Yõaannẽ 1
1
Thõõth cĩ rũgẽtõ
1Baa ꞌthianaatta, baa aaĩ Thõõtha. Baa arũmĩ Thõõth#1:1 Thõõth: Baa aũ Yõaannẽ Yeesu Krĩstõ anneek Thõõth. hĩ Nyekuc nẽ baa ĩĩn Thõõth Nyekuc. 2Baa arũmĩ Thõõth hĩ Nyekuc baa ꞌthianaatta.
3Baa ẽhẽnytaa hẽlẽggĩ vẽlẽk Thõõthaa nĩĩcĩ. Má baa hiittiõõ nẽẽ tõõ, aitiõõ baa ꞌgii ꞌcĩ ẽhẽnytaa tõõ. 4Baa aaĩ rũgẽtĩ hĩ ĩnõõnnõ nẽ baa ĩĩn rũgẽtĩ niccia lanyit cĩ eetu. 5Nẽ lanyit cieeni, ĩĩn lanyit ꞌcĩ aara muguratõõ, nẽ hõllõngaa occa adĩĩt muguuri lanyit icci ũdũt.
6Ma ho, ĩꞌthõõa Nyekuci eet ꞌcĩ haĩ Yõaannẽ,#1:6 Yõaannẽ: Ĩĩn Yõaannẽ ciee, Yõaannẽ Batitta, hõllõngaa Yõaannẽ baa ẽhẽẽd ꞌbuuk icci. 7ꞌcĩ baa aku aduhaak eet lanyit nicci, hátĩ helemit eeta vẽlẽk ĩnõõnnõ. 8Baa hõllõngaa ĩĩn Yõaannẽ lanyit, baa ĩĩn nẽẽ eet ꞌcĩ ĩꞌthooyyiaa haaga, hikia huduhaak eet lanyit nicci. 9Lanyit ꞌcĩ ĩĩn dĩdĩ, ꞌcĩ aku aara hĩ eet vẽlẽk ko, aku hĩ eet loota nĩnga.
10Baa aaĩ Thõõth loota nĩnga, tananga baa ẽhẽnyta nẽẽ looc, baa hinnia aitiõõ ẽẽtĩ ꞌcĩ aga ĩnõõnnõ tõõ. 11Baa aku nẽẽ looccaa cĩnnĩ nẽ hõllõngaa ẽlẽmĩ eeta cĩgĩnnĩg ĩnõõnnõ. 12Baa nẽẽꞌthẽk aattĩg eeta ũgẽẽgĩ ꞌcĩg ẽlẽmĩ ĩnõõnnõ nẽ ĩthĩhĩt thõõth cĩnnĩ, nĩngĩtĩ aaꞌnyĩkĩ nẽẽ ĩhõõggõ hiita hĩĩtõ lõhõlĩ cĩg Nyekuci. 13Baa hõllõngaa ĩĩn nẽẽg lõhõlĩ cĩg Nyekuci hĩgõõng arrita eeta lõhõlĩ cĩggĩĩng, baa Nyekuc ꞌcĩ aaꞌnyĩk ĩhõõggõ hittirria hiita hĩĩtõ lõhõlĩ cĩgĩnnĩg ko.
14Ma nĩngaata, ikia Thõõth baa ĩĩn lanyit ĩĩ eet nẽ hũrũmtĩ hĩ ngagĩĩt hõdẽĩ loota nĩnga. Hiita hĩcĩnĩt naag bulẽẽnĩt cĩnnĩ dĩdĩ, bulẽẽnĩt cĩ Ngeertĩ Nyekuc Maaꞌnyĩ ꞌcĩ odoyyii. Aꞌnyahaakeet nẽẽ ngagĩĩt loota nĩnga, bũnnai hĩ thõõth vẽlẽk ꞌcĩ ĩĩn dĩdĩ, ꞌcĩ aku hĩ Nyekuc.#Tigiil ꞌBuuk cĩ Yõaannẽ 1:17
15Baa irrioon Yõaannẽ thõõth cĩnnĩ nẽ ẽggẽrẽny ĩĩ, “Eet baa haduhaakuung naa baa haini, ‘Anũaanna hatĩ eet umwaa ꞌcĩ ĩllõõannaa nganĩĩta, hĩnĩngĩtĩ baa aau nẽẽ ẽlẽk, baa nga hittirria naana.’ ”
16Hĩnĩngĩtĩ makaaꞌthĩt cĩ bũnnai cĩnnĩ, hiita hummuddia naag vẽlẽk ꞌgattan tabattĩ mẽẽlĩg. 17Baa aaꞌnyĩk Nyekuci eet nyattal cĩnnĩ, eetaa ꞌcĩ haĩ Mũũꞌtha,#1:17 Mũũꞌtha: Urutaa cĩ daahĩth cĩ Yothebo, iita ĩĩtõ lohollia cĩg Ĩꞌthĩraẽlĩ appahacaaꞌnya Ijjiba irkiꞌnyia ꞌmiiaꞌnya ꞌwec. Baa adticaniini Nyekuci Mũũꞌtha hõõgaĩ eet cĩg Ĩꞌthĩraẽlĩ appahacẽẽꞌthĩta. Baa aaꞌnyĩk Nyekuci lõhõlĩ cĩg Ĩꞌthĩraẽlĩ nyattal, hĩnĩngĩtĩ Mũũꞌtha. Ĩnõõ ꞌcĩ haĩnnĩ nyattal icci, nyattal cĩ Mũũꞌtha ho. Baa arũgĩ Mũũꞌtha irkiꞌnyia aalib hõdẽĩ hĩ ꞌmiiaꞌnya ꞌwec, baa nga hittirria Yeesu. Tigiil thõõth cĩnnĩ ꞌBuuhaa cĩ Luugithõõ 2-24. nẽ ikia bũnnai hĩ thõõth ꞌcĩ ĩĩn dĩdĩ hĩ Yeesu Krĩstõ.#1:17 Yeesu Krĩstõ: ꞌThaara ꞌcĩg haĩ Yeesu ho, aĩ ẽẽlanneet Nyekuci. ꞌThaara ꞌcĩg haĩ Krĩstõ ho, aĩ ẽbẽra Nyekuci eet hĩĩ habu. 18Nga hĩcĩn eet umwaa Nyekuc, Ngeerĩnĩ ꞌcĩ odoyyii dioo, ꞌcĩ ĩĩn Nyekuc dĩdĩ nẽ õbõhõõ hĩ Maaꞌnyĩ ꞌcĩ etereꞌtheet ngagĩĩt hagaac Nyekuc.
Õthõõth Yõaannẽ Batitta thõõth cĩ Yeesu
(Tigiil Maatteeo 3:1-12; Maarko 1:1-8; ꞌLuuka 3:15-17)
19Baa ĩꞌthõ makayyiooha cĩg ꞌJudeei ꞌJeruꞌthalẽma, paadĩrꞌnya#1:19 Paadĩr: Eetinii cĩg Ĩꞌthĩraẽlĩ, ĩĩn paadĩrĩ eet ꞌcĩ aku habuccieetaa cĩ ꞌLeevi nẽ ĩnõõnnõ ꞌcĩ ĩbbõõr ꞌgaarrieenit halaangatõõ cĩ ꞌCieeth cĩ Nyekuci. hĩ eet cĩg hattũũg cĩ ꞌLeevi,#1:19 Hattũũg cĩ ꞌLeevi: Baa au paadĩrꞌnya cĩg Ĩꞌthĩraẽlĩ vẽlẽk hattũũgaa cĩ ꞌLeevi nẽ baa ĩĩn Arõõnẽ ꞌgõtõnĩ Mũũꞌtha paadĩr ꞌcĩ oou. hõõt hijinit Yõaannẽ hĩĩttĩk, eet ꞌcĩ nganĩ nii. 20Baa hõllõngaa abũrĩ Yõaannẽ ngaatĩ õthõõthõnĩ hĩ ĩhõõggõ, nĩngĩtĩ ẽdẽcĩ ĩhõõggõ annẽẽkĩ, “Hõllõngaa hĩĩnĩ naa Krĩstõ.”
21Nẽ ijinit tarĩ paadĩrꞌnya hĩ eet cĩg hattũũg cĩ ꞌLeevi ĩnõõnnõ ĩĩttĩk, “Eet iina thĩ nii, Eliijja?”#1:21 Eliijja: Baa ĩĩn Eliijja põrõvẽtaac cĩ Nyekuci ꞌcĩ baa õkõõĩ Nyekuci hẽẽtahujjieen rũgẽtẽẽt. Baa arittiaa nẽẽ baa ĩĩn irkiꞌnyia ꞌmiiaꞌnya tũrkũwwec, baa nga hittirria Yeesu. Tigiil thõõth cĩnnĩ ꞌBuuhaa ꞌcĩ ĩĩn 1 Habuẽẽt 17-21; 2 Habuẽẽt 1-3.
Ẽdẽcĩ nẽẽ ĩhõõggõ anneek, “Aitiõõ naa hõllõngaa hĩĩnĩ Eliijja.”
Nĩngĩtĩ ajini nẽẽg Yõaannẽ tarĩ annẽẽkĩ, “Ĩĩnĩ thĩ nii põrõvẽtaac?”#1:21 Põrõvẽtaac: Baa õthõõth eeta põrõvẽtaac baa aduha Mũũꞌtha aĩ, aku hatĩnĩ. Yeesu ꞌcĩ ĩĩn põrõvẽtaac ꞌcĩ hatĩ aku ho. Tigiil ꞌBuuk cĩ Ditoronomi 18:15-18.
Ẽdẽcĩ nẽẽ aĩ, “Aitiõõ tõõ.”
22Ma baa uruta, ijinit nẽẽg ĩnõõnnõ tarĩ ĩĩttĩk, “Nganĩ nii, hátĩ hoottia huduktaaha eet ꞌcĩg ĩꞌthõõanneet ngagĩĩt ko thõõth cunni?”
23Ma ho, attacan Yõaannẽ ĩhõõggõ thõõthaa cĩ põrõvẽtaac Iꞌthaia ĩĩnnĩk, “Hĩĩnĩ naa molook ꞌcĩ ẽggẽrẽny horrwatõõ umwaanĩ ĩcĩ õdõhõhĩĩ kak aĩ, ‘Ũkũmatteek ꞌgõõl cĩ Makayyiookto hũũlan!’ ”#Tigiil ꞌBuuk cĩ Iꞌthaia 40:3
24Baa ĩꞌthooyyi Variꞌtheei#1:24 Variꞌtheei: Ĩĩn Variꞌtheei lothippit cĩ ꞌJudeei ꞌcĩg aꞌthũũnnĩ nyattal cĩ Mũũꞌtha nẽ ẽlẽmĩ thõõth ꞌcĩ arũgnaanĩ daakiaha tarĩ nẽ elemit aajĩlẽẽt hĩ loriẽẽta. Tigiil ꞌBuuk cĩ Dtiicanĩ cĩg ꞌThooyyiahu 23:8. ũgẽẽgĩ hõõt hĩ Yõaannẽ, 25nẽ õõt ijinit ĩnõõnnõ ĩĩttĩk, “Aggameehi nii eet baattithimo#1:25 Baattithimo: Aggam ẽẽtĩ baattithimo, hátĩ hẽtẽrẽtha ngaatĩ ũtũngẽẽhĩ nẽẽ ꞌthẽccanẽẽt cĩgĩnnĩg nẽ ẽlẽm Nyekuc. inni, hatĩ hõllõngaa ĩĩnĩ nii Krĩstõ hode Eliijja hode põrõvẽtaac?”
26Ẽdẽcĩ Yõaannẽ ĩhõõggõ anneek, “Haggameehi naa eet baattithimo maamĩ haaga, nẽẽthĩ, aaĩ eet umwaa hõrggẽẽnaa cunuung, ꞌcĩ hõllõngaa agayyu niiga. 27Tananga baa huwwatta naa ĩĩcĩ oou, hõllõngaa occa hũũlũ ngaatĩ hõõgĩ lõhamũcĩ cĩg caawa cĩgĩnnĩg.” 28Baa aduha Yõaannẽ thõõth icci, baa aggameek nẽẽ eet baattithimo ĩĩcĩ uruto cĩ hidioo cĩ ꞌJõrdanĩ, looccaa cĩ Bẽthani.
Ĩĩn Yeesu mĩꞌnyõõn cĩ Nyekuci
29Ma loohoth cĩnnĩ, udtuuha Yõaannẽ Yeesu ngaatĩ akuuni hĩ ĩnõõnnõ, nĩngĩtĩ õthõõthĩ Yõaannẽ aĩnnĩ, “Ĩcĩnĩt Mĩꞌnyõõn cĩ Nyekuci#1:29 Mĩꞌnyõõn cĩ Nyekuci: Nyattaalaa cĩ Mũũꞌtha, baa aduhaak Nyekuci eet cĩg ꞌJudeei hibboorrik ꞌgaarriẽẽn cĩg mĩꞌnyõ cĩg aꞌthaannu Nyekuc, hátĩ hũtũngtoothĩk ꞌthẽccanẽẽta cĩggĩĩng. Nẽẽthĩ ꞌyioko, ikia ĩĩ Yeesu Mĩꞌnyõõn ꞌcĩ attik ꞌthẽccanẽẽt cĩg eetuk. Tigiil ꞌBuuk cĩ Luugithõõ 12:17-28; Maarko 14:12; ꞌLuuka 22:7; Yõaannẽ 1:29-36; 1 Korinto 5:7; 1 Pẽẽtũrũ 1:19. ꞌcĩ attik ꞌthẽccanẽẽt cĩg eetuk! 30Eet baa haduhaakuung naa hanneekuung, ‘Aku hatĩ eet umwaa ꞌcĩ ꞌrĩĩng ꞌcĩ ĩllõõannaa nganĩĩt, hĩnĩngĩtĩ baa aau nẽẽ ĩĩcĩ oou, baa nga hittirria naana.’ 31Baa nga haga naa ĩnõõnnõ nẽ haggameekuung naa ngagiit baattithimo maamĩ, hátĩ hagaacõ eeta cĩg Ĩꞌthĩraẽlĩ vẽlẽk ĩnõõnnõ.”
32Nĩngĩtĩ aduhaanĩ Yõaannẽ thõõth umwa aĩnnĩ, “Baa hacini Lori ꞌcĩ Ẽllẽẽmĩth,#1:32 Lori ꞌcĩ Ẽllẽẽmĩthĩ: Ĩĩn Lorii ꞌcĩ Ẽllẽẽmĩth Lori cĩ Nyekuci. Aĩ Yeesu, ĩĩn Nyekuci Maaꞌnyĩ, ne ĩĩ nẽẽ Ngeertĩ Nyekuci. Aĩ thõõth ciee, ĩĩn Maaꞌnyia Nyekuc nẽ ĩĩ Ngeerĩnĩ Yeesu Nyekuc. Nẽ ĩĩ Lorii ꞌcĩ Ẽllẽẽmĩth Nyekuc. Nẽ tarĩ ĩĩtõ Maaꞌnyia hĩ Ngeerĩnĩ hĩ Lori ꞌcĩ Ẽllẽẽmĩth vẽlẽk, Nyekuc Hõdẽẽthõng. Tigiil ꞌBuuk cĩ Yõaannẽ 1:1-18; 8:41-42; Dtiicanĩ cĩg ꞌThooyyiahu 5:3-4. ngaatĩ alluuccianĩ hẽẽtahujjieen, ꞌcĩ aaĩ hĩ bõllõõĩ nẽ ikia ĩbĩl ẽllaa cĩnnĩ. 33Occa baa nga haga naa ĩnõõnnõ, hiittiõõ ngaatĩ aduhaaka ẽẽtĩ baa ĩꞌthõõannaa nganĩĩt hikia haggameek eet baattithimo maamĩ anneeka, ‘Ẽẽtĩ ꞌcĩ acini alluucciak Lorii ꞌcĩ Ẽllẽẽmĩth nẽ ikia ĩbĩl ẽllaa cĩnnĩ ho, ĩnõõnnõ ꞌcĩ hatĩ aggameek eet baattithimo Loriiaa ꞌcĩ Ẽllẽẽmĩth ko.’ 34Hĩcĩna ĩnõõnnõ dĩdĩ nẽ hagawa ngaatĩ ĩĩnnĩ nẽẽ Ngeertĩ Nyekuci.”
Ẽbẽra Yeesu nuyyiook cĩgĩnnĩg ꞌcĩg oou
35Ma hĩ loohoth cĩnnĩ tarĩ, iita aauto Yõaannẽ hĩ nuyyiook cĩgĩnnĩg ꞌramma nĩngaata. 36Ma baa adtuuha nẽẽ Yeesu ngaatĩ õvvõõĩ nĩngaata ho, õthõõth nẽẽ ĩĩ, “Ĩcĩnĩt Mĩꞌnyõõn cĩ Nyekuci!” 37Ma baa athĩhĩ nuyyiooha ꞌcĩg ĩĩn ꞌramma thõõth icci ho, iita unuyyiõõthĩ Yeesu.
38Ma baa abbuudi Yeesu ho, adtuuha hinnia nuyyiook ꞌcĩg ĩĩn ꞌramma ho ngaatĩ anũĩ ĩnõõnnõ, nĩngĩtĩ ajini ĩhõõggõ annẽẽkĩ, “Anũyyiaangu inni?”
Ẽdẽcĩ nẽẽg Yeesu anneek, “Rabbi, nĩngĩtĩ aayyi nii ho inoo?” Aĩ thõõth ꞌcĩ aĩ “Rabbi” ho Ebereeiyyi, “ꞌLimmannioohit.”
39Ẽdẽcĩ Yeesu ĩhõõggõ anneek, “Iita ĩcĩnĩt!” Baa ĩĩ ꞌthaa ꞌwec baa iggiingi kõrra ꞌcĩ õõkõrĩ nẽẽg hĩ Yeesu õõ acĩnĩ nĩngĩtĩ aayyi nẽẽ ho. Nĩngĩtĩ arũmẽẽnĩ hĩ ĩnõõnnõ nĩngaata hutub.
40Eetinii ꞌcĩg baag ĩĩn ꞌramma ĩcĩg athĩhĩ thõõth cĩ Yõaannẽ nẽ ookorit hĩ Yeesu ho, ĩnõõnnõ Andrea, ꞌgõtõnĩ ꞌThimõõnẽ Pẽẽtũrũ. 41ꞌGii ꞌcĩ baa adĩman Andrea ĩĩcĩ oou, baa adiimothi nẽẽ ꞌgõtõnĩ ꞌThimõõnẽ nẽ uduhaak ĩnõõnnõ ĩĩnnĩk, “Hummuddiaawa naag habu ꞌcĩ ẽbẽra Nyekuci,#1:41 Habu ꞌcĩ ẽbẽra Nyekuci: Haĩ habu ꞌcĩ ẽbẽra Nyekuci ho Ebereeiyyi Meꞌthia nẽ hĩĩtõ ꞌGiriheeyyi Krĩstõ. ꞌcĩ haĩ ꞌthaar ũgĩ Krĩstõ.” 42Ma nĩngaata, ikia ũũhĩ Andrea ꞌgõtõnĩ Pẽẽtũrũ hĩ Yeesu.
Ma ho, udtuuha Yeesu Pẽẽtũrũ nẽ ĩĩnnĩk, “Ĩĩnĩ nii ꞌThimõõnẽ ngeertĩ Yõaannẽ. Hĩĩtõ hatĩ ꞌthaar cugunnig, ꞌCeeva, nĩngĩtĩ aĩ, Pẽẽtũrũ.”
Ẽbẽra Yeesu Pilippo hĩ Nathaniele
43Ma loohoth cĩnnĩ, ĩtĩnga Yeesu ũũk ĩĩcĩ ꞌGalileea. Ma baa ommottio hĩ Pilippo, uduhaak ĩnõõnnõ ĩĩnnĩk, “Ijjia nũaa nganĩĩta.”
44Baa au Pilippo hĩ Andrea hĩ Pẽẽtũrũ ꞌtaaũnaa cĩ Beꞌthaida. 45Nĩngĩtĩ ammũdaanĩ Pilippo Nathaniele nẽ uduhaak ĩĩnnĩk, “Hummuddiaawa eet baa ẽhẽẽd Mũũꞌtha nyattaala nẽ eteheedito põrõvẽtaaꞌnya buúk ĩĩtõ, Yeesu cĩ Naaꞌtharẽtĩ ngeertĩ Yothebo.”#1:45 Yothebo: Baa ĩĩn Yothebo ciee maac cĩ Maria aattĩ Yeesu. Baa hũnũũk, baa aaĩ Yothebo umwaa ꞌcĩ baa ĩĩn ngeertĩ Yakobo ꞌcĩ baa ammĩnan maaꞌnyia gẽrrẽẽt nẽ utuuyyiõõĩ ꞌgotoonoggia hũũk hĩĩ appahaca eetinii cĩg Ijjibi. Tigiil thõõth cĩnnĩ ꞌBuuhaa cĩ ꞌThianaattõ 30-50.
46Nĩngĩtĩ ajini Nathaniele ĩnõõnnõ annẽẽkĩ, “Occa ꞌthẽk aku ꞌgiimwa ꞌcĩ abũnnaa Naaꞌtharẽta?”
Ẽdẽcĩ Pilippo ĩnõõnnõ anneek, “Ijjia thĩ da cĩnõ.”
47Ma baa acĩn Yeesu Nathaniele aku obokii ho, ikia õthõõth ĩnõõnnõ ĩĩ, “Eet ꞌcĩ ĩĩn Ĩꞌthĩraẽleenit dẽẽdẽ cieeni, ꞌcĩ hõllõngaa ĩĩn oloꞌngiaahit.”
48Ẽdẽcĩ Nathaniele ĩnõõnnõ anneek, “Agayyaa nii nganĩĩt hutuno?”
Ẽdẽcĩ Yeesu anneek, “Hacinnii naa nganiit aa nga hutuvvii Pilippo, iccioloongani ꞌmũũnĩca uruta.”
49Nĩngĩtĩ õthõõthĩ Nathaniele aĩnnĩ, “ꞌLimmannioohit! Ĩĩnĩ nii Ngeertĩ Nyekuci, habu cĩ Ĩꞌthĩraẽlĩ!”
50Ma ho, ĩĩnnĩk Yeesu ĩnõõnnõ, “Elemi nii thõõth caannĩ, hĩnĩngĩtĩ hanneekii, iyyia hacciinnii aa iccioloongani ꞌmũũnĩca uruta. Acini hatĩ nii hẽlẽggĩ ꞌcĩg ĩllõõan thooꞌthiok iccig.” 51Ma nĩngaata, õthõõth Yeesu ĩĩ, “Haduhaakuung dĩdĩ, acinnu hatĩ hẽẽtkujjieen ngaatĩ abbuuhẽnĩ nẽ udtuuktau aajĩlẽẽt cĩg Nyekuci,#1:51 Aajĩlẽẽt: Ĩĩn aajĩlẽẽta loriẽẽt ꞌcĩg arũmĩ hĩ Nyekuc hẽẽtahujjieen nẽ aitiõõ ĩhõõggõ eleeti tõõ. Ĩꞌthõõa Nyekuci ĩhõõggõ waathinnioohĩĩ ũgẽẽgĩ hiita haꞌnyaktaak nyeemuut cĩ Nyekuci eet loota nĩnga. ngaatĩ õtõdĩ nẽ ulluucciak Ngeertĩ Eeto.#1:51 Ngeertĩ Eeto: Avvĩ Yeesu ẽlẽ cĩnnĩ anneek Ngeertĩ Eeto, hĩnĩngĩtĩ ẽtẽrꞌtha nẽẽ aĩ, ĩĩn nẽẽ Krĩstõ nẽ ĩĩ habu cĩ habuccieet ꞌcĩ aalla ũdũt. Tigiil ꞌBuuk cĩ Danieele 7:13-14.”
Tällä hetkellä valittuna:
Yõaannẽ 1: did
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2017, Wycliffe Bible Translators, Inc., All rights reserved.
