 If you would like a copy of this version please contact info@davaraudiobibles.org

Surgujia New Testament, CC-BY-SA-4.0, The Love Fellowship. Surgujia New Testament Audio Bible, CC-BY-SA-4.0, Davar Partners International, The Love Fellowship, 2023.

Surgujia New Testament

SurgujiaBible (सरगुजिया) by The Love Fellowship is licensed under Creative Commons Attribution-ShareAlike 4.0 License.

“मय हर तुमन मन ले सहिच-सहिच कहथो कि जेहर भेड़ मन कर कोठा मे नी ढुकथे, लेकिन कोनो दूसर कती ले ढुकथे ओहर चोर अउ डाकू है। लेकिन जेहर दूरा ले भीतरी ढुकथे, ओहर भेड़ मन कर चरवाहा है। ओकर बर पहरा दार हर दूरा ला खोएल देहेल, अउ भेड़ मन ओकर गोएठ ला सुनथे, अउ ओहर अपन भेड़ मन कर नाव ले के बलाथे, अउ बाहरी ले जाथे। जब ओहर अपन सबेच भेड़ मन ला बाहरी निकाएल लेथे, त ओमन मन कर आगू-आगू चलथे, अउ भेड़ मन ओकर पीछू-पीछू होए लेथे, काबर कि ओमन मन ओकर गोएठ ला पहिचानथे। लेकिन ओमन मन दूसर मन कर पीछू मे नी जाही, लेकिन ओकर ले भागही, काबर कि दूसर मन कर गोएठ ला नी पहिचाने।” यीशु हर ओमन मन ले ये कहानी कहिस, लेकिन ओमन मन नी समझिन कि एहर का गोएठ है जेला ओहर हमर ले कहथे।

तब यीशु हर ओमन मन ले फिर कहिस, “मय हर तुमन मन ले सहिच-सहिच कहथो, भेड़ मन कर दूरा मय हो।” जेतेक मन मोर ले आगू अईन ओ सबेच झन मन चोरहा अउ डाकू है लेकिन भेड़ मन ओमन मन कर नी सुनिन। दूरा मय हो; अगर कोनो मोर मे ले भीतरी ढुकही, त उद्धार पाही, अउ भीतर बाहर आए जाए करही अउ चारा पाही। चोरहा कोनो अउ बुता बर नही लेकिन सिर्फ चोराए अउ मारे अउ नाश करे बर आथे, मय हर एकरे बर आए हो कि ओमन मन जीवन पाए अउ बहुतायत ले पाए। बड़िया चरवाहा मैहर हो; बड़िया चरवाहा भेड़ मन बर अपन प्रान ला देथे। मजदूर जेमन न चरवाहा है अउ न भेड़ मन कर मालिक है, भेड़िए मन ला आत देख भेड़ ला छोएड़ के भाएग जाथे, अउ भेड़िया हर ओमन मन ला धरथे अउ इते-उते कईर देथे। ओहर एकरे बर भाएग जाथे कि ओहर कमिया है अउ ओला भेड़ मन कर फिकर नी है। बड़िया चरवाहा मय हो, मय अपन भेड़ मन ला जानथो, अउ मोर भेड़ मन मोला जानथे। जे नियर दाऊ हर मोला जानथे अउ मय दाऊ ला जानथो अउ मैहर भेड़ मन बर अपन जीवन देथो। मोर अउ भी भेड़ मन है जेमन ये कोठा कर नी है। मोला ओमन मन ला भी लाने बर जरूरेच है, ओमन मन मोर गोएठ ला सुनही तब एक ही झुन्ड अउ एक ही चरवाहा होही। दाऊ हर एकरे बर मोर ले प्रेम रखथे, कि मैहर अपन प्रान ला देथो कि ओला फिर ले लेहू। कोनो ओला मोर ले नी लुटथे, बल्कि मैहिच ओला देथो। मोला ओकर देहे कर भी अधिकार है, अउ ओला फिर ले लेहे कर भी अधिकार है, ये हुकूम मोर दाऊ ले मोला मिलिस है।
ये गोएठ मन कर कारन यहूदी मन मे फिर फुट पड़िस। ओमन मन ढेरेच झन मन कहे लागिन यीशु मे प्रेत आत्मा है, अउ ओहर पागल है, ओकर काबर सुनथा? दूसरे मैनसे मन कहिन, “ये गोएठ एसन मैनसे कर नी है जेमा प्रेत आत्मा होही। का प्रेत आत्मा अन्धवा मन कर आएख ला खोएल सकही?”

यरूशलेम शहर मे स्थापना तिवहार मनाल जात रहिस, अउ जाड़ कर समय रहिस। यीशु मन्दिर मे सुलैमान कर ओसरा मे ले घुमत रहिस। त यहूदी मन ओला आए घेरिन अउ पुछिन, “तय हर हमर मन ला कब ले दुबिधा मे रखबे? अगर तय हर मसीह हस त हमन मन ले साफ-साफ कह दे।” यीशु हर ओमन मन ला जवाब देहिस, “मय हर तुमन मन ला कह देहे लेकिन तुमन मन बिश्वास नी करथा। जे बुता ला मैहर अपन दाऊ कर नाव मे करथो ओहिच मोर गवाही है। लेकिन तुमन मन एकरे बर बिश्वास नी करथा काबर कि तुमन मन मोर भेड़ मन ले नी हा। मोर भेड़ मन मोर गोएठ ला सुनथे, मैहर ओमन मन ला जानथो, अउ ओमन मन मोर पाछू-पाछू चलथे। अउ मैहर ओमन मन ला अनन्त जीवन देथो। ओमन मन कभो नाश नी होही। अउ कोनो ओमन मन ला मोर हाथ ले लुईट नी लेही। मोर दाऊ जेहर ओमन मन मोर बर देहिस है, सबले बड़खा है अउ कोनो ओमन मन ला दाऊ कर हाथ ले लुईट नी सकही। मै अउ दाऊ हर एकेच झन हन।”
यहूदी मन ओला पखना मे मारे बर फिर पखना उठईन। तब यीशु हर ओमन मन ले कहिस, “मय हर तुमन मन ला अपन दाऊ कती ले ढेरेच भलाई कर बुता ला देखाए, ओमन मन ले कोन बुता बर तुमन मन मोर उपर पखना ले मारिहा?” यहूदी मन ओला जवाब देहिन, “भला बुता बर हमन तोर उपर पखना नी फेकथन, लेकिन परमेश्वर कर निन्दा के कारन अउ एकरे बर कि मैनसे होए के अपन आप ला परमेश्वर बनाथस।” यीशु हर ओमन मन ला जवाब देहिस, “का तुमन मन ब्यवस्था मे नी लिखईस है कि मैहर कहे, तुमन ईश्वर हा? अगर ओहर ओमन मन ला ईश्वर कहिस जेमन जग परमेश्वर कर बचन पहुचिस (अउ पवित्रशास्त्र कर गोएठ हर भुलाए नी सकत है)। त जेला दाऊ पवित्र ठहराए के जगत मे भेजिस है, तुमन ओकर ले कथा ‘तय निन्दा करथस,’ एकरे बर कि मय हर कहे, ‘मैहर परमेश्वर कर बेटा हो।’ अगर मैहर अपन दाऊ कर बुता ला नी करथे, त मोर बिश्वास झिन करिहा। लेकिन अगर मय हर करथो त चाहे मोर बिश्वास झिन भी करा, लेकिन ओ बुता मन पर बिश्वास करा ताकि तुमन जाना अउ समझा कि दाऊ हर मोर मे है अउ मय हर दाऊ मे हो।” तब ओमन मन फिर ओला धरे बर प्रयास करिन लेकिन ओहर ओमन मन कर हाथ ले हिकेल गईस।
फिर ओहर यरदन नदी के पार मे ओ जगहा मे चईल देहिस, जहा यूहन्ना हर बपतिस्मा देहत रहिस, अउ ओहर ओहिच रहिस। ढेरेच झन मन ओकर ठन आए के कहत रहिन, “यूहन्ना हर त कोनो चिन्हा नी देखईस, लेकिन जे कुछ यूहन्ना हर एकर बिषय मे कहे रहिस, ओ सबेच हर सही रहिस।” अउ हुवा बहुतेच झन मन यीशु पर बिश्वास करिन।

Escuchar यूहन्ना 10