Quechua, Huamalies Dos de Mayo - 2003 Edition (NT) Non-Drama

Quechua, Huamalies Dos de Mayo - 2003 Edition (NT)

Imapis manaraq kaptinmi Diospa Palabran kaykarqanna.
Tayta Dioswanmi pay kaykarqan.
Payqa Diosmi kaykan.
Qalaykunanpitami Tayta Dioswan kaykarqan.
Paywanmi lapan imaykatapis Tayta Dios kamarqan.
Kay pasacho kaqkunaqa lapanpis pay kamashqanmi kaykan.
Paychömi mana ushakaq kaway kaykan.
Say kawaymi runakunapaq aksi kaykan.
Say aksimi sakaychöpis selläma asikyan.
Sakaypis say aksita manami upisinsu.
Juk runami karqan Juan jutiyuq. Paytami Tayta Dios kacharqan wilakuptin lapan runakunapis say aksita chaskikuyänanpaq. Juan manami say aksisu karqan, saypa trukanqa say aksipita wilakuqlami.
Rasunpaypa kaq aksi lapan runakunatami asikyapan.
Paymi kay pasaman shamurqan.
Kay pasacho kaykaptinpis y kay pasata kikin kamash kaykaptinpis runakuna manami payta reqiyarqansu.
Kuyashqan runakunaman shamuptinpis manami chaskikuyarqansu.
Payman yärakur chaskikuqkunatami isanqa Tayta Dios legitimakun wamrankuna kayänanpaq.
Manami mamanpita yuriyashqanpitasu
ni runapa surin kayashqanpitasu Tayta Diospa wamran kaykäyan,
sinöqa Tayta Diospita yurish karmi.
Diospa Palabran kay pasaman shamurmi runano yurirqan.
Noqakunawanmi kay pasacho purirqan.
Tayta Diospa juklayla Surin kaptinmi munayyuq kaykaqta rikayarqä.
Kuyapäkuq y rasun kaqlata parlaqmi karqan.
Paypaqmi Juan wilakur nirqan: <<Say runapaqmi noqa nirqä: Qepäta shamuq kaqqa noqapita mas munayyuqmi kaykan. Payqa manaraq yuriptïmi kaykarqanna>>.
Payqa shumaq kuyakuq karmi lapansita imaypis kuyapämansi.
Leyninkunataqa Moiséswanmi Tayta Dios wilakasirqan.
Kuyapäkuq kayninta y rasunpa kaq wilakuynintami isanqa Jesucristuwan tantiyasimashkansi.
Manami pipis Tayta Diosta imaypis rikashsu.
Juklayla Surinmi isanqa, Dios kar y Tayta Dioswan juklayla kar, Tayta Diospita musyasimashkansi.


Juan pï kashqantapis tapuyämunanpaqmi cürakunatawan levitakunata Jerusalén autoridäkuna kachayarqan. Tapuyaptinmi Juan nirqan: <<Rasun kaqtami nï: Noqa manami Cristusu kä>>.
Saymi yapay tapuyarqan: <<Sayno kaptinqa ¿pitaq kaykanki? ¿Profëta Elíasku kaykanki?>>
Sayno niyaptinmi Juan nirqan: <<Manami Elíassu kä>>.
Saymi yapay tapuyarqan: <<¿Shamuqpaq kaq profëtaku kaykanki?>>
Niptinmi nirqan: <<Manami say profëtasu kä>>.
Saymi niyarqan: <<Sayno kaptinqa ¿pitaq kanki? Kachamaqnïkunata wilayänäpaq pï kashqaykitapis wilayämay>>.
Saymi Juan nirqan: <<Profëta Isaías qelqashqanchömi nin: <Juk runami sunyaq jirkacho qayakuypa wilakur nikan: <<Tayta Dios shamunanpaq wenqu nänita derechayay>> >. Say wilakuq runami noqa kaykä>>.
Kachayashqan fariseukunami Juanta niyarqan: <<Cristupis ni Elíaspis ni shamuqpaq kaykaq profëtapis mana kaykarqa ¿imanirtaq runakunata bautizaykanki?>>
Saymi Juan nirqan: <<Noqaqa yakulawanmi bautizä. Isanqa noqansichönami mana reqiyashqayki runapis kaykan. Paymi [noqapita mas puntata karpis] qepätaraq shamunqa. Noqaqa lanqi watunta paskapänaläpaqpis manami merëcïsu>>.
Juanta sayno tapuyarqan Jordán mayu simpan Betaniacho runakunata bautizaykaptinmi.

Saypita waraynin junaq Jesús shamuykaqta rikaskirmi Juan nirqan: <<¡Tayta Dios kachamushqan Carnishmi pay kaykan! Paymi runakunata jusankunapita perdonanqa. Say runapaqmi noqa nirqä: <Qepäta shamuq kaqqa noqapita mas munayyuqmi kaykan. Payqa manaraq yuriptïmi kaykarqanna>. Noqapis manami musyarqäsu Tayta Dios kachamushqan pay kashqanta. Sayno kaptinpis Israel runakuna payta reqiyänanpaqmi runakunata bautizaykä>>.
Mastapis Juan nirqan: <<Noqa rikarqä imayka palumano Espíritu Santu jana pasapita urämur payman rataykaqtami. Manaraq sayta rikar manami musyarqäsu Tayta Dios kachamushqan kashqanta. Isanqa yakuwan bautizanäpaq kachamarmi Tayta Dios nimarqan: <Mayqan runapa jananmanpis Espíritu Santu palumano rataykaqta rikarmi musyanki Espíritu Santuwan bautizananpaq kashqanta>. Say nimashqannölami say runapa jananman Espíritu Santu palumano rataykaqta rikashkä. Saymi qamkunata wilapä Tayta Diospa Surin pay kashqanta>>.

Saypita waraynin junaqnami ishkay discïpulunkunawan Juan kaykarqan. Jesús päsaykaqta rikarmi nirqan: <<¡Rikayay! ¡Tayta Dios kachamushqan Carnishmi päsaykan!>>
Sayno niptinmi Juanpa ishkay discïpulunkuna Jesúspa qepanpa aywayarqan. Tikraykushqanchömi Jesús rikarqan qepanpa paykuna aywaykäyaqta. Saymi nirqan: <<¿Pitataq ashiykäyanki?>>
Tapuptinmi niyarqan: <<Rabí, ¿maychötaq posädaraykanki?>>
(Rabí ninanqa yachasikuq ninanmi.)
Jesúsnami nirqan: <<Aku, reqisiyäshayki>>.
Sayno nir pusharmi maycho posädarashqantapis reqisirqan. Tardiyaykaptinnami say ishkay discïpulukuna saylachöna Jesúswan posädakuyarqan.
Jesúswan posädakuq juknin discïpulumi karqan Simón Pedrupa wawqin Andrés. Paymi Juan nishqanta wiyashpan Jesúspa qepanpa aywarqan. Saypitanami Andrés aywarqan wawqin Simón kaqman. Chaykurmi wilar nirqan: <<¡Mesíaswanmi tinkuyashkä!>>
(Mesíasqa Tayta Dios kachamushqan Cristo ninanmi.)
Nirkurnami Jesús kaqman pusharqan. Chaykuptinnami Simónta rikaykur Jesús nirqan: <<Qamqa Jonáspa surin Simónmi kanki. Kananpitaqa Cefasnami jutiki kanqa>>.
(Cefas ninanqa Pedro ninanmi.)

Saypita waraynin junaqmi Galileapa aywaykashqancho Felipita tariykur Jesús nirqan: <<Aku aywashun>>.
Felipe karqan Betsaida markapitami. Andréswan Pedrupis say markalapitami kayarqan. Saymi Natanaelman aywar Felipe nirqan: <<¡Moisés y wakin profëtakunapis Cristo shamunanpaq qelqayashqannölami shamush! ¡Paywanmi tinkuyashkä! ¡Payqa Josépa surin Nazaret markapita Jesúsmi!>>
Niptinmi Natanael nirqan: <<Nazaretpita ¿pilaqa ali runa kanmansuraq?>>
Sayno niptinmi Felipe nirqan: <<Aku aywashun rikanaykipaq>>.
Natanael chaykaqta rikaykurmi Jesús nirqan: <<Kay runami isanqa rasunpaypa Israel runa. Payqa lulakuyta manami yachansu>>.
Sayno niptinmi Natanael tapurqan: <<¿Imanöpataq reqimashkanki?>>
Niptinmi Jesús nirqan: <<Felipe manaraq qayashuptikimi hïgus jacha chakincho jamaraykaqta rikashkä>>.
Sayno niptinmi Natanael nirqan: <<¡Tayta Diospa Surinmi qam kaykanki, rabí! ¡Israel runakunapa mandaqnin reymi kaykanki!>>
Sayno niptinmi Jesús nirqan: <<¿<Hïgus jacha chakincho jamaraykaqtami rikashkä> nishläpitaku sayno nimanki? Kananpitaqa imaypis mana rikashayki kaqkunataraqmi rikankipaq>>.
Nirkurmi Jesús nirqan: <<Rasunpami nï: [Kananpitaqa] ciëlu punku kichakämuptin Tayta Diospa angilninkuna Runapa Surinman uraykäyämuqta y paypita kutiykäyaqtami rikayanki>>.

Kuuntele Juan 1