Luka 15
15
Mondɛ moBata Yona Olaboa
1Baputeja batako na bato babikɔmɛli bibe babatama na Yesu hulelu bo bamohokee. 2BaPalusi na basɔni ko banungu-bana. Babala bo, Moto yoyo asɔkɔ bato babe na sepi, na ayakaka na bu a esika emɔci.
3A mojɔ momina, Yesu abala na bu mondɛ mu. 4Okina moto onu akada na bata mokama, na omɔci akabunga na nde, atakina bata domi-libwa na libwa a lisobe bo akɛe nduki ebata yona obungi, oko a ehole êmoboloja yo? 5Akamoboloja, adi bomobakea a malɔkulɔku mande na sepi. 6Akamea a ndako ende, âbea bma’nde na mituteano minde, âbala na bu bo, Sepani na mbi, mojɔ bo nabolojai bata ombi yona odaka mobungake. 7Mbi natɔndɔkɔ no bo, Sepi êda koko boa oho Diko a mojɔ momoto omɔci mobe yona ohekojaka molema monde. Sepi emina edi bonɔ sepi a mojɔ mobato babodongo domi-libwa na libwa baya baditi bohekoja milema mibu.
Mondɛ moLikonja Lia Libunga
8Isa okina mwali adi na likonja, pata domi, na emɔci ekabunga na nde, atayoja paka a bo’mbɔ ndako a boduka na bingi oko a ehole êboloja yo pata emina? 9Akaeboloja, adi bobea bina’nde na mituteano minde, na âbala na bu bo, Sepani na mbi, mojɔ bo nabolojai pata yena ebungi na mbi. 10Mbi natɔndɔkɔ no bo sepi edi koko boa a tei ebabwɛnji baNjambe a mojɔ momoto omɔci mobe yona ohekojaka molema monde.
Mondɛ moMwana Ongɔngɔ
11Abala koko bo, Okina momi adaka na bana-bami babae. 12Yona ongɔngɔ abala na sangwa’nde bo, Sesa, pani libondo lilikonja libwani mbi bosangoa. Sangwa’bu akaba leka londe losusu, na abapa libondo-libondo. 13Ama nɔ makina masu, mwana ongɔngɔ ami tomba oko leka londe losusu, akɛ a ekina esika bohali mɛnɛ, na anameja likonja linde lisusu oho na bikɔmɛli bibe. 14Ama yo sieja likonja linde kanga lisusu mɛnɛ, linjale linɛnɛ limi doa oko a esika emina, na yo abanga boda na taka. 15Oko boa akɛ acingame na moto omɔci ongando emina, na yo amoloma a gbie jinde a bopa ngulube boyaka. 16Iyo adaka na posa bo agole na leka loyakaka ngulube; pɛpɛ nongo moto ko omopa eka. 17Yana alɛ yo a molema monde, abala bo, Sangwa’mbi adi na basali banɛnɛ. Ibo te bahɔnɔke boyaka milɛmbɛ mibu misusu; mbi ko nagwi nja a esika yeye! 18Mbi nadi bongɔ; nâkɛ oko ai sangwa’mbi; nâbala na nde bo, Sesa, mbi nakɔi bobe a boso boNjambe na a boso bowɛ. 19Nitabɔngɔ koko bo nadae na kombe emwana owɛ. Kina nadae o mosali owɛ omɔci. 20Oko boa yo angɔ, na ahula ai sangwa’nde. Sangwa’nde ko amonɛ yana adaka yo oko bohali. Amokea wa, apota ebango, amodinga lilɔbɔ, na amohia. 21Mwana abala na nde bo, Sesa, mbi nakɔi bobe a boso boNjambe na a boso bowɛ. Nitabɔngɔ koko bo nadae na kombe emwana owɛ. 22Sangwa’nde ko abala na babuli bande bo, lmejani bokpa kasaka eyai yena enɔi na bomwenga, molwajani. Mo’sani pɛtɛ a mosapi; molwajani sapata a mako. 23Doani na mwana-ngɔmbɔ mojukamake, mowani. Kinani so boyake na bodae na sepi. 24Mojɔ bo mwana yoyo ombi yona odaka mogwake, adi koko mɔ; adaka mobungake, na aboloi. Oko boa babanga bosepa. 25Mwana’nde momi, mwana-sɔmi, adaka a gbie. Yana ahulaka yo, amea hulelu na ndako, na aka moliki na bobua bongɔmɔ. 26Abea okina mosali, na amobɔjɔ cina emina. 27Iyo abala na nde bo, Mwangwao ahuli. Sangwao awoi mwana-ngɔmbɔ mojukamake mojɔ bo amosi bopele. 28Mwana omina akɛnjɔ na alona bokwea. Sangwa’nde amana, na amongɔɔnɔ bo akwee. 29Iyo ko asɔmbeja sangwa’nde bo, Ika! Mbi nakɔmɛkɛ wɛ edɛye bianga binɛnɛ. Naisopa nongo mobeko mowɛ; wɛ ko opakini mbinongo mwana-kambɛli bo nasepe na bma’mbi. 30Ahuli ko mwana yo owɛ, yona onamejai likonja liwɛ na bali balisɔngi, omowei mwana-ngɔmbɔ mojukamake. 31Sangwa’nde amosɔmbeja bo, Mwana’mbi; wɛ odi na mbi na bosusu; leka lombi losusu lodi oko ai wɛ. 32Ebɔngi ko bo bodae na sepi na elɛndɛ, mojɔ bo yo mwangwao yona odaka mogwake, adi koko mɔ; adaka mobungake, na aboloi.
اکنون انتخاب شده:
Luka 15: NTNG61
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Alliance Biblique de la R. D. Congo