If you have would like a copy of this version please contact info@davarpartners.org

Pahari Mahasu New Testament, CC-BY-SA-4.0, The Love Fellowship (Text), Pahari Mahasu New Testament Audio Bible, CC-BY-SA-4.0, Davar Partners International, 2021 (Audio)

Pahari Mahasu New Testament

This work is licensed under Creative Commons Attribution-ShareAlike 4.0 License.

फरीसीउ और सदुकिउऐ यीशु काऐ आशीयौ तेस परखुणा लै बोलौ, “आमुकै सौरगा री केज़ी इणी निशाणी देखाल़ कि यीशु परमेश्‍वरा कु आ आशौ औन्दौ।” यीशुऐ तिउंलै ज़वाब दैऔ, “ब्याल़ी तुमै बोलाई कि, ‘सौरग आच़्छ़ौ रौआ, कैलैकि सौरग रातौ आ,’ और दोउती उठीयौ तुमै बोलाई, ‘आज़ पाणी लागा, कैलैकि सौरग रातौ और धुंधलौ आ। तुमै सौरगा रै हालत देखीयौ तेसरौ भेद बोली सौका ई, पर बौगता री निशाणी रौ भेद कैलै नाईं बोली सौकदै? एज़ै जुगा रै बुरै और गान्दै काम कौरणै वाल़ै लोग निशाण लोड़ाई, पर योना रै निशाणी छ़ाड़ियौ तिउंलै औज़ौ कोई निशाणी नाईं दैंदै।’ ”


च़ेलै झ़िला कु पार पउंच़ै, पर सै रोटी निणै बिसरुई गौऐ थै। यीशुऐ तिउंलै बोलौ, “शुणौ, फरीसीउ और सदुकिऊ रै संज़ेड़ै कु बौच़ियौ रौऐ ऊ। यीशु रै च़ेलै आपु मांझ़िऐ चौपड़िंदै लागै, ‘आमुऐ रोटी नाईं आणी, तैबै बोलौ यीशुऐ इणौ।’ तिंउरै विच़ार ज़ाणियौ यीशुऐ तिउंलै बोलौ, ‘ओ धौतरी रै लोगुऔ, तुमै आपु मांझ़िऐ कैलै ई लागै औन्दै चौपड़िंदै कि आमुकै रोटी नाईं? का तुमै इबी झ़ांऊ नाईं सौमझ़दै? का तुमुकै सै पांज़ हज़ारा री पांज़ रोटी याद नाईं, और ना इणौ कि तुमुऐ केती छ़ाबड़ी च़ुंगी थी? और ना सै च़ार हज़ारा री सात रोटी, और ना इणौ कि तुमुऐ केती छ़ाबड़ै भौरै थै? तुमै कैलै नाईं सौमझ़दै कि मुंइऐ तुमुकै रोटी रै बारै दी नाईं बोलौ, पर हाऊं बोलु थौ तुमुलै इणौ कि तुमै फरीसीउ और सदुकिऊ रै बुरै विच़ार और शिक्षा कु बौच़ियौ रौएऊ।’ तैबै यीशु रै च़ेलेऊ कै सौमझ़ी दी आशौ कि यीशुऐ रोटी रै संज़ेड़ै कु नाईं, पर फरीसीउ और सदुकिऊ री शिक्षा कु बौच़ियौ रौणा लै बोलौ थौ।”


तैबै यीशु कैसरिया फिलिप्पी रै परदेशा दी आशौ, और आपणै च़ेलेऊ कु पुछ़दै लागौ, “लोग आदमी रै छ़ोहरु लै का बोलाई?” तिंउऐ बोलौ, “कुछ़ ता यहुन्ना बपतिस्मौ देणै वाल़ौ बोलाई, और कुछ़ बोलाई एलियाह, और कुछ़ यिर्मयाह या कोई दुजौ भविष्यवक्ता सौमझ़ा ई, ज़ुण मारीयौ ज़िउंदै हुऐ ई।” यीशुऐ तिउंलै बोलौ, “पर तुमै मुलै का बोलाई?” शमौन पतरसै ज़वाब दैऔ, “तुमै ज़िउंदै परमेश्‍वरा रौ छ़ोहरु मसीहा ई।” यीशुऐ तिउंलै ज़वाब दैऔ, “ओ शमौन, योना रै छ़ोहरु, तू भौलौ ई। कैलैकि केज़ै भी आदमीऐ नाईं, पर मैरै बाबै ज़ो सौरगा दी आ, एज़ी बूश ताऊं माथै पौगड़ी की आ। और हाऊं भी ताऊं कु बोलाऊ कि तू पतरस आ, और हाऊं एस ढोल़ा माथै आपणी कलिसिया चाणाऊ, और अधोलोका रै दार ताऊं माथै हक्क नाईं छ़ाड़ा लौ। हाऊं ताउंलै सौरगा रै राज़ा री कुंज़ी दिआऊ: और ज़ो कुछ़ तू धौतरी माथै बानालौ, सेऊ सौरगा दी बानिया लौ। और ज़ो कुछ़ तू धौतरी माथै खोलालौ, सेऊ सौरगा दी खुलालौ। तैबै यीशुऐ आपणै च़ेलै च़ितल़ाऐ कि कासी कै नाईं बोलीयौ कि हाऊं मसीह ऊ।”


सेज़ै बौगता कु यीशु आपणै च़ेलै लै बोलदै लागौ, “ज़ुरुरी आ कि हाऊं यरुशलेमा लै डेऊ, और स्याणेऊ, और बौड़ै याजकु, और शास्त्रिउ रै हाथा कु भौरी दुःख उठाऊ। और मुं पोरु झ़ांगाई। और चिजै दिनै ज़िउंदौ हुआ ऊ।” तैबै पतरसै यीशु एकी भिलै नियौं और तेसलै डांटियौ बोलौ, “ओ प्रभु, परमेश्‍वरै केबी ना च़ांई इणौ कियौ ताऊं आइलै इणौ केबी ना औन्दौ।” तैबै यीशुऐ पिछ़ाऊं मुड़ियौ पतरसा लै बोलौ, “ओ शैतान, मुकाऐ कु दूर डेऊ! तू मुलै ठोकरा रौ कारण आ। कैलैकि तू परमेश्‍वरा री बुशै माथै नाईं, पर आदमी री बुशै माथै मन ला ई।”


तैबै यीशुऐ आपणै च़ेलेऊ लै बोलौ, “अगर कुण मुं पिछ़ु हाण्डणौ च़ाहा, ता आपणी इच़्छ़ा पोरु छ़ाड़ा लौ और आपणौ क्रूस च़ुंगियौ, मुं पिछ़ु हाण्डा लौ। कैलैकि ज़ुण-कुण आपणौ प्राण बौच़ाउणै च़ाहा लौ तेसलै परमेश्‍वरा आइलै सौदा री ज़िन्दगी नाईं मिलदी, पर ज़ो मुकालै और मैरै खुशी री खौबर शुणाउणै री वज़ाह कु आपणै प्राण दैणा लै तयार औलौ तेसलै परमेश्‍वरा आइलै सौदा री ज़िन्दगी मिला आ। अगर पुरी धौतरी री खुशी पाई बौल़ा ई, पर एथरौ का फाइदौ आ आपणौ प्राण खोआलौ पोरु? या आदमी आपणै प्राणा रै बौदल़ै का दिआ लौ? आदमी रौ छ़ोहरु आपणै पवित्र सौरगदूतु आइलै आपणै बाबा री शाना देखाइयौ आशा लौ, और सेज़ै बौगतै ‘सेऊ हर एकी लै तेसरै कामा रै मुताबिक मिनतानौ दिया लौ।’ हाऊं तुमुलै सौच़्च़ौ बोलाऊ कि ज़ो इदै इऐ खौड़ै लोग ई तिऊं मांझ़िऐ कु कुछ़ इणै ई कि सै ज़ेबी झ़ाऊं आदमी रौ छ़ोहरु तेसरै राज़्या दी आशदी बारै ना देखाल़ै तेबी झ़ाऊं नाईं मौरदै।”

Kuuntele मत्ती 16