Joni 2
2
Zya pobwe lyabwiinga ku Kana
1Nikwakainda mazuba obilo kwakali pobwe lyabwiinga mumunzi wa Kana uuli mucisi ca Galilii, banyina Jesu bakaliko. 2Awalo Jesu abasikwiiya bakwe bakalitambidwe kupobwe eelyo. 3Lino waini naakamana, banyina Jesu bakamwaambila kuti, “Waini wabamanina.” 4Jesu wakati kuli banyina, “Kuliswe, ino ncite buti mebo? Ciindi cangu tacinasika pe.” 5Nikuba boobo banyina bakaambila basimilimo bapobwe kuti, “Zyoonse nzyatimwaambile mucite.”
6Lino aawo kwakali matalo aamabwe aali cisambomwe aakali aakusambila mbubonya mbuli ciyanza ca Bajuda cakulisalazya. Talo lyomwe-lyomwe lyakali kubikkwa maanzi aazula nongo zyosanwe. 7Jesu wakaambila basimilimo kuti, “Amuzuzye matalo aaya amaanzi.” Bakaazuzya oonse mpamu-mpamu. 8Jesu wakati, “Amuteke ono, mutole kuli simwaaba kulya.” Bakateka akutola. 9Naakaalabila maanzi akasandulwa waini, taakaziba kuti waini wazwa kuli. (Pele babelesi bakateka maanzi bakalizi.) Mpawo wakaita sibwiinga 10akumwaambila kuti, “Bantu balasaanguna kunywa waini mubotu, bamana nkokunywa waini uuli mbuubede. Ono yebo waliyobwede waini mubotu kusikila kumamanino.”
11Eeci ncecitondezyo cakusaanguna Jesu ncaakacita ku Kana ku Galilii, wakatondezya nguzu zyabulemu bwakwe, aboobo basikwiiya bakamusyoma.
12Kumane Jesu, banyina, banabokwabo, abasikwiiya bakwe bakaya ku Kapenaumu. Ooko bakaakukkala mazuba masyoonto buyo.
Jesu mbwaakatanda bakali kuuzya muŋanda ya Leza
(Mateyo 21.12-13; Maako 11.15-17; Luka 19.45-46)
13Pobwe lya Kwiindilila lya Bajuda lyakali afwiifwi ciindi eeco, aboobo Jesu wakainka ku Jelusalemu. 14Muŋanda ya Leza wakajana bantu bamwi kabasambala basune, mbelele, ankwilimba. Bamwi bakali kucincana mali. 15Mpoonya wakoosa nswepu yaloozi akubatandila anze boonse, antoomwe abasune ambelele zyabo. Wakamwaya mali abasikucincana, akutingamuna matebule. 16Wakaambila baabo bakali kuuzya nkwilimba wakati, “Amuzigwisye! Ŋanda ya Taata tiili cisambalilo!” 17Basikwiiya bakwe bakayeeya malembe aamba kuti, “Busungu bwakuyandisya ŋanda yako O Leza, bwandimana mubili.”
18Lino bapati ba Bajuda bakamubuzya kuti, “Ncinzi ncokonzya kututondezya cakutuzibya kuti uleelede kucita boobu?” 19Jesu wakabaingula kuti, “Amwiimwaye ŋanda ya Leza, mebo ndiiyaka mumazuba otatwe buyo.” 20Bajuda bakati kulinguwe, “Cakatutolela myaka iili makumi one acisambomwe kuyaka ŋanda eeyi, ino yebo ulakonzya buti kwiiyakulula mumazuba otatwe?” 21Pele wakali kwaamba mubili wakwe naakaamba ŋanda ya Leza. 22Naakabuka kuzwa kubafu, basikwiiya bakwe bakayeeya kuti ani ncencico eeci ncaakali kwaamba. Bakaasyoma Malembe oonse akuzumina majwi aakaamba Jesu.
Jesu uuliizi myoyo yabantu boonse mbwiibede
23Ciindi Jesu naakali mu Jelusalemu, nikwakali Pobwe lya Kwiindilila, bantu banji-banji bakamusyoma nibakabona zitondezyo zyanguzu nzyaakacita. 24Nikuba boobo Jesu taakwe naakabasyoma bantu aabo, nkaambo wakalibuzi buumi bwabo. 25Alimwi taakali kuyanda kwiisigwa zyabukkale bwabantu amuntu naba omwe, nkaambo mwini wakalizi zyakali mumyoyo yabantu.
Tällä hetkellä valittuna:
Joni 2: Tonga96
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Tonga Bible © United Bible Societies, 1994.
