Mateo 3
3
Ro mga Ginhimo ni Juan nga Manogbawtismo
(Mar 1:1-8; Luc 3:1-18; Juan 1:23, 26-27)
1Nag-abot ro tyempo nga si Juan nga Manogbawtismo hay nag-umpisa sa anang pagpangwali idto sa *disyerto sa Judea. 2Hambae nana permi sa mga tawo, “Maghinuesoe kamo ag magtalikod sa inyong mga saea ay madali lang ro oras nga ipahayag it Dyos ro anang paghari sa tagipusuon ku anang mga sinakpan.” 3Si Juan ro ginapatungdan ni Propeta Isaias sa ana kato nga ginhambae nga,
“May tawo idto sa *disyerto nga nagasinggit, ‘Pahauma ro aeagyan it Ginuo. Patadlunga ro anang daean.’ ”#3:3 Isa 40:3.
4Ro eambong ni Juan hay ginhaboe nga baeahibo it sapat nga kamelyo, ro anang paha hay human sa panit it sapat ag ro anang pagkaon hay apan ag dugos. 5Ro mga pumueuyo it Jerusalem ag ku bilog nga Judea ag ku tanan nga kahilapit nga banwa sa mansigka pangpang ku suba it Jordan hay nag-inadto kay Juan agod magpinamati kana. 6Gin-ako nanda ag ginhinuesuean ro andang mga saea ag ginbawtismuhan dayon sanda ni Juan sa suba it Jordan.
7Abo man nga mga *Pariseo ag mga *Saduceo ro nag-adto kay Juan agod magpabawtismo. Pagkakita kanda ni Juan hay ginhambaean nana sanda, “Mga tuso gid-a kamo pareho it sawa!#3:7 Ro sawa sa *disyerto hay tuso gid. Permi sandang masae-an nga patay nga sanga ag gulpi eang dayon nga mangangkit it tawo nga nagaagi. Eaom baea ninyo hay makalikaw kamo sa pina it Dyos paagi sa inyong pagpabawtismo? 8Kon matuod nga nagatalikod kamo sa inyong mga saea, pakitaan sa inyong mayad nga buhat. 9Ag ayaw kamo magsalig nga tungod mga inapo kamo ni Abraham hay makalibre kamo sa pina it Dyos. Ginahambae ko kinyo nga ro Dyos hay makahimo it inapo ni Abraham halin sa rayang mga bato iya. 10Haom eon ro pina it Dyos kinyo pareho it wasay nga haom eon ipukan it kahoy. Ro kada kahoy nga owa nagabunga it manami hay pukanon ag igatong. 11Ginabawtismuhan ko kamo it tubi agod ipakita nga naghinuesoe ag nagtalikod eon kamo sa inyong mga saea. Pero may maabot masunod kakon nga mas eabaw pa kakon, ag bisan gauba eon lang ku anang sandalyas hay bukon ako it takos. Pagabawtismuhan nana kamo it Espirito Santo ag kaeayo. 12Ana eon nga paeainon ro mga matarong nga tawo sa mga maeain pareho it mangunguma nga haom eon nga magpahangin ku anang tubas. Anang tipunon ro matimgas nga mga eamigas ag taguon sa anang bodega. Pero ro mga upa hay anang iitsa sa kaeayo nga owa nagakapaeong.”
Ro mga Nagkaeanabo Tag Ginbawtismuhan si Jesus
(Mar 1:9-11; Luc 3:21-22)
13Kat nagapangbawtismo pa si Juan sa suba it Jordan, nag-abot idto si Jesus halin sa Galilea agod magpabawtismo. 14Pero ginabalibaran kunta imaw ni Juan. Hambae nana, “Ham-an it kakon ka gapabawtismo ay ako't-a ngani ro dapat nimong bawtismuhan?” 15Pero nagsabat si Jesus, “Ayaw eon it balibad ay tama eang nga obrahon naton ra ay dapat nga tumanon naton ro tanan nga tama sa panueok it Dyos.” Ngani nagsugot si Juan nga bawtismuhan si Jesus.
16Pagkabawtismo kay Jesus hay nagbutwa imaw. Pagkabutwa nana hay nagbukas dayon ro eangit ag nakita nana ro Dyos Espirito Santo nga nagapanaog nga kaitsura it salampati ag naghapon kana. 17May naghambae dayon halin sa eangit, “Raya ro akong palangga nga unga. Nalipay gid ako it duro kana.”
Actualmente seleccionado:
Mateo 3: akl
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
2024 (Active) Wycliffe Bible Translators, Inc.
