Luke 18
18
Kaa tipaachimaakanuut kaa peyakut iskweu kaye Mmaak wiyaaskunichesuu
1Jesus chii wiihtamuweu uchischinuhamuwaakan uyuu chischinuhamaacheu tipaachimuwiniyuu chechii uhchi chischeyihtamiyich muush chechii ayimihaayich, kaye ekaa chechii saskachiyich. 2Chii iteu, “Chii ihtaau wiyaaskunichesuu ihtaawinihch ekaa uhchi nanihchiishtuwaat Chishemanituu kaye ekaa uhchi aapateyimaat iinuuh. 3Anit maak an ihtaawin chii ihtaau e peyakut iskweu. Muush maak chii nituwaapameu aniyuu wiyaaskunichesuu e itaat, ‘Chinitutamaatin chechii wiichihiyin kuiskw chechii ishi wiyaaskunaakanuut an kaa pechi wanituutaut.’ 4Chineush maak an wiyaaskunichesuu namui uhchi wii naatamuweu aniyuu iskweu. Ekw chek kaa ishi maamituneyihtahk, ‘Namui nanihchiishtuwaau Chishemanituu kaye namui nitaapateyimaauch iinuuch. 5Uu maak kaa peyakut iskweu shaash nisaskachihiikw kaa ishpish muush pechi mukushkaachihiit, e nituweyihtahk chechii wiichihiik. Nitawaach kiipaa puut nika wiichihaau, ekaa etituu chechii saskachihiit.’ ” 6Ekw Utipeyihchikeu uyeyuu miin kaa itwet, “Kanawaapahtamukw maa. Chek chii wiichiheu an machiwiyaaskunichesuu aniyuu kaa peyakuyich iskweu, wesh namui uhchi puunihiikuu e nitutamaakut chechii wiichihaat. 7Namui aa maak etituu Chishemanituu suuhk kata wiichiheu aniyuu utiiniim kanawaach kaa ayimihaayich e chiishikaayich kaye e tipiskaayich e nitutamaakut chechii naatamuwaat. Taapaa kata uhchi pwaashtawiyuu chechii naatamuwaat. 8Chiwiihtamaatinaawaau, cheshtinaateyihtaakuniyuu wiipach che naatamuwaat. Ekw maak, Iinuu Ukusisa kata miskaweu kaakaye aweyuuh e taapweyimikut iskutak miin takushinite utah aschiihch.”
Pharisee ekw maak an naapeu maauch kaa machaatisiit kaa iteyimikut iinuuh
9Jesus miin kaa ishi wiihtamuwaat uyuu chischinuhamaacheu tipaachimuwiniyuu aniyuuh kaa maamishiitutaasuyich nikuiskutaatisiinaan e iteyimisuyich mikw maak kaa macheyimaayich kutak aweyuu. Eukw uyuuh Jesus kaa itaat, 10“Peyakwaau niishu naapeuch chii piihcheuch chisheayimiheukamikuhch chechii nituu ayimihaatwaau. Pharisee an peyakw. Ekw an kutak kaa maamuushtinahk chisheuchimaau shuuliyaayuu chii itaapatisuu. Uchii uyuu kaa itaapatisitwaau eukunich maauch kaa machaatisiitwaau chii iteyimikuuch aweyuu. 11Ekw an Pharisee chii peyakukaapuu e ishi ayimihaat, ‘Chishemanituu, chinanaaskumitin ekaa ishinaakusiyaan kutakach e ishinaakusitwaau awenichii kaye ekaa mistamaauchihtamaasuyaan shuuliyaau kaye ekaa nitamukw ihtuutuukwaau awenichii kaye ekaa pisikwaatisiyaan. Chinanaaskumitin ekaa ishinaakusiyaan taan e ishinaakusit anaah kaa maamuushtinahk chisheuchimaau shuuliyaayuu kaa itaapatisit. 12Niya maak eshikum tuushteu, niishu chiishikaau namui nimiichisun kaye nipachishtinichen peyakwaapishch eshikum mitaahtwaapisch e ayaayaan.’ Eukw uyuu kaa ishi ayimihaat wiya an Pharisee. 13Ekw maak an naapeu kaa maamuushtinahk chisheuchimaau shuuliyaayuu kaa itaapatisit, iskutak e ayimihaat waahyuusiis anit chii uhchikaapuu taanit kaa niipuyich aniyuu Pharisee namui kaye mechim uhchi tastasaapuu kihchikiishikuhch wesh chii kushikuteheu. Chii itweu, ‘Chishemanituu pechi chistimaacheyim e machituutamaan. Ekw Jesus miin kaa ati itwet iskutak kaa chiishi tipaachimut.’ 14Chiwiihtamaatinaawaau maak, uu naapeu chii chiiweu taapwe e kuiskunaakusit Chishemanituu e kanawaapamikut. Namui wii an Pharisee. An awen mistahii kaa iteyimisut kata tipihteyihtaakuhiikuu Chishemanituu ekw an kaa tipihteyimitisut awen eukw che chisteyihtaakuhaakanuut.”
Jesus kaa petawaakanuut awaasha
Matthew 19.13-15; Mark 10.13-16
15Chii petaweuch maak awenichii Jesus kaa apishiishiitwaau utawaashiimuwaau, e chii nituweyimaatwaau chechii saaminaayich. Ekw anichii chischinuhamuwaakanich iskutak wiyaapamaatwaau uyuu e ihtiyich chii chistahamuweuch. 16Jesus chii wiishaameu awaasha e itwet, “Pachishtinaahkuch awaashach chechii pechi naasitwaau, ekaawii uhchi chistahamuwaahkuch, wesh uyuu kaa iteyihtaakusitwaau awenich Chishemanituu uchisheuchimaawiniihch ishi tipeyihtaakusuuch. 17Taapwe chiwiihtamaatinaawaau, mwehch e ishi taapwehtahk awaash taan e ishi wiihtamuwaakanuut eukun kaye chiyawaau chipaa ishi taapwehtenaawaau taan e ishi wiihtamaakuyekw Chishemanituu chisheuchimaawin ekw maak chechii piihcheyekw anite.”
Kaa miisitisiit naapeu
Matthew 19.16-30; Mark 10.17-31
18Ekw peyakwaau Jewa iinuuch uchimaamuwaauh chii ishi kakwechimeu aniyuu Jesus, “Chiskutamaachesuu, kaa miyuhtwaayin taan che ihtiyaan chechii uhchi ayaayaan kaachiche pimaatisiiwin.” 19Jesus maak chii iteu, “Chekwaan wehchi ishinihkaasiyin kaa miyuhtwaat. Namui awen ihtaau tekash chechii miyuhtwaat, mikw Chishemanituu. 20Chichischeyihten uyuuh kacheskwewinh,
Ekaawii nipahii awen, ekaawii piikun wiichihtuwin, ekaawii chimuth, ekaawii nitamukw ishi ataameyim awen, chisteyim kuuhtaawii kaye chikaawii.”
21Ekw an naapeu kaa itwet, “Kaa pechi awaashiyuuyaan shaash nichii nanihiihten uyuuh kacheskwewinh.” 22Iskutak maak Jesus piyehtawaat uyuu e itweyich chii iteu, “Eshkw maak peyakw chekwaan miin nituweyihtaakun chechii ihtuutaman. Ataawe misiwe taan e ishi ayaayin, ekw an shuuliyaau kaa chistimaatisiitwaau che miitwaau. Ekw maak che ayaayin miisitisiiwin kihchikiishikuhch kaa ihtakuhch. Chii ihtuutamane maak uu ekw maak che pechi nuushuushkuwiyin.” 23Iskutak maak piyehtahk an naapeu uyeyuu, naashch taapwe chii macheyihtam wesh naashch taapwe chii miisitisiyuu.
24Iskutak maak Jesus wiyaapahtamuwaat taan e ishpish macheyihtamuunaakusiyich chii iteu, “Nuwach aayiman awen e miisitisiit chechii piihchet Chishemanituu uchisheuchimaawiniihch. 25Etituu aayimaniyuu awen kaa miisitisiit chechii piihchet Chishemanituu uchisheuchimaawiniihch ishpishaat an awesiis kaa mista piskwaakunet chechii shaapushkahk shaapunikaniyuu anite pekuneyaapiskaayich.” 26Anichii maak iinuuch kaa pehtawaatwaau Jesus, chii kakwechimeuch, “Awen maak ekw chechii pimaachihut.” 27Jesus maak chii iteu, “Taan aniyuuh ekaa chii ihtuutahk iinuu kata chii ihtuutam wiya Chishemanituu.”
28Ekw Peter kaa itwet, “Kanawaapahta maa. Shaash misiwe nichii nakatenaan niichinaanh chechii nuushuushkaataahch.” 29“Ehe, taapwe,” chii iteu Jesus, “Misiwe awen kaa nakatahk wiichi kaye kaa nakataat wiichiskweu kaye wiichishaan kaye uniichihiikw kaye utawaashiim, Chishemanituu uchisheuchimaawiniyuu uhchi chika cheshtinaateyihtenaawaau, 30etituu che miyaakanuut ishpishaat aniyuu kaa ishi nakatahk anuhchiish mekwaach e pimaatisiit, kaye kaachiche pimaatisiiwiniyuu che ayaat anite niishtamihch.”
Jesus kaa aayimuutahk taan che ishi nipit
Matthew 20.17-19; Mark 10.32-34
31Ekw Jesus kaa chistuhtahaat aniyuu kaa niishushaapuyich uchischinuhamuwaakan taanite pahkaan chechii ihtaawaakupanenich, ekw kaa itaat, “Jerusalemihch chika ituhtenaanuu. ekute anite misiwe che tipipayihch an kaa ishi aayimaakanuut che ispayit Iinuu Ukusisa aniyuu taan kaa ishi masinahamuwaakupanenich aniyehkaanaanich uchischiwehiichesuuch. 32Chika pachishtinamuwaakanuuch anichii iinuuch ekaa Jewa kaa itiskaanesitwaau, chechii maayeyimaatwaau kaye chechii wiyaahuwaachetwaau nitamukw e ishi chiishuwaataatwaau kaye chechii shihkwaataatwaau. 33Kaye chechii pishishtehwaatwaau, kaye che nipahaatwaau. Mikw maak chii nishtuchiishikaayiche miin kaau chika wanishkaau.” 34Chischinuhamuwaakanich maak namui waach peyakw uhchii nisituhtamuch aniyuu taan kaa ishi ayimitutamiyich.
Naapeu ekaa kaa waapahtahk Jerichohch kaa uhchiit
Matthew 20.29-34; Mark 10.46-52
35Iskutak maak e ati peshuwaapahtahkwaau aniyuu ihtaawiniyuu Jericho kaa ishinihkaateyich naapeu ekaa waapahtahk anite yaaiskanuu chii apuu e nitutamaat shuuliyaayuu. 36Iskutak maak piyehtawaat e pimimiyaashkaakut mihchetu aweyuu chii kakwechimeu taan e ihtinaanuyich. 37“Jesus, Nazareth kaa uhchiit mekwaach pimuhteu,” chii itaakanuu. 38Ekw kaa tepwet e itwet, “Jesus, David kaa ukusiitutaask, pechi chistimaacheyim.” 39Anichii maak iinuuch kaa niikaanihtetwaau chii chistahamuweuch e itaatwaau, “Ekaa maa chistuh.” Aahch maak etituu suuhk chii tepweu e itwet, “David weukusiitutaask, pechi chistimaacheyim.” 40Jesus chii chipihchikaapuu kaa itashuwet chechii petawaakanuut aniyuu ekaa kaa waapahtamiyich naapeu. Iskutak maak an naapeu ekaa kaa waapahtahk e ati peshuwaapamaat Jesus, chii kakwechimikuu, 41“Taan e ishi nituweyihtaman chechii ihtuutamaataan.” An naapeu chii iteu, “Utipeyihchikeu, ihtuutuuh chechii waapahtamaan.” 42Jesus maak chii iteu, “Waapahtah, chitaapwehtamuwin chimiinuwaachihiikuun.” 43Tiiwehch maak mitun chii waapahtam, kaa ati nuushuushkuwaat Jesus e maamihchimaat Chishemanituu. Iskutak maak misiwe awen wiyaapahtahk uyuu e ispayiyich, kaye wiyawaau chii maamihchimeuch Chishemanituu.
Tällä hetkellä valittuna:
Luke 18: crjrNT
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Southern East Cree - Roman script New Testament © Wycliffe Bible Translators, Inc. and Canadian Bible Society, 2001.
This work is licensed under the Creative Commons Attribution-NonCommercial-NoDerivatives 4.0 International License. To view a copy of this license, visit http://creativecommons.org/licenses/by-nc-nd/4.0/ or send a letter to Creative Commons, PO Box 1866, Mountain View, CA 94042, USA.