Hechos 2
2
Espíritu Santu shamushqan
1 Pentecostés fiesta junaqmi Jesucristuman yärakuqkuna juk wayicho juntakashqa kaykarqan. 2Tsaycho karkaykaptinmi elaqpita shukukuy wayranöraq fiyupa qaparashqan ciëlupita mayakämurqan. 3Tsaynölami qallu tamäñu nina niraqkuna jukninman jukninman chayarqan. 4Lapanmi Espíritu Santupa munayninwan imaypis mana parlashqan idiömakunata parlayta qalaykärirqan.
5Tsay witsanmi Dios munashqanno kawaq Israel runakuna maytsay nacionpitapis Jerusaléncho kaykarqan. 6Shukukuy wayrano qaparashqanta mayashpanmi ima pasashqantapis rikaq aywapäkurqan. Jukninpis jukninpis markancho parlashqan idiömata parlarkaykaqta mayarmi mantsakashqa rikakärirqan. 7Tsaymi kayno nipäkurqan: <<Kay parlaykaqkunaqa ¿manaku Galilea runakuna karkaykan? 8Noqantsipa idiömantsita parlananpaqqa ¿imanöpataq yachakushqa? 9Kaychöqa maytsaypitami karkaykantsi: Partiapita, Mediapita, Elampita, Mesopotamiapita, Judeapita, Capadociapita, Pontupita, Asiapita, 10Frigiapita, Panfiliapita, Egiptupita, Libiacho kaq Cirenipa nawpankunapita y Romapitami. 11Wakinnintsiqa yurishqantsipita patsami Israel runakuna kaykantsi. Y wakinnintsinami Israel runana kanantsipaq Tayta Diosta chaskikushqantsi. Cretapitapis, Arabiapitapis kaychömi kaykantsi. Maytsaypita karpis kikintsipa idiömantsichömi mayaykantsi Tayta Dios kushikuypaq rurashqankunata>>.
12Tsawraqa espantashqa rikakur kikinpura parlapäkurqan kayno nir: <<¿Imataq pasaykan?>>
13Wakinnami asipashpan kayno nipäkurqan: <<Kay runakunaqa shinkashqami karkaykan>>.
Pedro wilakushqan
14Tsayno parlapäkuptinmi apóstol mayinkunawan ichirkur Pedro kayno nirqan: <<Jerusaléncho y maytsaychöpis taq Israel runakuna, shumaq mayapäkamay. 15Manami qamkuna yarpashqaykinötsu shinkashqa karkaykä. Tuta las nuëvilaraqqa manami pipis shinkantsu. 16Kanan rikarkaykashqayki pasananpaqmi profëta Joel wilakurqan kayno nir:
17<< <Tayta Dios kaynömi nin:
Ultimu tiempuchömi Espïritüta kachamushaq lapan runakunaman.
Tsaymi olqu tsurikikuna y warmi tsurikikunapis wilakuynïta wilakärinqa.
Mözukunapis revelaciontami rikapäkunqa.
Awkinkunatapis sueñuyninchömi musyatsishaq.
18Tsay junaqkunami olqumanpis y warmimanpis sirvimaqnïkunaman Espïritüta kachamuptï wilakuynïta wilakärinqa.
19Jana patsachöpis y kay patsachöpis rikakätsimushaq imaypis mana rikashqaykikunatami.
Yawartapis, ninatapis y qoshtaytapis rikapäkunkipaqmi.
20Intipis tsakakäkunqami.
Killapis yawarmanmi tikranqa.
Tsaykuna kanqa juzganä junaq manaraq chayamuptinmi.
Tsay junaqqa mantsariypaqmi kanqa.
21Tsayno kaptinpis noqata manakamaq kaqtaqa pïmaytapis salvashaqmi>.#Joel 2.28-32.
22<<Israel runakuna, shumaq mayapäkamay. Musyapäkushqaykinöpis Nazaretpita kaq Jesústami Tayta Dios yanaparqan mana rikashqantsi milagrukunata noqantsi kaqcho rurananpaq. 23Tsayno kaykaptinpis qamkunaqa Jesústa prësu tsarirkur Diosta mana cäsukuq runakunapa makinman churapäkushqanki crucificananpaq.#Luc. 23.33; Juan 19.18. Tsayno kananpaq kashqantaqa unaypita patsami Tayta Dios nirqan.#Luc. 24.26. 24Wanutsiptinpis pamparashqalancho ushakänanta mana munarmi Tayta Dios kawaritsimushqa.#Mat. 28.5-6; Mar. 16.6; Luc. 24.5.
25<<Davidpis Jesucristupita kaynömi qelqarqan:
<< <Tayta Diostami imay hörapis yarparaykä.
Alawqa kaq nawpächo karmi imaypis yanapaykäman.
26Tsaymi shonqüpis pasaypa kushikun.
Shimïpis paytami alaban.
Payman yärakurmi imaypis jawka kawaykä.
27Wanushkuna pamparashqanchöqa manami kachaykamankipaqtsu.
Santu sirviqniki kaptïmi sepultüracho ayä ismunantapis mana munankipaqtsu.
28Munashqaykino kawanäpaqmi ali nänipa pushaykämanki.
Nawpaykichöqa imaypis kushishqalami kawaykä>.#Sal. 16.8-11.
29<<Wawqikuna, musyantsimi David wanushqanta. Maycho pamparaykashqantapis musyantsimi. 30Profëta karmi David musyarqan aylunpita [Cristo] yurinanpaq kashqanta. Tsaynöpis musyarqan payno rey kananpaq Tayta Dios jurar promitishqantami.#2Sam. 7.12-13; Sal. 132.11. 31Tsaymi kikinpaq qelqananpa trukan tsay yuriq runapaq David qelqarqan. Payqa salvamaqnintsi Cristumi kaykan. Cristo kawarimushqanta rikaykaqnömi David qelqarqan pamparashqancho Tayta Dios mana kacharinanpaq kashqanta y cuerpun mana ismunanpaq kashqantapis.
32<<Kananqa David qelqashqannölami Jesústa Tayta Dios kawaritsimushqa. Kawarimushqantaqa lapanïmi rikapäkushqä. 33Paytami Tayta Dios alawqa kaq nawpanman jamaykatsir promitishqan Espíritu Santuta entregashqa. Jesucristunami Espíritu Santuta noqakunaman kachamushqa. Kanan tsaytami mayarkaykanki y rikarkaykanki.
34<<Davidqa manami kawarimushqatsu ni jana patsaman aywashqatsu. Tsaymi kikinpita qelqananpa trukan jukpita qelqar kayno nirqan: <Mandamaqnïtami Tayta Dios kayno nirqan: <<Alawqa kaq nawpäman jamakamuy 35lapan chikishuqnikikunata munaynikiman churanäyaq>> >.#Sal. 110.1.
36<<Israel runakuna, nishqäta shumaq tantiyakäriy. Qamkuna cruzcho wanutsishqa kaptikipis Tayta Diosmi Jesústa churashqa Señornintsi y salvamaqnintsi Cristo kananpaq>>.
37Tsayta mayaykurmi runakuna fiyupa lakikärishpan Pedruta y wakin apostolkunatapis tapupäkurqan kayno nir: <<Wawqikuna, ¿imatataq rurapäküman?>>
38Tsawraqa Pedro kayno nirqan: <<Tayta Dios perdonashunaykipaq jutsa rurayta kacharir Jesucristupa jutincho bautizakäriy. Tsaynöpami Tayta Dios qarashushqayki#2.38 Wakin runakunaqa regalashushqayki nipäkun. Espíritu Santuta chaskikärinkipaq. 39Tayta Diosnintsi promitishqan Espíritu Santuqa qamkunapaq, tsurikikunapaq y maytsaycho taptinpis lapan qayashqan runakunapaqmi kaykan>>.
40Tsayno nirmi Pedro mastapis tantiyatsir kayno nirqan: <<¡Jutsasapa runakunano castigashqa kanaykipaq kashqanpita salvakäriy!>>
41Pedro nishqanta chaskikuqkuna kimsa waranqanömi (3,000) karqan. Bautizakushpanmi Jesucristuman yärakuqkunaman yapakärirqan. 42Paykunami imaypis juntakaq apostolkuna yachatsishqankunata yachakärinanpaq, shakyätsinakunanpaq, Santa Cënata upupäkunanpaq y Tayta Diosta manakärinanpaq.
Yärakuqkuna yanapanakur kawashqan
43 Apostolkuna milagrukunata rurashqanta rikarmi lapan yärakuqkuna espantashqa rikakärirqan. 44Imaypis juntakashpanmi imaykankunatapis rakipänakur yanapanakäriq.#Hech. 4.32-35. 45Tsaynölami chakrankunata y imaykankunatapis rantikuykur nistashqanman tupu tsay qellayta aypunakäriq. 46Waran waranmi templu patiuman juntakaq. Tsaynölami wayinkunacho juntakashpan tantata pakipänakur kushishqa mikupäkuq. Mayqanpis manami jaqayätsinakäriqtsu. 47Paykunaqa imaypis Tayta Diostami alabapäkuq. Lapan runakunami paykunata respitapäkuq. Wakintapis Señornintsi salvaptinmi waran waran atskayarqan.
Tällä hetkellä valittuna:
Hechos 2: qvmB
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2003, Wycliffe Bible Translators, Inc. All rights reserved.