Ge’ez - 2021 - BSE (NT) Non Drama

Ge’ez - 2021 - BSE (NT) Drama

ኢትኰንኑ ከመ ኢትትኰነኑ። እስመ በኵነኔ ዘኰነንክሙ ትትኴነኑ አንትሙ ወበመስፈርት ዘሰፈርክሙ ይሰፍሩ ለክሙ። ለምንት ትሬኢ ሐሠረ ዘውስተ ዐይነ እኁከ ወኢትሬኢ ሠርዌ ዘውስተ ዐይንከ ኢታቤይንኑ። ወእፎ ትብሎ ለእኁከ ኅድገኒ አውፅእ ሐሠረ እምውስተ ዐይንከ ወናሁ ሠርዌ ውስተ ዐይንከ። ኦ መደልው አውፅእ ቅድመ ሠርዌ እምውስተ ዐይንከ ወእምዝ ትሬኢ ለአውፅኦ ሐሠር ዘውስተ ዐይነ እኁከ። ኢተሀቡ ቅድሳተ ለከለባት ወኢትደዩ ባሕርየክሙ ቅድመ አሕርው ከመ ኢይኪድዎ በእገሪሆሙ ወተመዪጦሙ ይነፅኁክሙ። ሰአሉ ወይትወሀበክሙ ኅሡ ወትረክቡ ጐድጕዱ ወይትረኀወክሙ። እስመ ኵሉ ዘሰአለ ይነሥእ ወዘሂ ኀሠሠ ይረክብ ወለዘሂ ጐድጐደ ይትረኀዎ። መኑ ውእቱ እምኔክሙ ብእሲ ዘይስእሎ ወልዱ ኅብስተ ወእብነ ይሁቦ። ወእመሂ ዓሣ ሰአሎ አርዌ ምድርኑ ይሁቦ። ወሶበ እንከ እንዘ እኩያን አንትሙ ተአምሩ ሠናየ ሀብተ ውሂበ ለውሉድክሙ እፎ ፈድፋደ አቡክሙ ዘበሰማያት ይሁብ ሠናየ ለእለ ይስእልዎ። ኵሎኬ ዘትፈቅዱ ይግበሩ ለክሙ ሰብእ ከማሁ ግበሩ ሎሙ አንትሙኒ እስመ ከማሁ ውእቱ ኦሪትኒ ወነቢያትኒ። ባኡ እንተ ጸባብ አንቀጽ እስመ ረሓብ አንቀጽ ወስፍሕት ፍኖት እንተ ትወስድ ውስተ ኀጕል ወብዙኃን እሙንቱ እለ ይበውኡ ውስቴታ። ጥቀ ጸባብ አንቀጽ ወጽዕቅት ፍኖት እንተ ትወስድ ውስተ ሕይወት ወውኁዳን እሙንቱ እለ ይበውእዋ። ተዐቀቡኬ እምሐሳውያን ነቢያት እለ ይመጽኡ ኀቤክሙ በአልባሰ አባግዕ ወእንተ ውስጦሙሰ ተኵላት መሠጥ እሙንቱ። ወእምፍሬሆሙ ተአምርዎሙ ይቀሥሙሁ እምአሥዋክ አስካለ ወእምአሜከላ በለሰ። ከማሁኬ ኵሉ ዕፅ ሠናይ ፍሬ ሠናየ ይፈሪ ወእኩይሰ ዕፅ ፍሬ እኩየ ይፈሪ። ኢይክል ዕፅ ሠናይ ፍሬ እኩየ ፈርየ ወኢዕፅ እኩይ ፍሬ ሠናየ ፈርየ። ኵሉ ዕፅ ዘኢይፈሪ ፍሬ ሠናየ ይገዝምዎ ወውስተ እሳት ይወድይዎ። ወእምፍሬሆሙ እንከ ተአምርዎሙ። አኮ ኵሉ ዘይብለኒ እግዚኦ እግዚኦ ዘይበውእ ውስተ መንግሥተ ሰማያት ዘእንበለ ዘይገብር ፈቃዶ ለአቡየ ዘበሰማያት። ወብዙኃን ይብሉኒ በይእቲ ዕለት እግዚኦ እግዚኦ አኮኑ በስምከ ተነበይነ ወበስምከ አጋንንተ አውፃእነ ወበስምከ ኀይላተ ብዙኀ ገበርነ። ወይእተ ጊዜ እብሎሙ ግሙራ ኢየአምረክሙ ረኀቁ እምኔየ ኵልክሙ እለ ትገብሩ ዐመፃ። ኵሉኬ ዘይሰምዕ ዘንተ ቃልየ ወይገብሮ ይመስል ብእሴ ጠቢበ ዘሐነጸ ቤቶ ዲበ ኰኵሕ። ዘንሙ ዝናማት ወውኅዙ ወኀይዝት ወነፍሑ ነፋሳት ወገፍዕዎ ለውእቱ ቤት ወኢወድቀ እስመ ዲበ ኰኵሕ ተሣረረ። ወኵሉ ዘይሰምዕ ዘንተ ቃልየ ወኢይገብሮ ይመስል ብእሴ አብደ ዘሐነጸ ቤቶ ዲበ ኆፃ። ዘንሙ ዝናማት ወውኅዙ ወኀይዝት ወነፍሑ ነፋሳት ወገፍዕዎ ለውእቱ ቤት ወወድቀ ወኮነ ድቀቱ ዐቢየ። ወሶበ ፈጸመ እግዚእ ኢየሱስ ዘንተ ነገረ ተደሙ አሕዛብ ወአንከሩ ምህሮቶ። እስመ ከመ መኰንን ይሜህሮሙ ወአኮ ከመ ጸሐፍቶሙ።

Kuuntele ወንጌል ዘማቴዎስ 7