ማዢንቲ ማፃኣፔ 10
10
ኖሄ ናኣቶ ዜርፆ
(1ፆኦሲ. ዓሃኬ 1፡5-23)
1ኖሄ ናኣቶ ሴኤሜና ካኣሜና ያኣፔቴና ዜርፃ ሃይማፓ ዴማ ፓይዲንታዞንሢ ማዓዛ፥ ዬንሢ ሃይሦንሢ ባይሲንቶ ዋኣፆኮ ጊንፃፓ ናይ ሾዔኔ፤
ያኣፔቴ ዜርፆ
2ያኣፔቴ ናኣታ፦ ጎሜሬ፥ ማጎጌ፥ ማዳያ፥ ያዋኔ፥ ቱባሌ፥ ሜሼኬና፥ ቲራሴ ጌይንታዞንሢኬ። 3ያኣፔቴ ናኣዚ ጎሜሬ ናኣታ ሃሣ ዓሽኬናዜ፥ ሪፓቲና ቶጋርማ ጎዖዞንሢኬ። 4ያዋኔ ናኣታ፦ ዔኤሊሻ፥ ቴርሴሴ#10፡4 ቴርሴሴ ጌይፃ፦ «ዒስፔኔ» ጌይሢኬ።፥ ኪቲሚና#10፡4 ኪቲሚ ጌይፃ፦ «ቆጵሮሴ» ጌይሢኬ። ሮዳኒሜ#10፡4 ሮዳኒሜ ጌይፃ፦ «ሮዴ» ጌይሢኬ። ጎዖዞንሢኬ።
5ዬንሢ ጉቤ ባዞ ዓጮና ዋኣፆ ሳዛ ዓኣ ሳዖናይዳ ናንጋ ያኣፔቴ ዜርፆኮ ሚና ማዢንቶ ማዖንሢኬ፤ ዔያታኣ ፔኤኮ ዓጮና ቶኦኮ ቶኦኮና ፓቂንቲ ናንጋ ዴሬኬ፤ ፔቴ ፔቴ ቶኦካ ጌስታያ ዔያቶኮ ማዔ ሃንጎ ዓሶ ዻንጋፓ ዱማዺ ጌስቲንታ ሙኡቺ ዓኣያኬ።
ካኣሜ ዜርፆ
6ካኣሜ ናኣታ፦ ኩሼ፥ ሚፂራይሜ#10፡6 ሚፂራይሜ ጌይፃ፦ «ጊብፄ» ጌይሢኬ።፥ ፑፂንታ#10፡6 ፑፂ ጌይፃ፦ «ሊቢያ» ጌይሢኬ። ካኣናኔንታኬ። 7ኩሼ ናኣታ ሃሣ ሳኣባ፥ ሃዊላ፥ ሳቢታ፥ ራዒማና ሳቢቴካ ጎዖዞንሢ ማዓዛ ራማ ናኣታ ሳኣባና ዴዳኔናኬ።
8ኩሼ ሃሣ ቤርታዺ ዓጮይዳ ፑኡፖ ዖሎና ዔርቴሢ፥ ናምሩዴ ሾዔኔ። 9ናምሩዴ ፑኡፒ ኬሞ ዓሲ ማዒ ፆኦሲ ቤርታ ዔርቴሢሮ ዓሳ «ኔና ናምሩዴጉዲ ፑኡፒ ኬማያ ማሆንጎ» ጋዓሢ ዬያሮኬ። 10ቤርታዺ ናምሩዴ ካኣቱማ ሴናዖሬ ጌይንታ ዓጮይዳ ዓኣ ሃይሦ ካታሞንሢ ጌይፃ፦ ባብሎኔ፥ ዔሬኬኔና ዓካዲኔ ጌይንታ ካታሞ ዓርቃያኬ። 11ዬካፓ ዒዚ ዓሶኦሬ ጌይንታ ቤዞ ዓኣዻዖ ኔኔዌ፥ ራቦቴንታ ካላሂ ጌይንታ ካታሞ ማዤኔ፤ 12ዬያጉዲ ሃሣ ኔኔዌና ካላሂ ጌይንታ ካታሞንሢ ሳዛ ሬሴኔ ጌይንታ ኮሺ ዼኤፖ ካታሞንሢ ዒ ማዤኔ።
13ሚፂራይሜ ጌይንታሢ ካኣሜ ናኣዚ ዜርፃ፦ ሉዴ፥ ዓናሜ፥ ሌሃቤ፥ ናፕቱሄ፥ 14ፔቲሮሴ፥ ፒሊስፄኤሜ ጌይንታ ዜርፃ ኬስኬ ካፕቶሬና ካስሉሄ ጌይንታ ዴሮንታኬ።
15ካኣናኔ ናኣቶኮ ቶይዳሢ ፂዶኔ፥ ሄሌሢ ሄቴ ጌይንታያኬ፤ 16ሃንጎ ካኣናኔ ዜርፃ ዔቡሳ ዓሶ፥ ዓሜራ ዓሶ፥ ጌርጌሳ ዓሶ፥ 17ሂዋዌ ዓሶ፥ ዓርቄ ዓሶ፥ ሴና ዓሶ፥ 18ዓርዋዳ ዓሶ፥ ፃሚራ ዓሶ፥ ሃማቴ ዓሶ ጎዖዞንሢኬ፤ ሃሣ ጊንፃፓ ኔጌዖ ዱማዼ ካኣናኔ ዓሶ ዜርፃ ዱማ ዱማ ቤዞይዳ ላኣሊንቴኔ። 19ዬያሮ ካኣናኔ ዓሶ ዓጮኮ ዛጳ ሲዶና ጎዖ ዓጫፓ ዓርቃዖ ዾኦሎ ዛሎና ጌሬሬ ዓጮ ኮይሊና ዴንዲ ጋኣዛ ዓጮ ሄላንዳኣና ዓባ ኬስካ ዛሎና ዴንዲ ሶዶሜ፥ ጋሞራ፥ ዓዳኣማና ባላሻዔ ኮይሊና ዴንዲ ፃቦዬ ጌይንታ ዓጮ ሄላያ ማዔኔ። 20ዬንሢ ቢያ ካኣሜ ዜርፆንሢ ማዓዛ ዱማ ዱማ ቶኦኪና ዓጪና ፓቂንቲ ናንጋዖ ፔቴ ፔቴ ቶኦኮኮ ሃንጎዋቶይዳፓ ዱማዺ ጌስቲንታ ሙኡቺ ዓኣያኬ።
ሴኤሜ ዜርፆ
21ያኣፔቴኮ ዒሾ ሴኤሜ ጎዖሢ ዔቦሬ ጌይንታ ዜርፆኮ ማዢንቶ ማዓሢኬ።
22ሴኤሜኮ ናኣታ፦ ዔላኣሜ፥ ዓሶኦሬ፥ ዓርፓክሳዴ፥ ሉዴና ዓራሜ ጎዖዞንሢኬ። 23ዓራሜ ናኣታ፦ ዑፄ፥ ሁሌ፥ ጌቴራና ሜሽኬናናኬ፤ 24ዓርፓክሳዴ ጎዖሢ ሼላሂኔ ሾዔኔ፤ ሼላሂኔያ ዔቦሬ ሾዔኔ። 25ዔቦሬ ጎዖሢያ ላምዖ ናይ ሾዔኔ፤ ፔቴሢ ሾይንቴ ዎዶና ዴራ ዎሊዳፓ ፓቂንቴሢሮ ዒዛኮ ሱንፃ ፔሌጌ#10፡25 ፔሌጌ ጌይፃ፦ ዔብሬ ዓሶ ሙኡቺና «ፓቂንቲሢ» ጌይሢኬ። ጌይንቴኔ፤ ሃንጎሢ ሱንፃ ሃሣ ዮቅፃኔ ጌይንቴኔ። 26ዮቅፃኔ ናኣታ፦ ዓልሞዳዴ፥ ሼልፒሃፄርማዊቴ፥ ዬራሄ፥ 27ሃዶራሜ፥ ዑዛሌ፥ ዲቂላ፥ 28ዖባሌ፥ ዓቢማዔኤሌ፥ ሳኣባ፥ 29ዖፔሬ፥ ሃዊላና ዮባቤ ጌይንታዞንሢ ማዓዛ ዬያታ ቢያ ዮቅፃኔ ዜርፆኬ።
30ዔያታ ናንጌ ቤዛ ዓባ ኬስካ ዛሎና ዓኣ ጌሜራዻ ዓጮ ሜሻ ጌይንታ ቤዛፓ ሴፔራይዴ ጌይንታ ቤዞ ሄላንዳኣናኬ። 31ዬያታ ቢያ ሴኤሜ ዜርፆንሢ ማዓዛ፥ ዔያታ ዱማ ዱማ ቶኦኪና ዓጪናይዳ ፓቂንቲ ናንጋያኬ፤ ፔቴ ፔቴ ቶኦኮኮ ሃንጎዋቶይዳፓ ዱማዺ ጌስቲንታ ሙኡቺ ዓኣያኬ።
32ዬንሢ ቢያ ፔኤኮ ዜርፆና ዜርፆና ፓቂንቴ ዴሮ ኖሄ ዜርፆንሢኬ፤ ማዓዛ ባይሲንቶ ዋኣፆኮ ጊንፃፓ ዓጮ ዴራ ቢያ ሙኬሢ ዬንሢ ኖሄ ናኣቶንሢዳፓኬ።
Actualmente seleccionado:
ማዢንቲ ማፃኣፔ 10: ጌኤ.ማፃ
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Maale Full Bible © 2008 by The Word for the World International and The Bible Society of Ethiopia, 2008.
