<div class="version vid1400 iso6393tcs" data-vid="1400" data-iso6393="tcs">
 <div class="book bkLUK">
 <div class="chapter ch24" data-usfm="LUK.24">
 <div class="label">24</div><div class="s1">Zizas em laip</div><div class="r">(Matiu 28.1-10; Mak 16.1-8; Zon 20.1-10)</div><div class="p"> 1Orait. I bin prapa eli wea Sandei moning, bipo da san i bin kamantap. Ol dem oman bin go po da keib wea i gad da greib blo Zizas. Dempla bin kare ol dem nais sentoil ol bin mekem. 2Wen dempla bin kam klostu po da greib nau, dempla bin paine da ston bin pinis rol go wansaid, da doa bin open. 3So dempla bin go insaid da keib bat dempla no bin paine da bodi blo da BosLod Zizas de. 4Dempla bin pazol nau, &#8216;Ei, wea da bodi bin go?&#8217; Seimtaim dempla bin nadakain wori, prapa prait. Ol luk tu man were sainiklos. Demtu stanap de longsaid wea dempla.</div><div class="p"> 5Dem oman bin prait ane dempla bin baudaun pesdaun wea graun. Da tu man bin spik, &#8216;Ei! Wanem yupla luk po laip man wea ol ded man i stap? 6Em no stap ya, em bin gedap, em i laipgen. Yupla tingbaut wanem em bin spik po yupla de wea Galali. 7Zizas bin spik yupla, em da Truwan blo Man mas gibe emselp po ol dem nugudman ane dempla go neile em wea kros. Namba tri dei em go gedap laipwan gen.&#8217;</div><div class="p"> 8Apta dem oman bin lisen da tok blo demtu man, dempla i bin stretwei tingbaut wanem Zizas bin lane dempla. 9-10So dem oman ya bin stanap ane ariap gobaigen po dem leben klostuman ane ol dem nada pipol de. Neim blo sam dem oman, Meri Magdala, Zoana, Meri mama blo Zemes. Dempla ane ol dem nada oman bin yan wanem i bin apen. 11Bat ol dem klostuman no bin bilib. Ol no bin bilib ane dempla bin tingk ol dem oman meke rabistok. 12Bat eniwei, Pita bin gedap ane em bin ran go po luk da greib. Em bin bendaun luk go insaid ane em mata luk ol da greibklos leidaun de wansaid, i nogad no bodi de. Pita bin stretwei gobaik aus ane em bin pazol ane tingbaut wanem i bin apen de.</div><div class="s1">Zizas bin soe emselp po tu klostuman blo em</div><div class="r">(Mak 16.12-13)</div><div class="p"> 13Wea dat seimdei, tu man uda bin pole Zizas, demtu bin wagbaut go po Imeias. Imeias i wan smol biliz leben kilamita prom Zarusalem, baut tu aua wagbaut prom Zarusalem 14Demtu bin tok po wananada wanem i bin apen lo dat dei. 15Seimtaim demtu bin tok po demtuselp, Zizas bin kam zoine demtu, wagbaut wea demtu. 16Demtu bin luk em bat demtu kan megaraut em.</div><div class="p"> 17Zizas bin spik po demtu, &#8216;Wanem yutu yan?&#8217;</div><div class="p">Demtu stanap prapa kuaiat, gad nadakain sore pes. 18Wan man, Kliopas bin ansa em, &#8216;Ei! Mata yu no bin lisen wanem i bin apen wea dem lasdei de wea Zarusalem a?&#8217;</div><div class="p"> 19Zizas bin aske demtu, &#8216;Wanem ting?&#8217;</div><div class="p">Demtu bin ansa em, &#8216;Ol demting wanem bin apen ya wea Zizas blo Nazaret. Dis man i bin spesilmesizman blo God ane ol dem pipol bin spik em gad prapa bigpaua wanem em bin spik ane wanem em bin mekem. 20Ol dem edprist ane ol lida blo Zuwislo bin teke Zizas go po dem lida blo Rom ane em bin pase wod po kile em. So dempla bin teke Zizas go ane neile em wea kros. 21Mipla bin prapa wande Zizas po bi Promiswan uda God i go sanem kam po meke dis kantri blo Izrael pri. Bat tidei, i namba tri dei, wen disting i bin apen.</div><div class="p"> 22&#8216;Sam dem oman blo mipla bin meke mipla atzamp wen dempla bin go elimoning, go po dat greib 23ane dempla no bin paine da bodi blo Zizas de. Dem oman bin ariap kambaigen ane bin spik mipla, dempla bin luk tu einzel. Da tu einzel bin spik po dem oman, &#8220;Zizas bin gedap prom greib, em nomo ded, em i laip.&#8221; 24Sam man blo mipla bin go luk da greib ane bin paine da greib wase dem oman i bin spik. Bat ol no bin luk Zizas.&#8217;</div><div class="p"> 25Nau Zizas i bin spik po dem tu man, &#8216;Ei, yupla ebribodi prapa slo po kesem! Wiswei? Yupla no wande bilib wanem ol dem spesilmesizman blo God bin spik wea da Baibol a? 26Yupla sabe da Baibol i spik, da Promiswan uda God i go sanem, mas sapa ol demting bipo em gobaik po dat truglori blo em. Diswan i min, em kam king wea eben.&#8217; 27Den Zizas bin eksplein po demtu wanem da Baibol i spikbaut emselp. Em bin yan demtu ebriting wanem Mozes ane ol dem spesilmesizman blo God i bin spikbaut da Promiswan.</div><div class="p"> 28Apta nau wen dempla bin kam klostu po da smol biliz Imeias, demtu tekenotis Zizas go kipgo. 29Demtu spik po Zizas, &#8216;Nono, yu kan go. Mobeta yu stap ya bikoz i stat po dak.&#8217; Zizas bin spik, &#8216;Orait, ai go stap ya wea yutu.&#8217;</div><div class="p"> 30Apta nau i bin taim po kaikai ane dempla bin sidaun wea teibol. Zizas i bin teke da bred ane em bin eso God po da bred. Em bin broke da bred ane gibe demtu po kaikai. 31Demtu bin atzamp. Wen demtu bin luk wanem em bin mekem, stretwei demtu bin kesem. Demtu bin singaut, &#8216;Ei lugaut, diswan Zizas.&#8217; Ane stretwei demtu no bin luk em gen.</div><div class="p"> 32Demtu tok po demtuselp, &#8216;Ei! Wen Zizas bin eksplein da Baibol wen miplatri i bin wagbaut wea da rod, i bin wase paia i ban insaid wea at blo yumi.&#8217; 33Stretwei demtu bin gedap, ariap gobaigen po Zarusalem. Wen demtu bin kamaut de, demtu bin paine ol leben klostuman blo Zizas tugeda de wea ol dem nada pipol. 34Dem nada pipol de bin spik po demtu, &#8216;Wa wa! Diswan i tru. Da BosLod bin gedap laipgen ane Pita bin luk em.&#8217;</div><div class="s1">Dem klostuman luk Zizas</div><div class="r">(Matiu 28.16-20; Mak 16.14-18; Zon 20.19-23; Pas Misnare 1.6-8)</div><div class="p"> 35Apta nau, da tu man uda bin kam prom Imeias bin yan wanem bin apen wea da rod ane wiswei demtu bin sabe i bin da BosLod wen em bin broke da bred. 36Wail demtu kip tok, stretwei Zizas bin stanap de melen wea dempla ane em bin spik diskain, &#8216;Pis, God bles yupla.&#8217; 37Dempla i bin prapa prait ane ol bin atzamp. Dempla bin tingk em gos.</div><div class="p"> 38Zizas i bin spik po dempla, &#8216;Wanem yupla apset po? Wanem yupla wori po? Yupla tingk tuwei, yupla main go diswei ane yupla at go nadawei. 39Luk da neilmak wea an blo mi ane put blo mi. Luk, diswan mi. Tase mi ane yu go sabe ai no gos. Ai gad bodi, ai gad mit ane bon. Yupla luk.&#8217; 40Wen Zizas bin spik diskain em bin soe dempla neilmak wea an ane put blo em.</div><div class="p"> 41Dempla bin nadakain glad, bat dempla stil kan bilib bikoz i ad po dempla po bilib dat i tru dat em laipgen. So Zizas bin aske dempla, &#8216;Yupla gad eni kaikai ya? Gibe mi.&#8217; 42Dempla bin gibe em pis, kukwan. 43Em bin teke da pis ane em bin kaikai. Ol bin mata wase em.</div><div class="p"> 44Em bin spik dempla diskain, &#8216;Da seimtaim wen ai bin ya wea yupla, ai bin spik yupla dem seimting. Ebriting wea i bin raitem wea Baibol baut mi i mas kam tru: ol demting wea dem Mozeslo ane ol buk blo dem spesilmesizman blo God ane ol dem sing blo Deibid.&#8217; 45Zizas bin gibe dempla gudsens po sabe wanem da Baibol i spik. 46Ane em bin spik po dempla, &#8216;I bin spik wea Baibol, da Promiswan mas go ded ane namba tri dei em mas gedap laipwan. 47-48Nau ai gibe yupla da rait po kare lo po teke dis mesiz, stat prom Zarusalem go po ol dem neisin. Spik wea neim blo mi diskain, ebriwan mas sluraun prom ol nugudwei blo dempla ane God go pogibe dempla. Wanem ai spik yupla, yupla sabe ol demting i tru. So yupla mas go spik po ebriwan wanem ai bin spik po yupla ane yupla mas spikbaut ebriting wanem yupla bin luk.</div><div class="p"> 49&#8216;Orait. Bipo yupla go, yupla mas stap ya wea Zarusalem ane weit ya. Ai go sane da OliSpirit wanem PapaGod blo mi wea eben bin promis yupla. Da OliSpirit go gibe yupla paua prom eben kamdaun.&#8217;</div><div class="s1">Zizas bin gobaik po eben</div><div class="r">(Mak 16.19-20; Pas Misnare 1.9-11)</div><div class="p"> 50Orait. Nau em bin teke dempla go po Betani. De nau, em bin liptemap tu an blo em ane em bin blese dempla. 51Wail em bin stil blese dempla, em bin stat po gowei prom dempla. Dempla bin luze Zizas olgeda nau. Zizas bin go po eben. 52Dempla bin broke ni ane wosip em, ane dempla bin nadakain api. Den dempla bin gobaigen po Zarusalem. 53Orait. Apta dat taim, ebridei ol dei, dempla bin go po da Tempol blo God ane dempla bin eso ane preize God de. Pinis nau.</div>
 </div>
 </div>
</div>

Orait. I bin prapa eli wea Sandei moning, bipo da san i bin kamantap. Ol dem oman bin go po da keib wea i gad da greib blo Zizas. Dempla bin kare ol dem nais sentoil ol bin mekem. Wen dempla bin kam klostu po da greib nau, dempla bin paine da ston bin pinis rol go wansaid, da doa bin open. So dempla bin go insaid da keib bat dempla no bin paine da bodi blo da BosLod Zizas de. Dempla bin pazol nau, ‘Ei, wea da bodi bin go?’ Seimtaim dempla bin nadakain wori, prapa prait. Ol luk tu man were sainiklos. Demtu stanap de longsaid wea dempla.
Dem oman bin prait ane dempla bin baudaun pesdaun wea graun. Da tu man bin spik, ‘Ei! Wanem yupla luk po laip man wea ol ded man i stap? Em no stap ya, em bin gedap, em i laipgen. Yupla tingbaut wanem em bin spik po yupla de wea Galali. Zizas bin spik yupla, em da Truwan blo Man mas gibe emselp po ol dem nugudman ane dempla go neile em wea kros. Namba tri dei em go gedap laipwan gen.’
Apta dem oman bin lisen da tok blo demtu man, dempla i bin stretwei tingbaut wanem Zizas bin lane dempla. So dem oman ya bin stanap ane ariap gobaigen po dem leben klostuman ane ol dem nada pipol de. Neim blo sam dem oman, Meri Magdala, Zoana, Meri mama blo Zemes. Dempla ane ol dem nada oman bin yan wanem i bin apen. Bat ol dem klostuman no bin bilib. Ol no bin bilib ane dempla bin tingk ol dem oman meke rabistok. Bat eniwei, Pita bin gedap ane em bin ran go po luk da greib. Em bin bendaun luk go insaid ane em mata luk ol da greibklos leidaun de wansaid, i nogad no bodi de. Pita bin stretwei gobaik aus ane em bin pazol ane tingbaut wanem i bin apen de.


Wea dat seimdei, tu man uda bin pole Zizas, demtu bin wagbaut go po Imeias. Imeias i wan smol biliz leben kilamita prom Zarusalem, baut tu aua wagbaut prom Zarusalem Demtu bin tok po wananada wanem i bin apen lo dat dei. Seimtaim demtu bin tok po demtuselp, Zizas bin kam zoine demtu, wagbaut wea demtu. Demtu bin luk em bat demtu kan megaraut em.
Zizas bin spik po demtu, ‘Wanem yutu yan?’
Demtu stanap prapa kuaiat, gad nadakain sore pes. Wan man, Kliopas bin ansa em, ‘Ei! Mata yu no bin lisen wanem i bin apen wea dem lasdei de wea Zarusalem a?’
Zizas bin aske demtu, ‘Wanem ting?’
Demtu bin ansa em, ‘Ol demting wanem bin apen ya wea Zizas blo Nazaret. Dis man i bin spesilmesizman blo God ane ol dem pipol bin spik em gad prapa bigpaua wanem em bin spik ane wanem em bin mekem. Ol dem edprist ane ol lida blo Zuwislo bin teke Zizas go po dem lida blo Rom ane em bin pase wod po kile em. So dempla bin teke Zizas go ane neile em wea kros. Mipla bin prapa wande Zizas po bi Promiswan uda God i go sanem kam po meke dis kantri blo Izrael pri. Bat tidei, i namba tri dei, wen disting i bin apen.
‘Sam dem oman blo mipla bin meke mipla atzamp wen dempla bin go elimoning, go po dat greib ane dempla no bin paine da bodi blo Zizas de. Dem oman bin ariap kambaigen ane bin spik mipla, dempla bin luk tu einzel. Da tu einzel bin spik po dem oman, “Zizas bin gedap prom greib, em nomo ded, em i laip.” Sam man blo mipla bin go luk da greib ane bin paine da greib wase dem oman i bin spik. Bat ol no bin luk Zizas.’
Nau Zizas i bin spik po dem tu man, ‘Ei, yupla ebribodi prapa slo po kesem! Wiswei? Yupla no wande bilib wanem ol dem spesilmesizman blo God bin spik wea da Baibol a? Yupla sabe da Baibol i spik, da Promiswan uda God i go sanem, mas sapa ol demting bipo em gobaik po dat truglori blo em. Diswan i min, em kam king wea eben.’ Den Zizas bin eksplein po demtu wanem da Baibol i spikbaut emselp. Em bin yan demtu ebriting wanem Mozes ane ol dem spesilmesizman blo God i bin spikbaut da Promiswan.
Apta nau wen dempla bin kam klostu po da smol biliz Imeias, demtu tekenotis Zizas go kipgo. Demtu spik po Zizas, ‘Nono, yu kan go. Mobeta yu stap ya bikoz i stat po dak.’ Zizas bin spik, ‘Orait, ai go stap ya wea yutu.’
Apta nau i bin taim po kaikai ane dempla bin sidaun wea teibol. Zizas i bin teke da bred ane em bin eso God po da bred. Em bin broke da bred ane gibe demtu po kaikai. Demtu bin atzamp. Wen demtu bin luk wanem em bin mekem, stretwei demtu bin kesem. Demtu bin singaut, ‘Ei lugaut, diswan Zizas.’ Ane stretwei demtu no bin luk em gen.
Demtu tok po demtuselp, ‘Ei! Wen Zizas bin eksplein da Baibol wen miplatri i bin wagbaut wea da rod, i bin wase paia i ban insaid wea at blo yumi.’ Stretwei demtu bin gedap, ariap gobaigen po Zarusalem. Wen demtu bin kamaut de, demtu bin paine ol leben klostuman blo Zizas tugeda de wea ol dem nada pipol. Dem nada pipol de bin spik po demtu, ‘Wa wa! Diswan i tru. Da BosLod bin gedap laipgen ane Pita bin luk em.’


Apta nau, da tu man uda bin kam prom Imeias bin yan wanem bin apen wea da rod ane wiswei demtu bin sabe i bin da BosLod wen em bin broke da bred. Wail demtu kip tok, stretwei Zizas bin stanap de melen wea dempla ane em bin spik diskain, ‘Pis, God bles yupla.’ Dempla i bin prapa prait ane ol bin atzamp. Dempla bin tingk em gos.
Zizas i bin spik po dempla, ‘Wanem yupla apset po? Wanem yupla wori po? Yupla tingk tuwei, yupla main go diswei ane yupla at go nadawei. Luk da neilmak wea an blo mi ane put blo mi. Luk, diswan mi. Tase mi ane yu go sabe ai no gos. Ai gad bodi, ai gad mit ane bon. Yupla luk.’ Wen Zizas bin spik diskain em bin soe dempla neilmak wea an ane put blo em.
Dempla bin nadakain glad, bat dempla stil kan bilib bikoz i ad po dempla po bilib dat i tru dat em laipgen. So Zizas bin aske dempla, ‘Yupla gad eni kaikai ya? Gibe mi.’ Dempla bin gibe em pis, kukwan. Em bin teke da pis ane em bin kaikai. Ol bin mata wase em.
Em bin spik dempla diskain, ‘Da seimtaim wen ai bin ya wea yupla, ai bin spik yupla dem seimting. Ebriting wea i bin raitem wea Baibol baut mi i mas kam tru: ol demting wea dem Mozeslo ane ol buk blo dem spesilmesizman blo God ane ol dem sing blo Deibid.’ Zizas bin gibe dempla gudsens po sabe wanem da Baibol i spik. Ane em bin spik po dempla, ‘I bin spik wea Baibol, da Promiswan mas go ded ane namba tri dei em mas gedap laipwan. Nau ai gibe yupla da rait po kare lo po teke dis mesiz, stat prom Zarusalem go po ol dem neisin. Spik wea neim blo mi diskain, ebriwan mas sluraun prom ol nugudwei blo dempla ane God go pogibe dempla. Wanem ai spik yupla, yupla sabe ol demting i tru. So yupla mas go spik po ebriwan wanem ai bin spik po yupla ane yupla mas spikbaut ebriting wanem yupla bin luk.
‘Orait. Bipo yupla go, yupla mas stap ya wea Zarusalem ane weit ya. Ai go sane da OliSpirit wanem PapaGod blo mi wea eben bin promis yupla. Da OliSpirit go gibe yupla paua prom eben kamdaun.’


Orait. Nau em bin teke dempla go po Betani. De nau, em bin liptemap tu an blo em ane em bin blese dempla. Wail em bin stil blese dempla, em bin stat po gowei prom dempla. Dempla bin luze Zizas olgeda nau. Zizas bin go po eben. Dempla bin broke ni ane wosip em, ane dempla bin nadakain api. Den dempla bin gobaigen po Zarusalem. Orait. Apta dat taim, ebridei ol dei, dempla bin go po da Tempol blo God ane dempla bin eso ane preize God de. Pinis nau.

Kuuntele Luk tokbaut Zizas 24