Suosittuja jakeita Raamatun kirjasta MATEO 6

Jaa

Xaśiki anćhuk Yöś irpiś wathapanź qhura, niźaśa nïź lï patxparu oqa, neqhśtan anćhukaź maytanakaki thätaź khekićha.

Niźaśa anćhukki xaqatixapa anaź llakiśha, niźaśa ni xaqa thuñiki ni oraqaś llakiśhiś thensnakićha. Śapuru ćhhul anawali llakiśhnakami thensñipanqaśśa.

“Cheqpachal khiwćha: Anaź anćhukki lulhśkiśtan niźaśa likhśkiśtan llakiśhakićha ti yoqkiś qamśxapaki, niźaśa ana ućhum xañchi śkiti kuthśkiśtanami. ¿Anax ni źoñź źeti ćhherkiśtan tshan kuśtixo, niźaśa anax ni źoñź xañchi tshan kuśti ni śkitkiśtanxo?

Niźaśa amki mayiśikanaki am qhuya luśha niźaśa śana chawkhźka, neqhśtan amki am Yöś Ephźkin xamaśit mayiśa. Niźaśa am Yöś Ephki amiź xamaśit päta cherćha, neqhśtan am Yöś Ephki amkiś qhanaruź thäkićha.

Ućhumnakki tuź mayiśiśtanćha: ‘Yöś Tata, amki tsewkta yoqkin źelhćha, niźaśa am thüki alt'itax khila. Niźaśa am irpiś wathakix thonlalla. Am quśkama pälla ni tsewkta yoqkin, niźaśa ti yoqkiś.

Niźaśa śapuru wethnaka lulhś t'anta töx thuñi thäźkalla.

Wethnaka ujkiśtanź pertunalla, niźaśa werhnakki thappacha wethnakatan ana wali päñinakźkiś pertunućha.

Niźaśa anaź werhnak ujkiś thxotsqatalla, niźaśa wethnaka ujkiśtanź liwriyalla. Niźaśa amtaćha ni tsewkta irpiś wathaki, niźaśa ni am aśimi, niźaśa ni am thonñi chawkh aśimi watay wata thurñićha. Xalla nuźox khilalla.’

“Niźaśa ni anćhukatan ana wali päñinakźtan anćhuk śumansnakiź nïki, niźtaśaqaś ni tsewkta Yöś Ephki anćhuka ujkiśtan pertunakićha

Anćhukki ni tsekuñ layñi weźlanaka cherźna, ni weźlanakaki ana ćhhakhñićha niźaśa ana axśñićha, niźaśa ninakaki ana ćhheri makhś qhuychiśśa niźaśa ana ketalchiśśa; neqhśtan ućhum Yöś Ephqaź lulinaka thäćha. ¡Niźaśa ućhumnakki weźlanakźkiśtan tshantiź kuśtićha!

“Niźaśa ana ti yoqkiś źelinśnaka aka, ti yoqkiśiki ni khuri niźaśa śaxwiź thatanćha, neqhśtan ni źelinśnakaki apt'ićha, niźaśa ni qhuykiś thañinakamiź khiśñi luśhśa. Niźaśa anćhuka źelinśnaka tsewkta yoqkinź aka, neqhśtan nikhuki ni khurimi niźaśa ni śaxwimi anaź thatanćha, niźaśa thañinakami anaź khiśñi luśhśa. Xalla neqhśtan xaqhsikin anćhuka źelinśnaka akhchinćhukźlaxa, xalla nikhuśaqaś anćhukki quś thäćha.

“Niźaśa anapanź tshi uywitaki piśk tuyñuźkin manta päsaćha, niźtikiśtan tshïsuñaki pektaź khekićha niźaśa tshïsuñaki ćhhaxwtaź khekićha, niźaśa tshïźkiś thapa quśtanź khekićha niźaśa tshïsuñźkiśti ana quśtanź khekićha. Anapanź Yöśkin niźaśa źelinśnakźkin manta päyi atasaćha.

Xalla nuź Yöśki ni phxaqallanaka thutźa, töxiki pampikinćha niźaśa xaqaki jurnukiś ujtaź khekićha, ¡tshanti anćhukakiś päsaćha, ana Yöśkiś quśśiś źoñinaka!

Niźaśa amki ni t'aqhir źoñinakźkiś onanźku, anapan śiśtanćha ni am śqar qharaki, ćhhulu päćhaxa ni am źew qharaki; amiź qostan onantaki Yöś Ephki cherćha. Niźaśa Yöś Ephki ni cherźku amkiś qhanaruź onakićha.

“Anćhukki anaź Yöś tawqźtan qhanaru khïkhiya, ni źoñinakź tukkiś cherta khiśxapaqaśki. Xalla nuź päsaź nïki, am tsewkta Yöś Ephki anaź ćhhulumi onasaćha.

“Niźaśa anćhukki ayunaśkanaki ana ni toskar źoñinakaźtaqaś t'aqhirtichi chercherchiś khiśtanćha; niźaśa ninakaki źoñinaka ayunaśñi nayaxu niźta päñićha. Werhki cheqpachal khiwćha, niźta pätikiśtan ninakaki wax onanś tanśićha. Niźaśa amki ayunaśkanaki am acha t'axśiźna niźaśa źhikźna, niźaśa yukhmi axwźna, niźaśa ni amiź ayunaśta ana źoñiź śiśta khiśtanćha, niźaśa am tsewkta Yöś Eph alaxaź xamaśit śiśtanki; niźaśa xamaśit am cherñi Yöś Ephki amkiś qhanaruź thäźkakićha.