San Lucas 21
21
Tumi bajon naa nchri gaꞌan nua
(Mr. 12:41-44)
1Ngain niꞌngo icha renthe Jesús bikon kexreen chujni anto chunda tumi tedankaa na̱ tumi ngain thi dingachjian tumii niꞌngo. 2Kai bikon Jesús naa nchri gaꞌan nua bankaa nchra yoo tumi rentheꞌa. 3Ko Jesús ndachro:
—Ndua thi rundathjo ra ixin nchri gaꞌan nua jiꞌi bajon nchra icha tsjé ke kain chujni. 4Ixin kain chujni bajon na̱ thi tumi xeꞌe na̱, aro jeꞌe nchra, maski nua nchra, bajon nchra kainxin tumi jeꞌe nchra bechunda nchra ixin runenxin nchra.
Jesús ndachro ixin ruxanthe niꞌngo icha renthe
(Mt. 24:1-2; Mr. 13:1-2)
5Kanxion chujni bakao Jesús tetjao na̱ ixin niꞌngo icha renthe ko ixin chrjuin xro dikunchjianxin niꞌngo mee, ko icha thi digajon chujni ngain niꞌngo. Kuthimejan Jesús ndachro ngain na̱:
6—Tsii nchaꞌon are kain thi tedikon ra ruxanthe, ko xruꞌin xro sithuꞌe ngataꞌa inaa xro.
Thi tsuꞌen saꞌo kuthimejan ruxanthe nunthe
(Mt. 24:3-28; Mr. 13:3-23)
7Kuthimejan banchiangiꞌi na̱ Jesús ko ndachro na̱:
—Suixin ke tjaago, ¿kensa sikuꞌen jiꞌi? ¿Keꞌe saꞌo ruxraago are jiꞌi usikuꞌen?
8Jesús ndachro:
—Jian tsjeꞌe ra ixin xruꞌin kensen sinthayaꞌa ra, ixin anto tsjé chujni tsii ko rundachro na̱: “Jaꞌan thi Cristo na”, ko kai rundachro na̱: “Uchiaon juii nchaꞌon ndatsjexin nunthe.” Aro jaꞌa ra rueꞌa ra na̱. 9Ko are tsiꞌin ra ixin tethetukaꞌo choo rajna, jaꞌa ra xraonꞌa ra ixin jiꞌi rugunda tsuꞌen saꞌo, aro xra jeꞌa nchaꞌon ixin undatsjexin nunthe.
10Jesús xra ndachro ngain na̱:
—Chujni naa nunthe tsetukaꞌo chujnii inaa nunthe, ko naa xi thetuꞌan tsetukaꞌo inaa xi thetuꞌan. 11Ko kai anto suji tsingi nunthe, seꞌe jintha, ko chin ngain tsjé rajna, ko sikuꞌen tsjé ni naꞌa dikunxin ni nthi̱ꞌa̱ ngajni ko anto sinchexraon ni.
12’Ko xra tsuenꞌa jiꞌi, are chujni rutse ra na̱ jaꞌa ra ko sinthakinga ra na̱. Ko tsjiꞌo ra na̱ ngain niꞌngo ko tsiaxiꞌan ra na̱ ngain nduꞌa xiiso ko tsjiꞌo ra na̱ ngathexin kon ni rey ko xi gobernador ixin jaꞌan. 13Ko are tsuꞌen kain jiꞌi, jaꞌa ra nchao runichja ra ixin jaꞌan. 14Ko are mee, xraxaonꞌa ra kexreen rundachro ra ngain thi tsjiꞌo ra na̱, 15ixin jaꞌan rundathjo ra thi jaꞌa ra satheꞌe ra ko jian juaxraxaon ruchjaꞌa ra. Ko chujni ningakuꞌan ra tsixinꞌa na̱ ngajin ra ko chroꞌa satheꞌe na̱. 16Aro chujni tsjangiꞌa ra, jeꞌo ndudaa ra, xan choo ra, chujnia ra, ko ni jian dakjioꞌo ra. Ko thuꞌa ra nasuenxon ra na̱. 17Ko nguixin nunthe runingakuꞌan ra na̱ ixin dithikaon ni ra jaꞌan. 18Aro taꞌa ra juachjaon xruꞌin tsuꞌan ra ko xruꞌin xrajaa ra sitjaan. 19Ja̱ kainxin nchaꞌon sachrjendeꞌa ra thi ukuiꞌin ra, jañaa rukjan ra inaa chujni narua ko xruꞌin nchaꞌon tsjexin.
20’Are sikon ra rajna Jerusalén digixindajin xi soldado, jaꞌa ra unuꞌa ra ixin uruxanthe. 21Ko are mee thi chujni te Judea satsinga na̱ ngagaꞌa jna. Ko thi ni te ngain rajna Jerusalén satsingaxin na̱ nthi̱ꞌa̱. Ko thi ni sinthe ngataon jngi are mee, irukjanꞌa na̱ ngain rajna. 22Ixin ngain nchaꞌon mee tangi tsuꞌen chujni inchin jitaxin ngain Xruen Ndo Dio. 23¡Anto tangi sathuꞌe kain ni nchrii sintheyaa chjan ngain nchaꞌon mee o nchrii tenchekai chjan! Ixin are mee anto tangi tsuꞌen chujni nguii nunthe, ko icha tangi tsuꞌen rajna Jerusalén. 24Are mee chujni nasuenxon ra na̱ kunixin chia taade ko icha na̱ satsjioꞌo ra na̱ ngain icha nunthe. Ko chujni dithikaonꞌa Ndo Dio sincheꞌe na̱ thi rinao na̱ ngain rajna Jerusalén, ruxethjaja nchaꞌon bayée na̱ juachaxin.
Rukjan tsii thi Xii juixin ngajni
(Mt. 24:29-35, 42-44; Mr. 13:24-37)
25’Kuthimejan sikon ni thi xra naꞌa dikunxin ni tuꞌen ngain nchaꞌon, ngain kunithjao ko ngain kunutse. Ko nthiꞌi ngataꞌa nunthe kainxin chujni ruxraon na̱ ixin suji saxruen ndachaon ko suji rukjamangiathe nda. 26Chujni ndasenda na̱ ixin juaxraon are ruxraxaon na̱ ixin thi sikuꞌen ngain nunthe jiꞌi ixin kainxin thi jii ngajni ruxranga. 27Kuthimejan sikon ni ra jaꞌan, thi Xii juixin ngajni, siꞌi ngakjan naa thjui jidakima kunixin juachaxiin Ndo Dio. 28Ko are tsexiꞌin tsuꞌen kain jiꞌi, jaꞌa ra xro xra sinthechon ra, chaꞌa ra ko tsjeꞌe ra ngajni ixin are mee Ndo Dio tsjengijna ra ndo ko isetanꞌa ra thi tangi mee.
29Jesús kai kuekin naa thi kuꞌen ko ndachro:
—Tsjeꞌe ra ntha higo, o kexeꞌo ntha yua. 30Are uchriꞌin chanchjeꞌen ntha, jaꞌa ra unuꞌa ra ixin ujitunchiaon kunithjaue chrin. 31Ko are sikon ra tsuꞌen kain jiꞌi, jaꞌa ra unuꞌa ra ixin ujitunchiaon nchaꞌon are utsetuꞌan Ndo Dio.
32’Ndua thi rindathjo ra ixin chujni te jai xra sinthechon na̱ are tsuꞌen kain thi ndathjo ra. 33Maski ngajni ko nunthe ndatsjexin, aro kainxin thi jaꞌan ndachrjan tsuꞌen.
34’Tsjeꞌe ra jian ko tanchrjandaꞌa ra tsuncha ansean ra ixin kain thi jianꞌa jii, inchin thi kuan na̱ ko thi ta na̱ juachjaon ixin thi jii ngataꞌa nunthe jiꞌi, ko jañaa sithjaꞌa ra Ndo Dio tencheꞌe ra thi jianꞌa, 35o tsuꞌen xraa naa thi dijekjio ko tse na̱ kuxiigo, jañaa tsii nchaꞌon mee ngain chujni jii nguixin ngataꞌa nunthe. 36Mexinxin jaꞌa ra kain nchaꞌon tsjeꞌe ra jian ko nichjeꞌe ra Ndo Dio ixin xruꞌin tsuꞌan ra ngain thi sikuꞌen, ko jamee nchao tsunchieꞌen ra ngajin na jaꞌan, thi Xii juixin ngajni —jañaa ndachro Jesús.
37Ko nguii nchaꞌon Jesús bakjague chujni ixin Ndo Dio ngain niꞌngo, ko are bakunthie jeꞌe sabakji ixin bagithuꞌe ngagaꞌa thi jnanchjan diꞌin Ntha Olivo. 38Ko kain nchaꞌon anto dakao bagiji chujni ngain niꞌngo ixin bakiꞌin na̱ thi bandachro Jesús.
Tällä hetkellä valittuna:
San Lucas 21: plsNT
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2017, Wycliffe Bible Translators, Inc. All rights reserved.