Mak 3
3
Yesu, tomogha ima raborabobona iviyawiini
Mat 12:9-14; Luk 6:6-11
1 Wiiyawiitaveyana gabudarina tana Yesu iveramagha irughu kabepepa barene bi tomogha imana raborabobona ikita nama iyamakamake. 2Na Perisis yadi kayowana da siyiwawuni na siyaruruwiiteteni bi siyakita da noko tomoyina iyiyawiini wiiyawiitaveyana gabudarine. 3Bi Yesu tomoyina iwoneni bo, “Piika, wawaya naghodiye kunamiiri.” 4Bi kate nokodi wawaya ivitarakiiyanedi iwona bo, “Meko sirana imiise wiiyawiitaveyana gabudarine: Miisena tana bera bo berona tana bera? Tani yawa bo tanakasunugha?” Bi getana iiyabo iyawonabodenina. 5Na Yesu nuwanuwana ipughu bi ikita wiiveravera. Toudi tainadi sikuru na touna ivinuwapoya na tomogha imana raborabobona iwoneni, “Imam kuroroni inakanibu.” Na imana ikoghasi ikanibu na iyawa.
6Wasina, Perisis yaininagha sikuyoveni bi sinagho kiiwawo Herod turaturana#3:6 Herodiyans Herod turaturana toudi Jius damdi, bi Roume tamudu damdi yawata siyisisiya bi siyabagibagi, kiiwawo Herod (Herod Antipas) yana wiibadana rogune. Na Jius da Perisis siyanoghonoghota bi siyigeruwana da toudi wawayidi, (Herodiyans) Herod turaturana na yadi kubura siyaverevereyana. biiyadi bi keda sivinogha da metagha Yesu siyiraboboni.
Yesu, koroto ghamana sikivini
7-8Wasina bi, Yesu kana kivikivina yawata siveramagha sawa kikirine, na Galilima koroto ghamana sikivini sinagho. Wawaya korotodi siwaiyana da berakayowiiwiiyaka iyaberabera, na wawaya Jiudiyama, Jerusalemma, Idumeyama, bi kwanatu mududi Jodan rarimina nawane bi Taya da Saidon kwanatudi riridigha tupadi sipiika. 9-10#Mrk 4:1Wawaya korotodi nada iviyawiidi, na gubagubagidi mududi siyibusura da yadi wiina Yesu siyakabitowoi. Na kana kivikivina iwonedi da waga tana sinakabigubeni touna kiiravine, da gewawaya sinagwagwarina. 11Raghanine kanuma beroberodi wawaya siyibadedi bi sikita, na naghone sivituwapore oghogheyana bi sirakapara, “Tamna God natuna!” 12Bi Yesu sisiya bagibaginama iwonedi da gegha siyisisiya da touna iiyabo.
Yesu, apasol ivineyidi
Mat 10:14; Luk 6:12-16
13Yesu koyae igae bi tomotomogha ikayovedina ikwatuvedi, sipiika touna biidi. 14Bi tomotomogha yadi twelve ivineyidi da touna teya siyamakae bi siyapepewa na ikwatuvedi toudi apasol. Bi iwonedi bo, “Yagu wiina da yawata tana makae, bi raghani murine aniporami konakanibu da wawaya biidi wonagu koniwarareerebeni.” 15Bi maragata iveredi da kanuma beroberodi wawaya gwabidima siyikanibuvedi. 16Nokodi yadi twelve ivinegha na kadi waghawagha mma naboni:
Saimon (Yesu, iviwaghawaghayeni da Pita),#3:16 Pita yana basuna akima.
17Zebedi natunatuna Jemes da tiinaru Jon, Yesu iviwaghawaghayedi Boaneges (yana basuna warikeyakeya natunatuna),
18Andru,
Piripo,
Batoromiu,
Matiu,
Tomas,
Jemes, Arupiyas natuna,
Taidiyas,
Saimon touna Zelot wawaya#3:18 Zelot yana basuna, wawaya ribana mududi yadi kayowa na da Roume babada yawata siyiaviya.
19bi Jiudas Iskariyot (touna ivikedawaga da Yesu sinaburavi).
Wawaya siwona da Yesu yana maragata na Seitan gwabinama ipiika
Mat 12:22-32; Luk 11:14-23, 12:10
20Yesu yana apasol yawata sinagho bare tane bi koroto ghamana bada siriyena mayeni, na gerubana da siyakam. 21Yana rakaraka noko sisiyina siwaiyaneni na siwona bo, “Touna ineghanegha,” bi muriye na sipiika da siyarutayini.
22God yana gwara Mosis iverenina kana wiiyeveveyana damdi, mududi Jerusalemma siyowogha bi siwona bo, “Belsabub, touna na kanuma beroberodi kadi bada ghamana na Yesu yibadeni! Bi touna yana maragate na Yesu kanuma beroberodi yikanibuvedi.”
23Wasina bi, Yesu, gwara kana wiiyeveveyana damdi ikwatuvedi bi miibama iwonedi bo, “Metagha bi Seitan inageghomiiri da Seitan inikanibuveni? 24Memeda kwanatu tana inarutotoni damvedamve bi toudi siyogha vivirana, na noko kwanatuna gegha inamiiri wiimaragatana. 25Bi rakaraka tana yayarayi da damvedamve, bi toudi siyogha vivirana, na noko rakarakana gegha inamiiri wiimaragatana. 26Bi wasina, memeda Seitan yana dam inayarayi bi siniyogha na gesinamakena bi toudi sinaroukwa. 27Seitan kana miiba waragututuna tana mma: Getana iiyabo rubana tomogha maragasina yana bareye inarughu da yana sawara inayapina, da dagudagunena noko tomoyina inaghira tawatawani, bi muriye na yana bareye inayapi. 28God wawaya bera berodi sabera bi kate siwaghawagha beroveni na tupadi inanoghotatavedi. 29Bi iiyabo Kanuma Kabikabikuwayina iniwaghawagha beroveni, na God noko berona gegha inanoghotatavenina, bi yana berona inamakewaghata.” 30Yesu naboni iyisisiya na basuna Kanuma Kabikabikuwayina yana maragate kanuma beroberodi iyikanibuvedi, bi toudi Kanuma Kabikabikuwayina siyiwaghawagha beroveni siyawonawona bo, “Touna kanuma berona itowatawani.”
Yesu yana rakaraka waghata
Mat 12:46-50; Luk 8:19-21
31Yesu sinananaki da warewaresina siverakanibu, bi maghatare siyamiimiiri, na wawaya tana sivipora da touna iyawoneni. 32Koroto ghamana sigwagwari siyamakamake, na nokodi wawayidi mududi siwoneni bo, “Sinamnaki da warewaresim maghatare sakayokayovem.”
33Bi iwonabodedi bo, “Sinagunaki iiyabo, bi warewaresigu iiyawogha?” 34Wasina, ikita wiipatedi da nokodi wawaya simakegwagwari na iwonedi bo, “Kowaiyana! Mmkodi na sinagunaki bi warewaresigu! 35Iiyabo God yana wiina inabera na touna waresigu, nughuguru bi sinagunaki.”
Tällä hetkellä valittuna:
Mak 3: aui
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2010, Wycliffe Bible Translators, Inc. All rights reserved.