Ngigua, San Marcos Tlalcoyalco - WBT Version (NT) Non-Drama

Ngigua, San Marcos Tlalcoyalco - WBT Version (NT) Drama

Ko Jesús kunuꞌe ixin xi fariseo kuiꞌin xa ixin nchaꞌon ko nchaꞌon icha bakutsjé chujni baruee Jesús ko icha tsjé ni banchegithe jeꞌe ke Juan. Maski jeꞌa Jesús thi banchegithe na̱, chujni bakao jeꞌe, mee ni banchegithe na̱. Ko are jeꞌe kunuꞌe thi kuiꞌin xi fariseo, bachrjexin nunthe Judea ko sakjan ngain nunthe Galilea.
Ko bunda batho no nunthe Samaria. Ko nthi̱ꞌa̱ biji ngain naa rajna diꞌin Sicar, chiaon ngain nunthe digajon Jacob ngain xeꞌen, xan biꞌin José. Ko nthi̱ꞌa̱ beꞌe thi kjui pozue Jacob, ko Jesús undadikunchrjen juixin kjín ko nthi̱ꞌa̱ tabetanda ngandeꞌe pozo. Ko jiꞌi kjui inchin ngusine nchaꞌon. Ko naa nchri nunthe Samaria juii nchra biruee nchra jinda, ko Jesús ndachro ngain nchra:
—Chjana nchin jinda siꞌi.
Ko jeꞌo Jesús beꞌe nthi̱ꞌa̱ ixin ni bakao jeꞌe sabinthekji na̱ ngaꞌa rajna ixin bikeꞌna na̱ thi sine na̱. Nchri nunthe Samaria ndachro nchra ngain Jesús:
—¿Jaꞌa naa chujni judío, kexreen ixin danchiana jinda jaꞌan, naa nchri Samaria?
(Ixin chujni judío ko ni Samaria xrakaoꞌa choo na̱ jian.) Ko Jesús batheꞌe ko ndachro:
—Ja̱ ruchunxin thi dajon Ndo Dio, ko kensen thi jidanchiaꞌa jinda, jaꞌa kai ruganchieꞌe jinda, ko jeꞌe ruchjaa thi nda nchegechon ni.
Thi nchrii ndachro:
—Suixin, rechundaꞌa thi segantsjexin nda ko anto niꞌnga jii nda. ¿Thinoo sigantsjexin nda nchegechon ni? ¿A suixin icha renthe ke ndo dachriꞌna ná xrachrjen biꞌin Jacob?, ndo kuinthuꞌe na ná pozo jiꞌi, thi nda jeꞌe ndo bagiꞌi ndo, ko nda bagiꞌi kain xeꞌen ndo ko kain kuxigue ndo.
Jesús ndachro:
—Kain chujni diꞌi jinda jiꞌi, rukjan seꞌen na̱ jinda inaa; aro thi chujni siꞌi jinda jaꞌan dajon, ixruꞌin nchaꞌon rukjan seꞌen na̱ jinda inaa ixin thi jinda dajon jaꞌan, kjan inchin naa thi chrinxin jinda ngain anseen chujni mee ko rukjan na̱ inaa chujni narua ko xruꞌin nchaꞌon tsjexin.
Ko thi nchrii ndachro:
—Suixin, chjana jinda yáa ixin irukjanꞌa seꞌen na jinda inaa, ko isigantsjeꞌa nda nthiꞌi.
Jesús ndachro:
—Thji, dayeꞌe xixiꞌa, ko siꞌi nthiꞌi.
Ko thi nchrii ndachro:
—Jaꞌan chundaꞌa xixiꞌna.
Ko ndachro Jesús:
—Jaan, ndua thi ndachro ixin chundaꞌa xixiꞌa, ixin jaꞌa ubarikoꞌo naꞌo xii, ko thi xii chunda jai jeꞌa xixiꞌa.
Ko nchrii mee ndachro:
—Suixin, jaꞌan tununa ixin suixin naa ni dayée juajnee Ndo Dio. Ni ndo dachriꞌna ná xrachrjen banchesayeꞌe na̱ Ndo Dio ngataꞌa jna jiꞌi, aro jaꞌa ra xro judío ra ndachro ra ixin ngain Jerusalén, nthi̱ꞌa̱ thi jikininxin sinchesayexin ni Ndo Dio.
Jesús ndachro:
—Dithikaon thi rindathjo ixin tuin tsii nchaꞌon are jaꞌa ra sinchesayeꞌe ra Ndudaa ná ko irugundaꞌa tsji ra ngain jna jiꞌi ko ngain rajna Jerusalén. Jaꞌa ra xro samaritano ra nuaꞌa ra kensen nchesayeꞌe ra, aro jaꞌan ná, xro judío ná, nuna ná kensen nthasayaa ná, ixin thi tsjengijna chujni tsixin ngain ni judío. Aro uchiaon juii nchaꞌon, ko jai ujuii nchaon mee ixin chujni ndua nchesayeꞌe Ndudaa ná, sinchesayeꞌe na̱ ndo kunixin espíritu ko thi ndua. Ixin Ndudaa ná thjee ndo chujni jañaa sinchesayeꞌe ndo. Ndo Dio Espíritu, ko chujni sinchesayeꞌe ndo rugunda sinchesayeꞌe na̱ ndo kunixin espiritue na̱ ko thi ndua.
Thi nchrii ndachro:
—Jaꞌan nuna ixin tsii thi Mesías, —thi kai diꞌin Cristo—, ko are jeꞌe tsii, jeꞌe rundachjejin ná kain.
Jesús ndachro:
—Jaꞌan thi Cristo na, thi jinichja ngajin.
Ko are mee binthekii chujni bakao Jesús, ko jeꞌe na̱ kuiseꞌen na̱ ixin Jesús jitjao naa nchrii. Aro xruꞌin ni banchiangiꞌi Jesús ixin keꞌe binao o keꞌe jitjao nchrii mee. Kuthimejan nchrii mee kuinthuꞌe nchixreꞌe nchra nthi̱ꞌa̱ ko sakjui nchra ngagaꞌa rajna ixin bindache nchra chujni:
—Xrakui ra sitsjeꞌe ra naa xi ndachjejin na kainxin thi jaꞌan binthaꞌa. ¿Ajeꞌa xi jiꞌi thi Cristo?
Kuthimejan tsjé chujni binthegachrjexin na̱ rajna ko binthekji na̱ bitsjeꞌe na̱ thi jii Jesús. Ko are xra dijiꞌa chujni, ni bakao Jesús binchetseꞌen na̱ ñao ko ndachro na̱:
—Suixin ke tjaago, dijinthe.
Aro jeꞌe ndachro:
—Jaꞌan chunda naa thi jine ko jaꞌa ra chunxinꞌa ra.
Ko chujni bakao kuexiꞌin na̱ banchiangiꞌi choo na̱:
—¿A chrujan ni juiauꞌe thi bine?
Aro Jesús ndachro:
—Are jaꞌan nthaꞌa thi rinao thi ruaꞌan na, ko tsjena xree, mee thi jaꞌan jine. ¿A jeꞌa jaꞌa ra ndachro ra: “Xra ditjaan noo kunithjao satsinxin ni thi kuenga ni”? Jaꞌan ndathjo ra: Danthjeꞌe ra jmakon ra ko tsjeꞌe ra jngi diginga ixin unchao tsjejo ni thi udiguan. Ko thi ncheꞌe xra ixin datse thi diguan, Ndo Dio tsjengeꞌe ꞌna. Ko thi tsee xra tse, mee chujni kjan inaa chujni narua ko xruꞌin nchaꞌon tsjexin. Ko thi thenga ko thi thjejo, kayui na̱ ruchee na̱. Ixin jañaa chro thi nichja na̱: “Jee thi thenga ko jee thi thjejo.” Jaꞌan ruaꞌan ra ixin bigatsiin ra tsee thi jaꞌa ra kuengaꞌa ra. Ko ikanxion na̱ ubincheꞌe na̱ xra, ko jai jaꞌa ra thjejo ra thi uguan.
Ko tsjé ni samaritano bithikaon na̱ ngain Jesús, jeꞌo ixin thi ndachro thi nchrii: “Jeꞌe ndachjejin na kain thi jaꞌan binthaꞌa.” Mexinxin ni samaritano kjui na̱ ngain jeꞌe ko binchetseꞌen na̱ ñao ixin tarugithuꞌe ngain na̱. Ko Jesús bithuꞌe ngain na̱ yoo nchaꞌon. Ko icha tsjé ni bithikaon are kuiꞌin na̱ thi ndachro jeꞌe. Kuthimejan ndache na̱ thi nchrii jiꞌi:
—Jai dithikaꞌon ná jeoꞌa ixin thi jaꞌa ndachjejin ni ra, kai ixin jaꞌan ná kuian ná thi nichja jeꞌe, ko nuna ná ixin ndua jeꞌe thi Cristo ko tsjengijna kain chujni ngataꞌa nunthe rukjan na̱ inaa chujni narua.

Batho thi yoo nchaꞌon, kuthimejan Jesús bachrjexin nunthe Samaria ko sakjui ngain nunthe Galilea. Ko Jesús ndachro: “Xruꞌin profetee Ndo Dio tusayeꞌe ngain rajnee profeta.” Ko chujni Galilea jian bayée na̱ ixin bikon na̱ kain thi bincheꞌe Jesús ngain kiai diꞌin pascua are binthekji na̱ Jerusalén.
Ko kjan Jesús ngain rajna Caná ngain nunthe Galilea, thi binchekjan Jesús jinda vino. Ko nthi̱ꞌa̱ beꞌe naa xii bechunda jié juachaxin ngain rey, ko xii jiꞌi bechunda xa naa xeꞌen xa beniꞌi xan ngain rajna Capernaum. Ko are xii jiꞌi kunuꞌe xa ixin Jesús juixin nunthe Judea ko juii ngain nunthe Galilea, kjui xa bitsjeꞌe xa, ko binchetseꞌen xa ñao Jesús tsji ngain nchianduꞌa xa ixin sinchexrueꞌen xeꞌen xa ixin undajideꞌen xan. Ko Jesús ndachro:
—Jaꞌa ra jeꞌo dithikaon ra ngain Ndo Dio ja̱ sikon ra thi naꞌa dikunxin ra.
Aro xi thetuꞌan ndachro xa:
—Suixin, chjin ná tuin nchiania, ja̱ naꞌi, ndaseꞌen xanꞌna.
Jesús ndachro:
—Sakjan nchiandui, xaꞌan jichon xan.
Thi xii jiꞌi bithikaon thi ndachro Jesús, ko sakjui xa. Ko are uchiaon jidiji xa nchianduꞌa xa, bachrje ni ncheꞌe xree xa ixin bichuenxin na̱ xa ngatja nthiꞌá, ko ndachro na̱ ngain xa:
—Xaꞌan jichon xan.
Ko banchiangi xa ngain na̱ ixin ke hora kuexiꞌin xan kunuꞌe xan jian, ko jeꞌe na̱ ndachro na̱:
—Jna tsukjin inchin a la una ndabachrjeꞌe xan sua.
Kuthimejan ndudaꞌa xraxaon ndo ixin jaan, inchin hora mee ndachro Jesús ngain ndo:
—Xaꞌan uxingameꞌe xan.
Ko jeꞌe xa kunixin kain ni nduꞌa xa bithikaon na̱ Jesús.
Jiꞌi thi yuxin naꞌa bagikunxin chujni bincheꞌe Jesús are jeꞌe kjanxin nunthe Judea ko juii ngain nunthe Galilea.

Kuuntele San Juan 4