ÂTHAONA 2

Pahânoh

1Cha hawhna chata avâ nata alei nata a chhôh liata a ypa zydua cha patlô khaipa a châ. 2#Pua 20.11; Heb 4.4,10A noh sarina noh ta Khazohpa ta a hmotaopa zydua pangoh ta, a noh sarina noh liata a raihria zydua tawhta a pahâ ta. 3Chavâta Khazohpa ta noh sarina noh cha, a paysapa nata a hmotaopa zydua patlô ta â pahâna noh a châpa vâta, byhnâ pie ta, a pathaisa.

Idâh Sadô

4He he Zehôvâh#2.4 Zehôvâh he Biehrai Parohpa liata Khazohpa ta anosasyh ta a moh â phualuahpa châ ta, Biehmia liata a kawh viapa ta chhopasiapa a châ. Khazohpa ta alei nata avâ a paysa nota alei nata avâ a taona thâtih a châ.

5Zehôvâh Khazohpa ta alei chô liata avâ a pasuasa mâh leipa vâta nata lei a palie awpa chyhsa ama y mâh leipa vâta, lyurâhpa liata sibiepazy y mâh leipa ta, lyu liata chicheipazy pyuh mâh hra vei. 6Châhrasala alei tawhta ameih kaw thyu ta, cha chata alei chô zydua cha a pahnasa tyh. 7#1 Kaw 15.45Chatawhcha Zehôvâh Khazohpa ta chhaohlei tawhta dohlei ta chyhsapa tao ta, a hnapasu liata hrona hu so thlu ta, chatanachata chyhsapa cha hrona hneipa a vaw châ haw.

8Zehôvâh Khazohpa ta nochhi lâta Idâh liata sadô tao ta, cha liata chyhsapa a taopa cha soh ta. 9#Biep 2.7; 22.2,14Zehôvâh Khazohpa ta, mo la ngaitapa nata nie awpa phapa tho chi to chhaohlei tawhta papyusa ta. Sadô liah liata hrona tho y ta, chhie nata pha pahnona tho chhao a y.

10Sadô pahnasa awpa ta Idâh tawhta chavah za loh ta, cha tawhna chata pachiahpa ta chavah miapalih lâta a pachhaih ta. 11Miakhana cha Pisaw chavah châ ta, ngôh puana Havilâ râh zydua chahryhpa ta a lohpa a châ. 12Cha râh liata ngôh cha ngôh suapa châ ta, ropahâhpa nata lôsôhpa pha patluapa zy chhao a y. 13Chavah mianona cha Kihaw châ ta, Kusi#2.13 Tanoh ta Ethiopia râh nata Africa maw lâ râh zydua he, Biehrai Parohpa daihti liata cha Kusi (Cush) râh tahpa a châ. râh zydua chahryhpa ta a lohpa a châ. 14Chavah miathôhna cha Tikari châ ta, Asuria râh nochhi lâta a lohpa a châ. Chavah miapalihna cha Ufrâti a châ.

15Zehôvâh Khazohpa ta chyhsapa cha a chhi ta, Idâh sadô liata rai hria awpa nata sadô vaih awpa ta soh ta. 16Zehôvâh Khazohpa ta chyhsapa hnohta, “Sadô liata tho thei chi to he na nie thei khai, 17chhie nata pha pahnona tho thei deikua he cha na nie awpa rai châ vei. Na nie khiahta cha, na nie noh tlai ta na thi thlyu aw,” tahpa ta biepie ta.

18Zehôvâh Khazohpa ta, “Chapaw ano dei ta a ypa he pha vei, ano baotuhpa â khypa ei taopa aw,” tah ta. 19Zehôvâh Khazohpa ta chhaohlei hmâpa ta râhsa chi to nata avâ pavaw chi to tao ta, ama moh bi awpa ta Âdâh lâ a chhi ta, hmohrohneipa to cha Âdâh ta moh a bizie lymâ hawhta ama moh a vaw châ haw. 20Âdâh ta osa zydua, avâ pavaw zydua nata râhsa zydua ama moh bi khai ta. Âdâh châta deikua cha baotuhpa â khypa y leipa ta. 21Chavâta Zehôvâh Khazohpa ta Âdâh cha mokuh pahâh ngaitapa ta pamôsa ta, â mô chhôh ta a kâru miakha la ta, a vyuhpa ta a sapa ta pabie ta. 22Zehôvâh Khazohpa ta chapaw kâru a lapa tawhna chata chanô tao ta, ano cha chapaw lâ a chhi ta. 23Âdâh ta,

“He tlai he ei rupazy rupa châ ta,

Ei sapazy sapa cha a châ hih;

Chapaw tawhta lapa a châpa vâta,

‘Chanô’ tahpa ta bipa a châ aw,” tah ta.

24 # Mat 19.5; Mka 10.7,8; 1 Kaw 6.16; Eph 5.31 Chavâta chapaw ta a nô nata paw siesaipa ta, a lapinô patu aw ta, pôhpa miakha ama vaw châ ha aw. 25Âdâh nata a lapinô cha ama pano ta thluahruapa ta y ei ta, châhrasala ama noza vei.

Actualmente seleccionado:

ÂTHAONA 2: MARVBSI

Destacar

Copiar