Mathew 3
3
1Naŋ alo qoŋ ŋaŋ ilone i John i Vasugroŋo we rowo lue ma, we toretore alo vanua vanameag a Judea, 2ti vet wa, Tur nomleas, ape o marana tavunana me rasu ma. 3Ape iloke ineia i Isaia o prophet me vava apena wa,
Naliŋansei we awoawo raka alo vanua vanameag wa,
Tur wurvag namatesalan i Lord,
Tur ge taniniga non o tano vanoga ŋaŋ.
4Wa i John iloke non o siopa o ul kamel, wa narotigina o vin kau ape toqana, wa nagana o paut wa o lig telepue talo mot. 5Naŋ me rowolue at suria o Jerusalem wa o Judea nol, wa o vanua nol a pan Jordan; 6wa me lav mora o vasugroŋo amaia alo peilava Jordan, we gaganag lue napugara. 7Wa ni me ilo ira Pharise tara Saduke we qoqo we mule ma ape non o vasugroŋo, ti vet mun neira wa, Ra natmata, isei me nir lue mun kamiu si a toa nan o lologagara we rasu ma? 8O manigiu iloke, tur uwa o woai we sasarita ape nomleas. 9Wa nipea we nonom si a vava raka alo toqamiu wa, I Abraham amenina i tamanina; ape na we vava mun kamiu si God we mana we ge raka nan o vat ŋaŋ iloke ira nanatuna mun i Abraham. 10Pa ilokenake o parapara me map veta ape gar tangae, wa o val tangae gate uwa o woai we wia te tara sur te sasavrag ilo av. 11Inau nake na we vasugroŋo kamiu mun o pei ape nomleas, nava i gene we mule ma ti a tagirik we mana nan nau, wa na gate sar si a taur non o sarsar goro malekai; ni te vasugroŋo kamiu mun o Vui we Roŋo wa o av. 12Non o rivriv alo panena wa ni te wurvag mantag non o tano pitpit korn, we te sogon o korn alo qea, pa ni te gao qet o virotiu alo av tete pun mate lai.
13Paso nan i Jesus me van lue ma nan o Galilea ape Jordan sur i John sin la o vasugroŋo amaia. 14Nava i John sin gatogoroa, ti vet wa, Namok ran si na la o vasugroŋo amaiko, pa ko we van ma surinau? 15Naŋ i Jesus me valui goroa ti vet wa, Maukeg galtag ma; ape we sar mun nara si a ge tira o liŋe taniniga nol tamaike. Wa ni qara maukeg apena. 16Wa me vasugroŋo paso i Jesus, wa ni me kalo ran nan o pei: wa ilo, o tuka kor ti rave wora munia, wa ni me ilo o Vui non God ti siwo ma, tama o qona, wa ti mule ivunana. 17Wa ilo, o liŋai mavunana ti vet wa, Iloke natuk o meratape, na we ilo mana ineia.
اکنون انتخاب شده:
Mathew 3: MOTA
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
New Testament was published by the British and Foreign Bible Society in 1931.