San Juan 12
12
Jesure María ʉꞌmʉtise piopeoꞌque niꞌi
(Mt 26.6-13; Mr 14.3-9)
1Pascua bosenʉmʉ waꞌatjo seis nʉmʉrĩ dʉꞌsawʉ. Titare Jesú Efraĩ́pʉ níꞌcʉ Betania wãmetiri macãpʉ waꞌawĩ. Todʉporo ti macãpʉta Jesú Lázarore masõwĩ. 2Tocjãrã Jesure bosenʉmʉ weepeowã. Marta baꞌasere etiwõ. Na pãjãrã waꞌterore Lázaro quẽꞌrã Jesú meꞌrã baꞌadujiwĩ. 3Ʉ̃sã baꞌari cura María pajicja ʉꞌmʉticja nardo wãmetise wapabʉjʉsere poseticjare Jesú tiro miitiwõ. Miiti, cʉ̃ dʉꞌpocãrĩpʉ piopeowõ. Beꞌro co poari meꞌrã tuucoewõ. Ti wiꞌi nipeꞌtiropʉ ʉꞌmʉtiseꞌsa waꞌawʉ.
4Co tojo weecã ĩꞌagʉ̃, Juda Iscariote ʉ̃sã meꞌrãcjʉ̃ beꞌropʉ Jesure ĩꞌatuꞌtirãrẽ oꞌoacjʉ aꞌtiro niwĩ:
5—¿Deꞌro weego aꞌte ʉꞌmʉtisere duatiati? Tere duago, niꞌcã cʉ̃ꞌma daꞌrase wapa weronojõ wapataꞌaboapã. Te niyerure pajasecʉorãrẽ oꞌoboapã, niwĩ.
6Cʉ̃ pajasecʉorãrẽ maꞌígʉ̃ mejẽta, tojo niwĩ. Yajasebʉcʉ niwĩ. Cʉ̃ ʉ̃sã niyerure coꞌtegʉ niwĩ. Ti ajuropʉ ʉ̃sã niyeru sãaꞌquere yajamʉjãcũwĩ. 7Jesú cʉ̃rẽ niwĩ:
—Co ʉaro weeato. Co yʉꞌʉre yaatjere wãcũgõ, tojo weeamo. 8Mʉsã pajasecʉorãrẽ oꞌonuꞌcũmasĩrãsaꞌa. Beꞌropʉ yʉꞌʉ pũrĩcãrẽ oꞌomasĩsome. Yʉꞌʉ aꞌto nidojacjʉ niweꞌe, niwĩ Jesú.
Judío masã wiorã Lázarore wẽjẽsĩꞌrĩꞌque niꞌi
9Pãjãrã judío masã Jesú Betaniapʉ nise quetire tʉꞌocãrã niwã. Tojo weerã Jesure, cʉ̃ masõꞌcʉ Lázaro quẽꞌrãrẽ ĩꞌarã aꞌticãrã niwã. 10-11Lázarore masõse ye buꞌiri pãjãrã judío masã Jesure ẽjõpeowã. Cʉ̃rẽ ẽjõpeorã, paꞌia wiorã dutise doca nimiꞌcãrã dʉcawatia waꞌawã. Na tojo weese ye buꞌiri paꞌia wiorã Jesure na wẽjẽsĩꞌrĩrõnojõta Lázaro quẽꞌrãrẽ wẽjẽsĩꞌrĩwã.
Jesú Jerusalẽ́pʉ piꞌaꞌque niꞌi
(Mt 21.1-11; Mr 11.1-11; Lc 19.28-40)
12Pascua judío masã bosenʉmʉrẽ ĩꞌarã waꞌarã pãjãrã masã Jerusalẽ́pʉre waꞌacãrã niwã. Na etáca nʉmʉ ape nʉmʉ peꞌe Jesú waꞌatje quetire masĩcãrã niwã. 13Tojo weerã pũrĩ opa querire dʉte, cʉ̃rẽ põtẽrĩrã aꞌticãrã niwã. Na aꞌtiro caricũwãꞌcãtiwã:
—Marĩ wiogʉre eꞌcatise oꞌorã. Ãꞌrĩ Õꞌacʉ̃ oꞌóꞌcʉre añurõ waꞌato. Cʉ̃ marĩ Israe curuacjãrã wiogʉ nimi, niwã.
14Jesú Õꞌacʉ̃ ye queti ojáca pũrĩpʉ nírõnojõta burrore ĩꞌagʉ̃, cʉ̃ buꞌipʉ mʉjãpejawĩ. Zacaría todʉporocjʉ̃ Õꞌacʉ̃ ye quetire weremʉꞌtãrĩ masʉ̃ aꞌtiro ojacʉ niwĩ:
15Mʉsã Jerusalẽ́cjãrã, uiticãꞌña.
Ĩꞌaña, mʉsã wiogʉ burro buꞌipʉ pesawãꞌcãtimi, ni ojacʉ niwĩ.
16Aꞌte ojaꞌquere ʉ̃sã cʉ̃ buꞌerã ne waro “Jesú ye queti nisaꞌa”, niticãti. Beꞌro ʉꞌmʉse cʉ̃ mʉjã́áca beꞌropʉ ʉ̃sã masĩwʉ̃. “Õꞌacʉ̃ ye queti ojáca pũrĩpʉ níꞌcaronojõta cʉ̃rẽ queoro waꞌawʉ”, niwʉ̃.
17Jesú Lázarore masõgʉ̃, cʉ̃ pijiwĩrõcã ĩꞌaꞌcãrã ãpẽrãrẽ wereturiacãrã niwã. 18Tojo weerã cʉ̃ weeĩꞌoꞌquere ẽjõpeorã, Jesure põtẽrĩrã aꞌticãrã niwã. 19Fariseo masã peꞌe tojo weecã ĩꞌarã, aꞌmerĩ nicãrã niwã:
—¿Ĩꞌati mʉsã? Nipeꞌtirã cʉ̃ meꞌrã waꞌarã weema. ¿Marĩ deꞌro weebosaʉ? niwã.
Griego masã Jesure ĩꞌasĩꞌrĩꞌque niꞌi
20Jerusalẽ́pʉ Pascua bosenʉmʉ nicã, Õꞌacʉ̃rẽ ẽjõpeorã nerẽꞌcãrã waꞌterore niꞌcãrẽrã griego masã niwã. 21Na Jesure ĩꞌasĩꞌrĩrã Felipe tiro aꞌtiwã. Felipe Betsaida Galilea diꞌtapʉ nirĩ macãcjʉ̃ niwĩ. Na cʉ̃rẽ aꞌtiro niwã:
—Jesure ĩꞌasĩꞌrĩsaꞌa.
22Na tojo nicã tʉꞌogʉ, Felipe Andrére weregʉ waꞌawĩ. Beꞌro pʉarãpʉ waꞌa, Jesure wererã waꞌawã. 23Na griego masã ĩꞌasĩꞌrĩsere tʉꞌogʉ, Jesú niwĩ:
—Yʉꞌʉ Õꞌacʉ̃ macʉ̃ masʉ̃ weronojõ upʉtigʉ wẽrĩ masãmʉjãatjo cãꞌrõ dʉꞌsaꞌa. 24Diacjʉ̃ta nigʉ̃ti. Niꞌcʉ̃ otese capere otetibosami. Te oteticã, mejãrõta tojasaꞌa. Te peri otecã pũrĩcãrẽ, diꞌtapʉ boa waꞌasaꞌa. Beꞌro pĩꞌrĩ, pupi, peje dʉcatisaꞌa. Te peri weronojõ yʉꞌʉ wẽrĩgʉ̃saꞌa. Yʉꞌʉ wẽrĩse meꞌrã pãjãrã Õꞌacʉ̃ põꞌrã waꞌarãsama. 25Noꞌo aꞌti ʉmʉcopʉre cʉ̃ catiri ʉmʉcore maꞌiyʉꞌrʉgʉ pecameꞌepʉ buꞌiri daꞌre bajurionoꞌgʉ̃sami. Noꞌo cʉ̃ catiri ʉmʉcore maꞌitigʉ peꞌe ʉꞌmʉsepʉ catinuꞌcũgʉ̃sami. 26Yʉꞌʉ dutisere weesĩꞌrĩgʉ̃, yʉꞌʉre sirutuato. Cʉ̃ yʉꞌʉ niatjopʉre yʉꞌʉ meꞌrã nigʉ̃sami. Yʉꞌʉ dutisere weesirutugʉnojõrẽ yʉꞌʉ pacʉ añurõ weegʉsami, niwĩ Jesú.
Jesú cʉ̃ wẽrĩatjere ucũꞌque niꞌi
27Jesú niwĩ:
—Niꞌcãrõacã yʉꞌʉ pũrõ bʉjawetiꞌi. ¿Deꞌro nigʉ̃sari? “Pacʉ, yʉꞌʉre ñaꞌarõ waꞌatjere yʉꞌrʉoya” ¿nigʉ̃sari? Nisome. Yʉꞌʉ tereta piꞌeti, wẽrĩgʉ̃ aꞌtiwʉ. 28Pacʉ, mʉꞌʉ tutuasere ĩꞌoña, niwĩ Jesú. Cʉ̃ tojo níca beꞌro niꞌcʉ̃ ʉꞌmʉsepʉ ucũdijosere tʉꞌowʉ. Aꞌtiro niwĩ:
—Yʉꞌʉ tutuasere ĩꞌotojawʉ. Ĩꞌonemogʉ̃ti tja, niwĩ.
29Masã topʉ nirã́ cʉ̃ ucũꞌquere tʉꞌorã, “Bʉpo bʉsʉami”, niwã. Ãpẽrã “Õꞌacʉ̃rẽ werecoꞌtegʉ ʉꞌmʉsecjʉ̃ Jesure ucũami”, niwã.
30Jesú narẽ niwĩ:
—Yʉꞌʉre tʉꞌodutigʉ mejẽta ucũami. Mʉsã peꞌere tʉꞌodutigʉ ucũami. 31Niꞌcãrõacãrẽ Õꞌacʉ̃ aꞌti turicjãrãrẽ bese, buꞌiri daꞌregʉsami. Tojo nicã aꞌti turicjãrãrẽ dutigʉ wãtĩ cõꞌawĩrõnoꞌgʉ̃sami. 32Apeye quẽꞌrãrẽ yʉꞌʉre na ʉꞌmʉarõpʉ tuumorõnʉꞌcõcã, nipeꞌtirãrẽ yʉꞌʉ tiropʉ aꞌticã weegʉti, niwĩ Jesú.
33Tojo nígʉ̃, yʉꞌʉ curusapʉ wẽrĩgʉ̃saꞌa nígʉ̃, tojo niwĩ. 34Masã tere tʉꞌorã, aꞌtiro niwã:
—Õꞌacʉ̃ ye queti ojáca pũrĩpʉ na buꞌeĩꞌocã, aꞌtiro tʉꞌonoꞌwʉ̃: “Õꞌacʉ̃ beseꞌcʉ Cristo catinuꞌcũcʉ̃sami.” ¿Deꞌro weeacjʉ mʉꞌʉ peꞌe tja “Õꞌacʉ̃ macʉ̃ masʉ̃ weronojõ upʉtigʉ ʉꞌmʉarõpʉ tuumorõnʉꞌcõnoꞌgʉ̃sami”, niti? Õꞌacʉ̃ macʉ̃ masʉ̃ weronojõ upʉtigʉ ¿noanojõ niti? ni sẽrĩtiñaꞌwã.
35Jesú narẽ niwĩ:
—Yʉꞌʉ aꞌti nucũcãcjãrãrẽ sĩꞌose weronojõ niꞌi. Yʉꞌʉ masãrẽ Õꞌacʉ̃ yere añurõ masĩcã weeꞌe. Yoaticã mʉsã meꞌrã nigʉ̃saꞌa. Yʉꞌʉ aꞌtopʉ nirĩ curare mʉsã yʉꞌʉ buꞌesere ẽjõpeoya. Tojo weerã mʉsã wãcũña marĩrõ naꞌitĩꞌarõpʉ sijarã weronojõ waꞌasome. Yʉꞌʉre ẽjõpeotirã naꞌitĩꞌarõpʉ nirã́ weronojõ nima. Na weesere “Aꞌtiro peꞌe ʉaꞌa”, nímasĩtisama. 36Yʉꞌʉ sĩꞌose weronojõ nigʉ̃́ mʉsã tiropʉ niꞌi. Yʉꞌʉ mʉsã tiropʉ nirĩ curare yʉꞌʉre ẽjõpeoya. Tojo weerã mʉsã quẽꞌrã sĩꞌorĩ masã weronojõ nirãsaꞌa. Õꞌacʉ̃ yere añurõ masĩrãsaꞌa. Ãpẽrã quẽꞌrãrẽ masĩcã weerãsaꞌa, niwĩ Jesú.
Jesú narẽ tojo níca beꞌro duꞌtiwãꞌcã waꞌawĩ.
Judío masã wiorã Jesure ẽjõpeotise niꞌi
37Jesú peje weeĩꞌomicã, judío masã wiorã cʉ̃rẽ ẽjõpeotiwã. 38Na ẽjõpeoticã, Õꞌacʉ̃ ye queti ojáca pũrĩpʉ Isaía ojaꞌcaronojõta queoro waꞌawʉ.
Cʉ̃ aꞌtiro ojacʉ niwĩ:
Niꞌcʉ̃nojõpʉta ʉ̃sã weresere tʉꞌotimi.
Õꞌacʉ̃ tutuase meꞌrã weeĩꞌocã ĩꞌamirã, ne ẽjõpeotima, ni ojacʉ niwĩ Isaía.
39Na ne ẽjõpeomasĩtiꞌque quẽꞌrãrẽ Isaía aperopʉ Õꞌacʉ̃ ye queti ojáca pũrĩpʉre aꞌtiro ojacʉ niwĩ:
40Õꞌacʉ̃ narẽ caperi bajutirã weronojõ weecʉ niwĩ.
Cʉ̃ yere tʉꞌomasĩticã weecʉ niwĩ.
Tojo weerã añurõ cʉ̃ weesere ĩꞌamirã, ĩꞌamasĩticãrã niwã.
Cʉ̃ buꞌesere tʉꞌomirã, tʉꞌomasĩticãrã niwã.
Cʉ̃ buꞌesere ẽjõpeorã, na ñaꞌarõ weeꞌquere duꞌu, acobojose sẽrĩbopã.
Cʉ̃ narẽ yʉꞌrʉobopĩ, nicʉ niwĩ Isaía.
41Isaía Jesú tutuasere, cʉ̃ asistesere ĩꞌagʉ̃, cʉ̃ ye cjasere tojo ucũcʉ niwĩ.
42Pãjãrã judío masã Jesure ẽjõpeowã. Niꞌcãrẽrã wiorã waropʉta ẽjõpeowã. Fariseo masãrẽ uirã, bajuyoropʉ Jesure ẽjõpeosere ucũtiwã. Ʉ̃sãrẽ judío masã na nerẽrĩ wiꞌipʉ nirãrẽ cõꞌawĩrõrĩ nírã, tojo weewã. 43Wiorã Jesure ẽjõpeomirã, masã peꞌere Õꞌacʉ̃ nemorõ añurõ wãcũcã ʉawã.
Jesú masãrẽ besese cjasere ucũꞌque niꞌi
44Jesú nipeꞌtirã tʉꞌoato nígʉ̃, tutuaro ucũwĩ:
—Yʉꞌʉre ẽjõpeogʉ yʉꞌʉ seꞌsarore ẽjõpeotimi. Yʉꞌʉ pacʉ yʉꞌʉre oꞌóꞌcʉ quẽꞌrãrẽ ẽjõpeomi. 45Yʉꞌʉre ĩꞌagʉ̃, yʉꞌʉre oꞌóꞌcʉ quẽꞌrãrẽ ĩꞌami. 46Yʉꞌʉ sĩꞌose weronojõ niꞌi. Aꞌti nucũcãpʉre yʉꞌʉre ẽjõpeorã naꞌitĩꞌarõpʉ tojaticãꞌto nígʉ̃ aꞌtiwʉ. Na yʉꞌʉ buꞌesere masĩrãsama. Masĩrã, añurõ weerãsama. 47Yʉꞌʉ buꞌesere tʉꞌomirã, tere weetirã, buꞌiri cʉorãsama. Yʉꞌʉ narẽ buꞌiri daꞌresome. Yʉꞌʉ buꞌiri daꞌregʉ aꞌtitiwʉ. Narẽ yʉꞌrʉogʉ aꞌtiwʉ. 48Yʉꞌʉre ʉatirãnojõ, yʉꞌʉ buꞌeꞌquere weetirãnojõ Õꞌacʉ̃rẽ buꞌiri daꞌrenoꞌajãpʉ nitojama. Yʉꞌʉ buꞌeꞌquere weetise buꞌiri na aꞌti ʉmʉco peꞌticã, buꞌiri daꞌrenoꞌrãsama. 49Yʉꞌʉ seꞌsaro yʉꞌʉ ʉaro buꞌeweꞌe. Yʉꞌʉ pacʉ yʉꞌʉre oꞌóꞌcʉ “Tojo ni buꞌeya” nirṍ buꞌeꞌe. 50Yʉꞌʉ masĩꞌi, yʉꞌʉ pacʉ dutisere ẽjõpeorã catinuꞌcũcãꞌrãsama. Tojo weegʉ cʉ̃ buꞌedutiꞌcaronojõta masãrẽ buꞌeꞌe, niwĩ Jesú.
Tällä hetkellä valittuna:
San Juan 12: touC
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2005, Wycliffe Bible Translators, Inc. All rights reserved.
