If you have would like a copy of this version please contact info@davarpartners.org

Pahari Mahasu New Testament, CC-BY-SA-4.0, The Love Fellowship (Text), Pahari Mahasu New Testament Audio Bible, CC-BY-SA-4.0, Davar Partners International, 2021 (Audio)

Pahari Mahasu New Testament

This work is licensed under Creative Commons Attribution-ShareAlike 4.0 License.

तैबै यीशुऐ आपणै च़ेलेऊ लै भी एक औनैणौ दैऔ, “एकी सेठा रौ एक खज़ान्च़ी थौ, और लोग तेस सेठा काऐ तेस खज़ान्च़ी माथै इलज़ाम लाइंदै लागै कि इयौ खज़ान्च़ी तेरी सारी धन ज़यदाद उड़ाउंदै आ लागौ औन्दौ। तैबै सेठै सेऊ खज़ान्च़ी आपु काऐ औटाऔ और बोलौ तैरै बारै दी हाऊं का बूश ऊ शुणदै लागौ औन्दौ, तांऐ मैरै रुपाऐ-पैसै रौ का कियौ आ? तू आबै आपणौ खज़ान्च़ी वाल़ौ हिसाब किताब दै ओरु कैलैकि तू आबै खज़ान्च़ी रै लायक नाईं रौ। तैबै सेऊ खज़ान्च़ी आपणै ज़िवा दी सुच़दै लागौ, कि आबै हाऊं का कौरुलै, कैलैकि आबै मैरौ बाबु ता मुं खज़ान्च़ी रै कामा कु पोरु गाड़दै लागौ औन्दौ, बांजर मुकै खोदिंदौ नाईं और भीखा मांगणा री लागा मुकै शौरम। इणै सुंच़ीयौ तिणी आपणै ज़िवा दी बिच़ार कियौ कि, आबै मेरी सौमझ़ी दी आशी गौ आ कि मुंइऐ का जा कौरणौ, ताकी ज़ेबी मुं मैरौ मालिक खज़ान्च़ी रै कामा कु पोरु गाड़ा लौ, तेबी लोग मुं आपणै घौरै निआं। तैबै तिणी खज़ान्च़ीऐ आपणै मालिका रै सारै करज़दार एक-एक कौरीऐ आपु काऐ औटाऐ और पैहलै करज़दारा कु पुछ़ौ, ‘ताऊं माथै मैरै मालिका रौ केती कौरज़ौ आ? तिणीऐ बोलौ शौ मण तेल खज़ान्च़ीऐ बोलौ की आपणौ बौई-खातौ कर और फेटी पचास लिख।’ तैबै पुछ़ौ तिणीऐ दुजै कु, ‘ताऊं माथै केती कौरज़ौ आ? तिणीऐ बोलौ, शौ मण गीऊं तैबै खज़ान्च़ीऐ बोलौ आपणौ बौई खातौ कर और आस्सी लिख।’ तैबै यीशुऐ बोलौ, ‘तिणी सेठै तेस च़लाक खज़ान्च़ी री तारीफ की, कि तांऐ केती च़ालाकी कौरीऐ काम कियौ आ, कैलैकि इणी ई इंऐ धौतरी रै लोग आपणै साथा रै लोगु आइलै रीती-रिवाज़ा और च़ाल-च़ालणा दी धौर्मी लोगु कु भौरी च़लाक ई।’ और हाऊं तुमुलै बोलाऊ, ‘कि एस धौतरी रै धन-ज़यदादा कौरीऐ आपु कालै इणै गोश्टण चाणौ, ताकी ज़ेबी तुमुकै सै धन-ज़यदाद पोरु सौंबड़ा ली तेबी सै गोश्टण तुमु केबी ना सौम्बुड़नै वाल़ै घौरा दी निआं।’ ज़ुण छ़ोटी-छ़ोटी बुशेऊ दी सौच़्च़ौ रौआ सा सेऊ बौड़ी-बौड़ी बुशेऊ दी भी सौच़्च़ौ रौआ, और ज़ुण छ़ोटी-छ़ोटी बुशेऊ दी बेईमान औआ सा, सेऊ बौड़ी-बौड़ी बुशेऊ दी भी बेईमान औआ। एथीलै ज़ैबै तुमै धौतरी रै धन-ज़यदादा दी सौच़्च़ै नाईं रौआ लै ता तुमुकै आत्मिक (सौरगा रौ) धन-ज़यदाद कुण दिआ सा? और ज़ैबै तुमै बिगानै धन-ज़यदादा दी सौच़्च़ै विश्वास वाल़ै नाईं रौआ लै ता, तैबै ज़ो तुमुकै आपणौ आ तेस तुमुकै कुण दिआ सा? ‘कोई भी नुकुर दुई मालिका री सेवा नाईं कौरी बौल़दौ, कैलैकि सेऊ या कौरा एकी आइलै नफरत और दुजै आइलै कौरा प्यार या, एकी आइलै रौआ मिली झ़ुलीऔ दुजै आइलै छ़ाड़ा राग।’ इणी ई तुमै भी परमेश्‍वर और धौतरी री धन-ज़यदाद, दुइया री सेवा नाईं कौरी सौकदै।”


फरीसी लोग ज़ुण लाल़च़ी थै सै इऊं बुशेऊ शुणियौ यीशु रौ मज़ाक उड़ाउंदै लागै। यीशुऐ तिउंलै बोलौ, “तुमै ता इणै लोग ई ज़ो लोगु मांझ़िऐ आपुलै धौर्मी बौणा ई, पर परमेश्‍वर तुमारै मन ज़ाणा सा। कैलैकि ज़ो चीज़ लोगु री नौज़रीयै आच़्छ़ी आ, सै च़ीज़ परमेश्‍वरा री नौज़रीयै बुरी आ।” यीशुऐ बोलौ, “मुसा रै नियम और भविष्यवक्ता री शिक्षा ता तुमुलै यहुन्ना रै बौगता झ़ांऊ थी तेथ बासिऐ ता परमेश्‍वरा रै राज़्य री खुशी री खौबर आ शुणाउणी लाई ऐन्दी। और हर आदमी परमेश्‍वरा री बाटा दी पुरी शक्ति कौरीऐ आ आशदै लागौ औन्दौ। सौरग और धौतरी टौल़ी सौका ई पर परमेश्‍वरा रै चाणै औन्दै नियम रौ एक भी बिन्दु नाईं टौल़ी सौकदौ। ज़ुण आदमी आपणी बोउटी गाड़ीयौ दुजी शादी कौरालौ सेऊ गलत काम कौरा आ, और ज़ुण आदमी दुजै री गाड़ी ऐन्दी छ़ेउड़ी आइलै शादी कौरालौ सेऊ भी कौरा गान्दै काम।”

“एक आदमी थौ ज़ुण मैंहगै-मैंहगै और मखमला रै जुड़कै भीड़ा थौ, और रोज़ आच़्छ़ी-आच़्छ़ी रोटी खा थौ। और लाज़र नावां रौ थौ एक गरीब ज़ासरै पुरै ज़िसमा दी दुखणै थै, लोग तेस रोज़ च़ुंगियौ सेठा री खोल़ी काऐ छ़ाड़ा थै। कैलैकि सेऊ च़ाहा थौ कि सेठा री फोकुई ऐन्दी ज़ुठी रोटी खाइयौ आपणौ पेट भौरु। तिऐ कुकुर भी आशीयौ तेसरै दुखणै च़ाटा थै। इणौ हुऔ कि एकी दिनै सेऊ गरीब आदमी मौरौ, और परमेश्‍वरा रै दूतुऐ सेऊ च़ुंगियौ अब्राहमा आइलै इज़्ज़तदार ज़ागाह छ़ाड़ौ। तैबै सेऊ सेठ आदमी भी मौरौ और लोगुऐ सेऊ दाबौ। और सेऊ डैऔ नौरका दी तिऐ सेऊ भौरी दुखा दी थौ तौड़फदै लागौ औन्दौ ज़ैबै तिणीऐ आपणी नौज़र उपरै लाई तैबै तिणीऐ दुरा कु सेऊ लाज़र अब्राहमा आइलै देखौ। तैबै तिणीऐ हाकै मारीयौ बोलौ, ‘ओ बाब अब्राहम मुं माथै दया कौरौ एस लाज़र मुकाऐ भेज़ौ ताकी एऊ आपणी औंउठी री मुंडकी पाणी दी भिज़ाइयौ मेरी ज़ीभ शेल़ावा, कैलैकि हाऊं इऐं नौरका री आगी दी तड़पदेऊ लागौ औन्दौ।’ पर अब्राहमै बोलौ, ‘ओ छ़ोहरु याद कर कि ताऐं ता आपणी ज़िन्दगी दी आच़्छ़ी-आच़्छ़ी च़िज़ेऊ कौरीऐ आराम कियौ।’ और इणी लाज़रै भी गौऐ दुःख झ़ेली। आबै एऊ इदै सुख शान्ति दी, और तू ई तड़पदै लागौ औन्दौ। ‘इऊं सारी बुशै छ़ाड़ियौ आमारै और तैरै बिच़ा दी एक बौड़ी खाल़ आ ताकी ज़ो इदरु ताऊं काऐ आशणौ च़ाहा लौ सेऊ नाईं आशी बौल़ा, और ना ताऊं काऐ कु इदै आमु काऐ आशी बौल़ा।’ तिणीऐ बोलौ, ‘ओ बाब अब्राहम इणौ कर हाऊं ताऊं कु औरज़ कौराऊ कि तू एस लाज़र मैरै बाबा रै घौरै भेज़। कैलैकि मैरै पांज़ भाई ई, और एऊ लाज़र तिऊं च़ितलावा, इणौ नाईं च़ांई हुऔ कि सै भी इदै नौरका दी आशा।’ अब्राहमै तेसलै बोलौ, ‘तिउंकै च़ितलाउणा लै ता मुसा रै नियम और भविष्यवक्तु री लिखी ऐन्दी किताबै ई, तिंउऐ च़ांई तेथरी शुणनी।’ तिणीऐ बोलौ, ‘ओ बाब अब्राहम इणौ नाईं भी नाईं, अगर तिऊं काऐ कुण मौरै औन्दै मांझ़िया कु ज़िउंदै हुइयौ डिआलौ तैबै बौदल़ा ई सै पापा कु आपणौ मन।’ अब्राहमै तेसलै बोलौ, ‘ज़ैबै सै मुसा और भविष्यवक्ताऔं रै नियम नाईं मानदै, तैबै सै तेसरी भी नाईं शुणदौ ज़ुण तिऊं काऐ मौरै औन्दै मांझ़िया कु ज़िउंदै हुइयौ डिआलौ।’ ”

Kuuntele लुका 16