Maatiyu 3

Wa'aju Yahaya Gaɗoowo Baptisma

(Markus 1.1‑8; Luka 3.1‑18; Yahaya 1.19‑28)

1Gaɗa duuɓi ɗuɗɗi Yahaya Gaɗoowo Baptisma yahi nder ladde Yahuudiya, e mo wa'ajina, 2e mo wi'a, “Tuubee, ngam Laamu Allah ɓadake!”#Maat 4.17; Mar 1.15. 3On ɗon kanko woni mo Annabi Icaaya meti dow maako, wi'i,

“Goɗɗo e nodda nder ladde, e wi'a,

‘Mo''inee ɗatal Joomiraawo,

portee laawol ngam garol maako!’ ”#Ica 40.3.

4Yahaya e ɓornii kolte ɗe ɗum waɗiri leeɓe ngeelooba, e mo taadii taadorde laral. Nyamndu maako woni baabeeji e njumri.#2Laam 1.8. 5Sey yimɓe ɗuɗɓe daga gariiri Urucaliima e leydi Yahuudiya fuu e gariije ɗe haade Caangol Urdun ɓe ngaɗi ka yaaki to maako. 6E ɓe mbi'a fuu ko wooɗaa ɗum ɓe ngaɗi, e mo waɗanaɓe baptisma nder Caangol Urdun.

7Ammaa nde Yahaya yi'i Faarisanko'en e Saadusanko'en ɗuɗɓe ngari ngam o waɗanaɓe baptisma, o wi'iɓe, “Onon ɓiɓɓe boole! Moye wi'i'on ndoggon bone garayɗum?#Maat 12.34; 23.33. 8Ngaɗee ko hollata on ali hakkeeji mooɗon. 9To' on nyumu on mbi'ay nder ɓerɗe mooɗon, ‘Minon, min ɓiɓɓe Annabi Ibraahim.’ Ngam e mi wi'a'on, Allah waaway umminanki Annabi Ibraahim ɓiɓɓe daga nder kaaƴe ɗe'e.#Yah 8.33. 10Koo jooni fe''irde ƴeftaama ngam fe''a leɗɗe daga ɗaɗi maaje. Lekki fuu ki rimataa ɓikkoy mboɗkoy, ɗum fe''ayki ɗum faɗɗaki nder hiite.#Maat 7.19. 11Min, e mi waɗirana'on baptisma e ndiyam ngam holluki on tuubi. Ammaa ɓurɗoyam mangu e wara gaɗa am. Mi fotaayi mi jogoo paɗe maako. O waɗiranay'on baptisma e Ruuhu Allah e hiite. 12E mo jogii besirɗum gawri maako ngam senduki gawri e nyaande. O hawritay gawri ndin, o waɗandi nder resirde gawri maako, ammaa o wula nyaande nden nder hiite nge waatataa.”

Yeesu Waɗanaama Baptisma

(Markus 1.9‑11; Luka 3.21,22)

13E carel ngel Yeesu waroyi daga leydi Galiili. O yahi Caangol Urdun to Yahaya ngam Yahaya waɗanamo baptisma. 14Ammaa Yahaya yiɗii wanya waɗankimo baptisma, e wi'a, “E haani ngaɗanaayam baptisma, ammaa a wari to am?”

15Ammaa Yeesu nootii wi'i, “Alu ɗum warta non jooni, ngam non haani kebbiniren ko Allah yiɗi ngaɗen.” Nden Yahaya jaɓi.

16Nde ɗum waɗani Yeesu baptisma, e mo wurto nder ndiyam ɗam, sey ɗon e ɗon dow maɓɓitii o yi'i Ruuhu Allah e jippoyo dow maako e ɓandu bo foondu. 17Sey hononde ƴiwoyi daga dow wi'i, “O'o woni Ɓiɗɗo am mo ngiɗumi, e mi nana belɗum maako.”#Fuɗ 22.2; Jab 2.7; Ica 42.1; Maat 12.18; 17.5; Mar 1.11; Luk 9.35.

Actualmente seleccionado:

Maatiyu 3: fuv

Destacar

Copiar