pagka una'-una' mu iyo, om ikau nga dai ya moiyu'an mokitaak so iyo, tantu tumungag-a iyo monaak so ikau nu onu yo po pokitaakon mu no so' ado ya pupus mu mokitaak so iyo.
Ono yo ko' mutangar Aku so kou, indamo yo so Kinoringan nu koinginan mu no om taakan ko ya Niyo. Podium-o kiat so Kinoringan om kooyang ko ya. Koritiko yo pintu no, om sukaban ko ya. So' isai mindamo so Kinoringan niyo, taakan-a. Isai modium kiat so Kinoringan, kooyang-a. Om isai monoritik nu pintu, sukaban-a nu Kinoringan. Bang kianak kou yo, dai otoop ong monaak so anak muyu no nu lopung ong mokitaak iyo nu pait, intawa monaak nu tompoluluu ong mokitaak iyo nu ontolu. Insan oraai-a akal muyu no, tantu koilo kou ya nu onu owarong itaak so anak. Makin po ong Amo toko so surga nga itaak-a Atod Niyo so lobuw mokitaak so Iyo no,” koo si Yisus.


Ido runat minonusub si Yisus nu moinat kiat so ido lobuw bobou. Nokolabus-o po moinat-i, koputangar-o sono lobuw-i. Osuang sono lobuw oiranan, nga kuwai ya mutangar nu, “Tinaakan Iyo ni Biiljibul iri Wowaidon nu Moinat-i, nu kuasa monusub nu moinat,” koo.
Wokon lobuw-i mokipopongoburunsut so Iyo. Mokitaak nosiro nu koiran-iran kiat so Kinoringan, nga noilaan-a ni Yisus padu-padu nosiro ri, mutongaro yo Iyo so nosiro nu, “Bang muimpolanu lobuw so ido tontong mualod, sampai mutotondiang, obinasa tontong oono. Om soko ono ya ong mualod sompinunguan om mususub, dai ya tumaan nu olaid. Soko ono ya pudi komoinatan-o, ong mupipinig om mualod, kopogkuosaan nosiro no nga dai tumaan nu olaid. Nga tangar muyu, ono yo ko koponusub Aku nu moinat so' tinaakan Aku ni Biiljibul nu kuasa. Bang soko ono, isai so kuasa pinakai nu mompomaid muyu no monusub nu moinat? Mompomaid muyu no ya kondiri su pointolang nu osala' pikiran muyu no. Nga Aku yo po, kuasa nu Kinoringan su pinakai ku monusub nu moinat, om ono yo pongilaan muyu nu tumimpuun-o Kinoringan mogkuasa tuui so kou.
Wowaidon nu Moinat oono soko ido koyuwan obasag om osukup sindata mongipat nu waloi niyo no. Kiawi' orata' niyo no dai osolod. Nga bang kuwai obasag po ko' iyo mongodoog, lobuw oono koponolod nu kiawi' sindata nosongapan niyo no, om monayad-nayad nu nosolod niyo no. Aku yo su soko lobuw obasag oono.
Isai mokimupinig so Aku, lumawan so Aku. Om isai dai tumabang mongingol nu lobuw poimaid so Kinoringan, mongogorusou nu gogoma'on Ku,” koo si Yisus.


Mutongaro yo si Yisus nu, “Koduung kolaiw-o moinat-o kiat so koyuwan nu lobuw, manou-panou sono iyo so tontong d'ado sungoi, modium nu intoronan. Bang dai iyo kooyang, mutangar sono iyo so inawo nu, ‘Gaam nai' mululi' aku ya so inintoronan ku laid-i,’ koo. Kopululi' po moinat oono, osiou sono niyo nu oborisi om omomos inintoronan niyo gulu ri. Momponowo po moinat oono om minongingol nu turu komoinatan nu oraai po ko' iyo, om masuw-o sono so lobuw oono, om kogoyaan niyo oraai po ko' togna ri,” koo si Yisus.
Nopupus si Yisus mutangar nu iri, minutangar sono ido woinoi so Iyo nu, “Osanang-o woinoi minuanak om nopotiti' so Ikau-i,” koo.
Nga sumombuto yo si Yisus nu, “Osanang po lobuw mongkinongou nu tinongaran nu Kinoringan om poimaid,” koo.


Kakal po si Yisus nopuinliwutan nu lobuw suang, mutongaro yo Iyo nu, “Sobana ko oraai lobuw nu ono sono tu! Moingin nosiro nu koiran-iran kiat so Kinoringan pongimaidan nosiro so Aku kolaai, nga dai ya taakan nu koiran-iran sondiang ko koiran-iran suat so si Yunus, poo'abar nu Kinoringan gulu ri. Si Yunus-o su sinumiliw nu koiran-iran so kolobuwan so wonuo nu Niniwi. Soko ono ya pudi Aku, Anak nu Riniba, sumiliw nu koiran-iran so kolobuwan kosiono tu. So Runat Pongukuman ong wagu, kuwai lumoga' raja woinoi gulu ri ungkiat so wonuo solatan. Mundii iyo maid nu kiawi' lobuw nu ono sono tu, om iyo yo su pointolang nu kosola'an muyu nu dai mongimaid so Aku. So' pudi ungkiat-a iyo so isan nu langit, nga linumoga' ya iyo dii si Salumu mongkinongou ong komuro kopintar ni Salumu mutangar. Nga, kosiono Aku yo su maayo po ko' si Salumu tuui so kou, nga dai kou ya mongkinongou nu pontudukan Ku. Ongo lobuw so bandar Niniwi mundii poinsala' so kou nu Runat Pongukuman, so' nosiro yo po rinumorogo momaal nu koraayan koduung nokorongou nu tangar ni Yunus, nga kosiono Aku yo su maayo po ko' si Yunus, nga dai kou ya mongkinongou nu pontudukan Ku,” koo si Yisus.


Mutongaro yo si Yisus nu, “D'ado ya lobuw monikit nu politaan om nirinding so pasok intawa tutuban nu montaya. Bang monikit nu politaan, subai nisiit so dilanggau su' onowawan lobuw masuw so waloi oono. Mato mu no yo su soko politaan nu koyuwan mu no. Bang maid ko nu pontudukan Ku no, ono yo soko mato konawau nu koyuwan mu no, kosiou nu onawau. Nga bang dai ko maid nu pontudukan Ku no, soko osowut mato mu no, om soko otuong koyuwan mu no. Ono yo ko', kimati yo su' dai sumiliw nu otuong ono onawau so koyuwan mu no. Bang onawau pilolongkop nu koyuwan mu no, om d'ado boogian otuong, tantu otogu' kiawi' koyuwan mu no soko otogu' ko nu koonawau nu politaan,” koo.


Nopupus-a si Yisus montuduk, ido koyuwan kiat so puimpugan nu Parisi minongingol so Iyo muli' so waloi niyo ri mongokan. Mindokodo yo si Yisus so waloi oono, om mogomo yo mongokan. Noiranan lobuw nu Parisi iiri nu nosiou niyo si Yisus dai minuugas nu uyud niyo mogom mongokan-i, mongowaid nu adat nu Parisi.
Nga noilaan-a ni Yisus nu noiranan lobuw Parisi ri, mutongaro yo sono Iyo nu, “Kou yo po lobuw Parisi, ono ya su ugasan muyu dirimbou nu pinggan om mangkuk muyu no, nga rinuang-o noponu' nu sinaim om koraayan. Oo su lobuw olowong, Kinoringan-a su minomaal nu dirimbou om rinuang nu pinggan mangkuk-o. Nga potaako muyu yo asuw nu pinggan muyu no so lobuw omiskin. Bang soko ono waalon muyu, torima'on kou nai' nu Kinoringan.
Aagut kou yo su lobuw Parisi, so' pudi pona monaak kou so Kinoringan sombaagi' opulu nu kiawi' pinumpung nu tonoman muyu, nga dai ya ooluk gogoma'on muyu so lobuw wokon, om dai ya somodan muyu Kinoringan, ono yo popusio-sioon muyu. Mupatut ong waalon muyu kiawi' oono.
Aagut kou yo su lobuw Parisi! Momili' kou nu oogoman so waloi sosombooyangan so otingkuangan nu lobuw suang, om mokiorumaton kou so pasar. Aagut kou yo su lobuw Parisi! Kou yo po soko lobong d'ado ponondu'an, puiningkagan nu lobuw, so' mongowaid lobuw so kou om ponontaman nosiro nu owarong ono so nosiro, nga sobana yo oraai so nosiro ong minsuw nosiro nu gogoma'on muyu oraai-o,” koo si Yisus.
Sumombuto yo ido koyuwan so Iyo nu, “Oo Guru, bang mutangar Ko nu soko ono, koorotian mongusiba' Ko so kai,” koo.
Nga sumombuto yo si Yisus nu, “Kou su moomontuduk nu Ukum nga aagut-a! Montuduk kou so kolobuwan nu orogon waidon, indama kou kondiri dai montuduk ong onu koo gama' mongowaid nu ono musuat so koinginan nu Kinoringan. Soko poponimban kou so nosiro nu owogat, nga insan sabat dai kou tumabang monimban. Aagut kou yo sobana! Inatag muyu lobong nu poo'abar nu Kinoringan, iri pinupatoi nu porookian muyu gulu ri, om ono yo pongilaan nu muinong-a koinginan muyu om odu aki muyu ri momaal nu oraai. Odu aki muyu ri su minomatoi nu poo'abar nu Kinoringan, om kou sono su minongatag nu lobong nosiro no. Ono yo ko' nokosurat-o so buuk ingoranan koilaan nu Kinoringan nu, ‘Pologa'on Ku nai so nosiro poo'abar Ku om pinongoorapan Ku, nga wokon potoyon, om wokon po sonsora'on!’ koo ri. Nga kou yo kosiono tu su sunsuli'an nu gogoma'on nu odu aki muyu ri momatoi nu poo'abar kiat nu nowaal wonuo tu ri, ono yo kiat nu kinopotoyan ni Abil sampai kinopotoyan ni Jakaria, iri pinatoi so puola'an nu ranggar om Waloi Maayo nu Kinoringan-i. Mutangar Aku so kou, lobuw nu ono sono tu tantu ukumon suat nu kiawi' oono.
Aagut kou yo su moomontuduk nu Ukum! Kou yo su nokoilo nu pontudukan so Buuk nu Kinoringan, soko nokokuyut nu kunsi nu pintu pongoilaan. Nga kou kondiri dai masuw modium nu koilaan oono. Om kuwai maam lobuw wokon mokiaasuw nai bana-bana nu modium nu Kinoringan nga tibonan muyu,” koo si Yisus.
Nokolaiw-o po si Yisus dii, lumawan sobana moomontuduk nu Ukum om lobuw Parisi ri so Iyo. Osuang duaton nosiro so si Yisus, pongoburunsut so Iyo tayon ong osala' sambut Niyo om aakom sono nosiro suat so totongaron Niyo ri.

Escuchar Lukas 11