Jɔɔn 2
2
Keena haŋfalii kpɛɛlaa wia
1Hɔpizaa anɛɛ n wa bɛrɛɛ, baal bɛl kpa haaŋ Galilii hɛri bol bɛl banna yir Keena. Denii ba yir Yeesu maa, 2di kaa yir Yeesu ni u hiŋra, bá ge gba ba a haŋfalii kpɛɛlaa bɔr. 3Ba ba waa di. Denii ba siŋ waa birgee ka tuŋ. Yeesu maa ba u be di wa ŋɔ, “Ba siŋ tunnɔɔ.”
4Yeesu ŋɔ, “N ma, giliŋ. Saŋa la min niŋ hum n huma haa waa helle.”
5U maa bir ŋɔ a dia balaa be, “Di Yeesu wa ŋɔ ií ɛɛ wiimaa, ií ɛɛu.”
6Golaa anumbɛllɛ faa du de. Ba ɔɔ ɛɛ nii di du a maa biine, dikuu ba naana wii bɛl wia, nɛ́ra wer di ra sanzi sanzaa bɛl dee mɔɔ ka ra di. A golaa bɛl maa ɔɔ weruu lɛɛ nii aŋkɔrɔŋ keza.
7Yeesu ŋɔ balaa la be, “Ií ɛɛ nii su golaa naa.” Ba ɛɛ nii di su a maa.
8Denii u ŋɔ ba be, “Ií ɛɛ a nii aŋhina di wa tɛɛ ii haŋfalii koori naa.”
Ba ɛɛ a nii tɛu, 9di a jaa birgi siŋ, u kpa nyɔɔ. U ge waa zum bɔr la siŋ la n liwɛɛ. Dia la balaa la n ɛɛ nii la bɛnnɛ zum bɔr la a siŋ n liwɛɛ. 10Awia, u yir haŋfalii jaari la, di ŋɔ, “Saŋa maa, nɛra ɔɔ feluu kpa sinsuma ra ba, nɛ́ra nyɔɔ di piŋ mɔɔ, ka bá jaa kpa sinsɛba tɔ har di haa ra ba, bá nyɔɔ. Ka hiŋwaa gil asuma du de, ka yaa nyɔɔ asɛba tuŋ.”
11Yeesu lugli wizenne la. Keena n du Galilii hɛri labuu u du, ka ɛɛ guŋ di bagli u fɔŋŋazeŋ la. U hiŋra na di yarduu.
12Denii u izi, u ni u maa, u niuna ani u hiŋra la maa la Kapɛniɔm, di ga du de hɔpizaa anɛɛ.#Mat 4:13
Yeesu n la Kɔraawiizi Dia wia
(Mat 21:12-13; Maak 11:15-17; Luuk 19:45-46)
13Ka Jus hina hɔpizizenaa la banna di ba Gillikaali diwee la n waa dugli, Yeesu kaa izi di la Jɛrusalɛm, 14di ga zuu Kɔraawiizi Dia diŋŋizeŋ la biini, di nɛra su de maa di ra yoo ba kuna. Baŋhina kpogli nauna, baŋhina kpogli peeza, baŋhina ge kpogli kommazi di ra yoo. Kebichɛtta ge gba kpa ba teebulzi di ba wa so de.
15Yeesu ga nyiŋŋi kurhɔna di kpaa mil dɔŋa alugɔ bulaali, ka ba di wa duŋŋi a nayoora ni peyoora la ni ba kuna la maa lii diŋŋee la biini, di lɔ kebichɛtta ge teebulzi ni ba kebee la maa yaari, 16ka ŋɔ tɛɛ banla n na yoo kommazi la, dí ba kpa ba kuna lii de. Dí ba gilɛɛ kpa u Mɛɛ Dia la birgi yawa! 17U hiŋra la liizi gunla baŋ faa sɛbɛɛ Kɔraawiizi Hɔŋ biini la, “Kɔraawiizi Dia wiarɛ aah n siwii werge maa.”#Yira 69:9
18Denii Jus hina ba wa pɛɛzi Yeesu, “Bɛɛ wideere í wer ɛɛ di bagli yaa, yá zum lugɔ i dɔɔ fɔŋŋaa í wer di ra ɛɛ wia naanɛi?”
19Yeesu ŋɔ, “Ií lau Kɔraawiizi Dia naa purgi, ka hɔpizaa ahoro biini, ń ge lalluu ú kaa chi.”#Mat 26:60-61; Maak 14:58
20A Jus hina ŋɔ, “Aa! Binni tokkoanɛɛ ni anumbɛl biinii ba hum Kɔraawiizi Dia naa huma, ka jaa mau tuŋ. Ka híŋwaa wer lalluu hɔpizaa ahoro biiniaa?” 21Ka Yeesu n faa ŋɔ Kɔraawiizi Dia wia gunla, u himmaa bɔrahɔŋ wiarɛ u faa ra ŋɔ la. 22Uŋ jaa wa izi siu biini la, u hiŋra jaa liizi u wiŋɔzi hiŋ, di yardi Kɔraawiizi Hɔŋ ni u wiŋɔzi la.
23Yeesu n faa du Jɛrusalɛm ba Hɔpizizenaa la biini, nɛkpila na wizenaa la uŋ faa ra ɛɛ la, di yarduu lugɔ waabuu Kristo. 24Ama, Yeesu waa sɛɛwɛ bá kpau birgi ba nabɔma ú ni baa du, dikuubɛɛwiai, u zum nɛra maanii nɛnnɛ. 25A waa ɛɛwɛ lugɔ ba daŋ kaa wer bagluu nɛr maa wia. U himmaa teŋ zum ba biine maanii.
Tällä hetkellä valittuna:
Jɔɔn 2: vag
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2017, Copyright Ghana Institute of Linguistics, Literacy and Bible Translation in co-operation with Wycliffe Bible Translators, Inc.
