Génesis 5
5
Adánpita miraqkuna
1 Crónicas 1.1-4
1Kaychömi qelqaraykan Adánpa surinkunapita y paykunapita miraqkunapitapis.
Runata kamar kikin niraqtami Tayta Dios kamarqan.#Mat. 19.4; Mar. 10.6. 2Olqutapis warmitapis paymi kamarqan. Kamashqan junaqmi Tayta Dios nirqan paykuna runa kayashqanta. Nirkurmi kay pasacho ali kawayänanpaq bendicionninta qorqan.#Gén. 1.27-28.
3Pachak kimsa chunka (130) watayuq Adán kaykaptinmi surin Set yurirqan. Say surinqa taytalanmi karqan. 4Surin Set yurishqanpita puwaq pachak (800) wata masraqmi Adán kawarqan. Paypa surinkuna olqupis y warmipis kayarqanraqmi. 5Esqun pachak kimsa chunka (930) watayuq kaykarmi Adán wanurqan.
6Pachak pisqa (105) watayuq Set kaykaptinmi surin Enós yurirqan. 7Saypita Set kawarqan puwaq pachak qanchis (807) wata masraqmi. Setpa surinkuna olqupis y warmipis kayarqanraqmi. 8Set esqun pachak chunka ishkay (912) watayuq kaykarmi wanurqan.
9Enós esqun chunka (90) watayuq kaykaptinmi surin Cainán yurirqan. 10Surin Cainán yurishqanpita Enós kawarqan puwaq pachak chunka pisqa (815) wata masraqmi. Enóspa surinkuna olqupis y warmipis kayarqanraqmi. 11Enósqa esqun pachak pisqa (905) watayuq kaykarmi wanurqan.
12Cainán qanchis chunka watayuq (70) kaykaptinmi surin Mahalaleel yurirqan. 13Surin Mahalaleel yurishqanpita Cainán kawarqan puwaq pachak chusku chunka (840) wata masraqmi. Cainánpa surinkuna olqupis y warmipis kayarqanraqmi. 14Cainán esqun pachak chunka (910) watayuq kaykarmi wanurqan.
15Mahalaleel soqta chunka pisqa (65) watayuq kaykaptinmi surin Jared yurirqan. 16Surin Jared yurishqanpita Mahalaleel kawarqan puwaq pachak kimsa chunka (830) wata masraqmi. Mahalaleelpa surinkuna olqupis y warmipis kayarqanraqmi. 17Mahalaleel puwaq pachak esqun chunka pisqa (895) watayuq kaykarmi wanurqan.
18Jared pachak soqta chunka ishkay (162) watayuq kaykaptinmi surin Enoc yurirqan. 19Surin Enoc yurishqanpita Jared puwaq pachak (800) wata masraqmi kawarqan. Jaredpa surinkuna olqupis y warmipis kayarqanraqmi. 20Jaredpis esqun pachak soqta chunka ishkay (962) watayuq kaykarmi wanurqan.
21Enoc soqta chunka pisqa (65) watayuq kaykaptinmi surin Matusalén yurirqan. 22Enocqa Tayta Dios munashqannömi kawarqan. Surin Matusalén yurishqanpita kimsa pachak (300) wata masraqmi kawarqan. Enocpa surinkuna olqupis y warmipis kayarqanraqmi. 23Enoc kawarqan kimsa pachak soqta chunka pisqa (365) watami. 24Tayta Dios munashqanno kawashqanpitami Enocta Tayta Dios kawaykaqta pushakurqan.#Heb. 11.5; Jud. 14.
25Matusalén pachak puwaq chunka qanchis (187) watayuq kaykaptinmi surin Lamec yurirqan. 26Lamec yurishqanpita Matusalén kawarqan qanchis pachak puwaq chunka ishkay (782) wata masraqmi. Matusalénpa surinkuna olqupis y warmipis kayarqanraqmi. 27Matusalénpis esqun pachak soqta chunka esqun (969) watayuq kaykarmi wanurqan.
28Lamec pachak puwaq chunka ishkay (182) watayuq kaykaptinmi surin yurirqan. 29Surin yuriykuptinmi Lamec nirqan: <<Kay pasata Tayta Dios maldicionash kaptinpis kay surïmi ali yanapämäshun arurpis aläpa mana nakanansipaq>>.
Sayno nirmi surinta jutisirqan Noé jutin kananpaq.#5.29 Noé ninanqa yanapäkuq ninanmi. 30Noé yurishqanpita Lamec kawarqan pisqa pachak esqun chunka pisqa (595) wata masraqmi. Lamecpa surinkuna olqupis y warmipis kayarqanraqmi. 31Lamec qanchis pachak qanchis chunka qanchis (777) watayuq kaykarmi wanurqan.
32Noé pisqa pachak (500) watayuq kaykaptinmi surinkuna yuriyarqan. Say surinkunapa jutinkunami karqan Sem, Cam y Jafet.
Actualmente seleccionado:
Génesis 5: qvhB
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
© 2003, Wycliffe Bible Translators, Inc. All rights reserved.
