Gyenesise 34
34
Sɛkem to Dina mmɔnaa
1Ɛlɛho bie, Lea ne Yakob bɛ wa brasua bɔ bɛfrɛ ye Dina ne, ofitele kyɛ ɔkwaapasa aseɛ ne aso mmrasua nemɔ anwo. 2Hiwiniɛ Hamɔ bɔ ɔte aseɛ ne aso hene ne, ɔwa Sɛkem nwuni Dina, na ɔhyɛle ye ɔne ye bɛlale. 3Na Sɛkem nye gyele Yakob awa brasua Dina nwo, ohurole taluwa ne, na ɔkorɔkorɔle ye. 4Yiti Sɛkem sele ɔse Hamɔ kyɛ, “Kogya taluwa ye ma me.” 5Yakob tele kyɛ Sɛkem ato ɔwa brasua Dina mmɔnaa, nakoso ɔnate kyɛ né ye mma mmienzua nemɔ bafa nandwie bahɔ adidie wɔ eburo ne ati, ɔyɛle konn kɔpem kyɛ besa bɛwale awuro ɔ. 6Na Sɛkem baba Hamɔ hɔle Yakob berɛ kyɛ ɔne ye bɛkwaali ngɔmɔ. 7Yakob mma mmienzua nemɔ tele bɔ wasi ne, befili eburo dɔ bɛwale. Ɔyɛle bɛ yea, na bɛfɛle yaa paa ofikyɛ Sɛkem ali ngwaseasɛm wɔ Yisrael; wayɔ bɔ bɛnyɔ ɔ, kyɛ ɔne Yakob awa brasua ala ɔ.
8Nakoso Hamɔ sele bɛ kyɛ, “Mma Sɛkem kuro ɛmɔ awa brasua ne. Mesrɛ ɛmɔ, ɛ́mɔfa ye bɛma ogya. 9Ɛ́mɔma yɛ́gyigya yɛ nwo; ɛ́mɔfa ɛmɔ mma mmrasua bɛ́ma yɛ́gya, na ɛmɔ koso ɛ́mɔgyigya yɛ deɛ mɔ. 10Ɛmɔ ne yɛ bɛ́tena, na aseɛ yeɛ ɔla berɛ ye, ɛ́mɔtena so na ɛ́mɔyɔ so adwuma, na ɛ́mɔnya so agyapadeɛ.” 11Sɛkem toale so sele Dina baba ne Dina aliɛma mmienzua nemɔ kyɛ, “Ɛ́mɔpene so bɛ́ma me, na bɔ ɛmɔpena biala ngɔfa ngɔma ɛmɔ. 12Ɛ́mɔma nwu agyaa ne nwo nningyein ne akyɛdeɛ biala bɔ ɛmɔpena ɔ, na ngɔma kyɛbɔ ɛmɔkɔha kohyire me biala; bɔ mepena ala ole kyɛ ɛ́mɔfa taluwa ne bɛma ngya ye.”
13Ɔnate kyɛ Sɛkem ato Dina mmɔnaa ne ati, Yakob mma mmienzua nemɔ buale Sɛkem ne ɔse Hamɔ wɔ nnakannaka atee so. 14Bebuale bɛ kyɛ, “Yɛyɔ ye sɔ a ɔngɔyɛ yee! Ɔte animguaseɛ ma yɛ kyɛ yɛkɔfa y’eliɛma brasua yɛkɔma sona bɔ ɔppɛle ye bienzua ɔ. 15Nikyee komapɛ yeɛ ɔkɔmaa yɛkɔpene ɔ: kyɛ ɛmɔ anu biala kɔpɛ ye bienzua na ɛmɔayɛ kyɛ yɛ ala ɔ. 16Sɛ ɛmɔyɔ sɔ de a, yɛkɔfa yɛ mma mmrasua yɛkɔma ɛmɔ agyaa, na yɛ koso yagyigya ɛmɔ mma mmrasua, na yɛ ne ɛmɔ atena, na yayɛ mmenia ko. 17Na sɛ ɛmɔngɔpene maa bɛngɔpɛ ɛmɔ bienzua de a, ye de yɛfa yɛ wa brasua ne, na yɛkɔ.”
18Bɛ dwirɛ ne yɛle Hamɔ ne ɔwa Sɛkem fɛ. 19Na ɔnate kyɛ né aberandeɛ Sɛkem nye gye Yakob awa brasua ne nwo ne ati, wanyɛ bɛ nzusuleɛ ne nwo ngyɛkyerɛ koraa. Né Sɛkem yeɛ ɔte titire paa wɔ ye abusua nu ɔ. 20Yiti Hamɔ ne ɔwa Sɛkem bɛhɔle bɛ kuro n’anoa nu dɔ, na besele kuro berɛ mmienzua ne kyɛ, 21“Sɔ mmenia ye mɔ, bɛ ne yɛ te asomdwee nu, yiti ɛ́mɔma bɛ́tena aseɛ ye aso na beli bɛ dwaa. Aseɛ ne la berɛ pralalala ma bɛ, yiti ɛ́mɔma yɛ́gyigya bɛ mma mmrasua, na yɛ koso yɛfa yɛ deɛ mɔ yɛma begya. 22Nakoso nikyee komapɛ yeɛ sɛ yɛyɔ a mmenia nemɔ kɔpene so na bɛ ne yɛ atena maa yayɛ mmenia ko ɔ: kyɛ yɛ nu biala kɔmaa bɛkɔpɛ ye bienzua kyɛbɔ bapɛ bɛ deɛ ne ɔ. 23Aso bɛ nandwie, b’agyapadeɛ ne bɛ nyɛmmoa mukoraa ngɔyɛ yɛ deɛ? Ɛmɔ de ɛ́mɔma yɛne bɛ yɛyɛ adwene, na bɛ ne yɛ kɔtena.” 24Na bɛ bɔ beeyiale kuro n’anoa nu amukoraa tiele bɔ Hamɔ ne ɔwa Sɛkem hane ne. Yiti mmienzua ne amukoraa, bɔ beeyiale kuro n’anoa nu berɛ ne, bɛpepɛle bɛ bienzua.
25Ye ɛlɛsa ne aso bɔ bɛ kena ne tutu bɛ nen, Yakob mma nemɔ anu nyɔ bɔ beli Simeon ne Lewi, bɔ bɛte Dina aliɛma mmienzua ne, bɛhwehwene bɛ ngrandɛ. Bɛhɔle kuro ne aso mvum nu, na behuhuni mmienzua ne amukoraati. 26Bele ngrandɛ behuni Hamɔ ne ɔwa Sɛkem, na bɛɛyele Dina befili Sɛkem awuro bɛhɔle. 27Yakob mma mmienzua nemɔ fitele awufoɛ nemɔ aso ne, bɛfene kuro ne anu nningyein, ofikyɛ Sɛkem agua b’eliɛma brasua ne anwo fiɛ. 28Bɛsesale bɛ mmoaen ne bɛ nandwie ne b’afunum mɔ, ɔne nikyee biala bɔ ɔwɔ kuro ne fieso ɔ. 29Bɛsesale b’awuro nningyein amukoraa, bɛhyele bɛ mma ne bɛ ye mɔ amukoraa nnure, na bɛsesale b’anwonyadeɛ amukoraati. 30Na Yakob sele Simeon ne Lewi kyɛ, “Ɛmɔahwe edwirɛ piri babrɛ me. Ɛmɔamaa manya ɛpɔen wɔ bɛ bɔ bɛte aseɛ ye asofoɛ ne Kanaanfoɛ ne Perisifoɛ bɛ sa nu. Me nwo mmenia anzo. Na sɛ bɛyɛ ko na bɛboaboa bɛ noa bedwɔso betia me a, bekonua me ne m’awuro ama mukoraa bo.” 31Nakoso bebuale kyɛ, “Né yiti yɛtena berɛ ma ɔyɛ y’eliɛma brasua ne kyɛ gyanderaniɛ anaa?”
Tällä hetkellä valittuna:
Gyenesise 34: EBP
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Esahie Bible © Bible Society of Ghana, 2018.
Gyenesise 34
34
Sɛkem to Dina mmɔnaa
1Ɛlɛho bie, Lea ne Yakob bɛ wa brasua bɔ bɛfrɛ ye Dina ne, ofitele kyɛ ɔkwaapasa aseɛ ne aso mmrasua nemɔ anwo. 2Hiwiniɛ Hamɔ bɔ ɔte aseɛ ne aso hene ne, ɔwa Sɛkem nwuni Dina, na ɔhyɛle ye ɔne ye bɛlale. 3Na Sɛkem nye gyele Yakob awa brasua Dina nwo, ohurole taluwa ne, na ɔkorɔkorɔle ye. 4Yiti Sɛkem sele ɔse Hamɔ kyɛ, “Kogya taluwa ye ma me.” 5Yakob tele kyɛ Sɛkem ato ɔwa brasua Dina mmɔnaa, nakoso ɔnate kyɛ né ye mma mmienzua nemɔ bafa nandwie bahɔ adidie wɔ eburo ne ati, ɔyɛle konn kɔpem kyɛ besa bɛwale awuro ɔ. 6Na Sɛkem baba Hamɔ hɔle Yakob berɛ kyɛ ɔne ye bɛkwaali ngɔmɔ. 7Yakob mma mmienzua nemɔ tele bɔ wasi ne, befili eburo dɔ bɛwale. Ɔyɛle bɛ yea, na bɛfɛle yaa paa ofikyɛ Sɛkem ali ngwaseasɛm wɔ Yisrael; wayɔ bɔ bɛnyɔ ɔ, kyɛ ɔne Yakob awa brasua ala ɔ.
8Nakoso Hamɔ sele bɛ kyɛ, “Mma Sɛkem kuro ɛmɔ awa brasua ne. Mesrɛ ɛmɔ, ɛ́mɔfa ye bɛma ogya. 9Ɛ́mɔma yɛ́gyigya yɛ nwo; ɛ́mɔfa ɛmɔ mma mmrasua bɛ́ma yɛ́gya, na ɛmɔ koso ɛ́mɔgyigya yɛ deɛ mɔ. 10Ɛmɔ ne yɛ bɛ́tena, na aseɛ yeɛ ɔla berɛ ye, ɛ́mɔtena so na ɛ́mɔyɔ so adwuma, na ɛ́mɔnya so agyapadeɛ.” 11Sɛkem toale so sele Dina baba ne Dina aliɛma mmienzua nemɔ kyɛ, “Ɛ́mɔpene so bɛ́ma me, na bɔ ɛmɔpena biala ngɔfa ngɔma ɛmɔ. 12Ɛ́mɔma nwu agyaa ne nwo nningyein ne akyɛdeɛ biala bɔ ɛmɔpena ɔ, na ngɔma kyɛbɔ ɛmɔkɔha kohyire me biala; bɔ mepena ala ole kyɛ ɛ́mɔfa taluwa ne bɛma ngya ye.”
13Ɔnate kyɛ Sɛkem ato Dina mmɔnaa ne ati, Yakob mma mmienzua nemɔ buale Sɛkem ne ɔse Hamɔ wɔ nnakannaka atee so. 14Bebuale bɛ kyɛ, “Yɛyɔ ye sɔ a ɔngɔyɛ yee! Ɔte animguaseɛ ma yɛ kyɛ yɛkɔfa y’eliɛma brasua yɛkɔma sona bɔ ɔppɛle ye bienzua ɔ. 15Nikyee komapɛ yeɛ ɔkɔmaa yɛkɔpene ɔ: kyɛ ɛmɔ anu biala kɔpɛ ye bienzua na ɛmɔayɛ kyɛ yɛ ala ɔ. 16Sɛ ɛmɔyɔ sɔ de a, yɛkɔfa yɛ mma mmrasua yɛkɔma ɛmɔ agyaa, na yɛ koso yagyigya ɛmɔ mma mmrasua, na yɛ ne ɛmɔ atena, na yayɛ mmenia ko. 17Na sɛ ɛmɔngɔpene maa bɛngɔpɛ ɛmɔ bienzua de a, ye de yɛfa yɛ wa brasua ne, na yɛkɔ.”
18Bɛ dwirɛ ne yɛle Hamɔ ne ɔwa Sɛkem fɛ. 19Na ɔnate kyɛ né aberandeɛ Sɛkem nye gye Yakob awa brasua ne nwo ne ati, wanyɛ bɛ nzusuleɛ ne nwo ngyɛkyerɛ koraa. Né Sɛkem yeɛ ɔte titire paa wɔ ye abusua nu ɔ. 20Yiti Hamɔ ne ɔwa Sɛkem bɛhɔle bɛ kuro n’anoa nu dɔ, na besele kuro berɛ mmienzua ne kyɛ, 21“Sɔ mmenia ye mɔ, bɛ ne yɛ te asomdwee nu, yiti ɛ́mɔma bɛ́tena aseɛ ye aso na beli bɛ dwaa. Aseɛ ne la berɛ pralalala ma bɛ, yiti ɛ́mɔma yɛ́gyigya bɛ mma mmrasua, na yɛ koso yɛfa yɛ deɛ mɔ yɛma begya. 22Nakoso nikyee komapɛ yeɛ sɛ yɛyɔ a mmenia nemɔ kɔpene so na bɛ ne yɛ atena maa yayɛ mmenia ko ɔ: kyɛ yɛ nu biala kɔmaa bɛkɔpɛ ye bienzua kyɛbɔ bapɛ bɛ deɛ ne ɔ. 23Aso bɛ nandwie, b’agyapadeɛ ne bɛ nyɛmmoa mukoraa ngɔyɛ yɛ deɛ? Ɛmɔ de ɛ́mɔma yɛne bɛ yɛyɛ adwene, na bɛ ne yɛ kɔtena.” 24Na bɛ bɔ beeyiale kuro n’anoa nu amukoraa tiele bɔ Hamɔ ne ɔwa Sɛkem hane ne. Yiti mmienzua ne amukoraa, bɔ beeyiale kuro n’anoa nu berɛ ne, bɛpepɛle bɛ bienzua.
25Ye ɛlɛsa ne aso bɔ bɛ kena ne tutu bɛ nen, Yakob mma nemɔ anu nyɔ bɔ beli Simeon ne Lewi, bɔ bɛte Dina aliɛma mmienzua ne, bɛhwehwene bɛ ngrandɛ. Bɛhɔle kuro ne aso mvum nu, na behuhuni mmienzua ne amukoraati. 26Bele ngrandɛ behuni Hamɔ ne ɔwa Sɛkem, na bɛɛyele Dina befili Sɛkem awuro bɛhɔle. 27Yakob mma mmienzua nemɔ fitele awufoɛ nemɔ aso ne, bɛfene kuro ne anu nningyein, ofikyɛ Sɛkem agua b’eliɛma brasua ne anwo fiɛ. 28Bɛsesale bɛ mmoaen ne bɛ nandwie ne b’afunum mɔ, ɔne nikyee biala bɔ ɔwɔ kuro ne fieso ɔ. 29Bɛsesale b’awuro nningyein amukoraa, bɛhyele bɛ mma ne bɛ ye mɔ amukoraa nnure, na bɛsesale b’anwonyadeɛ amukoraati. 30Na Yakob sele Simeon ne Lewi kyɛ, “Ɛmɔahwe edwirɛ piri babrɛ me. Ɛmɔamaa manya ɛpɔen wɔ bɛ bɔ bɛte aseɛ ye asofoɛ ne Kanaanfoɛ ne Perisifoɛ bɛ sa nu. Me nwo mmenia anzo. Na sɛ bɛyɛ ko na bɛboaboa bɛ noa bedwɔso betia me a, bekonua me ne m’awuro ama mukoraa bo.” 31Nakoso bebuale kyɛ, “Né yiti yɛtena berɛ ma ɔyɛ y’eliɛma brasua ne kyɛ gyanderaniɛ anaa?”
Tällä hetkellä valittuna:
:
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Esahie Bible © Bible Society of Ghana, 2018.