Jɔɔn 5
5
Yeesu n chaa baal bɛl Bɛtzata wia
1Annii tuna, Jus hina hɔpizizeŋ bɛl wa hel. Yeesu izi di bir la Jɛrusalɛm. 2Pol bɛl faa du Jɛrusalɛm, ba ra yiruu Bɛtzata, u dugli Peeza Dominuuzeŋ. Ba faa ma sognibɔra anue lugɔ jaŋgalli, a pol nua. 3Wiila hina kpilakpila maa ɔɔ chɔɔ a biine. Nyuŋŋaa, gbɛraa, banla nonee ni ba naazi n siuzɛɛ, ba maanii ɔɔ ra chɔɔgi de. 4Yeesu ba a pol. 5Baal bɛl ge du a wiila hina biini. U wiiwɔɔ binni tokko ni fidiŋmantannaazi. 6Yeesu nau un chɔɔ de, di zum lugɔ u wiiwɔɔ birgi. Awia, u la u be di ga pɛɛzuu, “I ra nyiŋŋi í nyaagia?”
7Wiila hiŋ la ŋɔ, “Ɛɛh. Ka nii la n ɔɔ waa birgi gunla, maa ɔɔ na nɛr ú kpaŋ du u biini, ń nyaagi. Di u wa izoo ra birgi, anna nyiŋŋi lugɔ ń zuu u biini, ka bɛl ɔɔ feliŋ zuu.”
8Denii Yeesu ŋɔ u be, “Izi kpa i kalaŋ di ra la.” 9Yeesu n haŋ wa ŋɔ guŋ tuŋ, di baal la nyaagɔɔ, di izi kpa u kalaŋ di ra la.
Ba Heezaa Hɔpiziirɛ faa. 10Unna la, Jus hina baŋhina ga ŋɔ u be, “Yaa Heezaa Hɔpiziirɛ keŋ. Ka i kpa i kalaŋ chi. Yaa kiire i ra chɔgi la.”
11A baal ŋɔ, “Nɛr la n chaaŋ la, waabuu ŋɔ ń kpa n kalaŋ chi di ra la.”
12Ba pɛɛzuu, “Anɛɛ n ŋɔ dí i kpa i kalaŋ chi di ra lanɛi?”
13Baal la waa zum nɛr la n chaau la. Yeesu n chaau tuŋ la, u bir kaali, dikuu nɛkpila n faa du a pol wia, a baal waa kaa wer ú zumuu.
14Aŋ wa ɛɛ tama, Yeesu wa huuzuu Kɔraawiizi Dia, di ŋɔ u be, “Haa nawɛɛa? I nyaagɔɔrɛ. Awia, gilɛɛ kaa ra ɛɛ wichɔgaa. Di i kaa wa ɛɛ wichɔgaa, i daŋ kaa di tɔɔrɔɔ kaali gunla hiŋ faa diu la.” 15A baal jaa la Jus hina la be di ga ŋɔ, “Yeesuu chaaŋ la.”
16Yeesu n ɔɔ ra ɛɛ guŋ ba Heezaa Hɔpizii la wiarɛ a Jus hina ɔɔ ra tɔɔruu. 17Yeesu kaa ŋɔ ba be, “N Mɛɛ ra hum u humaa saŋa maa. N ge gba ra hum guŋ.” 18Denii Jus hina jaa ra nyiŋŋi werge maa lugɔ bá kpuu. Uŋ ɔɔ ra chɔgi ba Heezaa Hɔpizii la, ka ɔɔ ra yir Kɔraawiizi u mɛɛ lugɔ u nuu ɛɛ kpannɛ la, awiarɛ ba ra nyiŋŋi bá kpuu la.
Kɔraawiizi Biibaal fɔŋŋa wia
19Yeesu ŋɔ, “Ií gil n ŋɔ wibii maa tɛɛ ia. Kɔraawiizi Biibaal wàá wer ɛɛ wiimaa u hiŋ ni. Wia la u Mɛɛ n ɔɔ ra ɛɛ u ra na la, aabuu u ge ɔɔ ra ɛɛ, 20dikuubɛɛwiai, Kɔraawiizi nɔŋŋi u Biibaallɛ, di ɔɔ ra bagluu wia la maa u himmaa n ɔɔ ra ɛɛ. U daŋ haa bagluu wia la n ɛɛ wizenaa kaali annii gba, á tir ia. 21Gunla Kɔraawiizi n na lalli lalaa, bá kaa dɔɔ miibɔɔ la, guŋ himmaanii ú Biibaal gba lalli banla maa unna nyiŋŋi ú lalli, bá dɔɔ miibɔɔ.#Ɛzɛk 37:10 22Kɔraawiizi himmaa wàá di nɛr maa seriya. U gillɔɔ u Biibaal ɛɛ seriya diiri, ú wer di nɛr maa seriya. 23U ɛɛ gunnɛ, nɛ́r maa ra kpa u Biibaal girme gunla baŋ ɔɔ ra kpa u ge girme la. Nɛr la n waa u Biibaal la ra kpa girme, waa Kɔraawiizi ge gba a kpa girme.
24Ií gil n kaa ŋɔ wibii maa tɛɛ ia. Nɛr la maa n nuu n wiŋɔzi, di yardi n Mɛɛ la n humiŋ la, waabuu dɔɔ miibɔɔ la n waa tunaa dɔɔwɛ la. Màá ka di a hiŋ seriya ú chol. U teŋ bɛri siu ninɛɛ di dɔɔ miibɔɔ. 25Ií gil n ŋɔ wibii maa tɛɛ ia. Saŋa bɛl daŋ wa hel, a saŋa jaa heluu gba, lalaa nuu Kɔraawiizi Biibaal loobii. Banla maa n niŋ nuuu, daŋ na miibɔɔ. 26Kɔraawiizi dɔɔ miibɔɔrɛ, di gil u Biibaal gba dɔɔ miibɔɔ, 27di kaa ɛɛ nɛr maa seriya diiri, dikuubɛɛwiai, u ɛɛ Newee Biibaallɛ.
28U guŋ tir iabuuwaa? Saŋa bɛl jaa ra dugluu. Banla maa n siuzɛɛ la daŋ nuu Mìŋ́ Newee Biibaal loobii, 29di izi siu biini. Banla n ɛɛ winanaa daŋ izi di dɔɔ Kɔraawiizi miibɔɔ. Banla n ɛɛ wichɔgaa ge gba daŋ izi, ka Kɔraawiizi Biibaal di baa seriya, bá chol.#Dan 12:2
Yeesu wia daansɛɛzi
30N himmaa waa fɔŋŋa dɔɔwɛ ń wer di a seriyazi. Gunla Kɔraawiizi n bagliŋ la, gunnɛ n na dia la. A ɔɔ deŋluu nɛnnɛ, dikuubɛɛwiai, n himmaa kipar lɛi n na di a seriyazi. Kɔraawiizi la n humiŋ la kiparuu n na di a seriyazi. 31Di n ɛɛ n himmaa daansɛɛ hinnɛ, ii daŋ ŋɔ karaa n na kanni. 32Ka nɛbɛl du denii di ɛɛ n daansɛɛ hiŋ. A hinnɛ Jɔɔn. U daansɛɛ hiŋ ɛɛ wibiire, n zum.
33Ii himmaa faa hum nɛraa u be, u bagli ia wibii. 34Miŋwaa waa newee be ra binni, ú ɛɛ n daansɛɛ hiŋ. Ka ii wiarɛ n ŋɔ gunla ií wer sɛɛ, Kɔ́raawiizi lɛɛ ia. 35Jɔɔn la faa ɛɛwɔɔ lugɔ fintina la baŋ ɔɔ choŋŋi u ra chaani la. U bɔchaaŋ la wia zuu iabuu suma, ii ɔɔ chaali u be tama, di nuu ra tɛu.
36Ka n daansɛɛ bɛl du de, di du kpeg kaali Jɔɔn hor naa uŋ ɛɛŋ naa gba. N wiɛɛlaa la miŋ ɔɔ ra ɛɛ la, aabuu ra di n daansɛɛ. N Mɛɛrɛ ŋɔ dí n ɛɛ a wiɛɛlaa, n ɛɛa. Aabuu ra bagli lugɔ n Mɛɛ Kɔraawiizii humiŋ. 37N Mɛɛ la gba ɔɔ ra di n daansɛɛrɛ. Ii haa wɔɔ nawɛɛ. Ii haa waa u loobii nuuwɛ maa. 38U wiŋɔzi gba waa hoo ii bampiree, dikuubɛɛwiai, ii waa sɛɛwɛ tɛɛ unla uŋ hummɛ ii be la. 39Ii gba tamɔɔrɛ lugɔ di ii zum Kɔraawiizi Hɔŋ la ga tuŋ, ii daŋ na miibɔɔ la n waa tunaa dɔɔwɛ la. Awia, ií pigzuu di ra na. U gba ra bagli n wiarɛ. 40Ka ii wàá sɛɛ ba n be di wa na miibɔɔ la.
41Maa sɔnna nyiŋŋi newea be. 42N zum iabuu. Ii bampiree waa Kɔraawiizi lauwɛ. 43N Mɛɛ Kɔraawiizi sɔnnɛ n kpa ba, ii vɛɛŋ. Ka di baal la maa izoo di ba ii be ni u himmaa sɔŋ, ka ii ɔɔ nuuu tɛu. 44Ii ɔɔ ra nyiŋŋi sɔnnɛ dɔŋa be. Ka a waa ia titte iin niŋ wer na sɔŋ Kɔraawiiziwaa be. Iin du kennaa, ii daŋ wer yardimbuu naa?
45Ii gilɛɛ ra binni lugɔ mìŋ́ niŋ pɛɛzi ia nua Kɔraawiizi be. Miŋ lɛi. Moosis la iiŋ ɔɔ dɔɔ u tamii la, waabuu niŋ pɛɛzi ia nua Kɔraawiizi be. 46Di ii faa yardi Moosis, ii daŋ vii yardiŋ, dikuubɛɛwiai, u sɛbi n wiarɛ u hɔŋ biini. 47Ka di ii waa sɛɛwɛ yardi gunla Moosis n sɛbɛɛ la, ɛrɛɛ ii ɛɛ yardinnɛi?”
Tällä hetkellä valittuna:
Jɔɔn 5: vag
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2017, Copyright Ghana Institute of Linguistics, Literacy and Bible Translation in co-operation with Wycliffe Bible Translators, Inc.
