Versículos más leídos de la Biblia Tashches Corintoĉantyidyes 13

Compartir

Mạꞌjeyacsejaꞌ bäꞌjaꞌ jụijyaꞌ tsun, meꞌ raꞌ chat jämꞌjeyacsejaꞌ muntyiꞌ in, judyeyaꞌ chimeꞌ dyich buꞌjaꞌ muꞌincheꞌ in, mijam raꞌ jịꞌfajqueyacsejaꞌ jedyeꞌ in. Mạꞌjeyacsejaꞌ jụijyaꞌ jam raꞌ fibiꞌnaĉaꞌ tsun mijam raꞌ vaꞌbunyejaꞌ, mijam raꞌ ĉụiꞌ dyijtutiĉaꞌ tsun mijam raꞌ doroiꞌyejaꞌ muꞌincheꞌ in, mijam raꞌ dyijtucsebijaꞌ juchaj muꞌinsiꞌ in juchatusinꞌtyiꞌ jụijyaꞌ in, jämꞌjeyacsejaꞌ raꞌ mọmoꞌ.

Mạꞌjeyacsejaꞌ jụijyaꞌ tsun, dyich buꞌjaꞌ raꞌ bäꞌjaꞌ, yejĉojaꞌ raꞌ anicyejaꞌ, mijam raꞌ farajjejaꞌ bisacdyeꞌ tsun, judyeyaꞌ yejĉojaꞌ raꞌ dyichchutiĉaꞌ räjdyes tsun.

Mạꞌjeyacsejaꞌ jụijyaꞌ tsun jam raꞌ maꞌjotacsebijaꞌ aꞌc̣his dyijyedyeꞌ muꞌin, mọꞌ raꞌ mọmoꞌ maꞌjotacsebijaꞌ mọꞌ rụijsis dyijyedyeꞌ muꞌin.

Mọꞌyaꞌ chibin jedyeꞌ in jam mọtsis raꞌ in: Anicyedyeꞌ, bisacdyeꞌ Jenꞌcheꞌ tsun, judyeyaꞌ mạꞌjitidyes. Mọꞌ na mạꞌjitidyes, mọjoꞌchaꞌ buꞌyiꞌ.

Ayij raꞌ tupudyeꞌ jadyic raꞌ soꞌmac tsun p̂eyacdyeꞌ Jenꞌsiꞌ muꞌ paj qui voroꞌtacsejaꞌ, jadyic raꞌ soꞌmac tsun paj qui yocsiꞌĉan p̂eyacdyeꞌ p̂eyaĉaꞌ tsun. Aty jam raꞌ jemonac mọꞌ chị́dyeꞌ Jenꞌsiꞌ muꞌ, meꞌ meꞌ raꞌ jadyic carijtacdyedyes, mọꞌ na mạꞌjitidyes, mọꞌ raꞌ jam junꞌ mọtsiꞌ.

Meꞌ raꞌ tsanꞌ soꞌmac jụijyaꞌ yụ paj qui yocsiꞌĉan p̂eyacdyeꞌ p̂eyaqui yụ, meꞌ raꞌ tsanꞌ anjersiꞌĉan p̂eyacdyeꞌ p̂eyaqui yụ, jam qui namꞌ mạꞌjeyacsi bäꞌyi jụijyaꞌ yụ, fibis raꞌ shupquiꞌ mọꞌ p̂eyacdyeꞌ yụ, jeñej yiris dẹvyiꞌsiꞌ shọijyis, meꞌ buꞌyiꞌ raꞌ shupquiꞌ mọꞌ p̂eyacdyeꞌ yụ.

Meꞌ raꞌ tsanꞌ soꞌmactyiꞌ yụ Jenꞌsiꞌ p̂eyacdyeꞌ muꞌ, judyeyaꞌ räj soꞌmac yụ caminves chị́dyeꞌ Jenꞌsiꞌ muꞌ, meꞌ raꞌ tsanꞌ yụ fer anicjete Jenꞌ paj qui tupuj meijjete yocyaꞌjete yirity mụcuꞌ yụ, meꞌ tsanꞌ meꞌ jụijyaꞌ yụ, jam qui namꞌ mạꞌjeyacsi bäꞌyi jụijyaꞌ yụ, fibity raꞌ shupqui yụ, jam jedyedyety yụ.

Meꞌ raꞌ tsanꞌ yụ ñịbeꞌjeyacsi räj jedyeꞌ yụ muꞌin ñịbety in, judyeyaꞌ aꞌ yụ yụꞌtaqui yụ paj qui jiꞌcoꞌshayac, jam qui namꞌ mạꞌjeyacsi bäꞌyi jụijyaꞌ yụ, mọꞌ raꞌ jam junꞌ ñútyin yụ.

Jeshaꞌ, miquiꞌdyemꞌ jiquej yụ itŝiꞌdyemꞌ dyijyedyeꞌ yụ, mijam dyijyedyeꞌtum p̂eyaqui yụ, yojdyemꞌ miquity u, meꞌ buꞌyiꞌ dyijyedyeꞌ yụ. Q̂uinꞌ chat aty ishoꞌ yụ aty jam meꞌ yụ, aty räj farajjeꞌ yụ junꞌ chuc miquitysiꞌ dyijyedyeꞌ muꞌ.