Matayo 2

Ebandu be'bwenge báika kwêra Yesu

1Yesu ábutwaa mwa musi mueke we'Betelehemu, mwa chio che'Yuteya. Mwe'si suku, mwami Heroti iwábaa wèmire. Era nyuma se'kubutwa kwa Yesu, mwa musi we'Yerusalemu mwera kuulukira bandu be'bwenge ba bábaa bátengera kwa lunda esuba lyénde lyáulukira. 2Abu bandu bera kubusa mbu: «Kuli mwana ola wàbuchirwe mbu i'ungába mwami we'Bayuta! Rero, ngai u'àli? Bushi twalólaa kwa ngununu yai yápamukira era suba lyénde lyáulukira, bacha twaíkire kumwèra.»

3Mwami Heroti mwa kunômva bacha, ebwenge bwera kumusungulira ala'uma na besha Yerusalemu boshi. 4Bushi no'ku, era kwâmaala ebakulu-kulu be'bakuhanyi ne'bakangirisi be'Mwaso* boshi. Era kubabusa mbu: «Ewashe! Kirisito* ngai u'abáa ěmire àbuchirwe?» 5Nabo mbu: «Mwa musi we'Betelehemu, mwa chio che'Yuteya. Bushi ei myasi i'emurebi* ábaa áanjikire mira mbu:

6‹Nao Betelehemu mwa chio che'Yuteya,

woyo, atá u'mueke mwa misi yoshi ye'Yuteya,

bushi u'ungátengera mwe'mwami.

No'yu mwami, i'ukêmangira ebandu banyi be'Isiraeli.›#2:6 Somaa Mika 5:2. »

7Heroti kukwera kwâmaala abu bandu be'bwenge kwa bubisho-bisho, chasiya bamúbure mangochi balólaa kwe'i ngununu. 8Chasinda, era kubatuma eBetelehemu na ábabura mbu: «Muyáa kubusirisa kubuya emyasi era luulu so'yu mwana. Na mango mungába mwàmulolire'ko, mwánanyibura chasiya nanyi nyíye kumwèra.»

9Abu bandu be'bwenge, mango bábaa bera bomváa emyasi ya mwami, bera kuchiuma. Era ngununu bálolaa'ko era esuba lyénde lyáulukira, yábaa yénjire yábahondorera. Yera kwîmanga ala mwana ábaa àli. 10Ei ngununu, mango báhubaa kuilola'ko, bera kumowa busese.

11Mwo'lu, bera kwêngirira mwa nyumba, bera kulola kwa mwana àli ala'uma na nyina, Mariya. Bera kukoma emafi bàmwêre. Chasinda, bera kuboola ehao sabo, bera kutula emwana enyembo: ehoro, ne'kasuku, ne'marashi.

12Chasinda, Ongo era kubabura mwa biroto mbu bàtachihubaa era mwa Heroti. Mwa kufuluka era mwabo, bera kwire bárenga mu'inji njira.

Yesu êkibwa eMisiri

13Abu bandu be'bwenge, mango bábaa bera bàchiumaa, malaika* wa Enawetu era kuikira Yosefu mwa biroto. Era kumubura mbu: «Yosefu! Bàtukaa utóle emwana na nyina, muháire eMisiri. Mwǐkalaa'yi, kuikira emango nyingáhuba kubabura mbu mufúlukaa, bushi Heroti angáika kuhonda emwana, chasiya àmwîte.»

14Bushi no'ku, Yosefu era kubatuka mwo'bu butufu, era kutola emwana na nyina, era kunáhaira nabo eMisiri. 15Era kwíkala'yi kuikira mango Heroti áfaa. Mwo'lu, mwe'chinwa chéraa cháberera cha Enawetu ábaa átechire mira kurengera emurebi* mbu: «Namáalaa emwana wanyi àfuluke kutenga eMisiri.»#2:15 Somaa Oseya 11:1.

Ebana be'busana bêchibwa eBetelehemu

16Mango Heroti álolaa kwa abu bandu be'bwenge bàmwêngeere, era kusibuka busese. Era kutuma ebandu mwa musi we'Betelehemu no'mwa ndambi sao soshi, báye kwîta ebana boshi kutengera kwa tubonjo-bonjo kuikira kwa ba bète myaka ebiri. Ekuishirira kwe'i myaka ebiri, kwátenganaa ne'myasi era ebandu be'bwenge bámuburaa. 17Rero, echinwa chera kwire cháberera cha chátetwaa na murebi* Yeremiya mbu:

18«Malira manene, mwomvíkere mwa musi we'Rama.

Rakeli álirira ebana bai busese,

atánahonda kusiranyisibwa,

bushi abu bana bàtachiri'o.»#2:18 Somaa Yeremiya 31:15.

Yosefu átenga ne'mwana eMisiri

19Mango Heroti ábaa era àfaa, ei Misiri kanji malaika* wa Enawetu era kuikira Yosefu mwa biroto. 20Era kumubura mbu: «Bàtukaa utóle emwana na nyina, ufúluke mwa chio che'Isiraeli, bushi ba babáa báhonda kwîta oyu mwana bafíre mira.»

21Yosefu era kunábatuka, era kutola emwana na nyina, na báfuluka mwa chio che'Isiraeli. 22Si mango Yosefu ômvaa kwa Arikelao iwérire wêma eYuteya mwe'twe lye'she Heroti, era kwôbaa kuya'yi. Era nyuma se'kuburwa mwa biroto, era kwire áya mwa chio che'Kalilaya. 23Áikire'yi, era kuya kubera mwa musi we'Nasareti. Mwo'lu, mwe'chinwa chábereraa, cha chátetwaa kurengera ebarebi mbu: «Akénde érikibwa mbu mwesha Nasareti.»

Actualmente seleccionado:

Matayo 2: tbt

Destacar

Copiar