Matayɔ 26
26
Ɓakumu‑kumu ɓuwulio ididi yɛɛ wɛ Yeso
(Mak 14:1-2; Luk 22:1-2; Yʉa 11:45-53)
1Ati ngia Yeso a꞉pipo‑ɔɔ ngaka moni ngikʉnanɨ ɓʉ gba, gʉ ɛyɔ nʉ ɓakpataka ngiɓangɔ ɓɔ: 2« Nakʉmbɨa ɓɔ mbise ʉ makwaa kapɨnɨ, kaɓio nʉ Ʉmbɔ wʉ Pasɨka, uwa ɓa‑ɔɔ kʉsa kʉgaba Mwana ngia ʉ Mombi, nʉ nayɔ kʉɓakaka ekoo ʉ mʉsalaba. »
3Tiga nanɨ, ɓangama ɓʉ ɓakumu‑kumu nʉ ɓagʉgʉ ngiɓa ɓʉ Ɓayuda, ɓambʉmʉmanakɨa amati ʉ ɨkáa yɛɛ ɨja ngia yɨ Kayafa ngia i꞉nye ngama ʉ ɓakumu‑kumu. 4Ɛɓɔ kʉ ɓuɓomu ɓa꞉kwaisio kʉfa Yeso akʉ ɓaɗi, nʉ nayɔ kʉwa. 5Gʉ ɛɓɔ ɓɔ: « Kɔɔmufenikɔmʉ akʉ ɓisi ɓʉ Ʉmbɔ wʉ Pasɨka, ambʉ ɓombi ɓɔɔtɨchakanakɨakɔmʉ. »
Moi uto Yeso malazi akʉ 'ʉtʉ
(Mak 14:3-9; Yʉa 12:1-8)
6Ɓisi mʉngana, Yeso i꞉nye anʉ Betania, ɔɔ gue mʉngana ino ɓɔ Simoni iya i꞉nye nʉ keɓu‑keɓu. 7Iya Yeso i꞉nye tiga kʉdyakaka, moi mʉngana ambʉka tinene nayɔ nʉ uchupa wʉ malazi uhue tʉkʉ ɓʉ kyɛɛ, wʉ ɨgabʉ ɓʉmʉ nadɨndɨ.#26:7 'Ʉkɛɛ wɔngɔ, ɓa꞉utuo nʉ ikopi yɨ ɨgabʉ. Kija a꞉to nawɔ Yeso akʉ 'ʉtʉ 8Iya ɓakpataka ngiɓangɔ ɓa꞉na nayɔ moni ngikʉnanɨ, yambʉɓʉkyɨa ɓɨɓɨ akʉ mɨtʉma. Ɓambusigo ɓɔ: « Utambiso‑zʉ malasi ɓwanɨ jʉtanɨ? 9Ambʉ́ ɓʉ꞉ugabiso gɔ ɨgabʉ ɓʉmʉ, falanga ɔngɔ ɓambuɨpakɨa ɓombi ɓʉ ɓanangyɨa! »
10Yeso a꞉mbɨa moni ngikʉnanɨ ɓi꞉nye kusigo engo tʉkʉ mbɨaa. Gʉ ɛyɔ naɓɔ ɓɔ: « Nakudyiso moi ngia ikoko akʉ moni kɨmanɨ? Ʉ꞉nakyɨa ɛmɛ moni kɔɔ muɗo nadɨndɨ! 11Inu naakyɨa ɨzɔ nʉ ɓombi ɓʉ ɓanangyɨa makwaa kʉ muɓomu. Ɨkyɛmɨngana, ɛmɛ pɛpɛ, kambʉkɔmʉ kuɓio ɨzɔ ninu makwaa kʉ muɓomu. 12Malazi ngua ʉ꞉naɗɨa nawɔ nʉ ndʉtʉ, ya kʉtambanaka hʉnanɨa ngiisɛmɛ. 13Maninu kusigio tʉkʉ kingono ɓɔ, akʉ ɨtaka kʉ iɓomu akʉ ɓa꞊ɓʉkyɨa sina‑ɛɛ kʉɓɨakɨa Ɨsaʉ yɛɛ Iɗo, ɓaɓʉkyɨa tʉkʉ kʉchwa uduɓa wʉ moni ngika moi ngia ʉkyɨa akɛ, nayɔ kutunguo. »
Yuda Ɨsɨkalɨɔta ʉsa kʉgaba Yeso
(Mak 14:10-11; Luk 22:3-6)
14Tiga ananɨ, Yuda Ɨsɨkalɨɔta ngia i꞉nye mʉngana wʉ ɓatitima kumi nʉ ɓapɨni ngiɓa ɓʉ Yeso, a꞉sa tiga kʉgbʉka ɓangama ɓʉ ɓakumu‑kumu. 15Ambuɓuɓukuo ɓɔ: « Na꞊nanzo ɛmɛ ɨmanɨ, ndʉ maninzo Yeso? » Ɓambumupoyo mikpekpe yɨ falanga makumi kaatʉ, kija ɓa꞉munzo. 16Kʉʉngwa tii tʉkʉ ananɨ, Yuda ambufaniso hata wati wɔɔ uɗo ngua a꞊kwanana‑ɔɔ gaba Yeso.
Ɔɔ Yeso nʉ ɓakpataka ngiɓangɔ ɓʉdya idyo yɨ ʉmbɔ wʉ Pasɨka
(Mak 14:12-21; Luk 22:7-14,21-23; Yʉa 13:21-30)
17Ɓisi ɓʉ 'ʉkpanganɨa wʉ Ʉmbɔ ngua wʉ mikati ngia yambikinye nʉ ɓʉtɨ ɓɔɔ ɓufukise, ɓakpataka ɓambʉka kuɓukuo Yeso ɓɔ: « Wakʉkʉnda ɓɔ kʉsa nɔwɛ kʉtambanakɨa idyo yɨ ʉmbɔ wʉ Pasɨka gbanɨ? » 18Ambuɓutisio ɓɔ: « Seni na akʉ gʉlʉ,#26:18 Iinanɨ ya gʉlʉ ʉ Yɛlʉsalɛma. ɔɔ mombi mʉngana ɓɔ. Mʉɓɨeni ɓɔ: ‹ Mʉpananakɨa u꞉sigo ɓɔ: Wati nguʉsɛmɛ wa tiga kʉ tinene, mukwaisio kʉdya idyo yɨ ʉmbɔ wʉ Pasɨka andɔɔ aka, ɨzɔ nʉ ɓakpataka ngiɓʉsɛmɛ. › » 19Ɓakpataka ɓambʉkyɨa ngbanga kʉndʉ aka Yeso a꞉ɓusigio‑ɔɔ, kija ɓa꞉zɨa idyo yɨ ʉmbɔ wʉ Pasɨka.
20Yi꞉nye tiga nɨpasɨ, Yeso ambuwulo kʉdyakaka ɨzɔ nʉ ɓakpataka ngiɓangɔ kumi nʉ ɓapɨnɨ. 21Ati ngia ɓi꞉nye tiga‑ɔɔ kʉdyakaka, ambuɓusigio ɓɔ: « Maninu kusigio tʉkʉ kingono ɓɔ, mombi mʉngana ati ʉndɛnʉ aka akʉsa nɛmɛ kʉgaba. » 22Moni ngikʉnanɨ kambuɓudyiso ikoko nadɨndɨ. Ɓambufaniso nayɔ kuɓukuo kʉ nangana nangana ɓɔ: « Huu, Makʉʉɓɨɨ! Ajʉ ɛmɛ ɓiɛ? » 23Yeso ambuɓutisio ɓɔ: « Mombi ngia kakugiso nayɔ ɨkɔndɔ izi mɨngana akʉ zanɨ, ɛyɔ iya akʉsa nɛmɛ kʉgaba akʉ lɨkɔndɔ lʉ ɓakwa. 24Ɛmɛ Mwana ngia ʉ Mombi makʉsa kuwo, tʉkʉ ndʉ aka ɓa꞉tɨndakɨa‑ɔɔ ekoo asɛmɛ amati ʉ Mubio. Tɔ, ikoko nʉ mombi ngia akʉsa nɛmɛ kʉgaba! Ambʉ́ mombi ngiinanɨ a꞉nʉtanɨakɔmʉ jɛnɛ gɔ! » 25Ɛyɔ Yuda ngia a꞉gaba Yeso, ambumuɓukuo ɓɔ: « Huu, Mʉpananakɨa! Ajʉ ɛmɛ ɓiɛ? » Yeso ambumutisio ɓɔ: « Ɔwɛ mambɨnyɔngɔ kʉ wusigo! »
Ndʉtʉ nʉ miniki ngika kʉ Yeso
26Ati ngia ɔɔ Yeso nʉ ɓakpataka ɓi꞉nye‑ɔɔ kʉdyakaka, ambʉchɨka mukati, ambutuisio Asʉɓɨɨ ɨbɨba. Ambuuɓundo, kija a꞉ɓunzikio, gʉ ɛyɔ naɓɔ ɓɔ: « Chɨkeni nambʉdya, iyakɛ ya ndʉtʉ ngiisɛmɛ. » 27Ambʉchɨka ʉpata, ambutuisio Asʉɓɨɨ ɨbɨba, ambuɓunzo, gʉ ɛyɔ naɓɔ ɓɔ: « Mweni inu kʉ ɓuɓomu! 28Jʉ miniki ngikʉsɛmɛ ikakɛ, ika kakʉsa kuchichio ekoo ʉ ɓombi ɓaja, aka ekoo ngia ɓɔ ɓʉnyɨa nʉ ʉpɨa wʉ ɓʉɓɨɓɨ ngiɓʉndaɓʉ. Miniki ngikʉnanɨ kakʉkwananakiso agɔmɔ ngia wʉ Asʉɓɨɨ. 29Maninu kusigio ɓɔ, ma꞊mbʉkʉmwa ɓata vinyo ngia, kʉɓʉya tʉkʉ isiya ma꞊mwa sina ɓata‑ɔɔ iya wʉ ɨtakɨ‑takɨ ɨzɔ ninu, amati ʉ Ɓʉngama ngiɓa ɓʉ Tidoo ngiasɛmɛ. » 30Kija ɓa꞉sʉa ʉmbɔ wɔɔ bibise Asʉɓɨɨ. #26:30 Ati ngia Ɓayuda ɓi꞉nye pipo‑ɔɔ idyo yɨ Ʉmbɔ wʉ Pasɨka, ɓi꞉nye sʉa Mʉmbɔ 113—118. Mbise ɔngɔ, ɓambʉɓʉa, ɓambʉsa akʉ ɨkpangba yɨ Mijeituni.
Yeso ʉɓɨa kʉpɛɛ ɓɔ Pɛtɛlɔ akʉsa nayɔ kʉtata
(Mak 14:27-31; Luk 22:31-34; Yʉa 13:36-38)
31Kija Yeso a꞉sigio ɓakpataka ngiɓangɔ ɓɔ: « Nuɓutu ngia wʉ ɓʉɓʉnɨ, baya ngiindɛnʉ kʉ ɓuɓomu yakʉsa kʉkwa aka ekoo asɛmɛ. Jʉ ɓa꞉tɨndakɨa, ɓɔ:
‹ Ma꞊wa mʉpɨmakɨa wʉ ɓakɔndɔlɔ.
Kija imbi yɨ ɓakɔndɔlɔ, ya꞊ngbingono. ›#Popoko Jak 13:7
32Ɨkyɛmɨngana, mbise ʉ jʉkana ngiisɛmɛ akʉ ingyo, mabi apɛɛ ninu kusiɓo anʉ Galilaya. » 33Pɛtɛlɔ ambumusigio ɓɔ: « Abana baya yɨ ɓombi nga ɓɔmɔ kʉ ɓuɓomu yɨkweni ekoo asɔɔ, ɨkyɛmɨngana baya nga yɨsɛmɛ pɛpɛ yambʉkʉkwa gʉkʉ ɗɛkɛkɛ! » 34Yeso ambumutisio ɓɔ: « Manɔwɛ kusigio tʉkʉ kingono ɓɔ, nuɓutu ngia wʉ ɓʉɓʉnɨ, pɛɛ ngia gue ʉ kɔɓɔ a꞊natɨa‑ɔɔ, waɓio wʉpanatateni nɨsɨ kaatʉ, ɓɔ wambakanambɨa. » 35Gʉ Pɛtɛlɔ nayɔ ɓɔ: « Abana yɨkeni tʉkʉ ɓɔ kuwo ɨzɔ nɔwɛ, ɛmɛ mambʉkʉnatata gʉkʉ ɗɛkɛkɛ! » Ɓakpataka ngiɓɔmɔ kʉ ɓuɓomu ɓambusigo kʉ ɓwanɨ.
Yeso ʉta Asʉɓɨɨ anʉ Gɛtɛsɛmanɛ
(Mak 14:32-42; Luk 22:39-46)
36Ɔɔ Yeso nʉ ɓakpataka ngiɓangɔ, ɓambʉsa anʉ Gɛtɛsɛmanɛ. Ati ngia ɓa꞉ɓʉya‑ɔɔ, ambuɓusigio ɓɔ: « Ɓieni ɓuwei tʉkʉ aka, ati ngia ma‑ɔɔ kʉsa kʉta Asʉɓɨɨ oki. » 37Ambʉchɨka ɔɔ Pɛtɛlɔ nʉ ɓana ɓʉ Zɛbɛdayɔ ɓapɨnɨ kʉsa ɨzɔ nayɔ. Ambufaniso kʉdya ikoko nadɨndɨ, nʉ kʉdya ɓatanga. 38Kija a꞉ɓusigio ɓɔ: « 'Ʉtʉma nguʉsɛmɛ wakʉdya ikoko ikanzi ngia ɓɔ mawu tʉkʉ woni. Tukueni tʉkʉ aka nʉ ɓieni tʉkʉ ɓʉɓɨsɨnɨ ɨzɔ nɛmɛ. » 39Ambʉsɨngana nʉpɛɛ ɗɛkɛkɛ, ambʉgbʉkʉmɨa kʉɓʉya mesu tʉkʉ akɛsɨ. Ambufaniso nɨta Asʉɓɨɨ ɓɔ: « Huu, Tidoo! Ndʉ wabaya ɓaka, nungwisio ʉpata wʉ ikoko nguawɛ! Abana ɓwanɨ kititi, yɛɛɓiokɔmʉ akʉ ɓʉkʉnda ɓʉsɛmɛ, ɨkyɛmɨngana yiɓio tʉkʉ akʉ ɓʉkʉnda ɓʉsɔɔ. » 40Mbise ɔngɔ, Yeso ambʉtʉa aka ɓakpataka ngiɓangɔ ɓa꞉tukuo‑ɔɔ. Ambʉɓʉgbʉka tʉkʉ akʉ tɔɔ ɓʉ kpɛ. Ambusigio Pɛtɛlɔ ɓɔ: « Huu! Inu ɓugue ngiɓa! Ajʉ yambaka kyɨa ɓata ikanzi ngia napɨa‑ɔɔ tɔɔ ɨzɔ nɛmɛ abana tʉkʉ saa mʉngana ɓiɛ? 41Nɔɔkwaenikɔmʉ tɔɔ. Faniseni kʉta Asʉɓɨɨ, ambʉ nɔɔkumuniokɔmʉ amati ʉ kanyo! 'Ʉtʉma wa ɨwɔ tʉkʉ nʉ angu, ɨkyɛmɨngana ndʉtʉ pɛpɛ ya tʉkʉ nʉ ɓayadʉɓa. » 42Yeso ambʉɓʉsɨa, kija a꞉sa ɓata akʉ nɨsɨ kapɨnɨ kʉta Asʉɓɨɨ ɓɔ: « Tidoo, ndʉ yambʉkʉbayanɨa ɓɔ ʉpata wʉ ɓʉka‑ɓʉkaɨ ngua wʉnʉngwɨa, ɓɔ mʉʉmwa tʉkʉ mwanɨ, sɨa ɓʉkʉnda ɓʉsɔɔ ɓʉkyɨanɨa! » 43Ambʉtʉa ɓata kʉ akʉ ɓakpataka ɓi꞉nye‑ɛɛ, ambʉɓʉgbʉka ɓata tʉkʉ akʉ tɔɔ, jʉ mesu ki꞉nye naɓɔ ɓʉ jɛngɛ nʉ tɔɔ. 44Kʉ ɓwanɨ, ambʉɓʉsɨa ɓata, ambʉsa ɓata kʉta Asʉɓɨɨ akʉ nɨsɨ kaatʉ ɔngɔ. Kija a꞉tʉɨya kusigo moni tʉkʉ mʉngana ngikʉnanɨ. 45Mbise ɔngɔ, ambʉtʉa ɓata kʉ akʉ ɓakpataka ɓi꞉nye‑ɛɛ, gʉ ɛyɔ naɓɔ ɓɔ: « Na ɓata tʉkʉ akʉ tɔɔ, nʉ humuo ɓiɛ! Huu! Wati wʉka kanɨ! Mwana ngia ʉ Mombi iinanɨ ɓa tiga kʉsa nayɔ kunzo akʉ lɨkɔndɔ lʉ ɓombi ɓʉ ɓʉɓɨɓɨ. 46Ʉngweni ɨkʉʉ, kuseni! Kangeni‑zʉ mombi ngia ʉ꞉nagaba, iiya a tiga kʉ tinene akɛ! »
Nɨfa ngia yɨ Yeso
(Mak 14:43-50; Luk 22:47-53; Yʉa 18:3-12)
47Ati ngia Yeso i꞉nye zʉ‑ɔɔ tʉkʉ kʉyaka, kʉ nɨma ngiinanɨ, Yuda, mʉngana ʉ ɓakpataka kumi nʉ ɓapɨnɨ ngiɓangɔ ambʉɓwanɨa. I꞉nye tiga ɨzɔ nʉ ungbutu wʉ ɓombi wɔɔ ʉja nʉ ɓabakanza nʉ lingba akʉ lɨkɔndɔ. Ɓombi ngiɓʉnanɨ tʉkʉ ɓangama ɓʉ ɓakumu‑kumu nʉ ɓagʉgʉ ɓʉ Ɓayuda ɓi꞉nye ɓʉɓʉtʉmeni. 48Yuda ngia i꞉nye ʉmʉgabeni a꞉ɓʉpanɨa kɛɛ tɨmanɨ ɓa꞊mʉmbɨa nayɔ ɓɔ: « Tʉkʉ mombi ngia makʉsa nayɔ kʉnaputo, ɛyɔ iinanɨ, mufeni tʉkʉ fanɨ! » 49Chʉkɔmʉ nʉ ɨgbalakisie, Yuda ambʉka anambamba ʉ Yeso, gʉ ɛyɔ nayɔ ɓɔ: « Majɨkanatanɨ, Mʉpananakɨa! » Kija a꞉mʉmwa ingyengye. #26:49 Kuɓukuono majɨkanatanɨ ngia yɨ Ɓayuda amati ʉ ɓʉkʉnda nadɨndɨ yi꞉nye kyɨa ɓwanɨ 50Yeso ambumutisio ɓɔ: « Adii! Moni ngika wʉ꞉ka kʉkyɨa engo, kʉkyɨa tʉkʉ kyɨanɨ. » Tʉkʉ gagaa ngiinanɨ, ɛɓɔ ɓombi ngiɓʉnanɨ ɓambʉka tinene nʉ Yeso ɓambʉmʉfa. 51Gbɛgbɛ tʉkʉ ananɨ, mombi mʉngana ati ʉ ɓombi ngiɓa ɓi꞉nye nʉ‑ɔɔ Yeso ambiso bakanza ngiangɔ ɓʉ fwa, ambubuso nayɔ mombi ʉ kuu wʉ kumu‑kumu ngia ɔɔ 'ʉja, ambʉmʉtɨna 'uchwei ɓʉ cha. 52Ɨkyɛmɨngana, Yeso ambumusigio ɓɔ: « Tuiso bakanza ngiasɔɔ kʉ amati ʉ ɨkáa yɛngɔ! Jʉ mombi kʉ uɓomu ngia aamana ɗite nʉ bakanza, a꞊wo sina kʉ nʉ bakanza! 53Ɔwɛ gue ngia, ajʉ wambʉkɔmʉ kʉmbɨa ɓiɛ? Mu꞉kikilikieni piɛ Tidoo ɓɔ ʉnasalɨa, ambʉ́ ʉ꞉natʉmɨakɔmʉ‑zʉ ɓamalaika ɓaɛlɛfʉ ɓaja ɓiɛ? 54Ɨkyɛmɨngana, ndʉ akyɨa ɓwanɨ, moni ngika ɓa꞉tɨndakɨa amati ʉ Mubio ka꞊kyananakɨa tiga tanɨ? Jʉ kingono yɨkwanana ɓɔ moni kʉ muɓomu kʉkyananakɨa tʉkʉ ɓwanɨ. » 55Gʉ Yeso nʉ ɓombi ngiɓʉnanɨ ɓɔ: « Ya tanɨ iya nʉ꞉nɨkyɨa‑ɔɔ nʉ ɓabakanza nʉ lingba ndʉ gʉ mʉnɨtanaka mombi ʉ ndiɓo? Mi꞉nye kyɨa pongo makwaa kʉ muɓomu tʉkʉ ati ʉndɛnʉ, nʉ kʉpanɨa amati ʉ ɨkáa yɨ Asʉɓɨɨ, chʉkɔmʉ nambʉnafa gʉkʉ ɓisi mʉngana. 56Ɨkyɛmɨngana, ya tʉkʉ jʉ moni kʉ muɓomu ngika lɨgbɛ lʉ Asʉɓɨɨ la꞉tɨndakɨa kʉkwanana tʉkʉ kʉkyananakɨa. » Gbɛgbɛ tʉkʉ ananɨ, ɓakpataka ngiɓangɔ kʉ ɓuɓomu ɓambʉmʉsɨa, kija ɓa꞉nanzana nʉ bangʉ ɓʉ waa.
Yeso ʉmaa apɛɛ ubua wɔɔ ʉja ngua wʉ Ɓayuda
(Mak 14:53-65; Luk 22:54-55,63-71; Yʉa 18:13-14,19-24)
57Ɓombi ngiɓʉnanɨ ɓa꞉fa Yeso, ɓambʉsa nayɔ ɔɔ Kayafa, ngama ʉ ɓakumu‑kumu. Ɓapananakɨa ɓʉ mapanʉ nʉ ɓagʉgʉ ɓʉ Ɓayuda kʉ ɓuɓomu, ɓa꞉junikio na andɔngɔ. 58Pɛtɛlɔ i꞉nye kʉkpataka Yeso tʉkʉ ambise ɓʉ kɛlɛ. Kʉ ɓwanɨ, ɛyɔ ambʉɓʉya tʉkʉ akʉ ɨmbaa yɨ ɨkáa ngia yɨ ngama ʉ ɓakumu‑kumu. Ambukumunio, ambuwulo ɨzɔ nʉ ɓapɨmakɨa, aka ekoo ngia ɓɔ ʉna moni ngika kʉ Yeso aka kapipio‑ɔɔ.
59Ɓangama ɓʉ kumu‑kumu ɨzɔ nʉ Ubua wɔɔ Ʉja wʉ ɓakumu‑kumu ɓi꞉nye kʉhata ɓatɛmʉ ɓʉ yakanaka, ɓɔ ɓʉna ɨngbaa ngia ɓawisiso‑ɔɔ nayɔ Yeso. 60Ɨkyɛmɨngana, abana ndʉ ɓombi ɓaja ɓa꞉ka nayɔ kuchwio nʉ lɨngbaa lʉ moni, chʉkɔmʉ ɓambʉna ɨngbaa yɨ moni gʉkʉ mɨngana ngia ɓamʉnapɨa‑ɔɔ nayɔ nʉ 'ʉkɔmbɔ. Tiga akʉ 'upipio, ɓombi ɓapɨnɨ ɓambʉka kusigo ɓɔ: 61« Mombi ngia a꞉sigo bɛ ɓɔ: ‹ Makwanana kuto ɨkáa yɨ Asʉɓɨɨ ngia, mambʉɨtɨa kʉtɔ amati ʉ makwaa kaatʉ. › » 62Tiga ananɨ, kumu‑kumu ngia ɔɔ 'ʉja ambʉmáa ɓʉ gba, ambuɓukuo Yeso ɓɔ: « Ajʉ wambʉkɔmʉ nɨngbaa yɨ moni yɛɛ tisie ɓiɛ, aka ekoo mɨkɔmbɔ ngia ɓanɔwɛ kʉnapiikio engo akɛ? » 63Ɨkyɛmɨngana, Yeso ambʉkata tʉkʉ ɓʉ nyɛ. Gʉ ngama ʉ ɓakumu‑kumu ɓata nayɔ aka ɓɔ: « Akʉ ino yɨ Asʉɓɨɨ ngia a kʉkʉʉ, mʉ꞉nata ɓɔ tɨɓɨa‑zʉ kingono ɓɔ, ajʉ ɔwɛ wa tʉkʉ kingono Klisito Mwana ʉ Asʉɓɨɨ ɓiɛ? » 64Yeso ambumutisio ɓɔ: « Ɔwɛ, wusigo sigoni! Maninu kusigio ɓɔ, kʉʉngwa ɨtakɨ‑takɨ ngiakɛ, na꞊na ɓisi Mwana ngia ʉ Mombi ɓuwei akʉ ɨkɔndɔ yɨ guɔngɔ ngia yɨ Asʉɓɨɨ ngia wʉ Angu kʉ uɓomu. Nʉ na꞊mʉna i꞉nyeni kʉka amati ʉ lɨkʉɓa ekoo ʉ ɓisi. » 65Kija ngama ʉ ɓakumu‑kumu a꞉natʉa lɨpʉkʉ ngilangɔ ɓʉ hua hua. Gʉ ɛyɔ ɓɔ: « Ʉ꞉zɨaka Asʉɓɨɨ zɨakaa! Ka ɓata kʉhata ɓatɛmʉ ɓʉ ɨmanɨ? Inu nʉ꞉kɔ tiga kʉ kɔnɨ akʉ ʉ꞉zɨakɛ‑ɔɔ Asʉɓɨɨ! 66Inu nʉ꞉na tanɨ? » Ɓambumutisio ɓɔ: « Ʉkwanana tʉkʉ nʉ ingyo! » 67Kija ɓa꞉faniso tokoko Yeso nʉ mukoi akʉ mesu. Ɓambʉmʉɓɨnda makɔfɨ, ɓɔmɔ ɓambʉmʉnatʉa lɨkɔndɔ lʉ mesu ɓʉ hua hua. 68Gʉ ɛɓɔ nayɔ ɓɔ: « Klisito! Kwa‑zʉ ɨgbɛ, kija wa꞊chwa mombi ngia ʉ꞉naɓɛnda! »
Pɛtɛlɔ ʉtata Yeso
(Mak 14:66-72; Luk 22:56-62; Yʉa 18:15-18,25-27)
69Pɛtɛlɔ i꞉nye yangɔ ɓuwei tʉkʉ aɓei na amati ʉ ɨmbaa. Mombi ʉ kuu mʉngana gwa ɔɔ moi ɔngɔ ambʉka, ambumusigio ɓɔ: « Abana tʉkʉ ɔwɛ, ni꞉nye pongo tʉkʉ ɨzɔ nʉ Yeso ngia wʉ Galilaya. » 70Pɛtɛlɔ ambʉtata mesu ɓʉ ngbɔmʉ na apɛɛ ʉndaɓʉ kʉ ɓuɓomu. Gʉ ɛyɔ ɓɔ: « Moni kʉ muɓomu ngika wakusigo engo, mambʉkɔmʉ ɛmɛ kʉmbɨa engo gʉkʉ ɗɛkɛkɛ! » 71Mbise ɔngɔ, ambʉɓʉa nanɨ, ambʉsa anʉ umongu wʉ ɨmbaa. Mombi ʉ kuu, gwa ɔɔ moi ɔngɔ wɔmɔ, ambʉmʉgbʉka nanɨ. Gʉ ɛyɔ nʉ ɓombi ngiɓa ɓi꞉nye nanɨ ɓɔ: « Mombi ngiakɛ ɓi꞉nye ɨzɔ nʉ‑ɔɔ Yeso ʉnajalɛtɛ. » 72Pɛtɛlɔ ambʉtata ɓata tʉkʉ ɓʉ ngbɔmʉ, ambʉtɨna silika, ɓɔ: « Mambʉkʉmbɨa ɛmɛ mombi ngiakɛ! » 73Mbise ʉ wati ɗɛkɛkɛ, ɓombi ngiɓa ɓi꞉nye nanɨ ɓambʉka anambamba ʉ Pɛtɛlɔ, kija ɓa꞉musigio ɓɔ: « Kingono wa tʉkʉ mʉngana ʉndaɓʉ. Ɨyakɨɛ ngiisɔɔ ya kʉ kʉpananiso engo! » 74Pɛtɛlɔ ambʉtɨna silika kusigo ɓɔ: « Ndʉ yaɓio ɓɔ makʉyaka yakanaka, mʉjʉnganaka tʉkʉ jʉnganakanɨ, mombi ngiinanɨ, mambakamʉmbɨa ɛmɛ gʉkʉ ɗɛkɛkɛ! » Tʉkʉ nɨma ngiinanɨ, gue ʉ kɔɓɔ ambʉnatɨa. 75Pɛtɛlɔ ambutunguo moni ngika Yeso a꞉musigio ɓɔ: « Pɛɛ ngia gue ʉ kɔɓɔ a꞊natɨa‑ɔɔ, waɓio wʉpanatateni nɨsɨ kaatʉ. » Kija a꞉ɓʉa aɓei ɓʉ pu, ambufaniso ndɨa nʉ ikoko.
انتخاب شده:
Matayɔ 26: BudKoya
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2021, Wycliffe Bible Translators, Inc.