Quechua, Margos - 2003 Edition (NT) Drama

Quechua, Margos - 2003 Edition (NT)

Imapis manaraq kaptinmi Diospa Palabran kaykarqanna.
Tayta Dioswanmi pay kaykarqan.
Payqa Diosmi kaykan.
Qalaykunanpitami Tayta Dioswan kaykarqan.
Paywanmi lapan imaykatapis Tayta Dios kamarqan.
Kay patsacho kaqkunaqa lapanpis pay kamashqanmi kaykan.
Paychömi mana ushakaq kaway kaykan.
Tsay kawayqa runakunapaq atskimi kaykan.
Tsay atskiqa tsakaychöpis pasaypami atsikyan.
Tsakaypis tsay atskita manami upitsintsu.
Juk runami karqan Juan jutiyuq. Paytami Tayta Dios kacharqan wilakuptin lapan runakuna tsay atskita chaskikärinanpaq. Juanqa manami tsay atskitsu karqan, sinöqa tsay atskipita wilakuqlami.
Rasunpa kaq atskiqa lapan runakunatami atsikyapan.
Payqa kay patsamanmi shamurqan.
Kay patsacho kaykaptinpis y kay patsata kikin kamashqa kaykaptinpis runakuna manami payta reqirqantsu.
Kuyashqan runakunaman shamuptinpis manami chaskikärirqantsu.
Payman yärakur chaskikuqkunatami itsanqa Tayta Dios legitimakun wamrankuna kananpaq.
Manami mamanpita yurishqanpitatsu
ni papäninpa tsurin kashqanpitatsu Tayta Diospa wamran karkaykan,
sinöqa Tayta Diospita yurishqa karmi.
Diospa Palabran kay patsaman shamurmi runano yurirqan.
Noqakunawanmi kay patsacho purirqan.
Tayta Diospa juklayla Tsurin kaptinmi munayniyuq kaykaqta rikapäkurqä.
Kuyapäkuq y rasun kaqlata parlaqmi karqan.
Paypitami Juan kayno wilakurqan: <<Tsay runapaqmi noqa kayno nirqä: Qepäta shamuq kaqqa noqapita mas munayniyuqmi kaykan. Payqa manaraq yuriptïmi kaykarqanna>>.
Payqa shumaq kuyakuq karmi lapantsita imaypis kuyapämantsi.
Leyninkunataqa Moiséswanmi Tayta Dios wilakatsirqan.
Kuyapäkuyninta y rasunpa kaq wilakuynintami itsanqa Jesucristuwan tantiyatsimashqantsi.
Manami pipis Tayta Diosta imaypis rikashqatsu.
Juklayla Tsurinmi itsanqa, Dios kar y Tayta Dioswan juklayla kar, Tayta Diospita musyatsimashqantsi.


Juan pï kashqantapis tapumunanpaqmi cürakunata y levitakunata Jerusalén autoridäkuna kacharqan. Tapuptinmi Juan kayno nirqan: <<Rasun kaqtami nï: Noqa manami Cristutsu kaykä>>.
Tsaymi yapay tapupäkurqan: <<Tsawraqa ¿pitaq kaykanki? ¿Profëta Elíasku kaykanki?>>
Tsayno niptinmi Juan kayno nirqan: <<Manami Elíastsu kä>>.
<<Tsawraqa ¿shamunanpaq kaq profëtaku kaykanki?>>
Niptinmi kayno nirqan: <<Manami tsay profëtatsu kä>>.
Tsaymi kayno nipäkurqan: <<Tsawraqa ¿pitaq kanki? Kachamaqnïta wilapäkunäpaq pï kashqaykitapis wilaykalämay>>.
Tsawraqa Juan kayno nirqan: <<Profëta Isaías qelqashqanchömi kayno nin: <Juk runami chunyaq jirkacho qayaraypa wilakur kayno niykan: <<Tayta Dios shamunanpaq wenqu nänita derechapäkuy>> >. Tsay wilakuq runami noqa kaykä>>.
Kachashqan fariseukunami Juanta kayno nipäkurqan: <<Cristupis ni Elíaspis ni shamunanpaq kaykaq profëtapis mana kaykarqa ¿imanirtaq runakunata bautizaykanki?>>
Tsawraqa Juan kayno nirqan: <<Noqaqa yakulawanmi bautizä. Itsanqa noqantsichönami mana reqishqayki runapis kaykan. Payqa [noqapita mas puntata karpis] qepätaraqmi shamunqa. Noqaqa manami lanqi watunta paskapänaläpaqpis merecïtsu>>.
Juanta tsayno tapupäkurqan Jordán mayu tsimpan Betaniacho runakunata bautizaykaptinmi.

Tsaypita jukaq junaqnami Jesús aywaykämuqta rikaykur Juan kayno nirqan: <<¡Tayta Dios kachamushqan Carnishmi pay kaykan! Paymi runakunata jutsankunapita perdonanqa. Tsay runapaqmi noqa kayno nirqä: <Qepäta shamuq kaqqa noqapita mas munayniyuqmi kaykan. Payqa manaraq yuriptïmi kaykarqanna>. Noqapis manami musyarqätsu Tayta Dios kachamushqan pay kashqanta. Tsayno kaptinpis Israel runakuna payta reqinanpaqmi runakunata bautizaykä>>.
Mastapis Juan kayno nirqan: <<Noqa rikarqä palumano Espíritu Santu jana patsapita urämur payman rataqtami. Manaraq tsayta rikar manami musyarqätsu Tayta Dios kachamushqan kashqanta. Itsanqa yakuwan bautizanäpaq kachamarmi Tayta Dios kayno nimarqan: <Mayqan runapa jananmanpis Espíritu Santu palumano rataqta rikarmi musyapäkunkipaq Espíritu Santuwan bautizananpaq kashqanta>. Tsay nimashqannölami tsay runapa jananman Espíritu Santu palumano rataqta rikashqä. Tsaymi qamkunata wilapaykä Tayta Diospa Tsurin pay kashqanta>>.

Tsaypita jukaqnin junaqnami ishkay discïpulunkunawan Juan kaykarqan. Jesús pasaykaqta rikarmi kayno nirqan: <<¡Rikapäkuy! ¡Tayta Dios kachamushqan Carnishmi pasaykan!>>
Tsayno niptinmi Juanpa ishkay discïpulunkuna Jesúspa qepanta aywapäkurqan. Tikraykushqanchömi Jesús rikarqan qepanta paykuna aywarkaykaqta. Tsawraqa kayno tapurqan: <<¿Pitataq ashiykanki?>>
Paykunanami kayno nirqan: <<Rabí, ¿maychötaq patsaraykanki?>>
(Rabí ninanqa yachatsikuq ninanmi.)
Tsawraqa Jesús kayno nirqan: <<Aku, reqitsishayki>>.
Tsayno nir pusharmi maycho patsarashqantapis reqitsirqan. Tardiyäpakurnami tsay ishkay discïpulukuna tsaylachöna Jesúswan patsakärirqan.
Jesúswan patsakuq juknin discïpulumi karqan Simón Pedrupa wawqin Andrés. Paymi Juan nishqanta mayashpan Jesúspa qepanta aywarqan. Tsaypitami Andrés aywarqan wawqin Simón kaqman. Chayaykurmi kayno wilarqan: <<¡Mesíaswanmi tinkushqä!>>
(Mesíasqa Tayta Dios kachamushqan Cristo ninanmi.)
Nirkurnami Jesús kaqman pusharqan. Chayaykuptinnami Simónta rikaykur Jesús kayno nirqan: <<Qamqa Jonáspa tsurin Simónmi kaykanki. Kananpitaqa Cefasnami jutiki kanqa>>.
(Cefas ninanqa Pedro ninanmi.)

Tsaypita juknin kaq junaqmi Galileapa aywaykashqancho Felipita tariykur Jesús kayno nirqan: <<Noqawan aywashun>>.
Felipe karqan Betsaida markapitami. Andrés y Pedrupis tsay markalapitami karqan. Tsaymi Natanaelman aywaykur Felipe kayno nirqan: <<¡Moisés y wakin profëtakunapis Cristo shamunanpaq qelqashqannölami shamushqa! ¡Paywanmi tinkushqä! ¡Payqa Josépa tsurin Nazaret markapita Jesúsmi!>>
Niptinmi Natanael kayno nirqan: <<Nazaretpita ¿pilaqa ali runa kanmantsuraq?>>
Tsayno niptinmi Felipe kayno nirqan: <<Aku aywashun rikanaykipaq>>.
Natanael chayaykaqta rikaykurmi Jesús kayno nirqan: <<Kay runami itsanqa rasunpa Israel runa. Payqa manami lulakuntsu>>.
Tsayno niptinmi Natanael kayno tapurqan: <<¿Imanöpataq reqimashqanki?>>
Niptinmi Jesús kayno nirqan: <<Felipe manaraq qayashuptikimi hïgus yöra sikincho jamaraykaqta rikashqä>>.
Tsayno niptinmi Natanael kayno nirqan: <<¡Tayta Diospa Tsurinmi qam kaykanki, rabí! ¡Israel runakunapa mandaqnin reymi kaykanki!>>
Tsayno niptinmi Jesús kayno nirqan: <<¿<Hïgus yöra chakincho jamaraykaqta rikashqämi> nishqaläpitaku tsayno nimanki? Kananpitaqa imaypis mana rikashayki kaqkunataraqmi rikankipaq>>.
Nirkurmi Jesús kayno nirqan: <<Rasunpami kayno nï: [Kananpitaqa] rikapäkunkipaq ciëlu punku kichakämuptin Tayta Diospa angilninkuna Runapa Tsurinman urarkaykämuqta y kutirkaykaqtami>>.

Kuuntele Juan 1