Mak 3
3
Yesu Hamaringia Lipu Tela Mana Xaidap Yaguangam
(Matyu 12:9-14; Luk 6:6-11)
1Bunging tela, Yesu luxu Yudadi sabungading numania saing lipu tela wa la ba, rimanoa mati saing toatuana. 2Baing duwasa mana Yesu xai bu dibagu nabu bagula hamaringia lipua mana Xaidap Yaguangam kimbo tegu, namua na dibo ba dita haruangia. 3Baing harua na lipua rimanoa mati ba, “Umesa uli lipudi maxadingia.”
4Saking harua nadi ba, “Baru kubolunta naxu mana hanaunaunga mana Xaidap Yaguangam: Talibu xai kimbo talibu doa, tahauli kimbo taung?” Ne ding dimumguti mua.
5Baing Yesu atin disala, bagu mauli manadi. Hatuminganoa mauxana namua na hatumingading diriba ding, saing harua na lipua ba, “Uraria rimama.” Raria, saing rimanoa sok xai dup. 6Baing Parisidi disok sangua, dila digugunia rangua Herot bakbagindi bu dahangixaya bu disai daxanga tela bu dung Yesu mati.
Buranga Disu Mana Yesu
(Matyu 12:15-16; Luk 6:17-19)
7Yesu gabu lipuxindi dinaxu mana diyunga longga ba mala lang gamolingania saing buranga sabanga Galiliamdi disu mana. 8Bungina dilungu axadi Yesu libudi, lipudi dima rangua mana titia Yudia, long sabangga Yerusalem, titia Idumea, titiadi duwa Langga Yodan hataina xaung titiadi duwa mauli mana long sabanggadi Taya, Saidon. 9Baing bungina bagu buranga baguba, bala lipuxindi dinaxu mana ba daxauxau xai wagang tela bu haing mana, nam lipudi dibura mana. 10Bila balau namua na hamaringia busingam xumana. Binabu lipu busingamdi dahayuyu ma haxek haxek ba diring. 11Baing bungina xaungadi#3:11 Grik xuana—aningoningo sigixinga teguam. dibagu, xungdi mari maxania saing daxaba ba, “Ung Urana Garanoa!” 12Ne Yesu bilidi haringina ba dinaxuya mana ina gaxarea.
Yesu Mogu 12 Aposel
(Matyu 10:2-4; Luk 6:14-16)
13Yesu haing mala xaxagania, baing wagi ma rangua gaxarea muruna manadi, saing dima rangua. 14Mogu lup 12 uxudi ba aposeldi#3:14 aposel namuxina ba lipu soxingam. sanga mana duwa rangua xaung sanga mana soxidi mala bu dibaxanga 15xaung haringiadi bu disuka xaungadi. 16Lipua 12 ba mogudi bing:
Saimon (sina yaya Pita na),
17Yems kixinginoa Yon (Sebedi garandi, ne sina yaya Boanerges na dingtang, namuxinoa bing Kaxap Garandi),
18Andru,
Pilip,
Bartolomyu,
Matyu,
Tomas,
Yems (Alpias garanoa),
Tadias,
Saimon (duxu ba Selat, namua na bakbagindi dibo ba disuka Romdi mala),
19Yudas Iskariot (ina ta Yesu bixuandi rimadingia).
Yesu Xaung Belsabul
(Matyu 12:25-29; Luk 11:17-22)
20Yesu goxoya mala saing luxu mana numa tela. Baing lipu xumana digugunia muli, sanga mana Yesu gabu lipudi dinaxu mana sanga ba daxang te. 21Ne bungina Yesu bakbagina dilungu bila ba, dila ba daxap ma sanguadi, namua na daharua ba, “Ina kakahana ba.”
22Baing lipu hanaunaunga tubatubainganamdi diri Yerusalem ma daharua ba, “Belsabul#3:22 Belsabul Satan yan tela. wa mana! Suka xaungadi mala mana yanamidinga haringinganoa.”
23Baing Yesu wagidi dima rangua saing harua babu nadi ba, “Satan sanga ba suka ing sibuna baru? 24Nabu yongga tela dutu ding, bing bagula disup. 25Nabu numa tela dutu ding, bing bagula disup. 26Baing ina naga, nabu Satan haunggana ing sibuna saing utuina, bing sanga ba li te, ne subinganoa ma ba. 27Ne lipu tela sanga ba luxu lipu haringingam numania bila Satan numanoa saing hanai xalingindi olang te. Tegu. Muga bing goxigoxi to. Tauna, hanai numania. 28Maxung sibuna ngabalang ba, kubolu diang longgalo lipudi dilibudi, xauna haruanga diang longgalo daharungiadi mana Urana, ina sanga ba yungadi. 29Ning lipu gaxarea daharungia Urana Aningonoa, bing bagula yunga kuboluding dianoa te. Bagula wa ranguadi bungingbunginalo.”
30Harua bila ba namua na daharua ba xaunga#3:30 Grik xuana—aningoningo sigixinga teguam. wa mana.
Gaxarea Yesu Bauna Xaung Kixingindi?
(Matyu 12:46-50; Luk 8:19-21)
31Baing Yesu bauna gabu kixingindi disok. Dili mua sabasabia saing disoxi lipu tela maluxu bu wagi ma. 32Baing lipu buranga dirung taxiya, saing dibala ba, “Baum gabu kixingimdi duwa sabasabia, disai maung.”
33Baing haxuya ba, “Gaxarea baugu? Gaxarea kixingigudi?”
34Baing bagu mauli mana lipuadi dirung taxiya saing harua ba, “Adi bagudi li bila baugu xaung kixingigudi! 35Lipu gaxarea dilibu Urana murunganoa bing kixingigua, hamungagua xaung baugu.”
Tällä hetkellä valittuna:
Mak 3: met
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2018, Wycliffe Bible Translators, Inc. All rights reserved.