Koreguaje - 2007 WBT (NT) Drama

Ũcuarʉmʉ chʉkʉna Jesuna'me saijʉ Jerusalén kueñe cajoopo Olivo aikũti pa'ijoopona Betfagé vʉ'ejoopona tĩ'asinaa'me. Ũcuarʉmʉ Jesús chʉkʉna'te repaʉ neenare te'eka'chapanarechi'a saopi'rakʉ ija'che chʉ̃'ʉsi'kʉa'mʉ:
—Jeejoopona kueñe cajoopona saijʉ̃'ʉ mʉsanʉkona. Sani ũcuachejana burrava'ore quẽo sʉosiva'ore chĩina'me rʉ̃iva'oni jñaajanaa'me mʉsanʉkona. Jñaa repava'nare jose ichejana rakaijʉ̃'ʉ. Pãiʉ ũcuaʉakʉji mʉsanʉkonare, “¿Ʉ̃que cho'oñu chini mʉsanʉkona jã'ava'nare joseche?”, chiito, “Maire Paakʉ iva'nare chiimʉ. Na'mi co'choja'mʉ repaʉ iva'nare”, chiijʉ̃'ʉ —chiisi'kʉa'mʉ.
Jesupi jã'aja'ñe i'kaʉna, aperʉmʉ Dios chʉ'o kʉakaisi'kʉ tocha jo'kasi'epi ija'che chiicheji ũcuarepa ti'jñesi'kʉa'mʉ:
Jerusalén vʉ'ejoopo pa'inare ija'che i'kakaijʉ̃'ʉ:
“Ñajʉ̃'ʉ, mʉsanʉkonare chʉ̃'ʉkʉ raiche.
Pe'kerʉ pa'iʉ burrava'o põse ve'eva'o mamakʉni tuhiʉ raimʉ”,
chiicheji.
Ũcuarʉmʉ repana Jesús neena sani repaʉ chʉ̃'ʉsi'e cho'oasome. Burrava'ore jñaa, repaona'me mamakʉ'te jose Jesús pa'ichejana ra, kãñapi tʉorena Jesús repava'ʉre tuhisi'kʉa'mʉ. Ũcuarʉmʉ pãi rʉa jainʉko repaʉ tuhiʉ saima'ana repana sẽ'sevʉ ju'ikãñapi tĩ'te ja ũhasinaa'me. Chekʉna pũti kare veri ũcua ma'ana ũhasinaa'me. Repaʉ'te tuhana pãi charo sainana'me cho'je raina ija'che i'kajʉ cuisinaa'me:
—¡Ikʉ aperʉmʉ pa'isi'kʉ David Jojocojñokʉ rʉa masiʉ'mʉ! ¡Diopi re'oja'che cho'okaaʉ ikʉre, Repaʉ Raosi'kʉre! Cʉnaʉmʉ Pa'ikʉ Dios peore Masiʉ'mʉ —chiisinaa'me repana.
Repaʉ Jesús Jerusalén vʉ'ejoopo sani tĩ'asirʉmʉ repajoopo pa'ina pãi repaʉni ñañu chini jainʉko chi'i repaʉ'te ja'me tuhasinani ija'che sẽesinaa'me:
—¿Jeeja'iʉ'ʉ jã'ʉ? —chiisinaa'me.
Chitena chekʉna ija'che i'kasinaa'me:
—Galilea cheja pa'ijoopo Nazaret vʉ'ejoopo raisi'kʉa'mʉ jã'ʉ. Jesua'mʉ. Dios chʉ'o kʉakaikʉ'mʉ —chiisinaa'me.


Ũcuarʉmʉ Jesús Dios vʉ'ena kaka, repavʉ'e põse koosinana'me ĩsisinare peore eto saokʉ chekʉnare kuri sa'ñekaisina mesako'ñana'me ũkupova'nare ĩsisina ñu'isisaivʉã jʉjo tajño ũhasi'kʉa'mʉ. Jã'aja'ñe cho'okʉ ija'che i'kasi'kʉa'mʉ repaʉ:
—Dios chʉ'o aperʉmʉ tocha jo'kasi'e ija'che kʉamʉ:
Chʉ'ʉ vʉ'e pãi chʉ'ʉre pojojʉ sẽevʉ'ea'me,
chiimʉ. Jã'ata'ni mʉsanʉkona põse ñaana cho'ocheja'che kaka cu'ache cho'ome ivʉ'e —chiiʉ eto saosi'kʉa'mʉ Jesús repanare.
Ũcuarʉmʉ na'ava'nana'me cu'acũ'a paava'na Dios vʉ'ena kakarena Jesús ña repanare vasosi'kʉa'mʉ. Jesupi Diochi'a masiche'te cho'oʉna ña judío phairipãi chʉ̃'ʉnana'me judíopãi che'chona rʉa pe'rusinaa'me. Ũcuachi'a repavʉ'e pa'inapi chĩipi Jesús cho'osi'ere ña, cuijʉ ʉjachʉ'opi, “¡Ikʉ aperʉmʉ pa'isi'kʉ David Jojosi'kʉ Dios Raocojñosi'kʉ rʉa masiʉ'mʉ!”, chiijʉna asa pe'rujʉ Jesure ija'che i'kasinaa'me repana:
—¿Chĩi i'kajʉ cuiche asama'kʉ mʉ'ʉ? —chiisinaa'me.
Chitena Jesús i'kasi'kʉa'mʉ.
—Jʉ̃jʉ, asamʉ chʉ'ʉ. Dios chʉ'o aperʉmʉ tocha jo'kasi'e, ¿ñamanaa'ñe mʉsanʉkona? Ija'che chiimʉ:
Vĩjachĩina'me na'a aina Diopi cho'okaiʉna
Ũcuaʉni pojojʉ re'oja'che i'kajanaa'me,
chiimʉ —chiisi'kʉa'mʉ Jesús repanare.
Ũcuarʉmʉ chʉkʉna repanare pãi jo'ka Jesuna'me Betania vʉ'ejoopona sani kãisinaa'me.


Jo'e apeñatato Jesús chʉkʉnana'me Jerusalén vʉ'ejoopona jo'e co'isi'kʉa'mʉ. Co'ikʉna Jesure ãucuhaasomʉ. Co'ikʉ higoñʉ ma'a rʉ'tʉva nʉkañʉ'te ña repañʉ kueñe sani ñato repara'pʉrʉã peoñʉji ja'ochi'a pa'isi'kʉa'mʉ. Jã'ajekʉna repañʉ ija'che i'kasi'kʉa'mʉ repaʉ:
—Jmamakarʉjẽ'e jo'e ãira'pʉrʉã kʉ̃imaneja'mʉ iñʉ —chikʉna repañʉ teana te'erʉmʉ jũnisõsi'kʉa'mʉ. Jã'aja'ñe cho'oʉna ña cuasajʉ chʉkʉna repaʉ neena ija'che sẽesinaa'me repaʉ'te:
—¿Je'se cho'okʉna jã'añʉ higoñʉ teana jũnisõʉ? —chiisinaa'me.
Chitena Jesús i'kasi'kʉa'mʉ.
—Mʉsanʉkonapi Diore jachama'ñe masi cuasani higoñʉ chʉ'ʉ cho'osi'eja'chechi'a cho'oma'ñe, cheke si'ache cho'omasijʉ ikũtire aikũtire, “Icheja kʉñʉ chiarana sʉ'a nʉkajʉ̃'ʉ”, chiito repakũti mʉsanʉkona chʉ̃'ʉñe cho'oja'mʉ. Mʉsanʉkona Repaʉ'te sẽeñe peore cho'okaija'mʉ Repaʉ, Ũcuaʉni masi cuasajʉna. Ũcuarepaa'me jã'a —chiisi'kʉa'mʉ repaʉ.


Jã'aja'ñe cho'ocuha jo'e rani reparʉmʉ Jesús Dios vʉ'ena kakasi'kʉa'mʉ. Kaka pa'iʉ che'chokʉna judío phairi chʉ̃'ʉnana'me judío aina rani ija'che sẽesinaa'me repaʉ'te:
—¿Je'se cuasa pãi chʉ̃'ʉna cho'ocheja'che cho'okʉ mʉ'ʉ? ¿Neepi chʉ̃'ʉrena rani cho'okʉ mʉ'ʉ? —chiisinaa'me.
Chitena i'kasi'kʉa'mʉ repaʉ.
—Chʉ'ʉ ũcuaja'che mʉsanʉkonani chʉ'o sẽniasara. ¿Neepi Juanre Pãi Okoro'vekʉ'te chẽa raore? ¿Diopi raoʉ? Jã'apãani, ¿pãipi chẽa raore repaʉ'te? Mʉsanʉkonapi kʉaru chʉ'ʉ ũcuaja'che iere cho'oa'kʉ chini chʉ'ʉre chẽa raosi'kʉ mami kʉaja'mʉ mʉsanʉkonare —chiisi'kʉa'mʉ.
Chikʉna sãiñechi'a ija'che cutusinaa'me repana: “¿Je'se mai ikʉre i'kajanaa'ñe? Maipi, ‘Juanre Dios chẽa raosi'kʉa'mʉ’, chiito ikʉ maire, ‘¿Mʉsanʉkona je'se pa'iʉna jã'aja'ñe cuasanata'ni Juan chʉ'vasi'e cuasamanere?’, chiija'mʉ. Ũcuachi'a, ‘Pãipi chẽa raosinaa'me’, chiicu'amʉ maire. Ina pãi jainʉko, ‘Juan Dios chʉ'o kʉakaikʉ pa'isi'kʉa'mʉ’, chiijʉ cuasame. Jã'ajekʉna maipi jã'aja'ñe i'kato ina asa pe'rujʉ cu'ache cho'ojanaa'me maire”, chiniasome repana. Sãiñechi'a jã'aja'ñe cutu pi'ni Jesure ija'che i'kasinaa'me repana:
—Juanre raosi'kʉ mami vesʉme chʉkʉna —chiisinaa'me.
Chitena Jesús i'kasi'kʉa'mʉ.
—Chʉ'ʉ ũcuaja'che mʉsanʉkonapi jã'aja'ñe i'karena chʉ'ʉre chʉ̃'ʉ raosi'kʉ mami kʉamaneja'mʉ —chiisi'kʉa'mʉ repaʉ.

Ũcuarʉmʉ Jesús repanani chʉ'vakʉ ija'chere cuasakʉ kʉasi'kʉa'mʉ:
—¿Ie je'se cuasokʉ mʉsanʉkonare? Pãiʉ chĩi ka'chanare ʉmʉpãichi'a paaasomʉ. Paakʉji repanare te'eʉ'te ija'che i'kaasomʉ repaʉ: “Jmava'ʉ, iumucuse chʉ'ʉ pĩsi ʉche chio cho'oche cho'ojaikaijʉ̃'ʉ”, chiniasomʉ. Chikʉna mamakʉ i'kaasomʉ. “Saiʉama'mʉ chʉ'ʉre”, chiniasomʉ. Jã'ata'ni na'a pa'iʉ jo'e mama cuasa saniasomʉ repaʉ, pʉka'kʉni cho'oche'te cho'okasa chini. Jã'aja'ñe cho'ocuha pʉka'kʉ chekʉre mamakʉ'te ũcuaja'che i'kaasomʉ. I'kaʉna asa, “Jaʉ, sasa”, chiniasomʉ. Jã'ata'ni saimaneasomʉ repaʉ —Jã'aja'ñe chiiʉ kʉasi'kʉa'mʉ Jesús repanare. Jã'aja'ñe kʉa pi'ni repanare ija'che sẽniasasi'kʉa'mʉ repaʉ:
—Mʉsanʉkona cuasato repaʉ mamachĩi, ¿kaʉpi pʉka'kʉ chiiche cho'okakʉ? —chiisi'kʉa'mʉ.
Chikʉna i'kasinaa'me repana.
—Charo i'kacojñosi'kʉ —chiisinaa'me.
Chitena Jesús repanare ija'che i'kasi'kʉa'mʉ:
—Juan Pãi Okoro'vekʉ rani mʉsanʉkonare, Dios chʉ̃'ʉñe cho'ona re'oja'che pa'iche'te chʉ'vasi'kʉa'mʉ. Jã'ata'ni jachasinaa'me mʉsanʉkona. Jã'a cho'oto Romapãi kuri kookainana'me sĩ'uromi, Juan chʉ'vasi'ere asa chẽa repana cu'ache cho'oche ũhasõsinaa'me. Jã'aja'ñe cho'osinajejʉ repana jũnisõsirʉmʉ Dios pa'ichejana saijanaa'me. Mʉsanʉkonata'ni repana cho'oche peore ñasinata'ni mama cuasa cu'ache cho'oche ũhasõmanesinajejʉ saimanejanaa'me. Ũcuarepaa'me jã'a —chiisi'kʉa'mʉ repaʉ.


Ũcuarʉmʉ Jesús repanani chʉ'vakʉ jo'e chekere cuasakʉ kʉasi'kʉa'mʉ.
—Pãiʉ cheja paakʉ pĩsi ʉche chio tã pi'ni si'acachio rũhiso'koro jeo tʉsʉasomʉ. Repaso'koro jeo pi'ni ʉche cha'ca chachojavʉ je'naasomʉ repaʉ ũcuate'evʉji conora'ka meajacheja pa'ivʉ. Ũcuachi'a repachio kuirakaijanapi si'acachio ñajʉ kuirakaijʉ paapʉ chini vʉ'e ʉmʉ nʉkavʉ'e cho'oasomʉ repaʉ. Peore cho'o pi'ni repa chio kuirakaijanare jñaa jo'ka tĩichejana sanisõasomʉ repaʉ. Sani pa'iʉ ʉche tʉarʉmʉ tĩ'aʉna repaʉ'te cho'oche cho'okainare ʉche chio kuirakaina pa'ichejana saoasomʉ repaʉ, ʉchere miijani rakaapʉ chini. Jã'ata'ni sani tĩ'arena ña repana ʉche kuirana repanare chẽa te'eʉ'te rʉa asi vaijʉ, chekʉni vanisõjʉ jo'e chekʉni catapi asi su'aasome. Jã'aja'ñe cho'o ʉchejẽ'e peonare asichi'a vani co'choasome repana. Co'irena ña ʉche chio paakʉ repaʉ'te cho'oche cho'okainare na'a jainʉkore jo'e ũcuachejana saoasomʉ. Jã'ata'ni sani tĩ'arena repana ʉche chio kuirakaina peore ũcuaja'che repanare asi vani co'choasome.
’Jo'e ũcuaja'che cho'o co'chorena ña ʉche chio paakʉ ija'che cuasakʉ i'kaasomʉ: “Chʉ'ʉ chĩini repana pa'ichejana saora. Jã'ʉreta'ni ña, kʉkʉjacosome repana”, chiiʉ cuasaasomʉ repaʉ. Jã'aja'ñe cuasa mamakʉni saoasomʉ repaʉ. Jã'ata'ni repaʉ mamakʉji sani tĩ'aʉna ña ʉche chio kuirakaina sãiñechi'a ija'che i'kaasome: “Jã'ʉ ʉche chio paakʉ mamakʉ'mʉ. Pʉka'kʉ jũnisõsirʉmʉ repaʉ paasi'e paajaʉa'mʉ jã'ʉ. Vanisõñu jã'ʉni. Maipi pʉka'kʉ jũnisõsirʉmʉ repaʉ paasi'ere paañu”, chiniasome repana. Chini repaʉ'te chẽa chio rʉ'tʉvana juha sa vanisõasome repana —chiisi'kʉa'mʉ Jesús repanare.
Jã'aja'ñe kʉacuha repaʉ kʉasi'e asasinare ija'che sẽesi'kʉa'mʉ Jesús:
—Repaʉ mamakʉ'te vanisõsi'ere asa ʉche chio paakʉji sani, ¿je'se cho'oja'ʉ repanare ʉche kuirakainare? —chiisi'kʉa'mʉ.
Chikʉna repana i'kasinaa'me.
—Sani repaʉ mamakʉ'te vanisõsinare sãiñe vanisõja'mʉ repaʉ. Repanare vanisõ ʉche chio kuirakaijanare chekʉnani jñaa jo'kaja'mʉ repaʉ, cu'ache cho'oma'ñe ʉche tʉa pi'ni repaʉ'te sa ĩsijanani —chiisinaa'me repana.
Chitena Jesús i'kasi'kʉa'mʉ.
—¿Dios chʉ'o aperʉmʉ tocha jo'kasi'e jmamakarʉjẽ'e ñamanaa'ñe mʉsanʉkona? Ija'che chiimʉ:
Pãi vʉ'e cho'ona vʉ'ña tuu re'ojatuure ku'ejʉ paniasome.
Ku'ejʉ te'etuupʉ jñaani cuheasome repana.
Cuhejʉ jo'kaasome repatuupʉ.
Chekʉnata'ni na'a rʉa masinajejʉ rani repatuupʉ mini kuãa sa
repana vʉ'e chakavʉna nʉkoasome,
repana vʉ'epi na'a rʉa jʉjaa'kʉ chini.
Diopi cho'okaiʉna jã'aja'ñe cho'ojʉna ña cuasa Repaʉni pojojʉ i'kame chʉkʉna,
chiimʉ. Jã'ajekʉna mʉsanʉkonare ija'che i'kamʉ chʉ'ʉ: Repaʉ chʉ̃'ʉ jo'kasi'ere cho'oma'to ʉche paakʉ repaʉ chio kuirakaisinare cho'osi'eja'che cho'oja'mʉ Dios mʉsanʉkonare. Mʉsanʉkonare sẽjosõ chekʉnani chẽa paaja'mʉ, Repaʉ chʉ̃'ʉñe cho'ojanare. Pãiʉ vʉ'e tuupʉna tãni rʉa asi tãimʉ. Ũcuachi'a vʉ'e tuupʉji pãiʉni tãito jũnisõmʉ —chiisi'kʉa'mʉ repaʉ.
Ũcuarʉmʉ judío phairipãi chʉ̃'ʉnana'me fariseopãi Jesús cuasakʉ i'kasi'ere asa masi, “Ikʉ Jesús Ũcuaʉ cuasakʉ kʉacheji maini cu'ache i'kamʉ”, chiijʉ pe'rusinaa'me. Jã'aja'ñe i'kaʉna asa pe'rujʉ repaʉ'te chẽañu chiisinata'ni pãipi, “Jesús Dios chʉ'o kʉakaikʉ'mʉ”, chiijʉ cuasajʉna, “Maipi repaʉ'te chẽañe'te chʉ̃'ʉto pe'rujanaa'me ina maire”, chini vajʉchʉjʉ chẽamanesinaa'me repana.

Kuuntele San Mateo 21