Jouŋ 19
19
Pi chaʼa Jishɔ mfɛ ŋa pi kwīŋ vi ŋkuoŋ wáʼa
1Nnɛ Pailɛ lɔ̄gɔ Jishɔ ŋgwie vi ni ŋgwàŋ. 2Pa shoogɛ paʼa ndiʼi minduandua nɔ ŋkie, nūʼɔŋ thɔ yu, māʼaŋ pɨ̀rɨ mbɨŋ yu. 3Pugu thɔ njəɨ vi, nchhu nu ŋa, “Pigi ghɨnɔ ghɔ ma fùoŋ pa Juu!” Ndɔ ŋgwie vi ni mbhɔ yugu.
4Pailɛ pɨnɨ ntaoŋ mbhi ŋkamuʼɔŋ nchhu ni pugu ŋa, “Njəɨ, ǹtaoŋ nu ni ju mbhi mfɛ ni pəɨ nnɛ ŋa pəɨ ji ŋa ǹdɔ njiʼi njəɨ sheshe fàŋ ŋa a chwīe.” 5Nɛnnɛ Jishɔ taoŋ mbhi ni ŋkie minduandua thɔ yu ni pɨ̀rɨ mbɨŋ yu. Pailɛ chhu ni pugu ŋa, “Pəɨ līi njəɨ, ŋoŋ ghɔ pɔ nɛiŋ!”
6Pa thishɨ ghaŋ fɛʼiŋgiɛŋ pugu pa ghaŋ kɛ̄ʼi Nda Minnwi ni ŋga njəɨ vi, mbaʼo ŋgòu ni njɨ ŋa, “Kwīŋ vi ŋkuoŋ wáʼa, kwīŋ vi ŋkuoŋ wáʼa!”
Pailɛ chhu ni pugu ŋa, “Pəɨ lɔ̄gɔ vi ni noŋ yəɨ ŋkwiŋ vi ŋkuoŋ wáʼa nthɛ ŋa ǹdɔ njiʼi njəɨ sheshe nnu ŋa a fāaŋ.”
7Pa ŋgwa Juu khwɛ̄ ghɔ ŋa, “Pigi fāʼo gɨ́, ŋkwaŋ haʼaŋ gɨ́ ghɔ chhu nɛ, a nōoŋ ŋa a fāʼo nɔ khu nu nthɛ ŋa a nūʼɔŋ noŋ yi ŋa a Muuŋ Minnwi.”
8Pailɛ ni ŋga njaʼo yei nnu, mbɨnɨ ŋkaa pɔgɔ pɔgɔ mbīgi. 9Mbɨnɨ nii moŋ ntuʼɔ mbie Jishɔ ŋa, “Ɔ llɔ pi hɨŋ?” Ndɔ paʼa Jishɔ lɔ ŋkhwɛ̄. 10Nnɛ Pailɛ chhu ghɔ ŋa, “Ɔ lɔ ntāʼa nu nchrā vəɨ, ɔ lɔ nji ŋa m̀fāʼo ghrɨ́ nɔ chuʼɔ nu ghɔ, mfāʼo ghrɨ́ nɔ kwīŋ nu ghɔ ŋkuoŋ wáʼa?”
11Jishɔ khwɛ̄ ghɔ ŋa, “Ɔ fāʼo ghrɨ́ mbɨŋ mu ŋguʼɔ nthɛ pi ŋa a fɛ Minnwi vɛ. Nthɛ yie ghɔ, ŋoŋ yɛ ŋa a chaʼa a mfɛ vɛ nɛ fāʼo ju mmɛ phɨ.”
12Jɛ̄ ndɨɨ ghɔ, Pailɛ taʼa pa shɛndaoŋ nɔ chuʼɔ nu vi. Ndɔ pa Juu paʼo ŋgòu ŋa, “Ɔ̈ nchuʼɔ vi, kaŋ ɔ lɔ mbɔ taannu Kaisha. Shesheŋoŋ ŋa a nūʼɔŋ noŋ yi ŋa a fùoŋ nɛ tɨnɨ pi thɔ ni Kaisha.”
13Nnɛ ndɨɨ ŋa Pailɛ ni njaʼo yei chrà nɛ, a lɔ̄gɔ Jishɔ ntaoŋ nɔ mbhi, nchɔchhɔ ŋkuoŋ faaŋ sháʼa yi nɔ lɨʼɨ ŋa pi mɛ̄iŋ ni lɨʼɨ nūʼɔŋ ni ŋgùʼɔ nɛ (mbɔ moŋ chrà Hibru ŋa Gabata). 14A ni mbɔ llɛ́ pīri nu noŋ nɔ jɨ nu Lli Njiʼa. A ni mbɔ moŋ ntuŋ minaoŋ. Pailɛ chhu ni pa Juu ŋa, “Pəɨ līi njəɨ, fùoŋ vəɨ pɔ nɛiŋ!”
15Pugu paʼo ŋgòu ni njɨ ŋa, “Jwi vi jwi, kwīŋ vi ŋkuoŋ wáʼa!”
Pailɛ pie vugu ŋa, “Ŋ̀kwīŋ fùoŋ vəɨ ŋkuoŋ wáʼa?”
Pa thishɨ ghaŋ fɛʼiŋgiɛŋ khwɛ̄ ŋa, “Pigi lɔ njiʼi mfāʼo yichəɨ fùoŋ ŋkiɛŋ Kaisha.”
16Nnɛ, a chaʼa vi mfɛ ni pugu ŋa pi kwīŋ vi ŋkuoŋ wáʼa.
Pi kwīŋ Jishɔ ŋkuoŋ wáʼa
(Matio 27:32-44; Maaku 15:21-32; Luka 23:26-43)
Nnɛ pugu lɔ̄gɔ Jishɔ, 17a taoŋ mbhi ntiɛŋ wáʼa yi ŋgə̄ɨ nu nɔ lɨʼɨ ŋa pi mɛ̄iŋ ŋa Lɨʼɨ Kwéi Thɔ, ŋa pi mɛ̄iŋ moŋ chrà Hibru ŋa Gogota nɛ. 18Pugu kwīŋ vi fɔ ŋkuoŋ wáʼa pugu pa pichəɨ paa ŋgwa, taʼa yi nɔ sheshe ŋgei mbhɔ yi, Jishɔ pɔ titri pugu. 19Pailɛ nāʼaŋ yaoŋ ŋkwiŋ ŋkuoŋ wáʼa yi. Yaoŋ ghɔ ni mbɔ ŋa, “Jishɔ lɔ Nasharɛ, mbɔ Fùoŋ pa Juu.” 20Ntou pa ŋgwa Juu ni mɛ̄iŋ yaoŋ yei, nthɛ ŋa lɨʼɨ ŋa pi ni ŋkwīŋ Jishɔ nɛ ni mbara moŋ laʼa ndɔ pi ni nāʼaŋ moŋ chrà Hibru ni chrà Latiŋ ni chrà Gri.
21Nnɛ pa thishɨ ghaŋ fɛʼiŋgiɛŋ pa Juu chhu ni Pailɛ ŋa, “Kiʼi nāʼaŋ ŋa, ‘Fùoŋ pa Juu,’ ka nāʼaŋ pi ŋa, ‘Ŋoŋ vei ni nchhu ŋa, A mmu mbɔ Fùoŋ pa Juu.’ ”
22Pailɛ khwɛ̄ ŋa, “Yaoŋ ŋa ŋ̀kwo nāʼaŋ nɛ, ŋ̀kwo nāʼaŋ.”
23Pa shoogɛ ni ŋga ŋkwīŋ Jishɔ ŋkuoŋ wáʼa, ndɔ̄gɔ mmɛ ndhwí fɨgəɨ yi nshāa a taoŋ khwɛ lɨʼɨ, sheshe taʼa shoogɛ fāʼo taʼa pra yi. Mbɨnɨ ndɔ̄gɔ ndhwí ŋa a ni māʼaŋ moŋ ghɔ nɛ, paʼa lɨʼɨ yōu lɔ mbɔ ŋkuoŋ ghɔ, pi ni ntuŋ a pɔ pi taʼa pra yi llɔ thɔ ghɔ nshwiʼi fɛ nɔ laʼo yi. 24Nɛnnɛ pugu chhu ni noŋ pugu ŋa, “Kiʼi pia shāa, pia ka māʼaŋ pi yaoŋ nɔ yəɨ nu ŋa a shi mbɔ yi gɔ̌?” Yei ni mbɔ nɔ chwīe nu Ŋwaʼaŋlɨ Minnwi lɔ̄gɔ lɨʼɨ ŋa a chhu ŋa, “Pugu ni ŋgrā mmɛ ndhwí fɨgəɨ a shɨna pugu, māʼaŋ yaoŋ shhɛ nɔ jɨ nu muuŋ ndhwí a,” nnɛ pa shoogɛ pighɔ chwīe nnu pei.
25Ndɔ mǔuŋ Jishɔ pugu ndǐŋ mǔuŋ vi, ni Meri ŋgwɛ Klopa, Meri Madaliŋ ni nthi fɔ yəɨ wáʼa Jishɔ. 26Jishɔ ni ŋga njəɨ mǔuŋ vi, pugu ŋgaŋ younjiŋ yi yɛ ŋa ju Jishɔ ni ŋkhwā vi nɛ thi fɔ. A chhu ni mǔuŋ vi ŋa, “Ma, līi njəɨ, a muuŋ ghɔ!” 27Nnɛ nchhu ni ŋgaŋ younjiŋ yi ghɔ ŋa, “A mǔuŋ ghɔ.” Jɛ̄ ndɨɨ ghɔ ŋgaŋ younjiŋ yi ghɔ lɔ̄gɔ vi ŋgə̄ɨ nɔ nda yu.
Gu Jishɔ
(Matio 27:45-56; Maaku 15:33-41; Luka 23:44-49)
28Jishɔ ni nji ndwɛ ŋa ŋguoŋ nnu kwo mmɛ, nchhu ŋa (nɔ chwīe nu chrà Minnwi pɔ nnu shini), “Njùʼɔ a yaoŋ.” 29Mikei làʼo chəchɨgəɨ ni nthi fɔ, nnɛ pugu lɔ̄gɔ kusha nchru moŋ làʼo ghɔ, nshhɔ̄ thɔ muuŋ thɨ ŋa pi mɛ̄iŋ ni haisho nɛ, ŋkə̄rə nūʼɔŋ nɔ nchò yi. 30Jishɔ gha nnu làʼo chəchɨgəɨ ghɔ, nchhu ŋa, “A mmɛ nɛ!” Ntuʼu thɔ yi shhɛ Jijwɛ yi taoŋ.
Pi chwɛ̄ʼi mbru Jishɔ
31Nthɛ ŋa a ni mbɔ Llɛ́ pīri nu noŋ nɛ, nɔ yəɨ nu ŋa khu yugu lɔ ŋkɨna ŋkuoŋ wáʼa llɛ́ Ji (mbɔ ŋkiɛŋ mmɛ Llɛ́ Ji nthɛ ŋa a ni mbɔ Llɛ́ jɨ Lli Njiʼa) nɛ, pa Juu pie Pailɛ ŋa pi pəʼɨ kwò muŋu, nshwiʼi khu yugu ŋkuoŋ wáʼa. 32Nnɛ pa shoogɛ thɔ mbəʼɨ kwò fǔoŋ yi pugu vichəɨ ŋa pi ni ŋkwīŋ vugu pugu nɛ. 33Pugu ni ŋga nchəɨŋ mbɨŋ Jishɔ, njəɨ ŋa a kwo khu, paʼa ndɔ nuʼuŋ mbəʼɨ kwò yi. 34Ndɔ taʼa ŋoŋ shɨna pa shoogɛ pighɔ chwɛ̄ʼi mbru yi ni khwǎ, chhǐ pugu pa ŋkhǐ taoŋ wuʼɔ ndɨɨ ghɔ. 35Ŋoŋ ŋa a ni njəɨ nnu yei lɔ̄gɔ lɨʼɨ nɛ ni nchrā nthɛ nnu ghɔ, nnɛ ŋa pəɨ ŋkaa pəɨ nthɛ pəɨ piŋ. Nnu ŋa a ni nchhu nɛ nnu shini, a ji ŋa a chrā pi nnu shini. 36Pa nnu pei ni ndɔ̄gɔ lɨʼɨ ŋa chrà Minnwi pɔ yi nnu shini ŋa: “Mbaʼa pi yiʼi mbəʼɨ kaŋ taʼa kwéi yi.” 37Yichəɨ lɨʼɨ moŋ Ŋwaʼaŋlɨ Minnwi pɨnɨ nchhu ŋa, “Pugu shi ndīi ŋoŋ ŋa pugu chwɛ̄ʼi nɛ.”
Pi twei Jishɔ
(Matio 27:57-61; Maaku 15:42-47; Luka 23:50-56)
38Pa nnu pei ni ŋga ntɔgɔ, Joshɛ llɔ Arimatia, ŋa a ni mbɔ taʼa ŋgaŋ younjiŋ Jishɔ moŋ njiŋ nthɛ ŋa a ni mbɔgɔ pa Juu nɛ, luoŋ ni Pailɛ ŋa a lɔ̄gɔ khu Jishɔ. Pailɛ piŋ ŋa a lɔ̄gɔ. Nnɛ a thɔ ndɔ̄gɔ khu Jishɔ ŋgə̄ɨ nɔ ghɔ. 39Nikodemu ŋkaa yu, ŋa a ni ŋkwo fǔoŋ nthɔ njəɨ Jishɔ ni tuʼu nɛ, thɔ ni laminda ŋa pi nyaŋ ni yichəɨ yaoŋ ŋa pi mɛ̄iŋ ni məə pugu aloe nɛ, a pou yaoŋ mbɔ ghrà kilu. 40Nnɛ pugu lɔ̄gɔ khu Jishɔ, ndiŋ moŋ mbhɔ ndhwí fhu ni laminda ghɔ nɔ haʼaŋ nùʼɔŋ pa Juu pɔ nɛ. 41Yichəɨ nyìeŋ ni mbɔ moŋ lɨʼɨ ŋa pi ni ŋkwīŋ Jishɔ fɔ ŋkuoŋ wáʼa nɛ, chəɨ fúŋ fhi ŋa pi fīʼi moŋ ŋguʼɔ ni mbɔ fɔ, ŋa pi lɔ naa ma ntwei ŋoŋ fɔ. 42Nnɛ nthɛ nnu Pīri nu noŋ pa Juu, ndɔ mbɨnɨ mbɔ ŋa fúŋ ghɔ ni mbɔ fɔ nɛ, pugu twei vi fɔ.
Tällä hetkellä valittuna:
Jouŋ 19: bmo
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2019 Wycliffe Bible Translators, Inc.
