Vagla - 1977 Edition (Drama - NT)

Lugli la, Wiŋɔɔlii bɛllɛ faa du de. A Wiŋɔɔlii faa du Kɔraawiizi benii, di faa ɛɛ Kɔraawiizi. U ni Kɔraawiizi maanii faa du de lugli la.
U fɔŋŋa biinii kummaa lii. Kummaa waa hoo di waa u fɔŋŋa biini liwɛɛ. U benii miibɔɔ lii. A miibɔɔ ra chaani nɛra ni. U du bɔbirii di ra chaani. Bɔbiri la wàá wer kpegluu maa.
Baal bɛl faa izi. U sɔnnɛ faa Jɔɔn. Kɔraawiizi huŋhunnii. U ba ú wa di Bɔchaaŋ Hiŋ la daansɛɛ, di bagli u wia, nɛ́r maa wer sɛɛ u wia dikuu u daansɛɛ hiŋ wia. A Jɔɔn faa waa a Bɔchaaŋ Hiŋ ɛɛwɛ. U faa ballɔɔ ú wa bagli Bɔchaaŋ Hiŋ la n faa ra ba la wia. Unla n ɛɛ Bɔchaaŋ Hiŋ himmaa faa ra ba durnyaa ú waa chaani nɛra maa ni.
Ka uŋ wa ballɛ la, ba wɔɔ zummɛ. Waabuu faa ta baa, ka uŋ wa ba ba be, ba waa wette ba zumuu. U ba u himmaa hɛrii. U himmaa nɛra vɛɛu ta. Ka banla waa maa n sɛɛ u wia di yarduu nɛnnɛ la, u gillɔɔ ba wer birgi Kɔraawiizi biizi. Gunla nɛra n ɔɔ ɛɛ di lul ba biizi la, guŋ lɛi u ɛɛ ka lul baa. Newea fɔŋŋa biini lɛi ba wer birgi u biizi. Kɔraawiizi fɔŋŋa biinii ba wer birgi u biizi.
Wiŋɔɔlii la n faa du de saŋa maa la, wa birgi neweere di ba wa du yaa be. Yaa na u girme, di wer zum lugɔ Kɔraawiizi biikpaŋkpannɛ. U wia maa wessoo werge. U kaa dɔɔ wibii ge werge.
Jɔɔn faa di u daansɛɛrɛ, di ŋɔ u wia bɔkpega ni, “Nɛr la miŋ faa ŋɔ u wia lugɔ mìŋ́ feluu ba, ka waabuu ɛɛ nabɔma n ni werge maa, di du de mɔɔ ka ba haa wa luliŋ la, a hinnɛ keŋ.” U faa dɔɔ Kɔraawiizi hiinaare werge, yaa maa ra na hiinaa werge u be. Moosis faa bagli yaabuu Kɔraawiizi Gbɔgni. Yeesu Kristo genii bagli yaa Kɔraawiizi hiinaa ani u wibii. Nɛr maa haa waa Kɔraawiizi nawɛɛ. Ka Yeesu la n ɛɛ Kɔraawiizi himmaa, di ɛɛ u biinɔŋŋii la, waabuu bagli yaa u wia, yaa wer zumuu.


Denii Jus hina baŋhina n du Jɛrusalɛm hum ba Kizeehina baŋhina ni Levi dee ge baŋhina, dí ba la Jɔɔn be di ga pɛɛzuu nɛr la dee n ɛɛu. U ɛɛ Kristo la n niŋ ba labuu gɛɛ waa lɛiyɛi? Ba ba wa pɛɛzuu. Jɔɔn jaa bagli u himmaa wia tɛɛ baa. Waa sɛɛwɛ dar baa ka ŋɔ, “Akai. Min lɛi Kristo la.”
Ba ŋɔ, “Ka anɛɛ hinnɛi? Hinuu Ɛlijaa?”
U ŋɔ, “Akai.”
“Amɔ, hinuu Kɔraawiizi dɔgtɛɛ laa?”
U ŋɔ, “Min lɛi.”
Ba ŋɔ, “Ka anɛɛ hinnɛi? Bagli yaa i wia, yá wer ga bagli tɛɛ banla n hum yaa la. Ɛrɛɛ i ge ra yir i hinnɛi?”
U ŋɔ, “Kɔraawiizi dɔgtɛɛ Aizaaya faa ŋɔ n wiarɛ u hɔŋ biini, Ba daŋ nuu nɛbɛl n na sii hɛribɔduma biini, di ra ŋɔ, ‘Yaa Dɔɔri ra bau. Ií ra ɛɛ wia á ra deŋli ni a ŋmɛnizi.’ ”
Denii banla n ɛɛ Farisizi la pɛɛzuu, “Di haa Kristo ɛɛwɛ, haa kaa ɛɛ Ɛlija, haa a dɔgtɛɛ gba ɛɛwɛ, ka ɛrɛɛ i ra sɔ nɛra Kɔraawiizi nii kennei?”
U ŋɔ, “Niirɛ miŋwaa kpa ra sɔ baa. Ka baal bɛl du ii be, ii siwee waa u ni chaanɛɛ. Mìŋ́ ballɛ mɔɔ ka u ge ba. Ka waabuu ɛɛ nabɔma n ni werge maa. Maa dɛg min niŋ lizi u gawa gba tɛu.”
Ba maa n na ŋɔ wia naa, Bɛtani la n du Jɔɔdan muu keŋkere, bɔr la Jɔɔn n faa ra sɔ nɛra Kɔraawiizi nii labuu ba du.

Hɔɔŋ wa pizɛɛ, Yeesu ra ba u be. Jɔɔn kaa nau unna ba, di ŋɔ nɛra la n du de la be, “Ií na Kɔraawiizi Pebii. Waabuu niŋ waa lizi durnya wichɔgaa di ra ha la. Miŋ faa ŋɔ baal bɛl wia lugɔ mìŋ́ feluu ba, ka u ɛɛ nabɔma n ni werge maa, di du de mɔɔ ka ba haa wa luliŋ la, a hinnɛ keŋ. N himmaa gba faa wɔɔ zummɛ. Ka u wiarɛ n ba di waa sɔ nɛra Kɔraawiizi nii, Ízrɛl hina wer zumuu.”
U kaa ŋɔ, “N na Kɔraawiizi Dumnanii n lii chiŋ tuu, di wa togni u nyuu lugɔ komma. N faa wɔɔ zummɛ, ka Kɔraawiizi la n humiŋ la feli ŋɔ lugɔ di n wa na u Dumnanii n tuuwe di wa togni nɛr maa ni, amɔ, waabuu nɛr la n niŋ kpa u Dumnanii di du nɛra ni la. Too. N na guŋ. Awia, n na ŋɔ ii benii lugɔ baal naa ɛɛ Kɔraawiizi Biibaallɛ.”

Hɔɔŋ wa pizɛɛ, Jɔɔn ni u hiŋra banɛɛ kaa chi de. Yeesu ge ga ba kɛra di waa kaali. Jɔɔn nau di ŋɔ u hiŋra be, “Ií na Kɔraawiizi Pebii la!”
U hiŋra la nuu guŋ, di izi ga hiŋ Yeesu di ra la. Yeesu kɛɛ binni di na banna hiŋuu, u pɛɛzi baa, “Bɛɛ ii ra nyiŋŋei?”
Denii ba ŋɔ “Rabai, lee i dia duɛi?”
U ŋɔ ba be, “Ií ba wa na.”
Ba la ga na u duuribɔr a chɔɔzi ni, di du u be guŋŋ wiizi wa chol.
Baala la n faa nuu Jɔɔn wiŋɔzi di hiŋ Yeesu la, bɛl sɔnnɛ faa Andru. U kpɛɛma ge sɔnnɛ faa Saimɔn Pitta. U la ga nyiŋŋi u kpɛɛma la di ŋɔ u be, “Yaa na nɛr la n ɛɛ Mɛsia labuu.” Andru n yiruu Kristo la, Kristo la Kɔraawiizi n faa ŋɔ lugɔ u daŋ ŋmɛnɛ ba la wiarɛ u ŋɔ. U kpogluu la ú ga zum Yeesu.
Yeesu n wa na Saimɔn la, u ŋɔ, “Ba faa ra yiriibuu Jɔɔn bie Saimɔn. Filaŋkeŋ yaa daŋ jaa ra yirii Sifas.”

Hɔɔŋ wa pizɛɛ, Yeesu ra nyiŋŋi u kaali Galilii hɛri. U ga na baal bɛl, u sɔnnɛ Filip, di ŋɔ u be, “Izi ra hiŋiŋ.”
A Filip ni Andru ni Pitta maa bolle faa Bɛtseida. Filip ge ga na baal bɛl banna yir Natanɛl, di ŋɔ u be, “Yaa na nɛr la Moosis ni dɔgtɛɛzi n faa sɛbi u wia Kɔraawiizi Hɔŋ biini labuu. Waabuu Nazarɛf hinuu Joosɛf biibaal Yeesu.”
Natanɛl ŋɔ, “Aa! Boljaga naa! Maa sɛɛwɛ nɛnanii maa n niŋ lii a Nazarɛf.”
Filip ŋɔ, “Ba wa na.”
Ba kpa la. Baŋ gaa hel Yeesu be, Yeesu binni Natanɛl ka ŋɔ, “Jus hina nɛnanii bɛllɛ ra ba. Waa beela maa dɔɔwɛ.”
Natanɛl ŋɔ, “Lee i lii zuminnɛi?”
Yeesu ŋɔ, “Hiŋ faa du fig daa zɛɛ, mɔɔ ka Filip ba i be di wa yirii la, n naibuu de.”
Natanɛl ŋɔ, “N Nabɔma, i ɛɛ Kɔraawiizi Biibaallɛ. Izrɛl hina koorii hiŋ.”
Yeesu ŋɔ, “Miŋ ŋɔ min nai fig daa zɛɛ la wiarɛ i yardiŋ gɛɛ? I daŋ haa na wizenaa aŋhina, á kaali annii. Ií gil n ŋɔ wibii maa tɛɛ ia. I daŋ ŋmɛnɛ na chiŋ n pillɛɛ, Kɔraawiizi mɛlikazi ga de ra lii di ra tuu Mìŋ́ Newee Biibaal be, ka bir tinni ra kaali.”

Kuuntele Jɔɔn 1