KEYUM KERO 3
3
Tanilo Paab Aaname
1 Ruutum Shédíke monkír-tangkír pínam aralo, tabíde ségu kayayalumna konpe ito. Bí mimedem ingkíto, “Torgong arasok ingkona esing lokke ayémte nonyim domarupeka emla Shédíbí potorunía?” 2Mimede tabídem poyansuto, “Ngonyi torgong arang sokke esing takamke ayé kídíem dolado. 3Idola torgong arasokke raadaso duuna esing lokke ayéme domapeka delokke ukkípete mapeka; depe imílo nonyi siyé emla Shédíbí potung.” 4Delo tabíde bím poto, “Nonyi arope simayé. 5Kapeila edílo nonyi dem doyédí nonyi amige daryé delokke nonyi Shédí kísa ila ainem lang atímanem kénpansula iyé.” 6Delo mimede esing ayédem dopo kalíkpe kaato. Delokke amiglok kaabola esing ayéde kénmoyé emla mííla, bí delokke ayédem pílla doto. Bí bíkke milodemte ayoko pílbila bíte doto. 7Delo bínyi amige mikdarla, bínyike araape yénamem kénsula; bínyi tapang esing annelok omdumsula gekap bosuto.
8Edílo torgong aradelo, longe lokke rengamdí moodílo Ruutum Shédíke gígonam adudem bínyi tattodí, milo delang mimede, torgong delokke esing kídí arang delo Ruutum Shédíke keranglok runyokgeto. 9Idokom Ruutum Shédíbí amidem tomla bím ííto, “Ingkolo no?” 10Delo bí poyansuto, “Ngo nokke adudem torgong araso tatla, ngo pesola runyok gedung; kapeila ngo mílípe yédung.” 11Delo Shédíbí ííto, “Nonyi mílídung emla sékoda nonyim potone? Nonyi ngok domapeka emnam esing ayém dotunía?” 12Delo amide poyansuto, “Ngome yébosudope nokke mime binam simin esing delokke ayéme bila ngo dotone.” 13Delo Ruutum Shédíbí mimedem luto, “No kapeda sikepe ikan?” Mimede poyansuto, “Tabí bí ngom yadlamin ngo dotone.”
14Depeila Ruutum Shédíbí tabídem luto,
“No sikepe inam legape,
simon-sili tabung keelang,
monkír-tangkír kídí lokke,
aralo nom pélíkdung;
no nokke yénam tabungem, demullok doyé.”
15“Ngo mime sokkelang nok pénsamlo,
delokke nok otíng-oyin lolang,
mime sokke otíng-oyinlo mirupe imoyé.
Bí nom dumponglok itjépyé,
delokke no bím ledulok payé.”
16Mimedem bí sikepe luto,
“Ngo nokke koo olenyé tabungem,
yagorupe okii kimoyé,
kilamin no kooem olenyén,
idola nok míínam tabude,
nok milo legape iyé delokke,
bí nok teyolo ruutumbomyé.”
17Delo milodem bí sikepe luto,
“No nokke mime agom-aangem tatgaape,
delokke ngokke nom domapeka emla,
lutumnam esing ayém no dogaape;
amosim nok legape pélíkdung.
Nokke yénam tabulo no agér itíla doyé.”
18“Nome amongsi taang emlang tanyum tatké,
moonamem garsang biyé delokke
no aríkke nesi-neyangem doyé.”
19“Nokke mikmo íílnamlok,
no amolo aalat sukumang tetengem,
donamem doyé.
Kapeila no demule,
nom demullok laalento iname no demullo gílatsuyéku.”
20Delo Adambí, bíkke méngem Ib emla amínem mínlíkto, kapeila bí turna tabungke anepe ine. 21Delokke Ruutum Shédíbí, Adam keepelang bík mime delok legape ayolok omla bínyim gekapsumoto.
22Delo Ruutum Shédíbí poto, “Kaatola ngoluke akampe tani bí ainemlang atímanem kénpansunape ikai. Bí turmona esing delokke ayémteng laala dola, turyarla yépelo.” 23Depeila Ruutum Shédíbí tanime pílenko amodem bí arík ila yébomdope, Eden baarike torgong delok monlento. 24Bí tanidem Eden baarike torgong delokke sanggodanlo monlen rodem, turmona esingdem kaabomdope Sérubim emlang kiddung-kittoksuna emepe dorna yoksadem melíkto.
Actualmente seleccionado:
KEYUM KERO 3: adiBSI
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Adi (Re-edited) Bible - Deena Baibél
Copyright © Bible Society of India, 2012.
Used by permission. All rights reserved worldwide.
