Matie 24
24
Yezo apa lo ti kota da Nzapa mɛ azi na karangɔ lupu lupu
(Mar. 13.1-2; Luk. 21.5-6)
1Ngoi mɛ Yezo ĩ lo ka ya kota da Nzapa ĩ si ko, ava lo anɔ ka tɔ̃nda lo, afa lo na se mɛ awa na kota da Nzapa ni. 2La Yezo apa hɛ̃ la ya: “I hũ aye ko zu. Mbi pa hɛ̃ ĩ ti bɛta tɛnɛ ya, mbanga lá kɔi gbanda ko, azi akara gbanda ni zu asa tise, ko ta le tɛ́nɛ kɔi angbã gbanda na ndo fɔ̃ lo ma.”
Asiɔ lo niɛ na singɔ uzu ti sese wɛngɔ
(Mar. 13.3-13; Luk. 21.7-19)
3Yezo ama ka ndo hɔtɔ ti Olivie, adu tise. La bo ava lo anɔ ka tɔ̃nda lo, ahũnda lo ya: “Pa hɛ̃ e, da Nzapa ni akara gbanda lá wa? Lo mɛ gbanda afa ngoi ti gangɔ tɛ mɔ, afa nga ya, ngoi ti sese wɛngɔ alengbi wɛ nɛ?”
4Yezo agbinya hɛ̃ la ya: “Ale ĩ du na kpengba lɛ, so azi ahanda ĩ. 5Ta sanga ma, azi gba aga gbanda na ili mbi, ko zo kɔi kɔi na popo tɛ la apa gbanda ya, ni Mɛsia. Ko ala handa gbanda azi gba. 6Ngoi mɛ gbanda ĩ ma pa ti to mɛ azi ndotiri so tɔ̃nda ĩ, bere pa ti to mɛ azi ndotiri ka yɔngɔrɔ ndo ko, ta ĩ du na mbɛtɔ ma. Ale alo ni ko asi, kanda ta nda sese awɛ gbanda bo na ngoi ni ko ma. 7Azi ti mbanga kɔdɔrɔ na afɔ̃ la ti kɔdɔrɔ mɛ ndɛ̃ atiri gbanda to, ambanga agbia abi gbanda to tɛrɛ afɔ̃ la. Gwɛ̃ aya nga gbanda, sese ayingi gbanda na ndo ndɛ̃ ndɛ̃ ndɛ̃. 8Alo ni ko zu adu gbanda nga ma se pɛnɔ ti gwa mɛ ndotɛ wali uzu ti lo dúngɔ nyi.
9“Ko azi aka gbanda ĩ ya, ahɛ̃ ĩ pɛnɔ, aho nga ĩ. Bɛ azi ti sese zu akɛ̃ gbanda ĩ ka ka ka na lo tɛ mbi. 10Na ngoi ko gbanda ko, azi gba azia gbanda yengɔ lo tɛ Nzapa, aɔ na ló na ili afɔ̃ la, akɛ̃ngbi ka ka ka. 11Awa pangɔ nyɔ Nzapa gba mɛ awa nvɛnɛ aga gbanda, ahanda nga azi gba. 12Azi ali gbanda siɔ ye sĩ, na lo ni ko, ta azi gba ati ayengbi gbanda ma. 13Kanda zo ko la agbe bɛ lo na ya pɛnɔ ngbĩi, akpi da ko, Nzapa aso tɔrɔ tɛrɛ lo. 14Apa gbanda Nzɔ̃ Pa ti lo Lɛngɔ Gbia tɛ Nzapa na lɛ sese zu ya, azi zu ama tɛnɛ ni uzu, wadila sese awɛ.”
Siɔ ye mɛ ndosa mbɛtɔ bɛ zo
(Mar. 13.14-23; Luk. 21.20-24)
15Yezo apa ya: “Ĩ hũ gbanda ye mɛ andoili ya: ‘Siɔ ye mɛ ndosa mbɛtɔ bɛ zo.’ Adu ye mɛ ndo Daniɛlɛ wa pangɔ nyɔ Nzapa apa tɛnɛ ni. Akpã gbanda ni na ndo mɛ santo. (Ale wa dingɔ tɛnɛ olo, ahĩnga nda ló ni ko nzɔ̃ni!) 16Na ngoi ni ko, azi mɛ ka sese ti Yudea akpɛlɛ gbanda agwe ka ndo ahɔtɔ. 17Na lá ko gbanda ko, ta zo alo gbanda ka gegi ali ya da ya, ni lɔ aye, ni kpɛ na ni ma. 18Se tɛ zo mɛ nga gbanda ka yaka la, ta lo lo gbanda ka yaka, lo diri ka ya da so ntungɔ kota bɔngɔ tɛ lo ma. 19Awe mɛ ata ngɔ, na awe mɛ ndoã aya la, ahũ gbanda pɛnɔ sĩ na ngoi ni ko! 20Ale ĩ vɔrɔ Nzapa ya, ngoi ko gbanda ĩ kpɛlɛ ko, ta adu na ngoi ti de, bere na lá ti wɔngɔ tɛrɛ ma! 21Ta sanga ma, na ngoi ko gbanda ko, pɛnɔ ni adu gbanda kpengbani, aɔ apɛnɔ zu mɛ azi ahũ. Ko ato na lá mɛ ndo Nzapa ali na sese, ngbĩi asi na lá olo ko, ta gi tɛrɛ pɛnɔ ni ko ade asi ma. Ta azi ati ahũ nga gbanda gi tɛrɛ apɛnɔ ni ko fani mɛ ndɛ̃ ma. 22Se ta adu ya, Nzapa adiri na bi ti pɛnɔ ni angbã nduruni ma ko, ale ta zo kɔi alengbi ti ngbãngɔ lɛ lo ngɛ̃ ma. Kanda lo diri ndo na bi ni angbã yakere na lo tɛ azi mɛ ndo lo sara la lo kpã ya, ala du azi tɛ ni.
23“Se mbanga zo aga gbanda so handangɔ ĩ ya, ĩ ba Mɛsia lo ge, bere lo pa ya, ĩ ba lo la kai ko, ta ĩ ye ma. 24Ta sanga ma, awa hangɔ lo tɛ Nzapa na nvɛnɛ aga gbanda, ko zo kɔi kɔi apa gbanda ya, ni Mɛsia, bere ni wa pangɔ nyɔ Nzapa. Ala li gbanda akota akukuna ye, na aye ti kpɛnɛ ya, se alengbi ko, ani handa azi mɛ Nzapa asara la akpã ya, ala du azi tɛ ni. 25Ĩ ma la! Mbi pia mbi pa ló ni hɛ̃ ĩ uzu.
26“Ko se apa hɛ̃ ĩ ya, ĩ ba lo ka bɛ ndo ko, ta ĩ nɔ kai ma. Bere se apa hɛ̃ ĩ ya, ĩ ba lo lo, bere lo lo ge ko, ta ĩ ye ma. 27Ko nga ma se ko la bekpa ndotaima nzɛrrr ka lɛ ndozu, alo ka tɔ agwe ka do ko, se nre nga gbanda mbi Nyi Zo mbi ga na ni la. 28Ndo ko gbanda kinda ase da ko, ndo mɛ nga gbanda angwalo abombi tɛrɛ la da la.”
Gangɔ tɛ Nyi Zo
(Mar. 13.24-27; Luk. 21.25-28)
29Yezo apa ya: “Gbanda hiɔ na pɛ pɛnɔ ti ngoi ni ko, ta lá ati asũ gbanda ma, ta nzɛ̃ ati asũ nga gbanda ma. Atongolo alo gbanda ka lɛ ndozu, asa ge tise, aye ti nguru mɛ ka lɛ ndozu ayingi gbanda. 30Ko aye mɛ ndofa lo tɛ mbi Nyi Zo asi gbanda ka lɛ ndozu. Aale ti lɛ sese zu adema gbanda tɛrɛ la, ala hũ gbanda mbi Nyi Zo, na gangɔ na ya da baba na nguru, nga na kota ndima. 31Kota mbana avũ gbanda, ko mbi to gbanda aangelo tɛ mbi na lɛ sese zu ya, ato ka li sese asi ka nda ni gbɔ ko, ala bombi azi tɛ mbi mɛ mbi sara la mbi kpã.”
Nda niatɔ ti kɛkɛ mɛ ili ni la figie
(Mar. 13.28-31; Luk. 21.29-33)
32Yezo apa ya: “Ĩ ma tɛnɛ mɛ mbi na tɛnɛngɔ na ndo kɛkɛ figie, ko ale ĩ hĩnga ni lo mɛ: ngoi mɛ angbina kugbe ni adara tise, ko afana kugbe ato nda tɔ̃ngɔ ko, ĩ ndohĩnga ya, zongo adoli ti singɔ. 33Se gangɔ tɛ mbi nga la. Ngoi mɛ gbanda ĩ hũ aye ko zu mɛ mbi pa lo ni hɛ̃ ĩ ato nda singɔ ko, ale ĩ hĩnga ya, mbi doli ti gangɔ. Mbi lo na tɔ̃ nyɔ ngise. 34Mbi pa hɛ̃ ĩ ti bɛta tɛnɛ ya, azi ko la ade lɛ la ngɛ̃ na olo ko, ta ala zu akpili gbanda uzu, wa aye ni ko zu asi ma. 35Ndozu na sese awɛ gbanda, kanda ta tɛnɛ tɛ mbi awɛ gbanda bɛ gbɔ ma.”
Bo Nzapa kɔi Ia ahĩnga ngoi mɛ gbanda sese awɛ na ni
(Mar. 13.32-37; Luk. 17.26-30,34-36)
36Yezo apa ya: “Ta zo kɔi ahĩnga gbanda bi ni, bere ngoi ni ko ma. Abɛ nga aangelo mɛ ka yayu, abɛ nga mbi Nyi Nzapa ko, ta mbi hĩnga nga ngoi ni ko ma. Bo To mbi kɔi la ahĩnga ngoi ni ko. 37Ye ko ndo asi na ngoi tɛ Noa ko, se mɛ nga na singɔ na ngoi ti gangɔ tɛ mbi Nyi Zo la. 38Na ngoi ko ndo ko, azi ndotɛ, ndonyɔ, ndoko due, bere ndoto nga aya la ti awe ka due. Ala li ndo so, ngbĩi asi na lá ko ndo Noa ali ya kota masua. 39Ala hũ ndo aye zu ka lɛ la gɛgɛrɛ, ngbĩi asi na ngoi mɛ ngu asĩ tɛkɛ tɛkɛ, amu la zu. Ko ngoi mɛ gbanda mbi Nyi Zo mbi ga na ni ko, seni nga gbanda la. 40Ko na popo tɛ akɔli sɛ mɛ gbanda ka lɛ yaka ko, aangelo amu gbanda kɔi, azia kɔi. 41Na popo tɛ awe sɛ mɛ gbanda so ndogu nzo ko, aangelo amu gbanda kɔi, azia kɔi. 42Wa ale ĩ du lɛ ĩ ngɛ̃, na lo mɛ ya, ta ĩ hĩnga bi mɛ gbanda Gbia tɛ ĩ aga na ni ma. 43Ale ĩ ma nda tɛnɛ olo kpa: se adu ya, nvɛ̃ da ahĩnga ngoi mɛ wa nzĩ na gangɔ na ni na bi ko, ale lo ngbã lɛ lo ngɛ̃, ko ale ta lo zia wa nzĩ ali ya da tɛ lo ma. 44Nda mɛ ale ĩ lɛkɛ nga tɛrɛ ĩ la, ta sanga ma, mbi Nyi Zo mbi ga gbanda na ngoi mɛ ta ĩ hĩnga ma.”
Nzɔ̃ wa kwa na siɔ wa kwa
(Luk. 12.41-48)
45Yezo apa ya: “Nzɔ̃ wa kwa mɛ lo nga wa kɔdɛ adu na? Adu wa kwa ko la gbia tɛ lo na ziangɔ lo ya, lo bata da, ko lo hɛ̃ nga tɛ hɛ̃ awa kwa mɛ ndɛ̃ na ngoi mɛ alengbi. 46Dengɔ bɛ ati na wa kwa ko la, na ngoi mɛ gbia tɛ lo aga ko, atã lo na tɛrɛ lingɔ kwa ni ko! 47Mbi pa hɛ̃ ĩ ti bɛta tɛnɛ ya, gbia ko na kpãngɔ lo ya, lo bata aye tɛ ni zu. 48Kanda se wa kwa ko adu siɔni ko, lo na pangɔ ka ya bɛ lo ya, ta gbia tɛ ni na gangɔ hiɔ ma, 49ko lo na sɔ̃ngɔ afɔ̃ lo awa kwa, lo na tɛngɔ, nyɔngɔ kana ndoni kɔi na azi mɛ kana ndogbɔ̃nɔ la, ko 50gbia tɛ lo na gangɔ na lá mɛ ta lo hĩnga ma, nga na saa mɛ ta lo kpã bɛ lo da ma. 51Lo na hɛ̃ngɔ siɔ etumbu hɛ̃ wa kwa ko, lo nga na tongɔ lo na ndo ti pɛnɔ mɛ andoto na awa poroso da. Kai ko, wa kwa ko na tongɔ to, lo nga na demangɔ tɛrɛ lo.”
Tällä hetkellä valittuna:
Matie 24: NGB87
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Ngbandi New Testament © United Bible Societies, 1987.
Matie 24
24
Yezo apa lo ti kota da Nzapa mɛ azi na karangɔ lupu lupu
(Mar. 13.1-2; Luk. 21.5-6)
1Ngoi mɛ Yezo ĩ lo ka ya kota da Nzapa ĩ si ko, ava lo anɔ ka tɔ̃nda lo, afa lo na se mɛ awa na kota da Nzapa ni. 2La Yezo apa hɛ̃ la ya: “I hũ aye ko zu. Mbi pa hɛ̃ ĩ ti bɛta tɛnɛ ya, mbanga lá kɔi gbanda ko, azi akara gbanda ni zu asa tise, ko ta le tɛ́nɛ kɔi angbã gbanda na ndo fɔ̃ lo ma.”
Asiɔ lo niɛ na singɔ uzu ti sese wɛngɔ
(Mar. 13.3-13; Luk. 21.7-19)
3Yezo ama ka ndo hɔtɔ ti Olivie, adu tise. La bo ava lo anɔ ka tɔ̃nda lo, ahũnda lo ya: “Pa hɛ̃ e, da Nzapa ni akara gbanda lá wa? Lo mɛ gbanda afa ngoi ti gangɔ tɛ mɔ, afa nga ya, ngoi ti sese wɛngɔ alengbi wɛ nɛ?”
4Yezo agbinya hɛ̃ la ya: “Ale ĩ du na kpengba lɛ, so azi ahanda ĩ. 5Ta sanga ma, azi gba aga gbanda na ili mbi, ko zo kɔi kɔi na popo tɛ la apa gbanda ya, ni Mɛsia. Ko ala handa gbanda azi gba. 6Ngoi mɛ gbanda ĩ ma pa ti to mɛ azi ndotiri so tɔ̃nda ĩ, bere pa ti to mɛ azi ndotiri ka yɔngɔrɔ ndo ko, ta ĩ du na mbɛtɔ ma. Ale alo ni ko asi, kanda ta nda sese awɛ gbanda bo na ngoi ni ko ma. 7Azi ti mbanga kɔdɔrɔ na afɔ̃ la ti kɔdɔrɔ mɛ ndɛ̃ atiri gbanda to, ambanga agbia abi gbanda to tɛrɛ afɔ̃ la. Gwɛ̃ aya nga gbanda, sese ayingi gbanda na ndo ndɛ̃ ndɛ̃ ndɛ̃. 8Alo ni ko zu adu gbanda nga ma se pɛnɔ ti gwa mɛ ndotɛ wali uzu ti lo dúngɔ nyi.
9“Ko azi aka gbanda ĩ ya, ahɛ̃ ĩ pɛnɔ, aho nga ĩ. Bɛ azi ti sese zu akɛ̃ gbanda ĩ ka ka ka na lo tɛ mbi. 10Na ngoi ko gbanda ko, azi gba azia gbanda yengɔ lo tɛ Nzapa, aɔ na ló na ili afɔ̃ la, akɛ̃ngbi ka ka ka. 11Awa pangɔ nyɔ Nzapa gba mɛ awa nvɛnɛ aga gbanda, ahanda nga azi gba. 12Azi ali gbanda siɔ ye sĩ, na lo ni ko, ta azi gba ati ayengbi gbanda ma. 13Kanda zo ko la agbe bɛ lo na ya pɛnɔ ngbĩi, akpi da ko, Nzapa aso tɔrɔ tɛrɛ lo. 14Apa gbanda Nzɔ̃ Pa ti lo Lɛngɔ Gbia tɛ Nzapa na lɛ sese zu ya, azi zu ama tɛnɛ ni uzu, wadila sese awɛ.”
Siɔ ye mɛ ndosa mbɛtɔ bɛ zo
(Mar. 13.14-23; Luk. 21.20-24)
15Yezo apa ya: “Ĩ hũ gbanda ye mɛ andoili ya: ‘Siɔ ye mɛ ndosa mbɛtɔ bɛ zo.’ Adu ye mɛ ndo Daniɛlɛ wa pangɔ nyɔ Nzapa apa tɛnɛ ni. Akpã gbanda ni na ndo mɛ santo. (Ale wa dingɔ tɛnɛ olo, ahĩnga nda ló ni ko nzɔ̃ni!) 16Na ngoi ni ko, azi mɛ ka sese ti Yudea akpɛlɛ gbanda agwe ka ndo ahɔtɔ. 17Na lá ko gbanda ko, ta zo alo gbanda ka gegi ali ya da ya, ni lɔ aye, ni kpɛ na ni ma. 18Se tɛ zo mɛ nga gbanda ka yaka la, ta lo lo gbanda ka yaka, lo diri ka ya da so ntungɔ kota bɔngɔ tɛ lo ma. 19Awe mɛ ata ngɔ, na awe mɛ ndoã aya la, ahũ gbanda pɛnɔ sĩ na ngoi ni ko! 20Ale ĩ vɔrɔ Nzapa ya, ngoi ko gbanda ĩ kpɛlɛ ko, ta adu na ngoi ti de, bere na lá ti wɔngɔ tɛrɛ ma! 21Ta sanga ma, na ngoi ko gbanda ko, pɛnɔ ni adu gbanda kpengbani, aɔ apɛnɔ zu mɛ azi ahũ. Ko ato na lá mɛ ndo Nzapa ali na sese, ngbĩi asi na lá olo ko, ta gi tɛrɛ pɛnɔ ni ko ade asi ma. Ta azi ati ahũ nga gbanda gi tɛrɛ apɛnɔ ni ko fani mɛ ndɛ̃ ma. 22Se ta adu ya, Nzapa adiri na bi ti pɛnɔ ni angbã nduruni ma ko, ale ta zo kɔi alengbi ti ngbãngɔ lɛ lo ngɛ̃ ma. Kanda lo diri ndo na bi ni angbã yakere na lo tɛ azi mɛ ndo lo sara la lo kpã ya, ala du azi tɛ ni.
23“Se mbanga zo aga gbanda so handangɔ ĩ ya, ĩ ba Mɛsia lo ge, bere lo pa ya, ĩ ba lo la kai ko, ta ĩ ye ma. 24Ta sanga ma, awa hangɔ lo tɛ Nzapa na nvɛnɛ aga gbanda, ko zo kɔi kɔi apa gbanda ya, ni Mɛsia, bere ni wa pangɔ nyɔ Nzapa. Ala li gbanda akota akukuna ye, na aye ti kpɛnɛ ya, se alengbi ko, ani handa azi mɛ Nzapa asara la akpã ya, ala du azi tɛ ni. 25Ĩ ma la! Mbi pia mbi pa ló ni hɛ̃ ĩ uzu.
26“Ko se apa hɛ̃ ĩ ya, ĩ ba lo ka bɛ ndo ko, ta ĩ nɔ kai ma. Bere se apa hɛ̃ ĩ ya, ĩ ba lo lo, bere lo lo ge ko, ta ĩ ye ma. 27Ko nga ma se ko la bekpa ndotaima nzɛrrr ka lɛ ndozu, alo ka tɔ agwe ka do ko, se nre nga gbanda mbi Nyi Zo mbi ga na ni la. 28Ndo ko gbanda kinda ase da ko, ndo mɛ nga gbanda angwalo abombi tɛrɛ la da la.”
Gangɔ tɛ Nyi Zo
(Mar. 13.24-27; Luk. 21.25-28)
29Yezo apa ya: “Gbanda hiɔ na pɛ pɛnɔ ti ngoi ni ko, ta lá ati asũ gbanda ma, ta nzɛ̃ ati asũ nga gbanda ma. Atongolo alo gbanda ka lɛ ndozu, asa ge tise, aye ti nguru mɛ ka lɛ ndozu ayingi gbanda. 30Ko aye mɛ ndofa lo tɛ mbi Nyi Zo asi gbanda ka lɛ ndozu. Aale ti lɛ sese zu adema gbanda tɛrɛ la, ala hũ gbanda mbi Nyi Zo, na gangɔ na ya da baba na nguru, nga na kota ndima. 31Kota mbana avũ gbanda, ko mbi to gbanda aangelo tɛ mbi na lɛ sese zu ya, ato ka li sese asi ka nda ni gbɔ ko, ala bombi azi tɛ mbi mɛ mbi sara la mbi kpã.”
Nda niatɔ ti kɛkɛ mɛ ili ni la figie
(Mar. 13.28-31; Luk. 21.29-33)
32Yezo apa ya: “Ĩ ma tɛnɛ mɛ mbi na tɛnɛngɔ na ndo kɛkɛ figie, ko ale ĩ hĩnga ni lo mɛ: ngoi mɛ angbina kugbe ni adara tise, ko afana kugbe ato nda tɔ̃ngɔ ko, ĩ ndohĩnga ya, zongo adoli ti singɔ. 33Se gangɔ tɛ mbi nga la. Ngoi mɛ gbanda ĩ hũ aye ko zu mɛ mbi pa lo ni hɛ̃ ĩ ato nda singɔ ko, ale ĩ hĩnga ya, mbi doli ti gangɔ. Mbi lo na tɔ̃ nyɔ ngise. 34Mbi pa hɛ̃ ĩ ti bɛta tɛnɛ ya, azi ko la ade lɛ la ngɛ̃ na olo ko, ta ala zu akpili gbanda uzu, wa aye ni ko zu asi ma. 35Ndozu na sese awɛ gbanda, kanda ta tɛnɛ tɛ mbi awɛ gbanda bɛ gbɔ ma.”
Bo Nzapa kɔi Ia ahĩnga ngoi mɛ gbanda sese awɛ na ni
(Mar. 13.32-37; Luk. 17.26-30,34-36)
36Yezo apa ya: “Ta zo kɔi ahĩnga gbanda bi ni, bere ngoi ni ko ma. Abɛ nga aangelo mɛ ka yayu, abɛ nga mbi Nyi Nzapa ko, ta mbi hĩnga nga ngoi ni ko ma. Bo To mbi kɔi la ahĩnga ngoi ni ko. 37Ye ko ndo asi na ngoi tɛ Noa ko, se mɛ nga na singɔ na ngoi ti gangɔ tɛ mbi Nyi Zo la. 38Na ngoi ko ndo ko, azi ndotɛ, ndonyɔ, ndoko due, bere ndoto nga aya la ti awe ka due. Ala li ndo so, ngbĩi asi na lá ko ndo Noa ali ya kota masua. 39Ala hũ ndo aye zu ka lɛ la gɛgɛrɛ, ngbĩi asi na ngoi mɛ ngu asĩ tɛkɛ tɛkɛ, amu la zu. Ko ngoi mɛ gbanda mbi Nyi Zo mbi ga na ni ko, seni nga gbanda la. 40Ko na popo tɛ akɔli sɛ mɛ gbanda ka lɛ yaka ko, aangelo amu gbanda kɔi, azia kɔi. 41Na popo tɛ awe sɛ mɛ gbanda so ndogu nzo ko, aangelo amu gbanda kɔi, azia kɔi. 42Wa ale ĩ du lɛ ĩ ngɛ̃, na lo mɛ ya, ta ĩ hĩnga bi mɛ gbanda Gbia tɛ ĩ aga na ni ma. 43Ale ĩ ma nda tɛnɛ olo kpa: se adu ya, nvɛ̃ da ahĩnga ngoi mɛ wa nzĩ na gangɔ na ni na bi ko, ale lo ngbã lɛ lo ngɛ̃, ko ale ta lo zia wa nzĩ ali ya da tɛ lo ma. 44Nda mɛ ale ĩ lɛkɛ nga tɛrɛ ĩ la, ta sanga ma, mbi Nyi Zo mbi ga gbanda na ngoi mɛ ta ĩ hĩnga ma.”
Nzɔ̃ wa kwa na siɔ wa kwa
(Luk. 12.41-48)
45Yezo apa ya: “Nzɔ̃ wa kwa mɛ lo nga wa kɔdɛ adu na? Adu wa kwa ko la gbia tɛ lo na ziangɔ lo ya, lo bata da, ko lo hɛ̃ nga tɛ hɛ̃ awa kwa mɛ ndɛ̃ na ngoi mɛ alengbi. 46Dengɔ bɛ ati na wa kwa ko la, na ngoi mɛ gbia tɛ lo aga ko, atã lo na tɛrɛ lingɔ kwa ni ko! 47Mbi pa hɛ̃ ĩ ti bɛta tɛnɛ ya, gbia ko na kpãngɔ lo ya, lo bata aye tɛ ni zu. 48Kanda se wa kwa ko adu siɔni ko, lo na pangɔ ka ya bɛ lo ya, ta gbia tɛ ni na gangɔ hiɔ ma, 49ko lo na sɔ̃ngɔ afɔ̃ lo awa kwa, lo na tɛngɔ, nyɔngɔ kana ndoni kɔi na azi mɛ kana ndogbɔ̃nɔ la, ko 50gbia tɛ lo na gangɔ na lá mɛ ta lo hĩnga ma, nga na saa mɛ ta lo kpã bɛ lo da ma. 51Lo na hɛ̃ngɔ siɔ etumbu hɛ̃ wa kwa ko, lo nga na tongɔ lo na ndo ti pɛnɔ mɛ andoto na awa poroso da. Kai ko, wa kwa ko na tongɔ to, lo nga na demangɔ tɛrɛ lo.”
Tällä hetkellä valittuna:
:
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Ngbandi New Testament © United Bible Societies, 1987.